Tso Siab Ruaj Nrees rau Kev Ntseeg Niam Txiv Txais Tau

Thaum kuv mus xyuas lub Tuam Tsev Nashville Tennessee, kuv tau muaj cib fim taug kev mus hauv lub tuam tsev thaum kuv tshuaj ntsuam tus Tswv lub tsev zoo nkauj no. Kuv txais kev tshoov siab heev thaum kuv saib daim duab uas Mary Wanlass kos hu ua Mob Siab Mus uas tau muab dai rau ntawm phab ntsa hauv lub tuam tsev tus niam thawj tswj hwm chaw ua hauj lwm.

Nov yog zaj dab neeg txog daim duab no:

“Nyob hauv Missouri nyob rau xyoo 1862, Mary Wanlass uas muaj 14 xyoo cog lus rau nws niam tshiab tias nws yuav pab coj nws txiv uas tuag taw [thiab nws plaub tug nus muag] uas tseem hluas heev mus rau lub Hav ntawm lub pas dej Great Salt Lake. … Mary caij cov twm nrog rau cov nyuj uas cab lub laub uas Mary txiv pw haud, thiab pab nws tu nws … cov viv ncaus thiab nus. Txhua hnub nws pub mov rau nws tsev neeg thaum nws khaws cov paj, nroj tsuag, thiab cov txiv ntoo uas noj taus. Nws tsis muaj dab tsi taw kev tsuas yog tej lus qhia uas nws hnov kom mus rau sab hnub poob ‘mus txog thaum cov huab hloov los ua cov roob.’

“Lawv tuaj txog lub Hav Utah thaum lub cuaj Hlis Ntuj, vim lawv twb taug kev mus tas lub caij nplooj ntoo hlav thiab lub caij ntuj sov. Nws txiv tuag tsis ntev tom qab nws tsev neeg ua tsev hauv lub Nras Utah, es nyob ntawd Mary tau yuav txiv thiab muaj cov me nyuam.”

Nov yog ib zaj dab neeg zoo kawg nkaus txog kev ntseeg thiab kev muaj zog ntawm ib tug ntxhais hluas uas tsuas muaj 14 xyoos xwb uas pab tau peb txhua leej txhua tus niaj hnub no “mus tom ntej xwb.”

“Mus tom ntej xwb”—los yog txhais ua kuv yam lus Dutch, Gewoon doorgaan—yeej yog cov lus uas kuv niam kuv txiv nyiam hais thiab.

Kuv niam kuv txiv thiab kuv cov neej tsa yog cov neeg pioneer nyob hauv wb tsev neeg. Lawv twb hla lawv tej “tiaj nras” ib yam li txhua tus uas los koom lub Koom Txoos, uas yog tus Tswv pab yaj, txhua hnub. Lawv tej zaj dab neeg tsis hais txog cov twm thiab cov laub tiam sis tej zaj no tseem txhawb nqa tej tiam neeg uas yuav nyob yav tom ntej.

Lawv tau muab siab npuab txoj moo zoo thiab tau ua kev cai raus dej thaum lawv yog cov tub hluas ntxhais hluas. Kuv niam thiab kuv txiv ob leeg raug tej yam nyuaj thaum lawv loj hlob tuaj. Kuv txiv loj hlob tuaj hauv lub pov txwv Java hauv lub teb chaws Indonesia. Nyob hauv Kev Tsov Rog Thoob Ntiaj Teb thib Ob, nws thiab nws tsev neeg raug sib faib sib ncaim thaum nws raug kaw hauv lub nkuaj kaw yeeb ncuab, es nyob ntawd nws raug tej yam nyuaj kawg nkaus thaum nws tseem hluas.

Kuv niam loj hlob tuaj hauv ib lub tsev uas nws niam nws txiv sib nrauj thiab nws raug kev tshaib kev nqhis thiab tej yam nyuaj los ntawm Kev Tsov Rog Thoob Ntiaj Teb thib Ob. Tej lub sij hawm nws yuav tsum noj kaus paj. Vim nws txiv ua li no thiab nws txiv nrauj nws niam, ces nyuaj rau nws xav hais tias nws Leej Txiv Saum Ntuj Ceeb Tsheej yog ib Leej Txiv uas hlub nws.

Kuv niam kuv txiv sib ntsib hauv lub Koom Txoos thiab tsis ntev tom qab ntawd twb txiav txim siab sib yuav thiab ua kev cai sib khi hauv lub Tuam Tsev Bern Switzerland. Thaum nkawd tseem tos nyob rau ntawm chaw tos tsheb nqaj hlau, vim nkawd twb siv cov nyiaj tag lawm kom mus rau lub tuam tsev, nkawd xav paub seb yuav ua li cas thiaj tau noj tau haus tiam sis nkawd ntseeg tias txhua yam yuav zoo. Thiab yeej yog li ntawd!

Nkawd tau pib tu nkawd tsev neeg nyob hauv ib chav saum nthab hauv ib lub tsev kem nyob hauv plawv Amsterdam. Ob peb xyoo tom qab nkawd tau xuas tes ntxhua khaub ncaws, nkawd tau tseg nyiaj txaus yuav lub tshuab ntxhua khaub ncaws lawm. Ua ntej nkawd tau mus yuav lub tshuab ntawd, tus npisov tuaj xyuas nkawd, thiab thov kom nkawd muab nyiaj kom ua ib lub tsev sib ntsib hauv Amsterdam. Nkawd txiav txim siab muab cov nyiaj uas nkawd tau tseg cia kom yuav ib lub tshuab ntxhua khaub ncaws rau nws thiab nkawd tseem xuas tes ntxhua khaub ncaws.

Peb tsev neeg twb raug tej yam nyuaj ib yam li lwm tus. Tiam tsis tej yam no kuj ua rau peb muaj zog ntxiv thiab haj yam ua rau peb ntseeg tus Tswv Yexus Khetos, ib yam li thaum Amas hais nws zaj dab neeg rau nws tus tub Hilamas, thaum nws hais tias Vajtswv tau pab nws thaum muaj txhua yam kev sim siab thiab txhua yam teeb meem vim nws twb tau tso siab rau tus Tswv Yexus Khetos.

Ua cas ob tug neeg uas raug tej kev sim siab ntau kawg li thaum lawv tseem hluas ho yuav los ua ob tug niam thiab txiv zoo ua luaj? Lus teb yeej yooj yim: nkawd tau muab siab npuab txoj moo zoo thiab ua raws li nkawd tej kev khi lus tas nkawd lub neej!

Tom qab nkawd sib yuav 65 xyoos, kuv niam, uas raug mob tsis nco qab Alzheimer’s, tau tas sim neej thaum lub Ob Hlis Ntuj tas los. Kuv txiv, uas muaj 92 xyoos thiab tseem nyob hauv tsev, tau mus xyuas nws ntau npaum li nws mus tau txog thaum nws tso lub ntiaj teb no tseg. Ib ntus tas los nws tau qhia rau kuv cov kwv thiab muam hais tias tej yam phem uas nws raug hauv lub nkauj kaw neeg hauv Indonesia thaum ua Kev Tsov Rog Thoob Ntiaj Teb thib Ob tau npaj nws ua siab ntev tu nws tus poj niam rau ntau xyoo thaum nws muaj mob thiab lub cim xeeb ploj mus zuj zus thiab twb npaj siab rau hnub uas nws yuav tsum tso siab rau lwm tus pab tu nws tus poj niam thiab nyob tsis taus nrog nws txhua lub sij hawm. Nkawd ib txwm muaj lub ntsiab lus hais tias “Mus Tom Ntej Xwb,” vim nkawd cia siab zoo tag nrho rau Yexus Khetos hais tias nkawd yuav sawv rov los thaum txog hnub kawg thiab yuav nrog Nws nyob tas mus li.

Nkawd txoj kev ntseeg thiab zaj lus tim khawv yog tej yam uas ua rau nkawd cov xeeb ntxwv muaj zog.

Nyob hauv lub zos uas kuv tus poj niam loj hlob tuaj, nws niam nws txiv yeej yog neeg zoo uas mus rau lub koom txoos, es nkawd hloov siab los ntseeg txoj moo zoo uas tau muab txum tim rov qab los thaum nkawd yog ib khub niam txiv hluas tsuas muaj kuv tus poj niam ua nkawd tus ntxhais uas muaj ob xyoos xwb thaum ntawd. Nkawd txoj kev txiav txim ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua rau nkawd lub neej hloov tag nrho vim nkawd tsev neeg thiab cov neeg zej zog tau txiav kev tu nrho. Nkawd twb siv ntau xyoo, sau ntawv qhia tias nkawd hlub nkawd tsev neeg, thiab nkawd pab nkawd zej zog ua ntej cov neeg txais yuav nkawd.

Muaj ib lub sij hawm thaum kuv yam txiv yog tus npisov, es muaj ib tug neeg dag liam nws ua tej yam uas nws twb tsis tau ua es cov thawj coj muab nws tso tawm tam sim ntawd. Kuv niam tais tu siab heev nws thiaj li nug nws tus txiv seb puas tsim nyog uas nkawd yuav mus rau lwm lub koom txoos. Nws teb hais tias nkawd yeej yuav mus rau lub koom txoos no vim nov tsis yog tib neeg lub koom txoos, tiam sis yog Yexus Khetos lub Koom Txoos.

Twb siv sij hawm ntev me ntsis ua ntej txhua tus paub qhov tseeb thiab muaj neeg los thov txim rau nws. Qhov uas ua rau neeg muab kev ntseeg tso tseg yeej yog qhov uas ua rau nkawd muaj zog thiab muaj kev ntseeg ntxiv.

Vim li cas peb ib txhia saib tsis tau kev ntseeg thiab tej zaj lus tim khawv ntawm peb niam peb txiv uas raug tej yam nyuaj tiam sis yeej meem rau siab ntseeg? Vim li cas peb xav tias lawv tsis to taub meej? Lawv yeej tsis tau ntseeg kev dag ntxias! Twb muaj ntau lub sij hawm thaum tus Ntsuj Plig qhia lawv es lawv thiaj hais tau ib yam li tus Yaj Saub Joseph hais tias, “Kuv twb paub, … thiab kuv xyeej tsis tau.”

Nej puas nyiam zaj nkauj txog Hilamas pawg tub rog, nyob hauv phau Children’s Songbook?

Txawm yog nej tsis muaj lub neej zoo li no, ib yam li kuv niam thaum nws yog ib tug me nyuam, nej txawj hloov tau los ua “niam thiab txiv zoo uas hlub tus Tswv” thiab coj yam ntxwv ncaj ncees rau lwm tus pom.

Peb puas xav tias zaj nkauj no muaj tseeb tiag thaum peb hu nkauj? Nej puas xav tias nej yog “Hilamas pawg tub rog” thiab nej yuav ua “tus Tswv cov tub txib mus qhia Nws txoj moo zoo”? Kuv twb xav li no ntau zaus thaum kuv hu zaj nkauj no nyob hauv FSY thiab lwm lub sij hawm uas cov tub hluas ntxhais hluas koom ua ke.

Los sis peb xav li cas thaum peb hu zaj nkauj “Tso Siab Ruaj Nrees rau Kev Ntseeg”?

Hais rau nej cov hauv tiam neeg uas tab tom loj hlob txawm nej nyob qhov twg los thiab txawm nej raug xwm txheej dab tsi los yog, thov kom nej cia li kawm thiab txais dag zog los ntawm kev ntseeg thiab tej zaj lus tim khawv ntawm nej cov poj koob yawm txwv. Qhov no yuav pab nej to taub tias yog nej xav muaj ib zaj lus tim khawv, nej yuav tsum ua kev txi thiab “kev txi ua rau cov koob hmoov los saum ntuj los.”

Thaum nej xav txog ib txoj kev txi uas yuav foom koob hmoov rau nej lub neej, thov xav thiab thov Vajtswv txog peb tus yaj saub, Thawj Tswj Hwm Russell M. Nelson, tej lus caw thaum nws hais kom “txhua tus tub hluas uas tsim nyog thiab muaj peev xwm kom lawv npaj thiab mus ua tub txib Nej cov tub hluas uas yog Tsoom Haiv Neeg Ntseeg hauv Hnub Nyoog Kawg, txoj kev ua tub txib yog ib txoj kev lav ris ntawm lub pov thawj hwj. …

“Cov ntxhais hluas, kev ua ntxhais txib yeej yog ib lub cib fim uas muaj hwj chim heev, tiam sis tsis tas ua.”

Tej zaum yuav hu nej mus ua ib tug tub txib pab los yog ib tug tub txib mus qhia neeg. Ob hom tub txib no pab ua lub hom phiaj kom coj tib neeg los cuag Yexus Khetos, nyias muaj nyias peev xwm thiab txoj kev.

Txawm yog hom kev ua tub txib los, nej yuav qhia tus Tswv tias nej hlub Nws thiab xav paub Nws zoo dua. Nco ntsoov tias, “vim ib tug tib neeg puas paub tus tswv uas nws tsis tau ua hauj lwm rau, thiab tus uas yog ib tug qhua rau nws, thiab nyob deb ntawm tej kev xav thiab tej lub hom phiaj ntawm nws lub siab?”

Txawm yog tiam neeg thib ib los yog thib tsib uas ntseeg txoj moo zoo los, peb txhua tus yuav tsum nug peb tus kheej hais tias tiam neeg tom ntej yuav hais tej zaj dab neeg twg txog kuv txoj kev ntseeg, kev muaj zog, thiab kev cog lus tias yuav ua neej xilethi-aus.

Cia peb yeej meem siv zog kom paub peb tus Cawm Seej, Yexus Khetos, zoo dua thiab tsom ntsoov rau Nws hauv peb lub neej. Nws yog lub pob zeb uas peb yuav tsum ua peb tsev saud thiaj li nyob taus ruaj nrees thaum peb raug tej yam nyuaj heev.

Cia peb “tso siab ruaj nrees rau kev ntseeg niam txiv txais tau, tso siab ruaj nrees rau qhov tseeb uas neeg tuag rau, mloog Vajtswv lus, kawg siab kawg ntsws, Peb yeej yuav ntseeg thiab tso siab plhuav mus.” Los ntawm Yexus Khetos lub npe, amees.