Koj txoj Kev Hloov Siab Lees Txim Tsis Yog Ib lub Nra rau Yexus Khetos; Ua rau Nws txoj Kev Xyiv Fab Ci Dua

Ntau xyoo tas los thaum kuv mus Florida, kuv zaum nraum zoov nyeem ntawv. Phau ntawv lub npe qhia tias txawm tias kuv tsis zoo tag nrho tam sim no los, kuv tseem yuav mus saum ntuj ceeb tsheej. Ib tug poj niam hla kuv kev thiab nug tias, “Koj puas xav tias mus tau?”

Kuv ntsia nws, ua xyem xyav, ces kuv txawm paub tias nws hais txog phau ntawv uas kuv nyeem. Kuv hais ib yam txaus luag zoo li, “Es, kuv nyuam qhuav pib nyeem, tiam sis kuv mam li qhia koj seb xaus li cas.”

Kheev lam kuv muaj peev xwm rov qab mus rau lub sij hawm ntawd! Kuv mam li hais rau nws, “Aws, koj yeej mus tau! Rau qhov ntuj ceeb tsheej tsis yog rau cov neeg uas zoo tag nrho; yog rau cov neeg uas tau txais kev zam txim, cov uas xaiv Yexus Khetos txhua zaus.”

Hnub no kuv xav hais lus rau peb cov uas tej thaum xav tias, “Zoo li txoj kev hloov siab lees txim thiab kev zam txim yeej pab tau txhua tus tiam sis pab tsis tau kuv.” Cov uas xav hauv lawv lub siab, “Vim kuv pheej ua yuam kev tib yam li qub, tej zaum kuv yog li no xwb.” Cov uas, zoo li kuv, muaj tej hnub thaum txoj kev ua raws li kuv tej kev khi lus ntxhab heev, ntshe zoo li yog txoj kev nce roob!

Ib tug tub txib zoo heev uas nyob Australia, Txwj Laug QaQa uas los ntawm Fiji, tau hais zoo ib yam li kuv xav hauv nws zaj lus tim khawv: “Kuv paub tias Vajtswv hlub kuv, tiam sis tej thaum kuv xav seb ‘Vajtswv puas paub tias kuv hlub Nws?’ Rau qhov kuv tsis zoo tag nrho, thiab kuv tseem ua yuam kev.”

Los ntawm lo lus nug txawj xav ntawd, Txwj Laug QaQa piav txog tej yam uas kuv ib txwm txhawj txog. Tej zaum nej xav ib yam li ntawd thiab, xav tias, “Kuv siv zog heev, tiam sis Vajtswv puas paub tias kuv siv zog npaum li cas? Thaum kuv pheej ua yuam kev, Vajtswv puas paub tias kuv tseem hlub Nws?”

Ua rau kuv tu siab lees qhov no, tiam sis kuv ib txwm xav tias kuv txoj kev sib raug zoo nrog tus Cawm Seej nyob ntawm seb kuv ua neej zoo npaum li cas. Kuv xav tias ib lub neej mloog lus txhais tias kuv yeej tsis tas yuav hloov siab lees txim. Ces thaum kuv ua yuam kev, uas kuv ua txhua hnub, kuv nyob deb ntawm Vajtswv, thiab xav tias, “Kuv ua rau Nws poob siab.”

Qhov ntawd tsis muaj tseeb.

Kuv tau kawm tias yog yus tos thaum yus huv txaus lawm los sis zoo txaus lawm mus cuag tus Cawm Seej, yus twb tsis to taub hlo li!

Ua li cas peb tsis xav txawv txog tej lus txib thiab kev mloog lus?

Kuv ua tim khawv tias txawm tias Vajtswv yeej xav li cas txog peb tej kev txhaum, Nws haj yam xav li cas txog tej yam uas peb ua tom qab peb ua txhaum. Peb puas yuav tig mus rau Nws tsis tu tsis tseg? Peb puas yuav khi lus nrog Nws mus ntxiv?

Tej zaum nej tau hnov tus Tswv cov lus “Yog [nej] hlub kuv, cia li ua raws li kuv tej lus txib” thiab tu siab rau qhov nej tsis tau ua raws li tej lus txib tag nrho. Cia li nco ntsoov tias kev hloov siab lees txim kuj yog ib lo lus txib! Muaj tseeb tiag, tej zaum yog lus txib uas cov yaj saub hais ntau tshaj plaws hauv cov vaj lug kub.

Nyob hauv Amas tej lus thov, “Auj kheev lam kuv yog ib tug tim tswv, thiab muaj peev xwm ua tau li kuv lub siab xav … thiab tshaj tawm kev hloov siab lees txim,” nws tsis sim ua rau peb poob ntsej muag thaum nws hais txog peb tej kev txhaum. Nws xav tshaj tawm txog kev hloov siab lees txim kom nej thiab kuv yuav tsis raug txom nyem hauv lub ntiaj teb no. Amas ntxub kev txhaum vim rau qhov kev txhaum ua rau peb mob.

Tej thaum kuv yuav tsum nco ntsoov tias, ib yam li ib daim ntawv uas lo rau kuv lub hau pliaj, kev ua raws li cov lus txib yog txoj kev khiav dim kev mob. Thiab txoj kev hloov siab lees txim ua li ntawd thiab. Peb tus yaj saub tau hais tias, “Tus Cawm Seej yeej ib txwm hlub peb tiam sis qhov tseem ceeb Nws hlub peb thaum peb hloov siab lees txim.”

Yog li ntawd thaum tus Tswv hais tias, “Nej cia li hloov siab lees txim, nej cia li hloov siab lees txim,” yuav ua li cas yog tias nej xav Nws tau hais tias “Kuv hlub koj. Kuv hlub koj.” Cia li xav tias Nws thov nej kom muab tej kev coj cwj pwm uas ua rau nej mob tso tseg, thiab caw nej tawm ntawm qhov tsaus ntuj thiab tig mus rau Nws txoj kev kaj.

Nyob hauv kuv tus ntxhais Carly pawg ntseeg, ib tug tub hluas txhos caug foom koob hmoov rau lub cim nco txog thiab nws tsis hais tias, “Kom lawv yuav haus nco txog koj Leej Tub cov ntshav,” nws ua yuam kev hais tias, “Kom lawv yuav haus nco txog koj Leej Tub txoj kev hlub.” Ua rau Carly los kua muag thaum nws xav txog qhov tseeb ntawm cov lus ntawd.

Peb tus Cawm Seej txaus siab raug kev txom nyem thaum Nws theej peb lub txhoj vim Nws hlub nej. Muaj tseeg tiag, nej yog “txoj kev xyiv fab ua nyob ntawm nws” thaum Nws raug txom nyem.

Cov lus caw neeg hloov siab lees txim yog Vajtswv txoj kev hlub.

Kev ua li Nws caw yog peb txoj kev qhia Nws tias peb hlub Nws.

Xav txog ib daim duab uas nej nyiam tshaj txog Yexus. Tsam no xav txog Nws luag ntxhi nrog kev xyiv fab txhua zaus nej siv Nws lub txiaj ntsim, rau qhov Nws yog “txoj kev cia siab uas ci kawg nkaus.”

Nej txoj kev hloov siab lees txim tsis yog ib lub nra rau Yexus Khetos; ua rau Nws txoj kev xyiv fab ci dua!

Cia peb qhia li ntawd!

Rau qhov txoj kev hloov siab lees txim yog peb zaj xov xwm zoo tshaj plaws!

Peb yeej yuav ua yuam kev thaum peb sim taug kev raws nraim li peb tej kev khi lus. Tiam sis peb ua raws nraim li peb tej kev khi lus thaum peb hloov siab lees txim txhua hnub.

Thiab thaum peb hloov siab lees txim, Vajtswv zam txim rau peb thiab tsis ua rau peb txaj muag, muab peb piv rau lwm tus, los sis cem peb rau qhov peb rov qab ua txhaum li tau ua lub lim tiam dhau los.

Nws zoo siab txhua zaus Nws pom peb txhos caug. Nws nyiam zam txim pub rau peb rau qhov peb ua rau nws zoo siab!

Nej xav tias qhov no muaj tseeb yom?

Ces vim li cas nyuaj ua luaj rau peb ntseeg qhov no?!

Dab Ntxwg Nyoog, tus uas nkaug neeg thiab tus dag, siv kev poob ntsej muag kom peb nyob deb ntawm Vajtswv. Kev poob ntsej muag yog qhov tsaus ntuj ua luaj uas ua rau yus xav tias yog yus tshem tawm ntawm yus lub cev, ces yeej yuav muaj qhov hnyav.

Kev poob ntsej muag yog lub suab uas ntaus yus, hais tias, “Koj xav li cas?” “Koj puas muaj peev xwm ua ib yam dab tsi raws li qhov yog?”

Kev poob ntsej muag tsis yog kev xav tias peb tau ua yuam kev; kev poob ntsej muag ua rau peb xav tias peb yog neeg uas ua yuam kev. Tej zaum nej yuav hnov ib lub suab kom nej mus nkaum. Tus yeeb ncuab ua txhua yam kom peb ris qhov hnyav no nyob hauv peb lub siab, nws qhia peb tias tus nqi them kim dhau, thiab yuav yooj yim dua yog tias peb nyob hauv qhov tsaus ntuj, uas ua rau peb poob siab nthav.

Dab Ntxwg Nyoog yog tus nyiag kev cia siab.

Thiab nej yuav tsum hnov qhov no, ces kuv yuav hais tej lus no nrov: Nej tsis yog lub suab hauv nej lub hlwb los sis nej tej kev txhaum. Tej zaum nej yuav tsum hais qhov ntawd nrov thiab. Cia li hais rau Dab Ntxwg Nyoog tias, “Tsis yog hnub no.” Hais kom nws khiav mus.

Cia li hnov kev tu siab uas rub nej kom tig mus rau tus Cawm Seej, thiab saib Nws txoj kev tshav ntuj nkag rau hauv nej lub neej thiab lub neej ntawm cov neeg uas nej hlub. Kuv cog lus tias tib lub sij hawm uas peb coj peb lub siab mob mus rau Nws, ces tam sim ntawd Nws nyob ntawd.

Yog nej pom ib tug neeg poob dej, nej puas ncav nej txhais tes thiab pab tus ntawd? Nej xav tias tus Cawm Seej yuav tsis kam tuav nej txhais tes los? Kuv xav txog Nws dhia mus rau hauv dej, nqis mus tshaj tag nrho txhua yam kom muab peb tsa tau kom peb thiaj li ua pa tau! Tsis muaj leej twg uas yuav poob dej mus rau ib qho chaw uas Khetos txoj kev kaj ci tsis taus.

Tus Cawm Seej yeej ci ntsa iab dua qhov tsaus ntuj ntawm kev poob ntsej muag. Nws yeej yuav tsis tawm tsam nej txoj kev muaj nqi. Yog li ntawd saib zoo zoo.

• Cia li xav tias txhais tes no yog nej txoj kev muaj nqis.

• Txhais tes no yog kev mloog lus. Tej zaum nej tau sawv hnub no, thov Vajtswv, thiab nyeem vaj lug kub kom hnov tau Vajtswv lub suab. Nej tau txiav txim siab ua zoo thiab ua li Yexus Khetos yuav ua rau cov neeg nyob ib puag ncig nej. Nej mloog lub tuam rooj sab laj! Nej txoj kev mloog lus nyob no!

• Los sis tej zaum tej yam tsis tau mus zoo. Nyuaj rau nej ua tej yam yooj yim thiab me me kom nrog Vajtswv sib raug zoo. Nej tau txiav txim siab ua tej yam uas ua rau nej tsis txaus siab.

• Nej txoj kev muaj nqi nyob qhov twg? Txhais tes no puas tau txav?

Nej txoj kev muaj nqi tsis nyob ntawm nej txoj kev mloog lus. Nej txoj kev muaj nqi yeej tsis hloov. Vajtswv tau muab txoj kev muaj nqi rau nej, thiab tsis muaj dab tsi uas nej los sis lwm tus neeg ua taus kom hloov qhov ntawd. Txoj kev mloog lus yuav coj koob hmoov los; qhov ntawd muaj tseeb. Tiam sis nej txoj kev muaj tsis yog ib txoj koob hmoov. Nej ib txwm “muaj nqis heev rau Vajtswv” txawm tias nej tej kev txiav txim siab tau coj nej mus qhov twg.

Thaum kuv ua yuam kev, kuv xav ua raws nraim li kuv tej kev khi lus uas kuv nrog Yexus Khetos khi, thiab kuv yuav piav vim li cas.

Thaum kuv loj hlob tuaj, kuv kawm dhia dej thiab kawm tias thaum cov txiav txim qhab nias yus txoj kev dhia dej, lawv ua tib zoo saib yus ua li cas. Thaum nkag rau hauv dej, puas taw ntiv taw thiab txiab dej me me xwb? Ces lawv ua ib yam zoo heev. Lawv xav txog kev dhia dej ntawd nyuaj npaum li cas.

Txhua tus neeg txoj kev dhia dej nyias muaj nyias qhov nyuaj. Thiab nej tus Cawm Seej yog tib tug uas paub tiag tiag seb nej txoj kev dhia dej nyuaj npaum li cas. Kuv xav sib raug zoo nrog tib tug neeg uas paub kuv, uas paub kuv lub siab thiab paub tias kuv ua nyuaj npaum li cas!

Nws paub tias kev tsaus ntuj uas muaj huab zig niab nqis los rau peb txhua tus uas taug kev kom peb txoj kev hla dhau tus dej qias neeg—yog li ntawd txawm tias peb tuav tus nqaj hlau ruaj, dej yuav txaws ua rau peb ntub.

Txoj kev los cuag Khetos yeej zoo li yus hais tias, “Nej puas kam pab kuv?” nrog kev cia siab, uas ua rau yus paub tias Nws yeej ib txwm ncav tes rau yus. Kuv ntseeg tias txoj kev xav txog txoj kev hloov siab lees txim li no txawm tias peb tseem tsis mloog lus zoo tag nrho, peb sim mloog lus nrog kev hlub tam sim no, ib sij txiav txim siab nyob nrog Nws, rau qhov peb hlub Nws.

Nej puas nco qab txog Vaj Ntxwv Npeyamis cov neeg uas tsis muaj tej kev xav ua phem tiam sis xav ua zoo tsis tu ncua? Nej puas xav tias lawv ntim lawv cov tsev pheeb suab ntaub, mus tsev, thiab yeej tsis ua yuam kev ntxiv li lawm? Of course not! Qhov txawv yog tias lawv tsis xav ua phem ntxiv. Lawv mloog lus nrog kev hlub! Lawv lub siab tig mus rau Vajtswv tib lub sij hawm uas ua nyuaj rau lawv ua qhov yog!

Muaj ib zaug, nyob tim ntug hiav txwv, kuv pom ib tug noog ya mus hauv cua, ntxuaj nws sab tis, tiam sis zoo li nws mus tsis tau tom ntej hlo li. Ces kuv pom lwm tus noog, uas nyob siab dua. Nws ya hauv cov cua uas mus sab saud thiab yooj yim rau nws ya tau, nws tsis txhawj txog cov cua. Qhov ntawd yog qhov txawv ntawm peb txoj kev sim ua peb ib leeg xwb thiab txoj kev tig mus rau tus Cawm Seej, cia Nws tsa peb, “nrog hwj chim kho tau mob nyob hauv nws ob txhais tis.”

Thaum kuv thiab kuv tus txiv ua thawj coj rau cov tub txib nyob Australia, thaum zaum kawg uas peb sib ntsib nrog txhua tus tub txib, peb sib tham txog 3 Nifais 17, thaum cov neeg nyob ze tus Cawm Seej thiab hnov Nws thov Vajtswv rau lawv. Wb nug hais tias, “Yog tias koj hnov tus Cawm Seej thov Vajtswv rau koj, koj xav tias Nws yuav hais li cas?”

Txoj kev hnov lawv tej lus teb yeej ua rau kuv hnov tus Ntsuj Plig loj tshaj hauv kuv lub neej. Txhua tus tub txib tau nres ib me pliag, thiab lawv yuav los kua muag thaum wb hais kom lawv nco ntsoov tias, “Koj tus Cawm Seej paub tias koj ua tej yam nyuaj npaum li cas. Nws twb hnov qhov nyuaj ntawd!”

Cov tub txib tau ua siab mos siab muag hais tej yam zoo li no: “Yexus yuav qhia rau Leej Txiv tias, nws siv zog ua zoo npaum li nws ua taus. Kuv paub tias nws siv zog npaum li cas.” Ib tug txwj laug hais tias, “Txawm tias nws raug dab tsi hauv nws lub neej los, kuv zoo siab rau nws.”

Cia peb sim ua li no. Hmo no, ua ntej nej thov Vajtswv, cia li xav tias Yexus Khetos nyob ze. Nws yog tus uas thov Vajtswv pab peb. Nug nej tus kheej, “Kuv tus Cawm Seej yuav hais li cas rau Leej Txiv txog kuv?”

Ces nyob twj ywm.

Mloog lub suab ua hais tej yam zoo txog nej—tus Cawj Seej lub suab, nej tus phooj ywg zoo tshaj plaws, thiab nej Leej Txiv Saum Ntuj Ceeb Tsheej, uas ntob ntawd tiag. Nco ntsoov, Nkawd hlub nej heev thiab nej muaj nqi heev, txawm yog li cas los xij.

Kuv sawv no ua tim khawv tias Yexus Khetos yuav ci mus rau txhua tus uas nyob hauv qhov tsaus ntuj. Yog li ntawd, thaum muaj hnub uas nej hnov lub suab hais kom nej mus nkaum, kom nej yuav tsum nkaum hauv ib chav tsaus ntuj nyob nej ib leeg, kuv caw kom nej ua siab loj thiab cia li ntseeg Yexus Khetos! Taug kev mus thiab taws lub Teeb—peb txoj Kev Cia Siab uas Ci Kawg Nkaus.

Npog hauv Nws txoj kev kaj, nej yuav pom cov neeg nyob ib ncig ntawm nej uas xav tias lawv nyob lawv ib leeg ib yam nkaus thiab, tiam sis vim nej pom tau kev, nej thiab lawv thiaj yuav xav tias, “Vim li cas peb ntshai ua luaj thaum nyob hauv qhov tsaus ntuj? Thiab vim li cas peb thiaj nyob ntawd ntev tag npaud?”

“Thov kom tus Tswv ntawm txoj Kev Kaj yuav khawm nej thiab nplij nej lub siab thiab hlub nej mus ib txhis.” Cia peb hlub Nws thiab ib sij xaiv Nws. Los ntawm Yexus Khetos lub npe, amees.