Tej Txiaj Ntsim Tseem Ceeb uas Kav Mus Ib Txhis: Yexus Khetos txoj Kev Theej Txhoj, txoj Kev Sawv Rov Los, txoj Kev Muab Txoj Moo Zoo Txum Tim Rov Qab Los

Ntau xyoo tas los lawm, peb hoob kawm vaj lug kub thaum sawv ntxov muab tej nqe hauv Phau Npaivnpaum cim cia. Kuv ib txwm nyiam tej nqe luv luv. Tej nqe xws li Yauhas 11:35—uas yog nqe vaj lug kub luv tshaj plaws, tsuas muaj peb lo lus xwb—“Yexus txawm quaj.”

Rau kuv mas, qhov uas Yexus quaj thaum nws nyuaj siab thiab zoo siab qhia tseeb tias: Vajtswv Tib Leeg Tub uas los saum ntuj los tau yug los nyob hauv ntiaj teb no thiab kawm seb ua ib tug tib neeg yuav zoo li cas kom nws paub nrog peb nyob thiab foom koob hmoov rau peb.

Thaum peb quaj vim peb tu siab los sis zoo siab, Yexus Khetos yeej to taub peb. Nws thiaj nyob tau thaum peb xav tau tej txiaj ntsim zoo tshaj plaws uas yog: Yexus Khetos txoj Kev Theej Txhoj, Kev Sawv Rov Los, kev muab txum tim rov qab los.

Maivliag thiab Mathas quaj rau nkawd tus nus hu ua Laxalus uas tau tuag lawm. Vim muaj kev khuv leej, Yexus txawm quaj. Nws tsa Laxalus sawv rov los.

Yexus pom Yeluxalees hmo ua ntej txoj Kev Cai Hla Dhau. Nws quaj, vim Nws sau tsis tau Nws haiv neeg los ua ke zoo li tus poj qaib coj nws cov me nyuam qaib los. Hnub no Nws txoj Kev Txheej Txhoj pab peb muaj kev cia siab thaum peb tu siab rau tej uas muaj tau.

Tus Tswv rau vaj txiv roj quaj thaum Nws thov Nws cov tub qhe, uas yog peb sawv daws cov kwv tij thiab cov muam uas txhawb pab lwm tus neeg, “Tshuav dab tsi ntxiv uas kuv tsis tau ua rau kuv lub vaj txiv roj?”

Maivliag sawv ntawm lub ntxa uas tsis muaj dab tsi haud. Yexus ua tib zoo nug hais tias, “Ua li cas koj quaj?” Nws paub tias “thaum tsaus ntuj muaj kev quaj ntsuag, tiam sis thaum kaj ntug muaj kev zoo siab.” Kev Sawv Rov Los ua rau lub hnub tawm tuaj rau txhua leej txhua tus.

Hauv tej thaj av hauv Phau Ntawv Maumoos, thaum pab neeg coob uas rau siab ntseeg sawv los ntsib Nws, Yexus muaj kev xyiv fab puv npo. Nws quaj.

“Thiab nws foom koob hmoov rau lawv cov me nyuam yaus, ib tug dhau ib tug, thiab thov Leej Txiv rau lawv.

“Thiab thaum nws ua li no tas lawm nws rov quaj dua.”

Nov yog Easter los ntawm Yexus Khetos: Nws ua rau peb txais tau tej yam hauv peb lub siab thiab teb tej lus nug ntawm peb sab ntsuj plig. Nws so peb cov kua muag, tsuas tshuav cov kua muag vim peb zoo siab.

Thaum peb los kua muag, tej thaum peb hais thov txim, thiab txaj muag. Tiam sis qhov uas peb paub tias Yexus Khetos to taub tej kev mob siab thiab kev zoo siab hauv lub neej no yuav ntxiv dag ntxiv zog rau peb thaum uas peb tab tom raug tej yam iab thiab tej yam qab zib.

Nyob hauv Amelikas Qab Teb, ib leej txiv quaj. Vim ib tug uas ci ntsa iab hauv nws lub neej, nws tus ntxhais hluas, tso lub neej no tseg. Nws quaj hais tias “Kuv yuav muab txhua yam yog tias kuv muaj sij hawm pom nws ib zaug ntxiv.” Kuv txawm quaj thiab.

Nyob hauv txoj kev muab lub Tuam Tsev Puebla Mexico fij tseg, ib tug muam los los kua muag vim nws zoo siab. Nws yeej muaj kev ntseeg thiab txi ntau heev. Nws hais tias, “Todos mis hijos están aquí en el templo hoy”—“Hnub no tag nrho kuv cov me nyuam nyob hauv lub tuam tsev no.” Ntau tiam neeg sib sau ua ke hauv tus Tswv lub tsev yeej quaj vim lawv zoo siab thiab muaj kev ris txiaj heev.

Hauv tej kev ntaus tsov ntaus rog ntxeev teb chaws, ib txhia tsev neeg thiab neeg zej zog sib tawm tsam. Tej kev quaj vim chim siab ploj mus zuj zus thaum sawv daws rov qab cia siab. Tus poj niam hauv ib lub me nyuam zos quaj hais tias, “Tus neeg zej zog es, ua ntej kuv mus nyob hauv lub ntxa, kuv yuav tsum qhia nej tias cov neeg ntawm nej tsev neeg uas ploj lawm twb raug muab faus cia nyob qhov twg.’”

Tus nkauj nyab thiab tus nraug vauv tab tom ua kev cai sib khi ua ke hauv tus Tswv lub tsev. Nkawd ob leeg twb muaj 70 xyoo lawm. Ib tug nkauj nyab, nws twb ua neeg tsim txiaj tos rau hnub no. Nws txaj muag yoj nws daim tiab li ub li no. Peb los kua muag muaj kev zoo siab. Twb muaj raws li Vajtswv tej lus cog tseg lawm. Nws tej kev khi lus coj koob hmoov los.

Thaum tab tom mus qhia ib tug poj ntsuam tom tsev, tus tub hluas Boyd K. Packer kawm ib yam tseem ceeb. Tom qab tus poj niam no muaj lus tsis sib haum nrog nws tus txiv, nws hais ib co lus nchav heev. Txawm muaj xwm txheej ceev hnub ntawd ces nws tus txiv tuag. Tus poj ntsuam quaj hais tias, “Rau tsib caug xyoo kuv mob siab heev vim cov lus kawg uas nws hnov ntawm kuv qhov ncauj yog ib co lus nchav, cov lus phem.”

Lub caij Easter los ntawm Yexus Khetos pab kho peb lub siab, ua kom sib haum, kho peb tej kev sib raug zoo, nyob ntawm ob sab daim ntaub thaiv. Yexus kho tau kev tu siab; Nws pab tau neeg zam txim rau lwm tus. Nws muaj peev xwm cawm peb dim thiab lwm tus los ntawm tej yam peb hais los sis lawv tau hais los sis ua uas muab peb khi tseg.

Lub caij Easter los ntawm Yexus Khetos cia peb txais tau Vajtswv txoj kev pom zoo. Lub ntiaj teb qhia peb tias peb siab dhau, qis taub dhau, dav dhau, nqaim dhau—tsis txawj ntse, zoo nkauj, los sis tsis mloog peb sab ntsuj plig txaus. Yexus Khetos yuav hloov peb sab ntsuj plig ua rau peb dim tau, txoj kev xav tias peb yeej yuav tsis zoo txaus.

Thaum lub caij Easter, peb hu nkauj hais tias, “Kev tuag tu nrho; neeg dim txim. Yexus kov yeej mus ib txhis.” Khetos txoj Kev Sawv Rov Los cawm peb dim kev tuag, dim peb tej kev qaug zog thiab tej yam tsis zoo ntawm peb sab cev nqaij daim tawv. Yexus Khetos txoj Kev Theej Txhoj kho peb sab ntsuj plig thiab. Nws los ntshav ntawm txhua qhov hws, los los ntshav uas pab peb dim kev txhaum thiab kev sib ncaim. Nws pab peb rov los nyob ua ke, ib leeg nrog ib leeg thiab Vajtswv, ua neeg zoo tag nrho thiab dawb huv. Hauv txhua yam zoo, Yexus Khetos kho txhua yam—tsis yog txhua yam ntawm yav nram ntej tiam sis txhua yam uas peb muaj peev xwm ua.

Yexus lub neej thiab txoj kev kaj ua tim khawv txog Vajtswv txoj kev hlub rau tag nrho Nws cov me nyuam. Vim Vajtswv peb Leej Txiv hlub tag nrho Nws cov me nyuam hauv txhua lub caij nyoog thiab thaj av, peb pom tias muaj Nws txoj kev caw peb los txais yuav kev nyab xeeb thiab kev zoo siab hauv Nws nyob hauv ntau haiv neeg thiab kab lig kev cai. Qhov twg, thaum twg, los yog peb yog leej twg los xij, peb yeej yog tus Tsim Ntuj Tsim Teb no cov me tub me nyuam. Xws li cov neeg uas ntseeg Islam, Yudais, thiab Yexus sawv daws yog Leej Txiv Anplaham cov xeeb leej xeeb ntxwv thiab lawv txhua tus tau sib khi lus ua ke hauv tej xwm txheej yav thaum ub hauv Iyiv teb.

Leej Txiv Anplaham los nyob hauv Iyiv teb thiab tau koob hmoov.

Yauxej uas raug muab muag ua qhev, paub Falaus zaj npau suav qhia txog xya xyoo uas yuav muaj nplua mias ces tom qab ntawd yuav muaj xya xyoo uas muaj kev tshaib kev nqhis. Yauxej cawm nws tsev neeg thiab nws cov neeg. Yauxej quaj thaum nws pom Vajtswv txoj hau kev, uas txhua yam tsav pab ua zoo rau txhua tus uas ua raws li lawv tej kev khi lus.

Mauxes, uas loj hlob hauv Falaus tsev hauv Iyiv Teb, txais yuav thiab yav tom ntej tau muab cov yawm sij uas sau tau Vajtswv cov me nyuam los ua ke.

Kom muaj raws li tej kev tshwm sim los, Yauxej, Maivliag, thiab tus me nyuam mos liab Khetos khiav nkaum los nyob hauv Iyiv teb. Hauv lub zos Cairo, ib tug neeg ntseeg Muslim hais tias: “Phau Quran qhia tias Yauxej, Maivliag, thiab tus me nyuam mos liab Yexus nrhiav tau chaw nkaum thiab kev thaj yeeb nyob hauv kuv lub teb chaws. Nyob hauv kuv lub teb chaws, Yexus thaum ua me nyuam yaus tau noj peb cov zaub mov, tau chais Nws thawj ruam taw, Nws pib xyaum hais lus. Nyob hauv kuv lub teb chaws no, peb ntseeg hais tias tej tsob ntoo tau qhau hlo muab tej txiv rau Nws thiab Nws tsev neeg noj. Qhov uas Nws tau nyob hauv kuv lub teb chaws twb foom koob hmoov rau peb cov neeg thiab peb thaj av.”

Vajtswv txoj kev uas cia peb muaj kev ywj siab xaiv pab tau peb kawm los ntawm tej yam uas peb ua. Tej yam zoo tshaj uas peb kawm hauv lub neej no yog los ntawm tej yam uas peb yeej yuav tsis xaiv los ua. Vim muaj kev hlub, Yexus Khetos nqi los raug txhua yam tsav thiab txawm kov yeej txhua yam tsav. Nws zoo siab vim peb muaj tswv yim thiab kev xyiv fab, peb ua siab zoo tsis cia siab hais tias peb yuav tau nqi zog, es muaj kev ntseeg txaus peb thiaj kam hloov siab lees txim thiab txawj zam txim. Thiab Nws los kua muag vim tib neeg raug kev txom nyem, muaj siab phem, muaj kev tsis ncaj ncees—feem ntau muaj li no vim tib neeg xaiv yuam kev—lub ntuj ceeb tsheej thiab Vajtswv ntuj los kua muag thiab.

Txhua lub Caij Easter thaum nplooj ntoo hlav ua tim khawv txog tej uas los saum ntuj los uas yog Yexus Khetos txoj kev theej txhoj, kev sawv rov los, thiab kev muab txum tim rov qab los. Tsis yog lam tau lam muaj tej cim thiab tej yam dawb ceev no. Hnub Caiv Toov Laj, lub Lim Tiam Dawb Huv, thiab Easter huv tib si nco txog Khetos txoj Kev Theej Txhoj thiab Kev Sawv Rov Los. Xws li hnub no, txhua lub Plaub Hlis Ntuj hnub tim 6 peb nco qab tias tau txhim tsa thiab tsim Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Yog vim muaj Txoj Kev Muab Txoj Moo Zoo Txum Tim Rov Qab Los no peb thiaj li sib sau ua ke thawj Hnub Caiv txhua lub Plaub Hlis Ntuj hauv lub tuam rooj sab laj.

Kev Txum Tim Rov Qab Los kuj muaj thaum Yexus Khetos, Mauxes, Elias, thiab Eliyas uas sawv rov los tau los muab lub pov thawj hwj cov yuam sij thiab txoj cai coj los hauv lub Tuam Tsev Kirtland thaum Hnub Caiv Easter, lub Plaub Hlis Ntuj xyoo 1836. Hnub ntawd Yexus Khetos lub Koom Txoos uas muab txum tim rov qab los lawm tau txais Vajtswv txoj cai thiab tej koob hmoov uas yuav sau tau Nws cov me nyuam los ua ke, yuav npaj Nws cov me nyuam rov los cuag Nws, thiab muab tej yim neeg sib khi ua ke tas mus li. Kev muab txoj moo zoo txum tim rov qab los hnub ntawd twb ua kom muaj raws li cov yaj saub tej lus qhia vim twb ua thaum hnub Easter thiab Kev Cai Hla Dhau.

Tsis ntev tas los no kuv tau mus xyuas lub Tuam Tsev Kirtland, thiab tej qhov chaw dawb ceev hauv Ohio uas tus Yaj Saub Joseph Smith thiab lwm cov neeg tau ua yog toog pom Vajtswv peb Leej Txiv thiab Nws tus Tub, Yexus Khetos. Tus Yaj Saub Joseph pom seb lub ntuj ceeb tsheej zoo li cas. Nyob saum ntuj, Leej Txiv Saum Ntuj Ceeb Tsheej, dhau ntawm Yexus Khetos, “txhiv tag nrho tej yam nws ob txhais tes tau ua” hauv ib lub nceeg vaj uas muaj yeeb koob. Tib co uas tsis ua li ntawd yog cov uas txhob txwm “xyeej Leej Tub tom qab Leej Txiv tau muab Nws ua tshwm sim.”

Thaum Nws pib qhuab qhia tib neeg, Yexus tshaj tawm txog Nws ntiag tug hauj lwm uas yog foom txhua txoj koob hmoov uas peb kam txais yuav rau peb txhua leej txhua tus—hauv txhua lub caij, txhua lub teb chaws, txhua xwm txheej Tom qab yoo mov 40 hnub, Yexus mus hauv lub tsev teev ntuj thiab nyeem hais tias, “Tus Tswv tus Ntsuj Plig nrog nraim kuv, rau qhov nws tsa kuv ua tus qhia txoj moo zoo rau cov neeg txom nyem. Vajtswv tau txib kuv los kho cov uas muaj kev tu siab, nws txib kuv mus qhia txoj kev cawm dim rau cov neeg uas raug kaw, thiab kho cov neeg dig muag kom rov pom kev, thiab tso cov uas raug kev tsim txom kom dim.”

Peb txhua leej txhia tus yeej—pluag, mob siab, raug kaw, dig muag, thiab raug tsim txom.

Phau Yaxayas pheej cia siab rau tus Mexiyas txoj kev cia siab, kev cawm dim, kev pab: “Muab rau cov neeg uas tu siab hauv Xi-oos, … muab kev zoo siab thiab kev kaj siab pauj kev lwj siab, muab zaj nkauj uas hu qhuas tus Tswv pauj kev txom nyem nyuaj siab.”

Yog li ntawd, peb thiaj qw hais tias, “[Kuv] zoo siab heev rau tej uas tus Tswv tau ua lawm. Nws [tau muab kuv] hnav … cev tsoos mus rau hauv rooj tshoob. Vajtswv muab kev cawm dim thiab kev muaj yeej rau [kuv] hnav.”

Txhua lub caij Easter peb ua koob tsheej, ua cim nco txog, tej txiaj ntsim uas kav mus ib txhis uas Yexus Khetos muab: Nws txoj Kev Theej Txhoj, Nws (thiab kev cog lus rau peb tias) peb yuav Sawv Rov Los, muab Nws lub Koom Txoos hauv lub caij nyoog kawg txum tim rov qab los vim muaj lub pov thawj hwj cov yawm sij thiab txoj cai kom foom tau koob hmoov rau Vajtswv txhua tus me nyuam. Peb zoo siab hnav tej tsoos tsho uas yog kev cawm dim thiab tej thav ntxwv ntawm kev ncaj ncees. Peb qw hais tias, “Hauxanas rau Vajtswv thiab tus Me Nyuam Yaj!”

“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”

Thov kom peb txhua tus yuav siv Yexus Khetos txoj kev theej txhoj, kev sawv rov los, thiab kev txum tim rov qab los—kom txais tau kev thaj yeeb, kev rais los mus, thiab kev muaj chaw nyob—uas yeej muaj tiag thiab muaj kev xyiv fab, muaj kev zoo siab uas kav mus ib txhis, kuv thov li no los ntawm Yexus Khetos lub npe, amees.