“Koj Puas Hlub Kuv?”
Ib yam li ntawd, yog tias peb xav qhia peb txoj kev hlub rau Vajtswv, peb yuav tsum to taub saib Nws ua li cas thiaj paub tias peb hlub Nws.
Nyob hauv zaj lus piv txwv txog tus tub ua txhaum, thaum xub thawj tus tij laug tsis tshua zoo siab txog qhov uas nws tus kwv rov qab los txog tsev tom qab uas nws xaiv yuam kev ua txhaum thiab “nkim nws tej qub txeeg qub teg ua loj leeb.” Qhov uas tus tij laug muab hlob thiab xav tias nws ncaj ncees dua ua rau nws tsis xyiv fab vim yog nws tus kwv rov qab los hloov siab lees txim. Tej zaum peb kuj tsis muab lub cib fim qhia cov neeg uas peb hlub, txawm yog siv lus los sis ua tej yam rau lawv, hais tias peb hlub lawv.
Yeej muaj tej yam ntxwv hauv cov vaj lug kub hais txog tej kev hlub uas muab thiab txais yuav: Naomi thiab Ruth, Amoos thiab Vaj Ntxwv Laumaunais, tus tub ua txhaum thiab nws txiv, tus Cawm Seej thiab Nws cov thwj tim.
Thaum hlub lwm tus neeg thiab lawv txais txoj kev hlub ntawd, es txoj kev hlub no yeej loj hlob tuaj ntawm tus neeg hlub thiab tus neeg txais txoj kev hlub ntawd.
Vajtswv txoj kev hlub zoo tag nrho, nyob mus ib txhis li, thiab kav ib txhis li, thiab “qab zib tshaj plaws.” Cov txiv ntawd ua rau sab ntsuj plig “muaj kev xyiv fab loj heev.” Txawm yog li ntawd los, qee zaum peb yuav tsis paub nrhiav tau Vajtswv txoj kev hlub hauv peb lub neej. Txawm yog li ntawd los, peb Leej Txiv Saum Ntuj Ceeb Tsheej xav xav kom peb txais Nws txoj kev hlub ces Nws “hais lus rau [peb] raws li … [peb txoj kev] to taub.” Vajtswv yuav qhia Nws txoj kev hlub rau peb raws li peb, txhua tus, pom tau. Peb hnov tau Vajtswv txoj kev hlub rau peb thaum peb saib tej yam zoo nkauj ib ncig ntawm peb, los sis txais lus teb rau peb tej kev thov Vajtswv, los sis thaum muaj tej kev xav zoo tam sid thaum xav tau, los sis muaj tej lub sij hawm uas xyiv fab heev. Qhov uas qhia tias Vajtswv hlub peb ntau tshaj plaws yog thaum Nws cia Nws Tib Leeg Tub muab Nws tus Kheej txi ua tus theej txhoj.
Ib yam li tus tub ua txhaum tus tij laug, feem ntau peb tsom ntsoov peb tus kheej. Peb rau rau siab nrhiav kom tau puav pheej tias Vajtswv hlub peb thiab peb tsis txaus siab thaum tsis pom. Tiam sis qhov txawv txav yog thaum peb yim tsom ntsoov qhov uas peb qhia peb txoj kev hlub rau Vajtswv, peb yim yuav pom tau Nws txoj kev hlub rau peb. Tej zaum yog vim li no tus Cawm Seej teb lo lus nug “Vajtswv txoj kev cai nqe twg yog nqe uas tseem ceeb dua ntais huv tib si?” caw sawv daws li no hais tias: “Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv kawg nej lub dag lub zog.”
Qee zaum thaum peb qhia peb txoj kev hlub rau lawv cov uas peb hlub tshaj plaws, lawv yuav tsis pom tias peb hlub lawv. Li no tej zaum ua rau tus hlub thiab tus txais kev hlub ntxhov siab. Tej zaum yuav pab yog tias peb nug cov uas peb hlub ntawd saib lawv nyiam dab tsi thiaj qhia lawv tias peb hlub lawv. Ib yam li ntawd, yog tias peb xav qhia peb txoj kev hlub rau Vajtswv, peb yuav tsum to taub saib Nws ua li cas thiaj paub tias peb hlub Nws. Qhov zoo, Vajtswv tau sau cov ntsiab tseem ceeb hauv cov vaj lug kub uas qhia peb saib peb yuav tsum ua li cas.
Koj Hlub Kuv Tshaj Lawv cov No Los?
Thaum Petus thiab tus Tswv uas sawv rov los lawm sib tham rau ntawm tus Dej hiav txwv Tiberias, peb kawm tau peb yuav ua tau li cas kom thiaj qhia tus Tswv tias peb hlub Nws.
“Yexus hais rau Ximoos Petus, Ximoos, Yaunas tus tub, koj hlub kuv tshaj lawv cov no los? Petus teb nws hais tias, Tus Tswv; koj yeej paub tias kuv hlub koj.”
Lo lus nug tseem ceeb hauv tus Tswv lo lus nug ntawd yog “Koj hlub kuv tshaj lawv cov no los?” Peb qhia peb txoj kev hlub rau tus Tswv thaum peb saib Nws siab dua “cov no,” thiab “cov no” yog ib tug neeg twg, ib yam ntxim saib ntxim ua twg, los yog ib yam twg uas ua rau Nws tsis tseem ceeb tshaj plaws rau peb lub neej.
Yeej tsis muaj sij hawm txaus hauv ib hnub, ib lis tiam, ib lub hli, los sis ib xyoos kom ua tiav tag nrho peb xav ua los sis yuav tsum ua. Ib feem ntawm txoj kev sim siab hauv lub neej no yog kom siv sij hawm ua tej yam tseem ceeb tshaj plaws rau peb mus ib txhis li thiab tso tej yam uas tsis tseem ceeb npaud tseg.
Thawj Tswj Hwm Russell M. Nelson hais tias: “Lo lus nug rau peb txhua tus … zoo ib yam. … Nej puas txaus siab cia Vajtswv ua tus tseem ceeb tshaj plaws hauv nej lub neej? Nej puas yuav cia Nws cov lus, Nws cov lus txib, thiab Nws tej kev khi lus hloov tej yam nej ua txhua hnub? Nej puas yuav cia Nws lub suab nrov dua li lwm lub suab? Nej puas txaus siab ua tej yam twg uas Nws xav kom ne ua ua ntej nej ua lwm yam? Nej puas txaus siab cia nej lub siab nyiam ywj rau Nws li?” Peb qhia peb txoj kev ua thwj tim thiab txoj kev hlub rau Vajtswv thaum peb saib Nws ua tseem ceeb tshaj plaws.
Cia li Yug Kuv Pab Yaj
Nyob hauv nqe vaj lug kub tom ntej tseem yog Petus thiab tus Cawm Seej sib tham, es peb kawm lwm txoj kev uas tus Tswv paub tias peb hlub Nws: “[Tus Tswv] hais dua ib zaug ntxiv rau nws hais tias, Ximoos, Yaunas tus tub, koj puas hlub kuv? Petus teb nws hais tias, Tus Tswv; koj yeej paub tias kuv hlub koj. Yexus teb hais tias, Cia li yug kuv pab yaj.”
Peb qhia tias peb hlub Leej Txiv Saum Ntuj Ceeb Tsheej thaum peb ua hauj lwm pab, mloog rau, txhawb nqa, los sis qhia Nws cov me nyuam. Txoj kev pab ntawd tej zaum yooj yim npaum li qhov uas pom lwm tus neeg es tsis txiav txim rau lawv. Nyob hauv tshooj 76 ntawm Lus Qhuab Qhia thiab Kev Khi Lus, peb pom tau saib cov uas yuav txais lub nceeg vaj xilethi-aus tus xeeb ceem zoo li cas: “Lawv pom ib yam li Vajtswv pom lawv, thiab paub ib yam li Vajtswv paub lawv.” Lawv pom lwm tus neeg ib yam li Vajtswv pom lawv, thiab Nws pom lawv raws li lawv rais los mus tau, yeeb koob saum ntuj ceeb tsheej.
Tom qab kuv mus ua tub txib rov qab los, kuv rov qab txiav nyom li qub kom tau nyiaj. Kuv kuj tsis khoom kiag li vim yog kuv tseem tab tom kawm ntawv. Thaum lub caij nplooj ntoos hlav, ntuj los nag ntau thiab tab tom kuv yuav tsum xeem ntawv thiab ces kuv poob qab tsis txiav nyom li yuav tsum ua.
Tom qab ob peb hnub, ntuj kaj, thiab kuv npaj siab yuav mus txiav nyom tom qab kuv lawb ntawv. Tiam sis thaum kuv los txog tsev, kuv lub truck thiab cov tshuab khoom pawv tas. Kuv cia li mus rau tej qho chaw uas kuv teem txiav nyom ib lub tsev zuj zus mus; txhua lub yoj twb tu tau zoo nkauj lawm. Nyob ntawm lub yoj kawg, kuv pom kuv tus kwv thawb lub tshuab txiav nyom. Nws pom kuv, luag nyav, thiab co tes rau kuv. Kuv zoo siab ris nws txiaj, kuv khawm nws thiab ua nws tsaug. Qhov uas kuv tus kwv pab kuv ntxiv dag zog rau qhov uas kuv hlub nws thiab muab siab npuab nws. Thaum peb ib leeg pab ib leeg ua li ntawd peb thiaj qhia Vajtswv thiab Nws Leej Tub hais tias peb hlub nkawd.
Lees Txhua Yam uas Nws Txhais Tes Tau Ua
Peb kuj qhia peb txoj kev hlub rau Vajtswv thaum peb ris Nws txiaj. Tus Tswv hais tias, “Neeg yeej tsis ua txhaum Vajtswv ib yam dab tsi li, … tsuas yog rau cov neeg uas tsis lees txhua yam uas nws txhais tes tau ua.” Peb qhia Vajtswv tias peb hlub Nws thaum peb lees paub hais tias Nws yog lub hauv paus rau txhua yam zoo hauv peb lub neej.
Thaum lub sij hawm uas kuv thiab kuv tus khub ua hauj lwm pib ua ib lub lag luam tshiab thaum ntxov, wb yuav rau siab thov Vajtswv ua ntej tej rooj sab laj tseem ceeb heev, es thov Leej Txiv Saum Ntuj Ceeb Tsheej pab. Txhua lub sij hawm, Vajtswv teb wb cov lus thov, thiab peb tej rooj sab laj mus zoo. Tom qab ib lub rooj sab laj, kuv tus khub ua hauj lwm hais tias wb raws maj thov kom tau kev pab tiam sis tsis rawm maj ua Vajtswv tsaug. Txij thaum ntawd los, wb thov Vajtswv thiab ua Nws tsaug, es lees paub hais tias twb yog tus Tswv pab wb ua txhua yam. Peb sawv daws qhia peb txoj kev hlub rau Vajtswv thaum peb muaj “tus xeeb ceem ua Vajtswv tsaug.”
Yog Nej Hlub Kuv, Ua Raws Li Kuv tej Lus Txib
Muaj dua ib txoj kev qhia peb txoj kev hlub rau Leej Txiv Saum Ntuj Ceeb Tsheej thiab Nws Leej Tub uas Nws Hlub yog txiav txim siab tias yuav ua raws li Nkawd hais. Tus Cawm Seej hais tias, “Yog tias nej hlub kuv, ua raws li kuv tej lus txib.” Txoj kev ua raws li tej kev txib no tsis yog peb lam tau lam ua yam dig muag li los sis tsis yog leej twg yuam tiam sis yog peb txoj kev hlub Vajtswv coj peb mus ua. Leej Txiv Saum Ntuj Ceeb Tsheej xav kom peb muaj lub siab xav mloog lus. Muam Tamara W. Runia hu qhov kev mloog lus no ua “kev mloog lus vim yog hlub.” Nws hais tias, “Txawm tias peb yeej tsis mloog lus zoo tag nrho los, peb sim ua raws li tej kev txib vim yog kev hlub tam sim no, txiav txim siab nyob twj ywm, nrog Nws, vim peb hlub Nws.”
Leej Txiv Saum Ntuj Ceeb Tsheej muab kev ywj siab xav rau peb kom thiaj yaum kom peb muaj lub siab xav xaiv Nws. Nws txoj hauj lwm thiab lub yeeb koob tsis yog ua kom peb tau txoj sia nyob mus ib txhis xwb tiam sis kuj suav qhov uas Nws cia siab tias peb txoj kev ntshaw loj tshaj plaws yog rov qab mus cuag Nws. Txawm yog li ntawd los, Nws yeej yuav tsis yuam kom peb mloog lus. Hauv zaj nkauj “Know This, That Every Soul Is Free,” peb hu nkauj hais tias:
Thaum wb ua thawj coj rau ib qho chaw qhia txoj moo zoo, kuv poj niam, Christina, thiab kuv zoo siab heev thaum cov tub txib feem coob xaiv ua raws li tej kev txib, tsis yog vim yog txoj kev cai xwb tiam sis kuj vim yog lawv xav qhia tus Tswv hais tias lawv hlub Nws thaum lawv sawv cev tam Nws.
Txwj Laug Dale G. Renlund qhia hais tias: “Peb Leej Txiv Saum Ntuj Ceeb Tsheej lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws. Yog tias Nws tsuas xav kom peb mloog lus xwb, Nws yuav muab nqi zog thiab rau txim tam sim ntawd kom peb coj li Nws xav.” Peb qhia peb txoj kev hlub rau Vajtswv thaum peb xaiv ua raws li Nws tej kev txib.
Peb Leej Txiv Saum Ntuj Ceeb Tsheej thiab peb tus Cawm Seej paub tias peb hlub Nkawd thaum peb tso Nkawd ua ntej tshaj plaws hauv peb lub neej, ib leeg pab ib leeg, ris Nkawd txiaj rau txhua txoj koob hmoov, thiab txiav txim siab mloog lus thiab ua raws li Nkawd hais.
I testify that each one of us truly is a child of God and He loves us perfectly. Kuv ua tim khawv hais tias Nws xav kom peb hnov thiab paub Nws txoj kev hlub rau peb raws li peb txoj kev nkag siab. Ib yam li ntawd, kuv ua tim khawv hais tias peb yuav paub tias Nws hlub peb thaum peb ua tej yam qhia Nws tias peb hlub Nws thiab. Los ntawm Yexus Khetos lub npe, amees.