Koj Yog tus Khetos
(Mathais 16:16)
Peb xav kom peb cov me nyuam ntseeg Yexus Khetos, koom siab nrog Yexus Khetos thiab Nws lub Koom Txoos thaum peb khi lus, thiab siv zog hloov los ua neeg zoo li Yexus Khetos.
Thaum wb tus tub Eli kawm ntawv qib plaub, nws chav kawm tau ua tseem fwv es cov phooj ywg tau xaiv nws tseg los ua nws chav kawm tus txiav txim. Muaj ib hnub, ib tug kws txiav plaub los ntawm Utah Koog Chaw Hais Plaub Ob tuaj xyuas, muab nws cov thav ntxwv rau Eli hnav, ces hais kom Eli hais kev lav lus rau nws lub luag hauj lwm hauv nws chav kawm. Qhov no ua rau Eli xav xav kawm kev cai lij choj thiab kawm txog tus uas Muab Kev Cai, Yexus Khetos.
Tom qab ntau xyoo uas nws siv zog kawm, muaj ib lub tsev kawm ntawv lij choj uas Eli xav mus caw nws tuaj ua xam phaj. Nws hais tias, “Niam, lawv nug kuv 10 lo lus nug. Lo lus nug kawg yog, “Koj txoj kev coj ncaj ncees los twb los ntawm qhov twg los?” Kuv hais tias nyob hauv tib neeg zaj keeb kwm lawv tau tsim tej kev coj ncaj ncees thaum lawv ua lawv lub neej raws li tib neeg uas coj yam ntxwv zoo. Tus uas coj yam ntxwv txog kev ncaj ncees uas kuv siv zog ua kuv lub neej raws li Nws yog Yexus Khetos. Kuv hais tias yog tib neeg txhua tus yuav ua raws li Yexus Khetos tej lus qhia hauv Zaj Lus Qhia Pem Roob, ces lub ntiaj teb no yeej yuav zoo dua thiab muaj kev thaj yeeb ntxiv.” Ces thaum xam phaj tas lawm, nws xav hais tias, “Kuv txoj kev ua npau suav txij thaum kuv yog me nyuam yaus los twb ploj tag. Tsis muaj leej twg uas kawm txuj kawm ci xav hnov txog Yexus Khetos.”
Ob lub lim tiam tom qab ntawd, lawv muab nyiaj pab Eli kawm ntawv hauv lub tsev kawm ntawv ntawd. Ua ntej nws cog lus tias nws yuav mus, peb mus xyuas tsev kawm ntawv qib siab ntawd. Tsev kawm ntawv lij choj ntawd yeej zoo li lub tsev vaj ntxwv pem ib lub roob thiab pom tau ib lub pas dej nyob hauv hav. Peb xav tsis thoob thaum peb mus hauv lub tsev qiv ntawv loj kawg li thiab tej kev hauv tsev, es peb pom tias muaj tej lus los ntawm Zaj Lus Qhia Pem Roob uas tau muab sau hauv tej daim chij thiab kos hauv pob zeb.
Zaj Lus Qhia Pem Roob yeej yog zaj lus qhia uas tib neeg nco ntsoov tshaj txhua zaj, ib zaj uas muaj tej lus qhia uas ib txwm tsis tau hnov dua. Yeej tsis muaj lwm zaj lus qhia uas pab peb to taub zoo dua txog Yexus Khetos tus yam ntxwv, Nws tej cwj pwm, thiab peb lub hom phiaj kom hloov los ua neeg zoo li Nws.
Kev ua Yexus Khetos cov thwj tim tas peb lub neej yeej pib hauv peb lub tsev—thiab nyob hauv lub Koom Haum Me Nyuam Yaus thaum lawv muaj 18 hli xwb. Peb xav kom peb cov me nyuam ntseeg Yexus Khetos, koom siab nrog Yexus Khetos thiab Nws lub Koom Txoos thaum peb khi lus, thiab siv zog hloov los ua neeg zoo li Yexus Khetos.
Kev Ntseeg Yexus Khetos
Qhov thib ib, cia li ntseeg Yexus Khetos.
Tom qab zaj lus qhia txog mov mog uas cawm neeg txoj sia, nyuaj rau tus Tswv cov thwj tim coob leej ntseeg Nws tej lus qhuab lus qhia, thiab lawv “tso Yexus tseg, thiab tsis nrog nws mus lawm.” Ces Yexus tig mus rau Kaum Ob tug Thwj Tim thiab nug ib yam uas ua rau lawv nyuaj siab: “Nej ne, nej yuav tso kuv tseg thiab los?”
Petus teb hais tias:
“Tus Tswv, peb yuav mus cuag leej twg? Koj tej lus pub tau txoj sia ib txhis rau neeg.
“… Peb ntseeg thiab paub tseeb hais tias koj yog tus [Khetos, Vajtswv Leej Tub].”
Ib yam li Petus hais, kev ntseg yog “kev ntseeg ib tug neeg los sis kev lees hais tias ib yam muaj tseeb.” Thiab yog peb xav kom peb txoj kev ntseeg yuav ua rau peb txais tau kev cawm seej, peb yuav tsum ntseeg tus Tswv Yexus Khetos. “Peb … muab siab rau ntseeg [Yexus] Khetos thaum peb paub tias Nws muaj txoj sia nyob, [to taub] Nws tus yam ntxwv thiab tej [cwj pwm tiag], thiab paub tias peb siv zog ua raws li Nws lub siab nyiam.”
Peb tus yaj saub, Thawj Tswj Hwm Russell M. Nelson, tau hais tias, “Kev ntseeg Yexus Khetos yeej yog qhov uas ua rau peb txais tau Vajtswv lub hwj chim.”
Peb yuav ua li cas kom pab cov me nyuam txhawb nqa lawv txoj kev ntseeg Yexus Khetos thiab txais tau Nws lub hwj chim? Peb tsis tas mus nrhiav vim yog tus Cawm Seej Nws tus kheej.
“Ces tus Tswv hais rau cov neeg, hais tias:
“Saib seb, kuv yog Yexus Khetos, …
“Cia li sawv thiab los cuag kuv, …
“… Cov neeg coob coob txav mus, thiab cev lawv txhais tes mus xuas nws sab tav, thiab xuas tej qhov ntsia hlau hauv nws ob txhais tes thiab hauv nws ob txhais taw; thiab lawv ua li no, ib leeg txav mus zuj zus txog rau thaum lawv txhua tus tau mus … thiab pom ntawm lawv lub qhov muag thiab xuas ntawm lawv txhais tes, thiab paub qhov tseeb thiab ua tim khawv tias, twb yog nws, tus uas cov yaj saub sau tseg tias yuav los.”
Kuv caw nej xav txog qhov uas yuav zoo li cas rau ib tug me nyuam yaus yuav tsum ua li cas nyob hauv lawv lub neej kom zoo li no. Lawv puas hnov tej lus tim khawv txog Yexus Khetos thiab nws txoj moo zoo? Lawv puas pom tej daim duab txog Nws txoj hauj lwm qhuab qhia thiab tej yam uas qhia tias Nws yog Vajtswv? Lawv puas hnov thiab to taub tus Vaj Ntsuj Plig Dawb Huv txoj kev ua tim khawv txog qhov uas muaj Nws tiag? Lawv puas paub Nws zaj lus qhia thiab ntiag tug hauj lwm?
Koom nrog Yexus Khetos thiab Nws lub Koom Txoos
Qhov thib ob, koom nrog Yexus Khetos thiab Nws lub Koom Txoos.
Vaj Ntxwv Npeyamis cov neeg tau hloov siab loj heev thiab lawv tau khi lus tias lawv yuav ua neej raws li Vajtswv lub siab nyiam. Vim lawv khi lus nrog Vajtswv thiab Yexus Khetos, ces tau “muab [lawv] hu ua Khetos cov me nyuam, nws cov tub, thiab nws cov ntxhais.” Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb tau khi lus tias peb yuav txhawb nqa Nws lub nceeg vaj thiab npaj rau Nws txoj kev rov qab los.
Peb yuav ua li cas kom pab cov me nyuam khi lus thiab ua raws li lawv tej kev khi lus? Nyob hauv ntaub ntawv ntxiv tom kawg A thiab B ntawm phau ntawv Los, Nrog Kuv Mus muaj tej kev pab sib tham thiab tej lus qhia uas yuav pab tsev neeg thiab txhawb nqa cov xib hwb thiab cov thawj coj ua lawv tej hauj lwm kom npaj cov me nyuam ua neej raws li Vajtswv tej kev khi lus.
Hloov Los Ua Neeg Zoo Li Yexus Khetos
Qhov thib peb, hloov los ua neeg zoo li Yexus Khetos.
Nyob hauv Phau Ntawv Maumoos, tus Cawm Seej tau ntuas Nws cov thwj tim uas Nws nyuam qhuav hu kom coj yam ntxwv zoo li Nws: “Nej yuav tsum ua neeg zoo li cas? Kuv hais tseeb rau nej tias, zoo tib yam li kuv.”
Peb yuav ua li cas kom pab cov me nyuam uas tau ua kev cai raus dej thiab ua kev pom zoo ua raws li lawv tej kev khi lus thiab muab lawv tus kheej thiab lwm tus los cuag Yexus Khetos? Yog peb yuav ua cov thwj tim tas peb lub neej peb yuav tsum “ua raws li txoj lus, tsis yog ua cov mloog xwb.”
Thaum peb caw tus Tswv cov thwj tim hluas tshaj no, thov siv txhua lub cib fim kom coj lawv, qhia lawv, nrog lawv mus kev, thiab pab lawv nrhiav tau txoj Kev. Nrog cov me nyuam uas muaj nqis no sib tham thaum lawv npaj qhia, ua tim khawv, thov Vajtswv, los sis pab lwm tus kom lawv ntseeg lawv tus kheej thiab muaj kev xyiv fab thaum lawv ua raws li lawv tej kev lav ris. Cia li nrhiav tej yam kom pab lawv paub tias nov yog lawv lub Koom Txoos thiab lawv muaj ib lub luag hauj lwm tseem ceeb kom npaj rau tus Cawm Seej txoj kev rov qab los.
Thaum peb tsom ntsoov rau Yexus Khetos hauv peb lub neej, ces tej yam uas peb xav tau, thiab yog li cas peb xav tau tej ntawd, los yeej hloov tas mus li. Kev hloov siab los ntseeg hloov tau txhua yam! Ua rau peb “tsis txhob muaj siab xav ua phem ntxiv, tiam sis xav ua zoo tsis tu ncua mus li.” Ua rau peb hloov peb txoj kev siv sij hawm, tej yam peb siv; peb nyeem, saib, mloog, thiab qhia txog dab tsi. Yeej ua rau peb hloov peb txoj kev teb lus nug thaum ua xam phaj rau kev kawm ntaub kawm ntawv tseem ceeb.
Peb yuav tsum siv Yexus Khetos txoj Kev Kaj ua txhua yam hauv peb lub neej. Yog peb tsis ua tim khawv txog qhov uas Nws yog ib tug vaj tswv ua ntej Nws yug los hauv lub ntiaj teb, Nws ntiag tug hauj lwm, thiab Nws txoj kev sawv rov los kom dim lub tsev kaw ntawm kev tuag nyob hauv peb tsev thiab hauv txhua txoj kev sib ntsib ntawm lub Koom Txoos no, ces ntshe peb tej zaj lus txog kev hlub, kev pab, kev ua ncaj, kev txo hwj chim, kev ris txiaj, thiab kev khuv leej yog tej lus uas lam txhawb nqa neeg kom ua neej zoo xwb. Yog tsis muaj Yexus Khetos ces tsis muaj hwj chim hloov, tsis muaj hom phiaj, thiab tsis muaj kev theej tej kev sim siab uas peb raug hauv lub neej no. Yog tias peb lam tau lam ua Yexus Khetos cov thwj tim, ces yuav ua rau peb cov me nyuam raug xwm txheej nyuaj tshaj plaws.
Thaum peb qhia peb cov me nyuam tias peb hlub lawv, peb puas qhia lawv tias lawv Leej Txiv Saum Ntuj Ceeb Tsheej thiab tus Cawm Seej Yexus Khetos hlub lawv thiab? Tej zaum peb txoj kev hlub yuav nplij lawv lub siab thiab tshoov lawv lub siab, tiam sis Nkawd txoj kev hlub yuav ua rau lawv dawb huv, muab lawv tsa nto, thiab kho tau lawv.
Tus Yexus no tsis yog ib tug Yexus cuav, los yog ib tug Yexus uas yooj yim, los sis ib tug Yexus uas tsis muaj cev, los sis ib tug Yexus uas yus lam ntseeg los sis ib tug Yexus uas yus tsis paub, tiam sis Nws yeej yog tus uas muaj yeeb koob muaj hwj chim tag nrho, sawv rov los, txais kev tsa nto, teev hawm, muaj zog, yog Vajtswv Tib Leeg Tub, uas muaj hwj chim cawm peb dim. Thiab ib yam li ib tug me nyuam yaus nyob hauv Philippines ua tim khawv rau kuv hais tias, “Peb tsim nyog txais kev cawm seej!” Los ntawm tus uas “Vajtswv txib [kom] los tuag theej neeg lub txhoj,” lub npe dawb huv, Yexus Khetos, amees.