Cov Koob Hmoov uas Txhawb Nqa

Vim kuv ua hauj lwm hauv Pawg Thawj Npisov, kuv twb muaj cib fim ntsib ib Tsoom Haiv Neeg Ntseeg hauv Hnub Nyoog Kawg nyob thoob plaws lub ntiaj teb uas muaj kab lig kev cai sib txawv. Nej txoj kev ntseeg uas khov kho thiab kev hwm tus Tswv Yexus Khetos ua rau kuv txais tau kev tshoov siab. Tiam sis kuv kuj xav txog qhov uas nej nyias muaj nyias tej xwm txheej nyuaj—tej teeb meem xws li kev mob kev nkees, kev xiam oob qhab, tsis muaj txaus tau noj tau haus, tsis muaj cib fim yuav poj niam yuav txiv los sis kawm ntawv, lwm tus ua lim hiam, thiab lwm yam teeb meem los sis ciaj ciam. Tej lub sij hawm, zoo li tej kev sim siab no tab kaum nej txoj kev vam meej thiab thiab tsim teeb meem rau nej txoj kev xav ua neej raws li txoj moo zoo, thiaj li nyuaj rau nej ua hauj lwm, teev ntuj, thiab ua tej tes num dawb ceev.

Kuv cov phooj ywg, yog tias tej xwm txheej ntawm lub neej no ua rau nej xav tias nej ua tsis taus los sis nyuaj rau nej ua tej yam kuv xav kom nej paub tias: Tus Tswv hlub nej txhua tus. Nws paub nej raug xwm txheej dab tsi, thiab nws qhib rooj ntug kom nej txais tau cov koob hmoov txawm yog nej raug teeb meem dab tsi loj xij.

Kuv tau kawm qhov tseeb no los ntawm ib lub sij hawm uas tau tshoov kuv lub siab tau ntev, txawm yog lwm tus yuav xav tias yog ib qho tsis tseem ceeb los. Thaum kuv muaj 22 xyoos, thaum kuv ua tub rog hauv cov Neeg Fab Kis Pawg Tub Rog Tsav Nyab Hoom nyob hauv Paris, kuv zoo siab kawm hais tias Txwj Laug Neal A. Maxwell, tus Tswv ib tug Thwj Tim, yuav los hais lus hauv ib lub rooj sab laj nyob ntawm Champs-Élysées. Tiam sis, ua ntej kev sib ntsib ntawd, kuv tau txais kev txib thauj ib tug nom mus rau tshav nyab hoom thaum tib lub sij hawm uas kuv yuav mus mloog lub rooj sab laj ntawd.

Kuv poob siab lawm. Tiam sis kuv yeej xav mus heev, kuv thiaj li thauj tus nom mus ces tsav ceev rau lub rooj sab laj ntawd. Tom qab kuv nrhiav chaw nres tsheb, kuv khiav mus rau Champs-Élysées mus rau qhov chaw sib ntsib thiab ua tsis taus pa vim tshuav tsib feeb ua ntej kev sib ntsib yuav kawg. Tib lub sij hawm uas kuv los txog, kuv hnov Txwj Laug Maxwell hais tias, “Tam sim no kuv yuav foom tus thwj tim txoj koob hmoov rau nej.” Tam sim ntawd, kuv txais kev tshoov siab rau kuv sab ntsuj plig uas kuv yeej yuav nco ntsoov. Tus Ntsuj Plig tau tshoov kuv lub siab thiab zoo li cov lus ntawm txoj koob hmoov ntawd nkag hauv kuv lub siab tag nrho, zoo li nws hais li ntawd rau kuv ib leeg xwb.

Qhov uas kuv txais hnub ntawd yeej yog ib yam kev nplij siab me me uas muaj hwj chim heev ntawm Vajtswv txoj hau kev rau Nws cov me nyuam; Thaum peb raug xwm txheej thiaj li ua tsis taus ncaj ncees raws li peb lub siab xav ua, tus Tswv yuav muab tej yam txhawb nqa peb kom peb txais tau cov koob hmoov uas Nws tau cog lus rau peb.

Qhov tseeb uas nplij peb lub siab no yeej nyob ntawm peb lub ntsiab cai tseem ceeb nyob hauv Yexus Khetos txoj moo zoo uas tau muab txum tim rov qab los.

1. Vajtswv hlub peb txhua tus zoo tag nrho. “Nws caw [peb] txhua tus kom los cuag nws thiab los txais yuav nws txoj kev tshav ntuj.” Nws txoj kev txhiv dim ua rau peb txhua leej txhua tus muaj cib fim kom txais tau cov koob hmoov ntawm kev cawm seej thiab kev tsa nto.

2. Vim Vajtswv ncaj ncees thiab muaj kev hlub tshua thiab Nws txoj hau kev zoo tag nrho, Nws yuav tsis rau txim rau peb yog muaj tej yam uas peb kav tsis taus. Txwj Laug Neal A. Maxwell piav hais tias “Vajtswv … muaj lub siab hlub tshua suav tej yam uas peb tau xav thiab ua, tiam sis nws kuj suav seb peb raug xwm txheej nyuaj npaum li cas thiab.”

3. Dhau los ntawm Yexus Khetos thiab Nws txoj Kev Theej Txhoj, peb yuav muaj zog txaus nyiaj kom dhau tag nrho tej teeb meem hauv lub neej no. Ib yam li Amas qhia tias, tus Cawm Seej tau ris tej kev txhaum ntawm cov uas hloov siab lees txim, tiam sis Nws kuj ris “nws cov neeg tej kev mob thiab tej kev nkeeg” thiab lawv “tej kev qaug dag qaug zog.” Yog li ntawd, tus Tswv tsis txhiv peb dim tej yam peb ua yuam kev xwb, Nws txoj kev hlub tshua thiab txoj kev tshav ntuj kuj txhawb nqa peb dhau tej yam tsis ncaj ncees, tej kev qaug zog, thiab tej ciaj ciam ntawm lub neej no.

Tiam sis peb yuav tsum ua tej yam kom txais cov koob hmoov uas txhawb nqa peb no. Tus Tswv hais kom peb ua “txhua yam uas peb muaj peev xwm ua” thiab “muab tag nrho nej lub siab lub ntsws ua kev tiam pub rau nws.” Ua li no mas peb yuav tsum xav ua tiag tiag, rau siab ntseeg, thiab mob siab ua raws nraim li Nws cov lus txib thiab hloov peb lub siab kom ua raws li Nws lub siab nyiam.

Thaum twg tej yam uas peb rau siab ua tseem tsis yog raws li peb xav vim peb raug xwm txheej uas peb kav tsis taus, tus Tswv tseem yuav xav tias tej kev xav hauv peb lub siab yog ib txoj kev tiam tsim nyog. Thawj Tswj Hwm Dallin H. Oaks qhia tias, “Peb yuav tau koob hmoov yog peb muaj lub siab xav ua ncaj ncees txawm yog peb raug xwm txheej kom ua tsis taus tej yam ncaj ncees ntawd raws li peb xav.”

Thaum tus Yaj Saub Joseph Smith txhawj txog nws tus tij laug Alvin, uas tau tuag ua ntej nws txais cov kab ke ntawm txoj moo zoo, Joseph tau txais kev tshwm sim uas nplij nws lub siab no: “Thiab tag nrho cov uas tuag txij no mus es tsis tau paub txog [txoj moo zoo], cov uas yeej yuav xav txais txoj moo zoo nrog tag nrho lawv lub siab, lawv yuav yog cov uas tau [Vajtswv] lub nceeg vaj [xilethi-aus] ua lawv tug.” Ces tus Tswv hais tias, “Vim kuv, tus uas yog tus Tswv, yuav txiav txim rau neeg sawv daws raws li tej yam lawv ua, raws li tej kev xav tau ntawm lawv lub siab.”

Qhov uas tus Tswv suav tsis yog nyob ntawm seb peb puas muaj peev xwm ua xwb, tiam sis nyob ntawm seb peb puas txaus siab ua txhua yam peb ua tau kom coj raws li peb tus Cawm Seej.

Ib tug phooj ywg tau nplij ib tug tub txib hluas thaum nws nyuaj siab vim nws txoj kev mob ua rau nws yuav tsum mus tsev ntxov, txawm yog nws tau thov Vajtswv tiag tiag thiab xav ua hauj lwm heev. Tus phooj ywg no tau hais ib nqe vaj lug kub uas tus Tswv hais tias thaum Nws cov me nyuam “nrog tag nrho lawv lub dag zog” thiab “tsis tsum lawv txoj kev rau siab” ua raws li Nws cov lus txib, “thiab lawv cov yeeb ncuab [los yog tej xwm txheej phem hauv peb lub neej] … tab kaum lawv txoj kev ua txoj hauj lwm ntawd, saib seb, yog kuv lub siab xav tau tias tsis tas yuav tseev kom cov neeg cov tub ki ntawd txhais tes ua txoj hauj lwm ntawd ntxiv lawm, tiam sis kom txais yuav lawv tej kev tiam.”

Kuv tus phooj ywg ua tim khawv rau tus tub hluas no tias Vajtswv paub hais tias nws tau ua zoo npaum li nws ua taus kom ua hauj lwm. Kuv tus phooj ywg qhia rau nws tias tus Tswv tau txais nws txoj kev tiam thiab yeej yuav muab tag nrho cov koob hmoov uas tus Tswv cog lus tias cov tub txib uas rau siab ntseeg yuav txais.

Tus Tswv cov koob hmoov txhawb nqa pheej los ntawm lwm tus txoj kev ua siab zoo thiab txoj kev pab kom peb muaj peev xwm ua tej yam uas peb ua tsis taus peb tus kheej. Kuv nco txog ib lub sij hawm thaum wb nyob deb ntawm wb ib tug ntxhais nyob hauv Fabkis Teb, es wb pab tsis taus nws hlo li tom qab nws txoj kev yug me nyuam uas ua rau nws sab heev. Tib lub lim tiam ntawd wb pawg ntseeg nyob hauv Utah nrhiav kev pab ib tug niam tsev uas nyuam qhuav yug ob tug me nyuam ntxaib. Kuv tus poj niam, Valérie, tau pab nqa ib pluas mov rau tus poj niam no, thiab thov Vajtswv rau tus niam tsev tshiab no thiab wb tus ntxhais ib yam. Tsis ntev tom qab ntawd, wb kawm tias cov poj niam hauv wb tus ntxhais pawg ntseeg nyob hauv Fabkis Teb tau npaj ua mov rau wb tus ntxhais tsev neeg. Wb xav tias, Vajtswv tau teb wb tej lus thov, thiab txib Nws cov tim tswv kom nplij wb tus ntxhais lub siab thaum wb ua tsis taus.

Thaum peb raug tej teeb meem thiab tej kev qaug zog, thov kom peb yuav nco txog peb cov koob hmoov—peb tej txiaj ntsim, tej yam peb muaj, thiab peb lub sij hawm—thiab siv tej ntawd kom pab cov uas txom nyem. Thaum peb ua li ntawd, tsis yog peb yuav foom koob hmoov rau lwm tus xwb tiam sis peb kuj yuav txais kev kho thiab kev txhawb nqa hauv peb lub neej.

Ib txoj kev zoo tshaj rau peb pab tau lwm tus txais Vajtswv cov koob hmoov uas txhawb nqa yog thaum peb ua tej hauj lwm sawv cev rau peb cov poj koob yawm txwv nyob hauv tus Tswv lub tsev. Thaum peb sawv lawv cev ua kab ke rau lawv, peb koom tes ua tus Tswv txoj hauj lwm cawm seej, siv peb tej txiaj ntsim thiab tej kev muaj peev xwm kom foom koob hmoov rau cov uas tsis tau muaj cib fim txais tau tej ntawd nyob hauv lawv lub neej.

Tej kev pab uas peb muab hauv cov tuam tsev dawb huv ua rau peb nco qab hais tias tus Cawm Seej txoj kev tshav ntuj yeej kav ntev dhau lub neej no. Nyob hauv lub neej tom ntej no, tej zaum peb yuav muaj cib fim tshiab kom ua taus tej yam uas peb ua tsis taus hauv lub neej no. Hais rau cov poj niam uas tseem tsis tau nrhiav ib tug khub mus ib txhis li, Thawj Tswj Hwm Lorenzo Snow hais tias: “Tsis muaj ib tug Neeg Ntseeg hauv Hnub Nyoog Kawg uas ua neej rau siab ntseeg uas yuav xiam ib yam dab tsi vim nws tsis tau ua tej yam uas tsis muaj cib fim ua. … Lawv yuav muaj tag nrho cov koob hmoov, kev tsa nto, thiab lub yeeb koob uas txhua tus txiv nej los sis poj niam uas txais tau lub cib fim no muaj.”

Zaj lus ua rau peb txhua tus, Vajtswv cov me nyuam, txais kev nplij siab thiab kev cia siab. Tsis muaj leej twg uas dim tau tej teeb meem thiab tej kev qaug zog hauv lub ntiaj teb no. Vim txij thaum peb yug los peb yeej tsis muaj peev xwm cawm peb tus kheej dim. Tiam sis peb muaj ib tug Cawm Seej uas hlub peb, thiab “vim peb paub hais tias twb yog los ntawm [Nws] txoj kev tshav ntuj peb thiaj tau txais kev cawm seej, tom qab peb tau ua txhua yam uas peb muaj peev xwm ua lawm.”

Kuv ua tim khawv tias txawm yog muaj tej xwm txheej hauv lub neej no uas peb kav tsis taus, peb txhua tus yeej txais tau tus Tswv cov koob hmoov uas kav mus ib txhis li. Dhau los ntawm Nws txoj kev txi theej txhoj, tus Cawm Seej yuav foom koob hmoov rau peb kom pauv txhua yam peb ua tsis tau thiab txhua yam uas tsis ncaj yog peb muab tag nrho peb lub siab tso rau Nws. Los ntawm Yexus Khetos lub npe, amees.