Txhob Ua Siab Tawv

Twb qhib txoj kev muab Yexus Khetos Txoj Moo Zoo Txum Tim Rov Qab Los thaum Vajtswv Leej Txiv thiab Nws Leej Tub tshwm sim rau tus tub hluas Joseph Smith, kom teb nws tej lus thov. Ib feem ntawm Kev Muab Txoj Moo Zoo Txum Tim Rov Qab Los no yog thaum Joseph Smith tau muab ib phau ceev xwm txheej txhais lus los ntawm Vajtswv lub txiaj ntsim thiab lub hwj chim. Phau no muaj “Vajtswv tej dej num nrog cov neeg thaum ub uas nyob cov teb chaws Amelikas thiab muaj qhov txhij txhua ntawm txoj moo zoo uas kav ib txhis li.”

Thaum kuv yog ib tug tub hluas, thaum kuv nyeem Phau Ntawv Maumoos, ua rau kuv xav paub vim li cas Lamas thiab Lemu-ees tsis tau ntseeg tej lus tseeb uas nkawd mloog, tsis hais thaum tus Tswv ib tug tim tswv tshwm sim thiab hais ncaj rau nkawd. Vim li cas Lamas thiab Lemu-ees tsis txo hwj chim thiab mloog nkawd txiv, Lihais, tej lus qhia, thiab mloog nkawd tus kwv Nifais tej lus?

Kuv twb kawm ib txoj kev teb lo lus nug no nyob hauv 1 Nifais, uas hais tias Nifais “nyuaj siab txog lawv txoj kev siab tawv.” Nifais nug nws ob tug tij laug hais tias, “Yog vim li cas neb lub siab yuav tawv ua luaj, thiab neb lub cim xeeb yuav dig ua luaj.”

Kev muaj lub siab tawv txhais li cas?

Lus Kaublim txoj kev txhais “siab tawv” hauv Phau Ntawv Maumoos yog 완악 (Wan-Aak: 頑惡). Lo lus no siv lub cim Suav “Wan” (頑), uas txhais tias “tawv ncauj” thiab “Aak” (惡), uas txhais tias “siab phem.” Thaum peb ua siab tawv, peb dig muag, thiab tej yam zoo nkag tsis taus hauv peb lub siab lub ntsws. Peb tawv ncauj zuj zus thiab pib tsom ntsoov rau tej kev ntshaw tej yam ntawm lub ntiaj teb, tsis qhib siab rau tej yam uas los ntawm Vajtswv los. Peb xaiv kom tsom ntsoov rau peb tej kev xav thiab tsis kam mloog lwm tus tej lub tswv yim thiab tej lus qhia. Peb xaiv kom txhob qhib siab rau tej yam uas los ntawm Vajtswv los tiam sis cia tej yam ntawm lub ntiaj teb no thiab tus yeeb ncuab ntxias peb. Thaum peb ua siab tawv, peb tiv tus Vaj Ntsuj Plig Dawb Huv lub hwj huam. Peb “qeeb heev nco txog tus Tswv,” thiab thaum sij hawm dhau mus peb “lub siab tsis xeev li” thiaj li tsis to taub Nws tej lus.

Amas tau qhia cov neeg nyob hauv Amoonaihas hais tias ib txhia yuav “xyeej Vajtswv tus Ntsuj Plig vim yog lawv txoj kev ua siab tawv.” Nws kuj qhia tias “cov uas yuav ua lawv lub siab tawv, yuav muab qhov uas tsawg dua ntawm txoj lus rau lawv kom txog thaum lawv tsis paub dab tsi kiag txog nws tej txuj ci uas neeg paub tsis txog.” Thaum kawg, tus Ntsuj Plig thim ntawm lawv mus, thiab tus Tswv “yuav tshem [Nws] txoj lus” ntawm cov uas ua rau lawv lub siab tawv mus ib yam li Lamas thiab Lemu-ees. Vim Lamas thiab Lemu-ees ib sij ua nkawd lub siab tawv, tsis mloog tus Vaj Ntsuj Plig Dawb Huv tej kev tshoov siab, thiab tau xaiv kom txhob ua raws li nkawd txiv thiab Nifais tej lus qhia, nkawd tau xyeej tej lus tseeb uas kav ib txhis li los ntawm Vajtswv.

Qhov fab ntxeev ntawm Lamas thiab Lemu-ees, yog Nifais uas tau txo nws lub hwj chim, thiab nrhiav tus Tswv tus Ntsuj Plig tej lus qhia. Yog li ntawd, tus Tswv tau ua rau Nifais lub siab mos muag. Nifais hais tias nws “tau thov tus Tswv; thiab saib seb nws tau los xyuas kuv, thiab tau ua rau kuv lub siab mos muag kom kuv thiaj ntseeg txhua lo lus uas kuv txiv tau hais.” Tus Tswv tau pab Nifais kom lees yuav, to taub, thiab ntseeg tag nrho Vajtswv tej txuj ci thiab Nws tej lus. Nifais thiaj muaj tus Vaj Ntsuj Plig Dawb Huv nrog nraim Nws nyob.

Peb yuav ua li cas kom tsis txhob muaj lub siab tawv?

Qhov thib ib, peb hloov siab lees txim txhua hnub los tau.

Peb tus Cawm Seej tau qhia tias, “Tus uas hloov siab lees txim thiab los cuag kuv ib yam li ib tug me nyuam yaus, kuv txais yuav tus ntawd.” Peb tus yaj saub uas peb hlub, Thawj Tswj Hwm Russell M. Nelson, tau qhia tias:

“Kev hloov siab lees txim yog tus yawm sij ntawm kev vam meej. Kev ntseeg ua rau peb mus tom ntej taug txoj kev khi lus.

“Thov tsis txhob ntshai los sis tos kom hloov siab lees txim. Dab Ntxwg Nyoog nyiam thaum nej nyuaj siab. … Pib hnub no mus kom muaj kev xyiv fab uas los ntawm kev tso tus neeg ntawm sab cev nqaij daim tawv tseg. Tus Cawm Seej yeej ib txwm hlub peb tiam sis qhov tseem ceeb Nws hlub peb thaum peb hloov siab lees txim.”

Thaum peb muaj kev xyiv fab vim peb ua peb lub siab mos muag thiab los cuag tus Tswv peb yuav “hloov los ua zoo li ib tug me nyuam, mloog lus, muaj siab mos siab muag, txo hwj chim, ua siab ntev, muaj kev hlub puv npo, txaus siab ua txhua yam uas tus Tswv pom tias tsim nyog muab rau nws ua, ib yam li ib tug me nyuam yaus txaus siab ua txhua yam rau nws txiv.”

Qhov thib ob, peb txo hwj chim los tau.

Kev hloov siab lees txim txhua hnub yuav ua rau peb txo hwj chim. Peb yuav xav txo peb lub hwj chim rau tus Tswv, ib yam li ib tug me nyuam yaus mloog nws txiv. Ces peb yuav muaj tus Vaj Ntsuj Plig Dawb Huv nrog peb nyob txhua lub sij hawm thiab peb lub siab yuav pib mos muag.

Kuv tus poj niam, Sue, thiab kuv wb paub ib khub niam txiv rau plaub xyoos tas los no. Thaum wb ntsib nkawd, tus txiv tsev yog ib tug mej zeej tshiab hauv lub Koom Txoos, thiab nws tus poj niam tseem nrog cov tub txib kawm txog txoj moo zoo. Ntau tus tub txib tau nrog nws tham kom pab nws los cuag Yexus Khetos. Wb tau xav tias nws muaj ib zaj lus tim khawv txog txoj moo zoo thiab paub tias lub Koom Txoos muaj tseeb. Nws tau hnov tus Ntsuj Plig ntau zaus thaum wb tuaj xyuas thiab tau koom tag nrho tej kev sib ntsib. Nws nyiam nrog cov mej zeej hauv pawg ntseeg tham. Tiam sis, nyuaj rau nws cog lus tias nws yuav ua kev cai raus dej. Muaj ib hnub nws nyeem Maulaunais 7:43–44, uas hais tias:

“Thiab ntxiv, saib seb kuv hais rau nej tias nws twb muaj tsis tau kev ntseeg thiab kev cia siab, tsuas yog tias nws yuav ua siab mos siab muag thiab txo siab txo ntsws xwb.

“Yog tsis li ntawd, [nej] txoj kev ntseeg thiab txoj kev cia siab twb tsis muaj qab hau, vim twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb.”

Tom qab nws nyeem tej nqe no, nws paub tias nws yuav tsum ua dab tsi. Nws tau xav tias nws to taub kev muaj siab mos siab muag thiab kev txo siab txo ntsws. Tiam sis nws tsis to taub txaus kom muaj kev ntseeg thiab cia siab rau txoj kev ua raws li Vajtswv cov lus txib. Nws yuav tsum muaj siab xav tso nws txoj kev tawv ncauj thiab nws lub tswv yim tseg. Nws tau pib txo nws lub hwj chim thaum nws hloov siab lees txim tiag tiag. Nws pib to taub kev txo hwj chim raws li Vajtswv xav. Nws tau tso siab rau Leej Txiv Saum Ntuj Ceeb Tsheej thiab thov kom ua rau nws lub siab mos muag. Los ntawm tej kev thov Vajtswv no, tus Ntsuj Plig tau ua tim khawv rau nws tias Leej Txiv Saum Ntuj Ceeb Tsheej xav kom nws ua kev cai raus dej.

Ob niam txiv no tau qhia tias nkawd yim txo hwj chim, nkawd yim txawj to taub Vajtswv txoj lus, thiab ua rau nkawd lub siab mos muag nkawd thiaj li tau coj raws li peb tus Tswv, Yexus Khetos, tej lus qhia.

Qhov thib peb, peb tso siab rau tus Cawm Seej los tau.

Nifais tau coj yam ntxwv zoo txog txoj kev cia kom nws lub siab mos muag thaum nws tso siab rau tus Tswv. Nws tau qhia hais tias, “Kuv tau tso siab rau koj, thiab kuv yuav tso siab rau koj mus ib txhis li. Kuv yuav tsis tso siab rau neeg lub hwj chim li.” Ib yam li ntawd, tus Tswv tau muab kev tshwm sim rau tus Yaj Saub Joseph Smith hais tias, “Koj cia li tso siab rau tus Ntsuj Plig uas coj mus ua qhov zoo—muaj tseeb tiag, ua ncaj ncees, txo hwj chim taug kev.” Thaum peb tso siab rau tus Tswv thiab cia siab rau Nws, Nws yuav ua kom peb lub siab mos muag, thiab Nws yuav txhawb nqa peb thaum peb raug kev sim siab, tej teeb meem, thiab kev txom nyem.

Yog peb hloov siab lees txim tiag tiag, txo peb lub hwj chim, thiab tso siab thiab cia siab rau tus Tswv, ces peb lub siab yuav mos muag. Ces Nws yuav muab Nws tus Ntsuj Plig nplua mias rau peb thiab qhia peb txog tej yam uas neeg tsis paub txog. Peb sawv daws yuav ntseeg tag nrho tej lus uas Nws tau qhia, thiab peb yuav to taub zoo zuj zus.

Peb tus Cawm Seej Yexus Khetos yog tus uas coj yam ntxwv txog kev muab siab mos siab muag. Nyob hauv 2 Nifais 31:7, peb nyeem hais tias, “Txawm tias nws dawb huv los, nws tseem ua qhia rau noob neej tias, raws li sab cev nqaij daim tawv nws tseem txo nws lub hwj chim rau Leej Txiv, thiab ua pov thawj rau Leej Txiv tias nws yuav mloog Leej Txiv lus kom ua raws li Leej Txiv tej lus txib.” Txawm yog Nws yog ib tug dawb huv thiab zoo tag nrho, Nws txo Nws lub hwj chim rau Leej Txiv thiab mloog Nws Txiv lus thaum Nws ua kev cai raus dej.

Thaum Nws lub neej hauv ntiaj teb yuav kawg, Yexus Khetos tau ua raws li Nws Leej Txiv lub siab nyiam thaum Nws haus lub khob dej iab. Kev raug mob no ua rau Nws “kom tshee hnyo vim yog txoj kev mob, thiab los ntshav ntawm txhua lub qhov hws, thiab raug txom nyem tag nrho sab cev nqaij daim tawv thiab sab ntsuj plig.” Tus Cawm Seej thov kom Nws “tsis xav haus lub khob dej iab, thiab tsum.” Nws hais tias, “Txawm li ntawd los, cia Leej Txiv tau lub yeeb koob, thiab [Nws] tau haus thiab ua tiav [Nws] tej kev npaj rau noob neej.”

Cov kwv tij thiab cov muam, twb tau muab kev ywj siab xaiv kev ncaj ncees rau peb. Peb xaiv tau kom ua peb lub siab tawv, los sis peb xaiv tau kom muaj lub siab mos muag. Niaj hnub nyob hauv peb lub neej, peb xaiv tau ua tej yam uas caw tus Tswv tus Ntsuj Plig nkag los nyob hauv peb lub siab. Kuv paub tias thaum peb xaiv ua li no, ces yuav muaj kev kaj siab thiab kev xyiv fab.

Cia peb coj raws li peb tus Cawm Seej, Yexus Khetos, tus yam ntxwv, tus uas ua raws nraim li Leej Txiv lub siab nyiam. Thaum peb ua li ntawd, tus Tswv tau cog lus rau peb hais tias, “Vim saib seb, kuv yuav muab lawv sau los ib yam li ib tug poj qaib sau nws cov me nyuam los rau hauv nws qab tis, yog hais tias lawv tsis ua kom lawv lub siab tawv qhawv.” Los ntawm Yexus Khetos lub npe, amees.