Thiab Peb Hais txog Khetos

Thaum kuv tus poj niam, Lesa, thiab kuv rov qab los tsev tom qab tau hla hiav txwv ua ib txoj hauj lwm, wb nkag hauv ib lub tsev txais neeg caij nyab hoom kom npaj ya ib zaug ntxiv—thaum tsaus ntuj—kom rov qab mus tsev. Thaum wb nrog lwm tus tos ntev heev, ua rau wb pib pom tias cov uas nrog peb caij nyab hoom txhawj heev txog qhov uas lawv yuav mus rau lwm lub nyab hoom lig dhau, yuav tsum mus dhau chaw saib phau ntawv hla ciam teb thiab daim ntawv tso cai mus lwm lub teb chaws, thiab mus dhau tej qhov chaw kuaj seb puas nyab xeeb.

Wb twb txog qhov chaw uas muaj ib tug tub ceev xwm saib xyuas kev hla teb chaws uas zoo li nws tsis quav ntsej txog qhov uas tib neeg nyuaj siab txhawj xeeb hauv chav ntawd. Tus tub ceev xwm ntawd maj mam cev tes tuav kuv cov ntawv tsis sib ntsia, saib kuv daim duab, saib cov ntawv, ces thaum kawg ntaus thwj rau kuv phau ntawv hla ciam teb.

Ces nws cev tes tuav Lesa cov ntawv. Nws ntsej muag tsis zoo siab li, nws nyo hau thiab tsom ntsoov rau nws tej hauj lwm, ces saib xyuas cov ntawv zoo zoo, tsom ntsoov rau cov ntawv uas nyob rau ntawm nws. Ces ua rau wb xav tsis thoob thaum nws cia li nres, tsa taub hau, thiab ntsia Lesa yam li muaj siab dawb siab zoo. Nws luag nyav ntaus thwj rau Lesa phau ntawv hla ciam teb ces muab cov ntawv rov qab rau Lesa. Kuv tus poj niam kuj luag nyav, txais cov ntawv, ces hais lus sib ntsib dua.

“Ua cas no?” Kuv xav tsis thoob nug nws.

Ces Lesa muab qhov uas tus ceev xwm tau pom—ib daim duab me me txog tus Cawm Seej. Nyob hauv Lesa lub hnab los daim no twb nkag hauv cov ntawv ntawm Lesa phau ntawv hla ciam teb. Tus tub ceev xwm saib xyuas kev hla ciam teb tau pom daim no. Ua rau nws lub ntsej muag hloov tag nrho.

Kev Tshav Ntuj thiab Qhov Tseeb, los ntawm Simon Dewey, txais los ntawm altusfineart.com, © 2025, tau kev tso cai siv

Daim duab me me txog tus Cawm Seej twb ua rau ob tug neeg uas tsis sib paub sib koom siab. Twb ua kom ib tug neeg hloov siab, thiaj li pom tau qhov zoo nkauj, txuj ci tseem ceeb thiab qhov uas muaj Yexus Khetos txoj Kev Kaj tiag tiag. Txij thaum ntawd los, kuv pheej xav tsis thoob txog lub sij hawm me me ntawd thiab ua rau kuv zoo siab vim Khetos txoj Kev Kaj hloov tau Vajtswv cov me nyuam lub siab li no.

Peb yog cov uas coj raws li Yexus Khetos, thiab peb xav txais thiab faib Nws txoj kev kaj. Nyob hauv lub npe rau lub Koom Txoos yog peb txoj kev ntseeg tias “tus ncej tas … yog Yexus Khetos ntag.” Dhau los ntawm cov yaj saub puag thaum ub thiab niaj hnub nim no, peb Leej Txiv Saum Ntuj Ceeb Tsheej tau txib peb kom “mloog Nws hais!” thiab “los cuag Khetos.” “Peb thiaj hais txog Khetos, peb zoo siab rau Khetos, peb qhia txog Khetos, [thiab] peb qhia tej uas yuav muaj los yav tom ntej txog Khetos.”

Peb qhia tias Yexus Khetos yog Vajtswv Leej Tub, thiab thaum Nws ua hauj lwm qhuab qhia hauv lub ntiaj teb no, Yexus tau qhia txog Nws txoj moo zoo thiab txhim tsa Nws lub Koom Txoos.

Peb ua tim khawv tias Yexus tau theej txhoj rau peb tej kev txhaum thaum Nws raug mob hauv lub Vaj Khexemanes, raug ntsia saum ntoo khaub lig, ces Nws sawv rov los.

Peb zoo siab kawg vim los ntawm tus Cawm Seej txoj kev txi theej txhoj, thiaj zam tau peb lub txim thiab ntxuav tau peb tej kev txhaum mus thaum peb hloov siab lees txim. Qhov no ua rau peb nyob kaj siab lug thiab qhib kev rau peb rov qab mus cuag Vajtswv thiab txais kev xyiv fab tag nrho.

Peb qhia tej uas yuav muaj los yav tom ntej hais tias vim Yexus tau sawv rov los, kev tuag tsis yog qhov kawg tiam sis yog ib qho kom pab peb mus tom ntej. “Peb txhua tus yuav sawv rov los tom qab peb tuag. Qhov no txhais tias txhua tus neeg tus ntsuj plig thiab lub cev yuav rov qab koom ua ke thiab nyob mus ib txhis.”

Cov yaj saub niaj hnub no—uas txais kev tshwm sim los ntawm Vajtswv kom qhia thiab coj peb mus—caw peb los cuag Khetos ntau zuj zus. Lawv pab peb haj yam tso siab rau Nws, mloog, thiab ntsia Nws. Peb hais tau ntau yam uas Thawj Pawg Thawj Tswj Hwm hloov thiab tshaj tawm kom pab peb tsom ntsoov rau Yexus Khetos. Ib txhia yog li no:

• Kev txiav txim muab lub npe “lub Koom Txoos Maumoos” pauv thiab siv lub npe raug, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

• Qhov uas muaj cov duab tshiab txog Yexus Khetos dai hauv tej tsev sib ntsib.

• Lub Koom Haum Ntxhais Hluas thiab tej pawg Pov Thawj Hwj Aloos tej ntsiab lus thiab cov nkauj tsom ntsoov rau Yexus Khetos, xws li ob zaj nkauj “Kuv Yog Yexus Khetos Ib tug Thwj Tim” thiab “Ntsia Ntsoov Yexus Khetos.”

• Tej lus qhia ntxiv hais tias Yexus Khetos txoj Kev Theej Txhoj thiab Kev Sawv Rov Los yog ob qho tseem ceeb tshaj plaws hauv lub ntiaj teb zaj keeb kwm.

• Kev ua koob tsheej Easter hauv ib lub caij tsis yog ib hnub xwb, uas tsom ntsoov rau Yexus Khetos.

• Kev tsim ib lub cim tshiab txog Yexus Khetos lub Koom Txoos thiab kev qhia txog txoj kev siv lub cim no.

Cia peb xav seb tej yam no tau pab li cas. Qhov thib ib, lub cim txog lub Koom Txoos.

Nyob rau xyoo 2020, Thawj Tswj Hwm Russell M. Nelson tau tshaj tawm txog ib lub cim tshiab rau lub Koom Txoos. Lub cim no piav txog qhov tseeb hais tias Yexus Khetos yog lub hauv paus ntawm Nws lub Koom Txoos thiab peb yuav tsum tsom ntsoov rau Nws hauv peb lub neej. Peb pom tau lub cim no nyob hauv cov ntawv tso cai nkag tuam tsev, hauv lub Koom Txoos tej qhov website thiab cov ntawv xov xwm, lub cim rau qhov app Txoj Moo Zoo cov Ntawv, thiab kuj tso rau cov tub rog daim cim ID rau lub Koom Txoos cov mej zeej hauv pawg tub rog. Lub cim no muaj lub Koom Txoos lub npe hauv ib lub hauv paus thiab ua rau peb nco ntsoov tias Yexus Khetos yeej yog tus Ncej Zeb Tag, saib nov yog lus Khabmeem thiab twb muab txhais ua 145 yam lus.

Hauv plawv ntawm lub cim yog ib daim duab txog Bertel Thorvaldsen kev puab tus neeg pob zeb Christus, uas ua rau tib neeg coob xav txog lub Koom Txoos thiab muaj nyob hauv tej qhov chaw rau tib neeg tuaj xyuas thiab tshav tuam tsev thoob plaws lub ntiaj teb. Daim duab no hauv lub Koom Txoos lub cim qhia tias peb yuav tsum tsom ntsoov rau Khetos hauv txhua yam peb ua. Ib yam li ntawd, tus Cawm Seej txoj kev cev tes ua rau yus nco txog Nws txoj kev cog lus tias Nws yuav khawm txhua tus uas los cuag Nws. Lub cim no yog ib qho piv txwv kom pom tau tus Cawm Seej Yexus Khetos txoj kev hlub thiab ua rau peb nco txog tus Khetos uas muaj sia nyob.

Vim kuv xav xav paub heev, kuv tau nug tej tsev neeg thiab phooj ywg coob txog ib yam tseem ceeb ntawm lub Koom Txoos lub cim. Xav tsis thoob uas neeg feem coob tsis paub txog ib qho dawb huv uas nyob hauv lub cim no. Yexus Khetos sawv hauv qab cov pob zeb ua nqeg. Qhov no piv txog tus Cawm Seej txoj kev sawv rov los thaum tawm hauv lub ntxa los. Peb yeej ua koob tsheej txog tus Khetos uas muaj sia nyob, tus uas sawv rov los, tsis hais thaum siv hauv lub Koom Txoos lub cim los yog.

Nim no cia peb xav txog qhov uas Easter tseem ceeb npaum li cas. Nyob hauv Thawj Pawg Thawj Tswj Hwm zaj lus txog Easter, lawv twb hais kom peb “ua koob tsheej txog peb tus Cawm Seej txoj Kev Sawv Rov Los thaum lawv kawm Nws tej lus qhia thiab pab tsim tej kab lig kev cai Easter nyob hauv peb koog zej zog, qhov tseem ceeb yog nyob hauv peb tsev neeg.” Los yog hais tias, lawv tau yaum peb kom ua tej yam siab dua thiab dawb huv dua thaum ua koob tsheej txog Easter.

Kuv nyiam tej kev tshwm sim txog Easter uas tseem los thiab kuv ua nej tsaug rau tej yam nej siv zog ua kom muaj ib lub caij Easter uas dawb huv. Ntxiv rau kev muaj kev sib ntsib txais lub cim nco txog rau ib teev xwb thaum Hnub Caiv Easter, lwm yam ntxim ua yog tej yam xws li tej kev sib ntsib hawm Vajtswv hauv nej pawg ntseeg los sis ceg txheem ntseeg thaum tsaus ntuj thiab tej yam ntxim ua thaum Hnub Caiv Toov Laj thiab lub Lim Tiam Dawb Huv. Tej kev nco txog Yexus no muaj tej yam uas cov me nyuam cov tub hluas ntxhais hluas ua tau thiab muaj tej pawg hu nkauj los ntawm tej lub koom txoos uas koom ua ke. Lwm tus tau qhib tsev sib ntsib ua yeeb yam txog tus “Khetos uas Muaj txoj Sia Nyob” rau cov mej zeej thiab cov phooj ywg saib thiab tau koom tes ua koob tsheej txog Easter nrog tej pawg ntseeg ntuj hauv zej zog.

Tej yam ntxim ua li no ua rau peb nco txog neeg coob hauv lub nroog Yeluxalees uas tau koom ua ke tsa suab qhuas tus Cawm Seej thaum Nws nkag los hauv lub nroog ntawd. Peb kuj txais kev tshoov siab los ntawm nej tej lus teb Thawj Pawg Thawj Tswj Hwm tej kev caw nej los teev tiam hauv tsev nrog nej tsev neeg kom nco txog hnub tseem ceeb no.

Kuv ntseeg tias tsev neeg txoj kev teev tiam hauv lub caij Easter yeej zoo dua li qub. Ob xyoos tas los no, kuv tau hais txog peb tsev neeg txoj kev txiav txim siab peb yuav hwm Easter zoo dua. Kuv lees hais tias, peb tseem ua txoj hauj lwm no. Peb yeej ib txwm noj ib pluas mov loj thaum Hnub Caiv Easter, muaj pob tawb Easter thiab nrhiav tej qe Easter, es peb tseem ua li ntawd. Tiam sis, qhov uas peb txhob txwm ua tej yam txhawb pab peb sab ntsuj plig kom tsom ntsoov rau Yexus Khetos thiab Nws txoj Kev Theej Txhoj thaum peb ua koob tsheej ces ua rau peb xav zoo zoo txog peb txoj kev nco txog qhov dawb huv tshaj ntawm tej yam peb ua no.

Xyoo no yog zaum peb uas peb yuav sim nco txog Yexus Khetos hauv lub caij Easter ntxiv. Ib yam li ua thaum lub caij Christmas, peb tsev neeg txoj kev ua yeeb yam thaum Hnub Easter muaj tej khaub ncaws uas hnav, kev nyeem vaj lug kub los ntawm Phau Tshiab thiab Phau Ntawv Maumoos, cov nkauj, cov duab txog Easter, cov nplooj toov laj—thiab yog kuv hais tseeb mas, muaj kev kub ntxhov me ntsis thiab. Cov me nyuam thiab cov xeeb ntxwv nyeem thiab hais tej lus qhuas ntawm Hnub Caiv Toov Laj hais tias “Hauxanas … Thov Vajtswv foom koob hmoov rau tus uas Vajtswv txib los; Cia li qhuas Vajtswv tus uas nyob saum ntuj ceeb tsheej” thiab “Tus no yog Yexus … uas tuaj pem … Kalilais tuaj” yeej tseem ceeb npaum li thaum hais tias “Neeg tau zoo nyob kaj siab lug” hauv lub caij Christmas.

Nim no peb nyiam tej khoom dai rau ub no uas txawv thiab. Peb ib txwm tsuas muaj cov luav thiab cov qe Easter xwb tiam sis nim no muaj tus Christus thiab cov duab txog lub ntxa uas tsis muaj leej twg haud, tus Cawm Seej uas sawv rov los tshwm sim hauv lub vaj ntawd, thiab tus Cawm Seej txoj kev tshwm sim rau cov Neeg Nifais. Peb kuj sim ua kom ua koob tsheej hauv lub caij Easter thiab tsis siv ib hnub xwb. Peb sim sib tham, xav txog thiab ua koob tsheej txog Hnub Caiv Toov Laj thiab Hnub Friday Zoo thiab txog tej xwm dawb ceev uas tau ua hauv lub Lim Tiam Dawb Huv.

Easter muab cib fim rau peb hwm Yexus Khetos txoj kev txi theej txhoj thiab Nws txoj Kev Sawv Rov Los uas muaj tiag tiag. Peb nyuaj siab kawg thaum peb xav txog tus Cawm Seej txoj kev raug txom nyem hauv lub vaj thiab nyob saum lub roob Khaulakhauthas, tiam sis peb zoo siab kawg thaum peb xav txog lub ntxa uas tsis muaj leej twg haud thiab cov tim tswv tej lus hais tias, “Nws sawv rov los lawm!”

Tsis ntev tas los, cov lus uas txhawb peb lub siab los ntawm Thawj Pawg Thawj Tswj Hwm zaj lus kom peb “tos ntsoov Easter thiab Yexus Khetos txoj Kev Sawv Rov Los—uas yog txoj moo zoo kawg nkaus rau noob neej” yeej ua rau peb nco qab tias lub caij no zoo npaum li cas. Txawm yog muaj cov kws kawm txuj ci kev ntseeg Khetos coob zuj zus uas xav tias Kev Sawv Rov Los yog ib zaj lus piv txwv los yog ib lub cim xwb, peb qhia tseeb tias peb cov lus qhuab qhia hais tias Yexus Khetos txoj “Kev Sawv Rov Los txhais tias txhua tus uas tau nyob hauv lub ntiaj teb no yuav sawv rov los, thiab Yexus twb sawv rov los tiag tiag.” “Txhua tus puav leej [ntawm Adas roj ntsha yuav] raug kev ploj kev tuag, … ib yam nkaus li ntawd, [dhau los ntawm Yexus Khetos] txhua tus yuav sawv hauv qhov tuag rov qab los.” Yexus Khetos tau muab kev tuag tej hlua tu nrho rau txhua leej txhua tus uas tau muaj sia nyob.

Peb yeej zoo siab rau txoj kev tshav ntuj uas Yexus muab rau peb. Peb ntseeg Nws tej lus hais tias “tus uas muaj kev hlub loj tshaj plaws yog tus uas zoo siab tuag theej nws cov phooj ywg.”

C. S. Lewis hais tias cov Thwj Tim xav tias “kev tshaj tawm kev ntseeg Khetos txhais tias yuav tshaj tawm txog Kev Sawv Rov Los. … Kev Sawv Rov Los yog lub ntsiab ntawm txhua zaj lus qhia txog Yexus Khetos nyob hauv phau Tes Hauj Lwm. Kev Sawv Rov Los, thiab tej yam uas muaj los ntawm Kev Sawv Rov Los, yog ‘txoj moo zoo’ uas cov neeg ntseeg Khetos tau qhia.

Kuv tshaj tawm tias “muaj ib txoj kev sawv rov los, … lub qhov ntxa thiaj tsis muaj yeej, thiab Khetos kov yeej qhov uas kev tuag muaj kuab heev tas lawm.”

Kuv xaus kuv zaj lus ua tim khawv hais tias tag nrho cov uas ua raws li peb tus yaj saub thiab nws ob tug pab cuam tej lus caw kom ua tib zoo ua koob tsheej txog tej yam dawb huv ntawm lub caij Easter cov neeg ntawd yuav nrog Yexus Khetos sib raug zoo dua.

Ob peb hnub tas los, kuv kawm txog ib tug pog uas qhia zaj dab neeg Easter rau nws tus tub xeeb ntxwv uas muaj plaub xyoo thaum nws siv tej khoom me me piv txog lub ntxa, daim txiag zeb uas npog lub rooj ntxa, Yexus, Maivliag, cov thwj tim, thiab tus tim tswv. Tus me nyuam tub ua tib zoo saib thiab mloog thaum nws pog qhia txog kev muab Yexus tso hauv lub ntxa, kev muab lub ntxa kaw thiab qhib, thiab lub vaj ntawm txoj Kev Sawv Rov Los. Ces nws ua tib zoo rov qab hais zaj dab neeg hais txhua qhov rau nws niam nws txiv thaum nws muab tej khoom me me txav mus txav los nws tus kheej. Tom qab lub sij hawm zoo no, nws pog nug nws seb yog vim li cas peb muaj Easter. Tus me tub ntsia nws pog thiab hais li ib tug me nyuam hais tias, “Vim Nws muaj sia.”

Kuv hais lus tim khawv li nws—thiab nej, thiab cov tim tswv thiab cov yaj saub—hais tias, Nws twb sawv rov los thiab Nws muaj sia nyob, kuv ua tim khawv li no, los ntawm Yexus Khetos lub npe, amees.