Txais Yuav Nws lub Txiaj Ntsim

Txoj kev muab khoom plig yog ib yam uas tib neeg hauv ntau haiv neeg, kab lig kev cai muab, thiab twb ua li no ntau txhiab xyoo tas los lawm. Hauv txhua lub caij, tib neeg muab khoom plig rau lwm tus neeg kom lawv haj yam sib raug zoo, qhia kev hlub thiab kev ris txiaj, thiab ua cim cia txog tej hnub tseem ceeb xws li hnub sib yuav, hnub yug, thiab tej hnub ua koob tsheej. Thiab tib neeg tsis yog tib cov uas Vajtswv tau tsim uas ib leeg muab khoom plig rau ib leeg! Muaj ntau yam piv txwv txog qhov no xws li, cov tsiaj penguin muab tej hlaws uas ci ci rau cov uas lawv xav ua ib khub, cov bonobos (uas yog ib hom liab) muab txiv hmab txiv ntoo rau lawv cov zej zog.

Nej tau muab cov khoom plig dab tsi? Xav txog ib lub sij hawm uas koj nrhiav tau—los sis tau ua—yam khoom plig zoo tag nrho rau ib tug neeg uas koj hlub. Nej yeej paub tias yam khoom plig ntawd yog yam uas tus ntawd xav tau thiab lawv yuav saib qhov ntawd rau nqi heev. Yam khoom plig ntawd yog dab tsi Puas yog yuav muab rau nej niam? ib tug phooj ywg? nej tus me nyuam? ib tug xib hwb? nej yawg? Nej xav li cas thaum nej nrhiav tau yam khoom plig ntawd? Nej xav li cas txog lub sij hawm uas tus neeg uas nej hlub ntawd qhib pob khoom plig ntawd? Zoo ib yam li ntawd, thaum twg leej twg thiaj muab ib yam khoom plig zoo tag nrho rau nej, thiab nej xav li cas thaum nej txais?

Thaum kuv muaj xya xyoo, nrog kuv niam txiv nyob tim Arabia teb, muaj ib zaj yeeb yaj kiab hu ua Chitty Chitty Bang Bang tawm tuaj. Zaj no qhia txog ib lub tsheb uas txawj ua yees siv uas tsav tau nws tus kheej, thiab yeej txawj ya! Kuv paub hais tias nyob hauv Askiv teb lawv ua ib lub me nyuam tsheb uas zoo li lub hauv zaj Chitty Chitty Bang Bang, kuv xav xav tau ib lub zoo li ntawd! Yus mam li rub ib qho ces ob phab tis mam li tshwm los ntawm lub me nyuam tsheb! Kuv txiv tau mus ua lag ua luam tim Askiv teb thiab nug seb kuv puas xav kom nws nqa ib yam dab tsi los, ces kuv qhia nws tias kuv xav xav tau ib lub tsheb Chitty Chitty Bang Bang.

Nws los tsev, tiam sis tsis pom ib lub tsheb. Kuv tu siab heev thiab xav tias nyaj nws tsis nco qab yuav xwb. Tab sis mas, ze li 10 hnub tom qab ntawd yog kuv hnub yug, muaj ib pob khoom me me uas muab qhwv zoo zoo, nyob ntawd rau kuv. Kuv zoo siab heev, yuav luag cia siab tsis tau, kuv txawm qhib pob khoom thiab pom kuv lub tsheb. Kuv zoo siab kawg kuv thiaj los kua muag. Kuv rub tau tus pas ntawd thiab ob phab tis tau tawm los, zoo ib yam li lub tsheb hauv zaj yeeb yaj kiab! Kuv ua kuv txiv tsaug rau qhov khoom plig zoo kawg no. Kuv nrog lub tsheb ntawd ua si rau ntau xyoo thiab tau muab yam khoom ntawd cia rau ntau xyoo tom qab ntawd. Kuv xav tias kuv txiv nyiam muab qhov khoom plig ntawd ntau npaum qhov uas kuv nyiam txais yam khoom plig ntawd.

Peb xav tau hais tias kev muab khoom plig muaj peb qhov:

1. Qhov uas muab yam khoom plig, thaum tus neeg muab los xaiv, ua, los sis npaj qhov khoom plig thiab muab rau ib tug neeg uas nws hlub. Tus uas muab yuav tsum ua tib zoo xav seb yuav muab li cas kom thiaj muab tau ib yam khoom plig uas muaj nqi.

2. Qhov uas txais thiab qhib yam khoom plig, thaum tus neeg txais yam khoom plig—feem ntau nws yuav xav tsis thoob, muaj kev ris txiaj, thiab zoo siab heev—ua ntej nws qhib pob khoom, maj mam daws txoj hluas khi thiab muab qhib seb muaj dab tsi haud.

3. Thiab ces, yeej muaj qhov tseem ceeb tshaj, uas yog kev txais yuav yam khoom plig. Kom txais yuav ib qho khoom plig yeej muaj ntau tshaj qhov txais thiab muab qhib xwb. Thiab yeej ntau tshaj qhov uas yus to taub yam khoom plig muaj nqi li cas thiab qhia tias yus ris tus neeg muab txiaj. Yog yus yuav txais yuav ib yam khoom plig tiag tiag, peb saib qhov ntawd rau nqi rau peb tus kheej, thiab muab siv zoo zoo hauv peb lub neej, thiab nco qab ntsoov ris tus uas muab txiaj.

Kev txais yuav ib yam khoom plig tsis yog yus lam ua xwb tiam sis yog ib yam yus txhob txwm ua, thiab nws yeej ntau tshaj qhov uas lam qhib ib pob khoom xwb. Kev txais yuav txhais tau tias muaj kev ris txiaj thiab txuas tau rau yam khoom plig thiab tus neeg uas muab es ob leeg tus neeg muab thiab tus neeg txais haj yam sib raug zoo. Thaum xav txog kuv lub me nyuam tsheb ua rau kuv nco zoo zoo txog ntau yam, thiab kuv rov qab hnov tau kuv txiv txoj kev hlub rau kuv, uas kuv paub los ntawm yam khoom plig ntawd thiab ntau yam ntxiv uas nws ua rau kuv.

Peb Leej Txiv Saum Ntuj Ceeb Tsheej muaj ntau yam txiaj ntsim kev kaj thiab qhov tseeb uas tau npaj tseg yuav muab rau peb, cov uas yog Nws cov me nyuam. Tej no los ntawm tus Neeg Muab Zoo Tshaj zoo ib yam li dej txhawv los hauv roob moj sab qhua los ntawm Nws lub siab dawb siab zoo. “Ib puas tsav yam uas zoo thiab ib puas tsav yam koob hmoov uas zoo kawg nkaus yeej yog Vajtswv pub rau peb.” Nyob hauv peb txoj kev sib khi lus nrog Leej Txiv, Nws pheej ua tus uas muab thiab peb yog cov uas txo hwj chim txais yuav xwb.

Tiam sis peb txais tsis tau dab tsi hlo li yog tias tsis muaj Leej Txiv lub txiaj ntsim zoo tshaj plaws, uas yog Nws tus Me Nyuam Yaj, Nws Tib Leeg Tub Yexus Khetos. Leej Txiv txhua lub txiaj ntsim yeej yog muab los ntawm qhov uas tus Cawm Seej kam ua kev txi hauv lub vaj Khexemanes thiab saum ntoo khaub lig, thiab los ntawm Nws txoj Kev Sawv Rov Los. Yexus Khetos, peb tus Txhiv Dim zoo, yog lub txiaj ntsim zoo tshaj plaws uas Leej Txiv ntawm txoj kev kaj muab. “Nyob hauv lub txiaj ntsim uas yog nws Leej Tub Vajtswv tau npaj [rau peb] ib txoj kev zoo dua.”

Rau kuv mas tsuas muaj ib lub txiaj ntsim zoo tag nrho uas yog kev tseeb uas kav mus ib txhis uas yuav pab tau peb txais yuav txhua yam tsav uas Leej Txiv xav muab pub rau peb—ib lub txiaj ntsim uas yog tias peb txais yuav tiag tiag thiab muab tso hauv peb nruab siab, yuav pab peb to taub txhua yam kev zoo siab thiab kev nyuaj siab hauv lub neej no, thiab teb peb txhua lo lus nug: Peb yeej yog Vajtswv cov me nyuam tiag. Qhov tseeb ntawd ua rau neeg xav tsis thoob! Tsis paub xav tiag! Thiab tsis yog hais paj lug xwb.

Cia li xav seb yog tias nov yog thawj zaus uas nej hnov qhov no! Nej yeej yog Nws cov ntxhais tsim txiaj. Nej yeej yog nws cov tub uas muaj nuj nqi. Thiab nej tab tom taug Nws txoj hau kev zoo siab. Nws muaj kev hlub zoo tag nrho, Nws paub tseeb hais tias nej yog leej twg ua ntej nej yug los rau hauv ntiaj teb no, nej tau raug dab tsi hauv nej lub neej hauv ntiaj teb no lawm, thiab Nws tau muaj kev sib hlub npaj rau nej tag kis. Thiab, Nws yeej xav kom yuav muaj ib hnub twg uas nej yuav rov los cuag Nws, yuav txais lub ntsiab ntawm Nws txhua yam txiaj ntsim zoo, uas yog txoj sia nyob mus ib txhis nrog Nws

Lo lus nug tsis yog seb lub txiaj ntsim kev tseeb no puas muaj tiag tiag, tiam sis yog seb peb puas yuav nrhiav thiab kam txais yuav. Leej Txiv twb muab lub txiaj ntsim no los rau peb lawm. Tus Cawm Seej twb them tus nqi rau lub hom phiaj uas tau muab lub txiaj ntsim no lawm. Tiam sis yog tias nej twb kawm txog qhov tseeb no tau ntau xyoo los lawm, tej zaum nej yuav xav tsis thoob txog qhov tseeb no thiab tej zaum nej tsis hnov lub hwj chim thiab kev nyab xeeb uas los ntawm lub txiaj ntsim no ntxiv.

Tiam sis yog tias lub txiaj ntsim uas muaj nqi tshaj—thiab txhua yam zoo, kev kaj siab lug, thiab kev cia siab uas yeej los ntawm Nws los—yog tej yam uas tib neeg tsis txais yuav, tsis siv, thiab tsis kam txais, ces yog ib qho tu siab kawg nkaus! Tus uas muab yeej yuav tu siab nrho! “Yog tias muab ib lub txiaj ntsim rau ib tug neeg, tiam sis nws tsis kam txais lub txiaj ntsim ntawd, ces yuav muaj nqi dab tsi rau nws? Saib seb, nws tsis zoo siab rau qhov uas tau muab rau nws, yeej tsis zoo siab rau tus uas tau muab lub txiaj ntsim ntawd rau nws.”

Kuv thiaj caw nej los txais yuav txawm yog thawj zaug xwb, los sis txais yuav ntau tshaj nej tau txais yav tas los lawm, kom nej to taub tias nej yog Vajtswv cov me nyuam uas nws hlub. Nej yuav tsum daws txoj hlua, tshem cov ntaub qhwv, qhib lub thawv, thiab ua tib zoo txais yuav txo hwj chim ris lub txiaj ntsim to taub qhov tseeb tseem ceeb kawg nkaus no. Tus Vaj Ntsuj Plig Dawb Huv yuav ua tim khawv rau nej lub siab hais tias nej yog tus uas Siab Tshaj Plaws ib tug me nyuam.

Thaum nej txais yuav qhov tseeb zoo kawg nkaus no hauv nej nruab siab thiab hnov tau kev nplij siab thiab kev zoo siab kawg, ces nej txoj kev xav yeej hloov tag nrho! Nej hnov tau Nws txoj kev hlub, hnov Nws lub suab, thiab pom tau Nws txhais tes, txawm yog muaj tej xwm txheej twg, los sis tsis muaj, hauv nej lub neej. Nej mam li rov qab pom seb nej thiab lwm tus neeg zoo li cas tiag. Nej txoj kev khi lus nrog nej tus Cawm Seej yuav muaj zog tuaj, thiab vim muaj lub txiaj ntsim zoo kawg no, nej lub neej muaj txoj kev kaj, kev zoo nkauj, thiab kev cia siab tshiab.

Thov, kom nej yuav thov Vajtswv pab nej to taub seb nej puas tab tom sim txais yuav qhov tseeb no tiag tiag hauv nej nruab siab? Nej puas kam txais yuav lub txiaj ntsim no? Nej puas kam haj yam mob siab txais yuav ntau tshaj qhov uas nej tau txais yav tas los lawm—thiab vim ua li ntawd nej thiaj yuav txais lwm yam txiaj ntsim uas los nrog lub txiaj ntsim no?

Tej zaum nej xav paub tias, “Kuv yuav tsum ua dab tsi kom txais yuav lub txiaj ntsim uas los ntawm Vajtswv no?” Nej tsis tas ua dab tsi. Yog ib lub txiaj ntsim los ntawm tus uas Muab. Yeej yog li ntawd xwb. Cia li txais yuav xwb. Nej yog Nws cov me nyuam. Nws hlub nej. Tsis txhob ua kom nyuaj to taub. Tsis txhob cia nej tej kev xav tias nej tsis tsim nyog tiv thaiv tsis pub nej txais yuav lub txiaj ntsim no. Tiag tiag mas, peb txhua tus yeej tsis “tsim nyog”—txais Leej Txiv txhua yam txiaj ntsim tsuas yog dhau los ntawm tus Mexiyas Dawb Huv tej hauj lwm, kev hlub tshua, thiab kev tshav ntuj peb thiaj txais tau, tiam sis Nws muaj siab xav kom Nws txhua tus me nyuam yuav txais tej ntawd! Ces, thaum nej to taub qhov no los sis rov qab to taub, cia li zoo siab hais ua tsaug rau tus uas Muab txiaj ntsim no.

Txij thaum kuv nrhiav tau kuv txoj kev ntseeg thaum kuv muaj nees nkaum xyoo tawm los, ua rau kuv to taub tias kuv yeej yog Vajtswv ib tug tub tiag. Thaum kuv yim txais yuav lub txiaj ntsim no hauv kuv lub siab, kuv yim paub hais tias kuv yog leej twg thiab tias Nws hlub kuv npaum li cas tiag. Tej yam uas tau pab kuv to taub ntxiv yog cov lus hauv cov vaj lug kub, kuv yawg koob txoj koob hmoov, kev teev tiam hauv lub tuam tsev, kev pab lwm tus, thiab kev thov kuv Leej Txiv. Kuv xav paub seb kuv tej kev nyuaj siab, kev mob siab, thiab kev tu siab yuav pauv li cas, nplij li cas, thiab kuv yuav kov yeej li cas yog tias kuv tau kawm qhov tseeb no thaum ntxov.

Maulaunais ntuas peb tias “txhob xyeej Vajtswv tej txiaj ntsim tseg,” tiam sis kom “los cuag Khetos, thiab tuav txhua yam txiaj ntsim uas zoo.” Nej thiaj yuav ua siab loj los cuag Khetos vim nej tso siab rau Nws txoj kev ua siab zoo thiab txais tag nrho Nws tej txiaj ntsim uas yog kev xyiv fab, kev kaj siab, kev cia siab, kev kaj, kev tseeb, kev tshwm sim, kev txawj ntse, thiab laj lim tswv yim—nej mam li tsa tes siab siab tos txais yuav tej no. Nej txais tau tej txiaj ntsim no vim nej paub tseeb hais tias nej yog Vajtswv cov ntxhais tsim txiaj, nej yog cov tub uas muaj nuj nqi, thiab Nws muab Nws Tib Leeg Tub los txhiv nej dim, kho nej, thiab ua kom nej yuav dawb huv.

Nej yog Vajtswv cov me nyuam. Tsis yog ib zaj nkauj zoo uas peb hu xwb. Nej puas kam txais, qhib, thiab txais yuav lub txiaj ntsim kev txawj ntse thiab kev to to taub uas los ntawm Nws? Nej puas muab siab npuab lub txiaj no vim yog ib qho uas muaj nqi heev? Cia li rov qab txais yuav lub txiaj ntsim no, los sis txais yuav thawj thawj zaug tiag tiag, thiab qhov no yuav pauv txhua yam tsav hauv nej lub neej. Yeej muaj ib txoj kev zoo dua uas Vajtswv tau npaj tseg rau nej dhau los ntawm qhov khoom plig uas yog Nws tus Tub. Nej muaj sia nyob kom muaj kev zoo siab! Los ntawm Yexus Khetos lub npe, amees.