Lub Caij Nyoog Muab Txhua Yam Txum Tim Rov Qab Los

Kev txhim tsa Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog qhov kawg ntawm tej txuj ci tseem ceeb uas muaj zuj zus. Thawj yam txuj ci tseem ceeb ntawd twb tshwm sim los 10 xyoo ua ntej nyob hauv lub xeev New York.

Nyob hauv lub caij nplooj ntoo hlav xyoo 1830, ib tug tub hluas hu ua Joseph Smith tau mus hauv hav zoov nyob ze nws lub tsev kom thov Vajtswv. Nws muaj lus nug txog nws sab ntsuj plig txoj kev cawm seej, thiab nws xav paub “saib tag nrho [lub koom txoos lub] twg thiaj muaj tseeb, … thiab saib [nws] yuav tsum zwm rau [lub koom txoos] twg.” Joseph tso siab rau Vajtswv hais tias Vajtswv yuav teb nws tej lus thov thiab qhia nws.

Thov nco ntsoov tias Joseph tsis tau thov kom paub tias qhov twg yog qhov yog. Tiam sis, nws thov kom paub qhov twg yog qhov yog nws thiaj li yuav ua raws li qhov yog ntawd. Joseph muaj kev ntseeg thov Vajtswv thiab nws yeej txiav txim siab tias nws yuav ua raws li tej lus teb uas nws tau txais.

“Xwv kom teb nws tej lus thov [tiag], Vajtswv Leej Txiv thiab Nws Leej Tub, Yexus Khetos, tau tshwm sim rau Joseph thiab qhib kev rau ‘kev muab txhij txhua txum tim rov qab los’ (Tes Hauj Lwm 3:21) raws li hais nyob hauv phau Npaivnpaum. Nyob hauv txoj kev ua yog toog no, nws kawm tias tom qab cov Thwj Tim tau tuag tas lawm, Khetos lub Koom Txoos hauv Phau Tshiab twb ploj mus thiaj tsis nyob hauv lub ntiaj teb no ntxiv lawm.” Joseph Smith yuav ua ib txoj hauj lwm tseem ceeb kom muab cov lus qhuab qhia, txoj cai, thiab tej kev khi lus thiab cov kab ke ntawm tus Cawm Seej lub Koom Txoos puag thaum ub txum tim rov qab los.

Joseph ua tim khawv tias: “Kuv pom ob tug Tib Neeg, uas ci ntsa iab thiab muaj yeeb koob uas yeej piav tsis tau, sawv ntawm kuv lawm saum nruab cua. Ib tug hais rau kuv, tuav kuv lub npe thiab taw tes rau tus sab tod, thiab hais tias—Tus no yog Kuv Leej Tub uas Kuv Hlub. Cia li mloog Nws hais!”

Los ntawm txoj kev ua yog toog no thiab lwm lub sij hawm uas tau txais kev tshwm sim, Joseph Smith to taub tias Vajtswv thiab Yexus Khetos paub nws, xav kom nws txais kev cawm seej mus ib txhis li, thiab muaj ib txoj hauj lwm rau nws ua. Nws kuj kawm tej yam tseem ceeb txog tej cwj pwm, lub xeeb ceem, thiab tej yam zoo tag nrho txog Pawg Vajtswv—thiab kawm tias Leej Txiv thiab Leej Tub nyias muaj nyias lub cev. Yexus Khetos yog Vajtswv Leej Tub tiag los ntawm sab ntsuj plig thiab sav cev nqaij daim tawv.

Joseph Smith tshaj tawm tias Leej Txiv Saum Ntuj Ceeb Tsheej thiab Yexus Khetos yeej muaj lub cev nqaij daim tawv. Nws hais tias, “Leej Txiv muaj ib lub cev muaj nqaij thiab muaj txha uas kov tau ib yam li tib neeg; Leej Tub los muaj thiab; tiam sis tus Vaj Ntsuj Plig Dawb Huv tsis muaj ib lub cev muaj nqaij thiab muaj txha, tiam sis yog ib tug Ntsuj Plig xwb.”

Kuv ua tim khawv tias qhov uas Leej Txiv thiab Leej Tub tau los rau Joseph Smith pom yog lub sij hawm uas qhib “lub sij hawm yuav muab txhua yam uas cov yaj saub dawb huv lub qhov ncauj tau hais txij thaum lub ntiaj teb chiv keeb los txum tim rov qab los.”

Qhov thib ob ntawm tej txuj ci tseem ceeb uas tshwm sim ua ntej tau muab tus Cawm Seej lub Koom Txoos rov qab txhim tsa yog kev txhais thiab luam Phau Ntawv Maumoos.

“Tau muab Vajtswv lub txiaj ntsim thiab lub hwj chim txhais lus rau Joseph Smith kom txhais ib phau ceev xwm txheej uas sau puag thaum ub—Phau Ntawv Maumoos: Ib zaj Tim Khawv Ntxiv txog Yexus Khetos. … Nyob hauv cov ntawv dawb ceev no muaj ib zaj lus uas hais txog Yexus Khetos txoj kev qhuab qhia rau ib co neeg nyob hauv lub Ntiaj Teb Sab Hnub Poob tsis ntev tom qab Nws txoj Kev Sawv Rov Los. [Phau Ntawv Maumoos] qhia txog lub hom phiaj ntawm lub neej no thiab piav txog Khetos cov lus qhuab qhia, uas tseem ceeb kawg nkaus rau lub hom phiaj ntawd. Yog cov vaj lug kub uas koom ua ke nrog phau Npaivnpaum, Phau Ntawv Maumoos ua tim khawv tias txhua tus neeg yog cov tub thiab cov ntxhais ntawm ib Leej Txiv Saum Ntuj uas muaj siab hlub, Nws muaj ib txoj hau kev rau peb lub neej, thiab Nws Leej Tub, Yexus Khetos, hais lus rau peb niaj hnub no ib yam li Nws tau hais puag thaum ub.”

Vim peb yog cov mej zeej hauv tus Cawm Seej lub Koom Txoos uas tau muab txum tim rov qab los, “Peb ntseeg tias phau Npaivnpaum yog Vajtswv txoj lus npaum li uas tau txhais yog; peb kuj ntseeg tias Phau Ntawv Maumoos yog Vajtswv txoj lus thiab.” Phau Ntawv Maumoos yog ib zaj lus tim khawv ntxiv txog Yexus Khetos, uas kuj pab qhia tias phau Npaivnpaum muaj tseeb, thiab muab tej lus tseeb los ntawm phau Npaivnpaum uas meej thiab muaj nqis heev txum tim rov qab los.

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg qhia tias lub Koom Txoos uas tus Cawm Seej tau txhim tsa, uas muaj Nws txoj cai, cov lus qhuab qhia, thiab tej kev khi lus thiab cov kab ke, los twb ploj mus tsis nyob hauv lub ntiaj teb no lawm. Raws li cov yaj saub puag thaum ub qhia tias yuav muab txhua yam txum tim rov qab los hauv hnub nyoog kawg, cov yaj saub thiab cov thwj tim puag thaum ub tau los muab txoj cai pov thawj hwj rau Joseph Smith thiab muab cov yawm sij pov thawj hwj rau nws. Nov yog qhov thib peb ntawm tej txuj ci tseem ceeb uas tshwm sim ua ntej tau muab tus Cawm Seej lub Koom Txoos rov qab txhim tsa.

Txoj cai pov thawj hwj cia Vajtswv cov tub qhe “kom sawv [Nws] cev thiab ua tej yam raws Nws lub npe.” “Cov yawm sij pov thawj hwj yog txoj cai kom coj kev siv lub pov thawj hwj kom pab Vajtswv cov me nyuam.”

Raws li Leej Txiv thiab Leej Tub coj, nyob rau xyoo 1829, Yauhas tus uas Muab Neeg Ua Kev Cai Raus Dej uas tau sawv rov los, tau muab txoj cai muab neeg ua kev cai raus dej kom zam txim rau tej kev txhaum txum tim rov qab los. Nyob rau xyoo ntawd, peb tug ntawm Yexus kaum ob tug Thwj Tim thaum ub—Petus, Yakaunpaus, thiab Yauhas—tau muab kev ua thwj tim thiab cov yawm sij ntawm txoj cai pov thawj hwj txum tim rov qab los.

Rau xyoo tom qab tau txhim tsa lub Koom Txoos, nyob hauv lub tuam Tuam Tsev Kirtland, Mauxes, Eli-as, thiab Eliyas tau muab txoj cai ntxiv rau Joseph kom thiaj li ua taus Vajtswv txoj hauj lwm hauv hnub nyoog kawg.

Mauxes muab cov yawm sij kom thiaj sau tau tsev neeg Ixayees rov qab los ua ke.

Eli-as muab cov yawm sij rau lub caij nyoog tso txoj cai ntawm Anplaham txoj moo zoo, tsis hais muab Anplaham txoj kev khi lus txum tim rov qab los.

Ces Eliyas muab cov yawm sij ntawm lub hwj chim muab neeg sib khi ua ke, thiaj li muaj txoj cai kom muab cov kab ke uas ua hauv lub ntiaj teb khi mus ib txhis li, xws li kev muab tsev neeg khi ua ke mus ib txhis li kom dhau kev tuag.

Thaum Joseph Smith muab Phau Ntawv Maumoos txhais, nws tau txais kev tshwm sim uas qhia tias yuav rov qab txhim tsa Yexus Khetos lub Koom Txoos. Tiam sis tus Tswv tau hais kom Joseph txhob muab Nws lub Koom Txoos txhim tsa tam sim ntawd. Tiam sis tus Tswv qhia Joseph tias, “los ntawm lub txiaj ntsim qhia tau tej yuav muaj los yav tom ntej thiab txais tau kev tshwm sim … [nws] yuav tsum txhim tsa Nws lub Koom Txoos dua ib zaug ntxiv rau hauv lub ntiaj teb.”

Twb txhim tsa lub Koom Txoos tsuas yog tom qab tau muab lub pov thawj hwj txum tim rov qab los thiab muab Phau Ntawv Maumoos luam tawm. Thawj zaug uas tau muab Phau Ntawv Maumoos luam tawm yog thaum lub Peb Hlis Ntuj 26, 1830, thiab twb txhim tsa lub Koom Txoos thaum lub Plaub Hlis Ntuj 6.

“Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg … yog Khetos lub Koom Txoos hauv Phau Tshiab uas Nws tau muab txum tim rov qab los. Lub Koom Txoos yeej txheem rau Yexus Khetos lub neej zoo tag nrho, uas yog lub Koom Txoos tus ncej zeb tag, thiab txheem rau Nws txoj Kev Theej Txhoj uas kav ib txhis thiab Nws txoj Kev Sawv Rov Los. Yexus Khetos twb tau rov qab hu cov Thwj Tim thiab tau muab txoj cai pov thawj hwj rau lawv. Nws caw peb txhua tus los cuag Nws thiab Nws lub Koom Txoos, txais tus Vaj Ntsuj Plig Dawb Huv, cov kab ke cawm seej, thiab muaj kev xyiv fab uas kav ib txhis.”

Qhov uas Leej Txiv thiab Leej Tub tshwm sim rau Joseph Smith, kev txhais thiab kev muab Phau Ntawv Maumoos luam tawm, thiab kev muab txoj cai thiab cov yawm sij pov thawj hwj txum tim rov qab los yeej yog tej yam uas yuav tsum ua kom thiaj li rov qab txhim tsa tus Tswv lub Koom Txoos 195 xyoos tas los.

Nyob hauv Phau Qub, tus yaj saub Daniyees tau txhais ib zaj ua npau suav txog ib lub pob zeb uas ntais rhe tawm ntawm ib lub pob tsuas yuav puv nkaus lub ntiaj teb. Ib xyoo tom qab tau muab lub Koom Txoos txhim tsa, tus Tswv tau qhia Joseph Smith tias twb rov qab muab cov yawm sij ntawm Vajtswv lub nceeg vaj “cob rau neeg nyob hauv ntiaj teb” [Yexus Khetos] txoj moo zoo yuav dov mus kom thoob rau ntiaj teb, ib yam li lub pob zeb uas muab txam tawm saum lub roob los uas tsis yog neeg txam.”

Kuv ua tim khawv tias: Tus Tswv tab tom ua raws li Nws tau cog lus lawm. Tab tom txhim tsa tus Cawm Seej lub Koom Txoos uas tau muab txum tim rov qab los nyob thoob plaws lub ntiaj teb thiab yog qhov uas Vajtswv yuav siv kom “coj ib puas tsav yam uas Vajtswv tau tsim los lawm, tsis hais tej uas nyob saum nruab ntug thiab tej uas nyob hauv ntiaj teb los nyob ua ke, thiab Vajtswv yuav tsa Yexus Khetos ua ib puas tsav yam ntawd tus thawj.”

Tus Tswv txoj hauj lwm hauv hnub nyoog kawg no “yog qhov uas Vajtswv haiv neeg hauv txhua lub caij nyoog tau sim ua; yog ib yam uas cov yaj saub, cov pov thawj thiab cov vaj ntxwv tau hais lus qhuab qhia txog ntau heev; lawv tau cia siab ntsoov rau lub caij nyoog uas peb nyob hauv; thiab lawv tau txais kev tshoov siab los saum ntuj ceeb tsheej los lawv thiaj tau hu nkauj thiab sau ntawv thiab kev qhia tshwm sim txog peb lub caij nyoog no.”

Nyob hauv lub caij nyoog tso txoj cai tshaj tawm txoj moo zoo uas yog lub caij nyoog kawg tseem ceeb tshaj, “kom yuav muaj txoj kev sib txuas tau tag nrho thiab txhij txhua thiab zoo tag nrho, thiab kev muab tej caij nyoog tso txoj cai, thiab tej yawm sij, thiab tej lub hwj chim, thiab tej lub yeeb koob coj los ham ua ke, thiab muab ua tshwm sim txij thaum Adas lub caij nyoog los txog rau lub sij hawm ziag no. Thiab tsis yog li no xwb, tiam sis tej yam uas yeej tsis tau muab ua tshwm sim los li txij thaum ntuj tsim teb raug los … yuav muab tej ntawd ua tshwm sim los … nyob hauv lub caij nyoog foom pub txhua tsav txhua yam.”

Tus Yaj Saub Joseph kuj piav hais tias, “Tag nrho cov kab ke thiab tej tes num uas yuav tsum ua raws li lub Pov Thawj Hwj, raws li tus uas Muaj Hwj Chim Tag Nrho tej lus qhia thiab tej lus txib nyob hauv txhua lub caij nyoog tso txoj cai, los yuav muaj hauv lub caij nyoog tso txoj cai kawg … thiaj li yuav muab txoj moo zoo txum tim rov qab los raws li tag nrho cov Yaj Saub Dawb Huv tau hais txog.”

Kuv twb sim hais ntsiab lus txog “txoj moo zoo” tseem ceeb tshaj thiab zoo kawg nkaus uas txhua tus neeg nyob thoob plaws lub ntiaj teb txais tau—yog txoj moo uas qhia tias tus Tswv Yexus Khetos tau muab Nws txoj moo zoo thiab lub Koom Txoos txum tim rov qab los hauv hnub nyoog kawg no.

Kuv caw txhua tus kawm thiab sim zaj lus no. Kuv cog lus tias cov neeg uas “thov Vajtswv thaum lawv kawm txog zaj lus ntawm lub Caij Nyoog Txum Tim Rov Qab Los thiab muab siab rau ntseeg yuav tau koob hmoov kom txais tau kev ua tim khawv tias zaj no yog los saum ntuj los thiab muaj lub hom phiaj uas yog npaj lub ntiaj teb rau peb tus Tswv thiab tus Cawm Seej, Yexus Khetos, txoj Kev Los Zaum Ob.” Thaum nej rau siab thov Vajtswv thiab xav tias nej yuav txais thiab nej yuav ua raws li tej yam uas Vajtswv teb, ib yam li tus tub hluas Joseph Smith xav, ces nej haj yam yuav muaj peev xwm to taub thiab ua raws li tej lus tim khawv uas los saum ntuj los.

Kuv ua tim khawv tias Vajtswv Leej Txiv uas Nyob Mus Ib Txhis yog peb Leej Txiv. Kuv ua tim khawv tias Yexus Khetos yog Leej Txiv tus Tub uas Nws Hlub thiab Nws Tib Leeg Tub ntawm sab cev nqaij daim tawv. Nws yog peb tus Cawm Seej thiab tus Txhiv Dim.

Thiab kuv zoo siab ua tim khawv tias Leej Txiv thiab Leej Tub tau tshwm los rau tus tub hluas Joseph Smith pom, thiaj li muaj kev muab Yexus Khetos txoj moo zoo txum tim rov qab los hauv lub caij nyoog kawg no. Phau Ntawv Maumoos yog ib zaj lus tim khawv ntxiv txog Yexus Khetos thiab muaj Vajtswv txoj lus. Peb rov qab muaj txoj cai pov thawj hwj kom sawv cev rau tus Cawm Seej thiab ua tej yam los ntawm Nws lub npe nyob hauv lub ntiaj teb. Thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Khetos lub Koom Txoos hauv Phau Tshiab uas Nws tau muab txum tim rov qab los. Kuv ua tim khawv tias tag nrho tej yam no muaj tseeb los ntawm tus Tswv Yexus Khetos lub npe dawb ceev, amees.