“Txav Los Nyob Ze Kuv”

Kuv cov kwv tij thiab cov muam uas kuv hlub, kuv zoo siab heev uas kuv koom nrog nej hauv lub tuam rooj sab laj no ntawm Yexus Khetos lub Koom Txoos ntawm Tsoom Haiv Neeg Ntseeg ntawm Hnub Nyoog Kawg. Nov yog Nws lub Koom Txoos. Peb sib sau ua ke nyob hauv tej tsev nyob thoob plaws lub ntiaj teb los ntawm Nws lub npe.

Peb ris Nws lub npe thaum peb nkag los hauv Nws lub nceeg vaj dhau los ntawm kev khi lus. Nws yog Vajtswv Leej Tub uas sawv rov los thiab tau yeeb koob. Peb yog neeg uas txawj tuag thiab txawj ua txhaum. Txawm li ntawd los, vim Nws hlub peb, tus Cawm Seej caw peb los cuag Nws.

Nov yog nws cov lus caw rau peb: “Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav pom kuv; thov, ces nej yuav tau txais; khob, ces yuav qhib rau nej.”

Muaj tej lub sij hawm thaum peb xav tias peb nyob ze tus Cawm Seej Yexus Khetos. Tiam sis, tej lub sij hawm thaum peb raug sim siab hauv lub neej no, peb xav tias peb nyob deb ntawm nws thiab xav tau kev nplij siab hais tias Nws paub tias muaj dab tsi hauv peb lub siab thiab Nws hlub peb txhua tus.

Tus Cawm Seej caw peb kom txais kev nplij siab ntawd. Cia li txav los nyob ze Nws thaum nej nco ntsoov Nws. Rau siab nrhiav Nws thaum nej kawm vaj lug kub. Cia li rau siab thov Leej Txiv Saum Ntuj Ceeb Tsheej kom txav los nyob ze Nws Leej Tub uas Nws hlub kawg.

Yeej muaj ib txoj kev yooj yim xav txog qhov no. Xav seb nej yuav ua dab tsi yog tias muaj ib tug phooj ywg zoo uas nej sib ncaim tau ntev. Nej yeej yuav nrhiav kev kom nrog nws sib tham, nej yuav zoo siab txais nws zaj xov, thiab nej yuav ua txhua yam nej ua taus kom pab nws.

Nej yim sib tham ntev zog ces nej txoj kev sib raug yim zoo, thiab nej ib leeg yuav muab siab npuab ib leeg zuj zus. Yog tias sij hawm dhau mus thiab tsis tau sib tham ntau pes tsawg thiab tsis tau muaj cib fim sib pab, ces ntshe nej yuav tsis sib raug zoo nrog tus phooj ywg ntawd.

Yexus Khetos hlub peb txhua tus. Nws muab cib fim rau peb kom txav los nyob ze Nws. Ib yam li ib tug phooj ywg zoo, nej yuav ua ib yam li ntawd, thaum nej thov Leej Txiv Saum Ntuj Ceeb Tsheej los ntawm Yexus Khetos lub npe, mloog tus Vaj Ntsuj Plig Dawb Huv tej lus qhia zoo, thiab zoo siab pab lwm tus kom ua hauj lwm rau tus Cawm Seej. Tsis ntev ces nej yuav tau koob hmoov txav los nyob ze Nws.

Thaum kuv yog ib tug tub hluas, kuv muaj kev xyiv fab thaum kuv txav los nyob ze tus Cawm Seej—thiab Nws txav los nyob ze kuv—feem ntau yog los ntawm tej yam me me uas kuv ua kom ua raws li cov lub txib. Thaum kuv tseem hluas, twb muab lub cim nco txog rau kuv hauv kev sib ntsib thaum hmo ntuj. Kuv tseem nco txog hmo ntawd, yuav luag 75 xyoos tas los lawm, thaum tsaus ntuj thiab no no nyob nraum zoov. Kuv nco txog ib txoj kev kaj thiab kev sov thaum kuv to taub tias kuv twb ua raws li txoj lus txib kom nrog Haiv Neeg Ntseeg koom ua ke kom txais lub cim nco txog, nrog peb Leej Txiv Saum Ntuj Ceeb Tsheej khi lus tias kuv yuav nco ntsoov Nws Leej Tub thiab coj raws li Nws cov lus txib.

Thaum kev sib ntsib kawg hmob ntawd, peb tau hu zaj nkauj “Nyob Nrog Nraim Kuv; Twb Tsaus Ntuj Lawm” uas muaj cov lus no hais tias “Cawm Seej, nyob nrog nraim kuv hmo no.”

Tej lus no ua rau kuv hnov tau tus Ntsuj Plig ntau nplua mias, txawm yog kuv yog ib tug tub hluas xwb los xij. Hmo ntawd kuv tau paub txog tus Cawm Seej txoj kev hlub thiab dhau los ntawm tus Vaj Ntsuj Plig Dawb Huv txoj kev nplij siab, kuv tau paub Nws nyob ze.

Ntau xyoo tom qab ntawd, kuv tau xav rov qab paub txog tus Cawm Seej txoj kev hlub thiab xav paub tias Nws nyob ze ib yam li kuv xav thaum kuv yog ib tug tub hluas uas mus rau kev sib ntsib txais lub cim nco txog ntawd. Yog li ntawd kuv tau ua raws li ib txoj lus txib ntxiv: Kuv tau kawm cov vaj lug kub.

Nyob hauv phau Lukas, kuv tau nyeem txog hnub thib peb tom qab Nws raug ntsia saum ntoo khaub lig, thaum cov poj niam rau siab ntseeg tau tuaj, vim lawv hlub tus Cawm Seej, kom pleev tshuaj rau Nws lub cev. Thaum lawv tuaj txog, lawv pom daim txiag zeb uas npog lub rooj ntxa twb dov rau ib cag lawm thiab Nws lub cev tsis nyob ntawd.

Ob tug tim tswv nyob ze thiab nug yog vim li cas lawv ntshai hais tias:

“Ua li cas nej tuaj nrhiav tus neeg ciaj ntawm cov neeg tuag no?

“Nws tsis nyob ntawm no; nws twb sawv lawm. Nej nco ntsoov tej lus uas nws hais rau nej, thaum nej tseem nyob pem lub xeev Kalilais,

“Hais tias, yeej yuav muaj neeg ntes Neeg Leej Tub coj mus rau cov neeg txhaum, muab nws ntsia rau saum ntoo khaub lig thiab peb hnub tom qab, nws yuav sawv rov los.”

Thaum tav su ntawd ob tug thwj tim tau taug kev los ntawm Yeluxalees mus rau Ema-us, thiab tus Tswv uas tau sawv rov los lawm tshwm sim rau ob tug thwj tim thiab nrog nkawd taug kev.

Phau Lukas qhia peb tias nkawd txoj kev mus zoo li cas:

“Thaum nkawd tseem sib tham thiab sib nug txog zaj ntawd, Yexus txawm los nrog nkawd taug kev mus.

“Nkawd pom Yexus, tiam sis zoo li muaj tej yam ua rau nkawd cim tsis tau nws.

“Yexus nug nkawd hais tias, Neb pheej sib tham dab tsi thaum neb taug kev? Nkawd nres ua ntsej muag mluas mlob.

“Ob tug ntawd, tus uas hu ua Kelupas, nug Yexus hais tias, Tag nrho cov neeg uas nyob hauv lub nroog Yeluxalees puav leej paub tej uas nyuam qhuav muaj tau ob peb hnub los no huv tib si, tsuas yog koj tib leeg thiaj tsis paub tej ntawd xwb los?”

Nkawd qhia Nws txog nkawd txoj kev tu siab uas Yexus tuag thaum nkawd ntseeg tias Nws yog tus uas yuav Txhiv Ixayees Dim.

Nyaj muaj kev hlub hauv tus Tswv lub suab thaum Nws hais lus rau ob tug thwj tim nyuaj siab no.

Thaum kuv nyeem ntxiv, ua rau kuv lub siab sov so, ib yam li thaum kuv yog ib tug tub hluas:

“Thaum lawv mus yuav txog lub zos uas lawv mus ntawd, Yexus txawm ua li nws yuav dhau plaws mus.

Tiam sis nkawd cheem hais tias, Koj nrog wb so ntawm no, rau qhov twb yuav tsaus ntuj. Yexus thiaj mus nrog nkawd so.”

Hmo ntawd tus Cawm Seej tau ua li Nws cov thwj tim caw Nws los hauv nkawd tsev. Nws nrog nkawd noj nqaij. Nws muab cov mov mog foom koob hmoov thiab ntais cev rau nkawd. Nkawd qhov muag txawm qhib kom nkawd paub Nws. Ces Nws txawm ploj ntais ntawm nkawd mus lawm.

Lukas sau hais tias ob tug thwj tim tau xav li cas hais tias: “Nkawd sib tham hais tias, Thaum peb taug kev tuaj, nws nrog wb tham thiab piav Vajtswv Txoj Lus rau wb mloog, mas wb lub siab kub lug cuag li hluav taws hlawv puas yog?”

Ces ob tug thwj tim khiav rov qab mus rau Yeluxalees qhia kaum ib tug Thwj Tim txog qhov no. Thaum lawv hais txog lub sij hawm no, tus Cawm Seej tau tshwm sim rau lawv sawv daws pom.

Tus Tswv txawm los sawv nruab nrab ntawm lawv, thiab “hais rau lawv hais tias, Nej cia li tau nyob kaj siab lug.” Ces Nws tau qhia lawv txog tej uas cov yaj saub hais txog Nws lub luag hauj lwm theej tag nrho Nws Leej Txiv cov me nyuam lub txhoj thiab tu txoj kev tuag tej hlua.

“Thiab Yexus hais rau lawv hais tias, Twb muaj lus sau tseg lawm hais tias, tus Mexiyas yeej yuav raug kev tsim txom thiab peb hnub tom qab, nws yuav sawv [rov] los”

“Nej yuav tsum tuav nws lub npe mus qhia txoj moo zoo rau txhua haiv neeg hauv qab ntuj no hais tias, Vajtswv yuav zam txim rau tus uas tso nws tej kev txhaum tseg. Nej cia li pib qhia hauv lub nroog Yeluxalees.

“Nej yuav tsum ua tim khawv qhia tej no rau sawv daws paub.”

Ib yam li Nws cov thwj tim uas Nws hlub, Leej Txiv Saum Ntuj Ceeb Tsheej txhua tus me nyuam uas tau xaiv kom nkag los rau hauv lub qhov rooj uas yog txoj kev cai raus dej tau khi lus tias lawv yuav ua tim khawv txog tus Cawm Seej thiab saib xyuas cov neeg txom nyem mus kom tas peb lub neej. Tus yaj saub Amas hauv Phau Ntawv Maumoos tau qhia meej txog txoj kev cog lus no txhiab txhiab xyoo tas los lawm nyob ntawm cov Dej Maumoos:

“Vim nej xav los rau hauv Vajtswv pab yaj, thiab los ua nws cov neeg, thiab ib leeg txaus siab ris ib leeg tej nra, xwv kom tej nra thiaj li sib;

“Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas nej nyob, kom txog hnub tuag, xwv kom Vajtswv yuav txhiv nej dim, … xwv kom nej yuav tau txoj sia nyob mus ib txhis.”

Thaum nej rau siab ua raws li tej lus cog tseg no, nej yuav kawm tias tus Tswv ua raws li Nws txoj lus cog tseg kom pab nej ua hauj lwm pab lwm tus, nej tej nra thiaj yuav tsis hnyav. Nej yuav los paub tus Cawm Seej, thiab thaum sij hawm mus nej yuav hloov los ua neeg zoo li Nws thiab “los ua neeg zoo tag nrho vim yog los ntawm nws.” Thaum nej pab lwm tus kom ua hauj lwm rau tus Cawm Seej, nej yuav kawm tias nej txav los nyob ze Nws.

Nej feem coob muaj cov uas nej hlub uas tsis taug txoj kev mus rau txoj sia nyob ib txhis. Nej xav paub seb nej yuav ua li cas kom lawv rov qab los. Thaum nej rau siab ntseeg ua Nws tej hauj lwm, tus Tswv yuav txav los nyob ze lawv.

Nej nco qab tus Tswv cov lus cog tseg rau Joseph Smith thiab Sidney Rigdon thaum nkawd nyob deb ntawm nkawd tsev neeg ua tus Tswv tej hauj lwm hais tias: “Kuv ob tug phooj ywg Sidney thiab Joseph, nej tsev neeg nyob zoo; lawv nyob hauv kuv txhais tes, thiab kuv yuav ua rau lawv li kuv pom zoo; vim muaj tag nrho tej hwj chim nyob ntawm kuv.”

Thaum nej txhawb nqa cov uas xav tau kev pab ces tus Tswv lub hwj chim yuav txhawb nqa nej. Nws cev tes pab nej tsom kwm thiab foom koob hmoov rau peb Leej Txiv Saum Ntuj Ceeb Tsheej cov me nyuam.

Yexus Khetos txhua tus tub qhe uas nrog Nws sib khi lus yuav txais Nws tej lus qhia los ntawm tus Ntsuj Plig thaum lawv ua hauj lwm rau Nws kom foom koob hmoov thiab pab lwm tus. Ces lawv yuav hnov tus Cawm Seej txoj kev hlub thiab muaj kev xyiv fab los ntawm qhov uas lawv txav los nyob ze Nws.

Kuv ua tim khawv tias kuv paub tseeb txog tus Tswv txoj Kev Sawv Rov Los zoo ib yam li kuv twb nyob nrog ob tug thwj tim hauv lub tsev ntawm ntug kev mus rau Ema-us. Kuv paub tias Nws muaj txoj sia nyob.

Nov yog Nws lub Koom Txoos tseeb—Yexus Khetos lub Koom Txoos. Thaum txog Hnub Txiav Txim peb yuav sawv ntawm tus Cawm Seej tim ntsej tim muag. Cov uas tau txav los nyob ze Nws thaum lawv ua hauj lwm rau Nws yeej yuav muaj kev xyiv fab hauv lub neej no thiab yuav tos ntsoov hnov Nws tej lus hais tias: “Zoo heev, koj yog tus tub txib uas zoo thiab ncaj ncees.”

Kuv ua tim khawv txog tus Cawm Seej uas sawv rov los thiab peb tus Txhiv Dim los ntawm Yexus Khetos lub npe, amees.