Kev Pe Hawm
Txoj kev pe hawm Vajtswv yog dab tsi rau nej thiab kuv?
“Yexus yug hauv lub nroog Npelehees uas nyob hauv cov Yudais lub teb chaws. Lub sij hawm ntawd Helauj ua vaj ntxwv kav teb chaws. Tom qab ntawd tsis ntev muaj cov neeg uas txawj saib hnub qub ob peb leeg tuaj sab hnub tuaj tuaj txog hauv lub nroog Yeluxalees.
“Lawv nug hais tias, Tus me tub uas yuav ua cov Yudais tus vaj ntxwv, nws yug rau qhov twg? Peb pom nws lub hnub qub uas qhia hais tias, nws yug los lawm tawm tim sab hnub tuaj tuaj, peb thiaj tuaj pe hawm nws.”
Cov neeg txawj ntse no, zoo li peb hu lawv, yeej muaj tswv yim nrhiav thiab pe hawm tus Mexiyas. Lawv txoj kev pe hawm yog kev muab khoom tiam xws li kub thiab cov tshuaj tsw qab rau Nws.
Txoj kev pe hawm Vajtswv yog dab tsi rau nej thiab kuv?
Thaum peb xav txog kev pe hawm los yog kev teev tiam, peb pheej xav txog tej yam uas peb ua tau kom qhia tias peb teev ntuj thaum nyob peb ib leeg thiab nyob hauv lub Koom Txoos tej kev sib ntsib. Thaum kuv xav txog txoj kev pe hawm peb Leej Txiv Saum Ntuj Ceeb Tsheej thiab Nws Leej Tub, peb tus Cawm Seej, ua rau kuv xav txog plaub lub ntsiab cai: qhov thib ib, tej yam peb ua thaum pe hawm Vajtswv; qhov thib ob, tej kev xav thaum pe hawm Vajtswv; qhov thib peb, txoj kev teev tiam Vajtswv ib leeg xwb; thiab qhov thib plaub, qhov uas yuav tsum coj raws li cov Neeg Dawb Huv uas peb pe hawm.
Qhov thib Ib, tej Yam Peb Ua Thaum Pe Hawm Vajtswv
Ib yam kev pe hawm tseem ceeb uas neeg coob paub txog yog thaum peb koom ua ke hauv ib qho chaw dawb huv kom teev tiam Vajtswv. Tus Tswv hais tias, “Thiab xwv kom nej yuav ceev nej tus kheej txhij zog kom tej yam ntawm lub ntiaj teb txhob ua rau nej ceb, nej yuav tsum mus rau hauv lub tsev thov Vajtswv thiab fij nej tej cim nco txog thaum yog kuv hnub dawb huv.” Nov yej yog qhov uas qhia seb vim li cas peb ua tej tsev teev ntuj. Tiam sis yog tias yuav tsum ua, ib qho chaw uas tsis tau muab fij tseg tsim nyog yog tias peb tu tau kom huv me ntsis.
Qhov tseem ceeb tshaj yog qhov uas peb ua li cas thaum peb koom ua ke nyob rau tus Tswv hnub. Muaj tseeb tiag, peb hnav ris tsho zoo npaum li peb hnav tau—tsis ua zam tag tiam sis hnav ris tsho npog lub cev kom qhia tias peb hwm thiab saib taus Vajtswv. Peb txoj kev coj yam ntxwv yeej zoo thiab saib taus Vajtswv. Peb pe hawm Nws thaum peb thov Vajtswv; peb pe hawm Nws thaum peb hu nkauj qhuas Nws (tsis yog mloog xwb tiam sis hu nkauj); peb teev tiam Nws thaum peb ib leeg qhia thiab kawm ntawm ib leeg. Yexus hais tias, “Nco ntsoov hais tias nyob rau hnub no, tus Tswv hnub, nej yuav tau muab nej tej txiaj ntsim [uas txhais tias, nej tej kev ‘tiam … uas yog nej lub sij hawm, txuj ci, los sis khoom, kom ua hauj lwm rau Vajtswv thiab pab nej cov neeg zej zog’] thiab nej tej cim nco txog pub rau tus Siab Tshaj Plaws, lees nej tej kev txhaum rau nej cov kwv cov tij, thiab rau tus Tswv.” Peb koom ua ke tsis yog vim peb xav kom muaj kev lom zem—xws li mloog ib pawg nkauj—tiam sis peb xav nco txog Nws thiab txais tej lus “qhia [peb] zoo dua” txog Nws txoj moo zoo.
Nyob hauv lub tuam rooj sab laj tas los, Txwj Laug Patrick Kearon qhia peb tias, “peb tsis sib sau ua ke thaum Hnub Caiv kom tuaj koom noj lub cim nco txog xwb thiab khij tias peb tau ua li ntawd. Peb sib sau ua ke kom thiaj teev tiam Vajtswv. Ob qho no yeej sib txawv heev. Tuaj koom txhais tias peb tuaj es nyob ntawd. Tiam sis [kev] teev tiam Vajtswv yog kev txhob txwm qhuas thiab hawm Vajtswv es peb thiaj hloov tau hauv nruab siab!”
Qhov uas peb siv sij hawm hauv Hnub Caiv rau tus Tswv thiab Nws tej lub hom phiaj yeej yog ib txoj kev pe hawm Vajtswv. Ob peb xyoos tas los, Txwj Laug Russell M. Nelson hais tias: “Yog li ntawd peb yuav ua li cas kom Hnub Caiv dawb huv? Thaum kuv tseem hluas, kuv tau kawm txog tej yam uas neeg sau hais tias yuav tsum tsis txhob ua thaum Hnub Caiv. Tom qab ntawd kuv twb kawm los ntawm cov vaj lug kub hais tias tej yam kuv ua thiab kuv tus xeeb ceem thaum Hnub Caiv yog ib lub cim uas kuv ua rau kuv Leej Txiv Saum Ntuj Ceeb Tsheej [saib Khiav Dim 31:13; Exekhees 20:12, 20]. Thaum kuv to taub li ntawd, kuv tsis tas sau hais tias kuv yuav ua dab tsi thiab tsis ua dab tsi. Thaum kuv yuav tsum txiav txim siab hais tias ib yam puas tsim nyog ua thaum Hnub Caiv, kuv cia li nug kuv tus kheej, ‘Kuv xav ua lub cim twg rau Vajtswv?’”
Kev pe hawm Vajtswv nyob rau tus Tswv hnub muaj ib txoj kev tsom ntsoov rau Yexus Khetos txoj kev txi theej txhoj. Peb ua koob tsheej txog Nws txoj Kev Sawv Rov Los nyob rau hnub Easter tiam sis peb kuj ua li no txhua lub lim tiam thaum peb txais lub cim nco txog Nws txoj Kev Theej Txhoj, tsis hais Nws txoj Kev Sawv Rov Los los yog. Rau cov neeg uas hloov siab lees txim, kev txais lub cim nco txog yog qhov zoo tshaj plaws ntawm kev hwm Hnub Caiv.
Kev koom ua ke ua “Khetos lub cev” yuav pab kom pe hawm Vajtswv yeej muaj hwj chim thiab cov koob hmoov thaum peb ib leeg qhia, pab, thiab txhawb nqa ib leeg. Muaj kev tshawb fawb uas kawm tias cov uas xav tias lawv txoj kev txhawb lawv sab ntsuj plig yog los ntawm kev ua tej yam lawv tus kheej xwb yuav tsom ntsoov rau lawv sab ntsuj plig txoj kev loj hlob tsawg dua, tsis tshua hais tias kev ntseeg tseem ceeb heev, thiab tsis siv sij hawm teev tiam Vajtswv pes tsawg. Vim peb yog ib Haiv Neeg Ntseeg, peb ib leeg txhawb nqa ib leeg txoj kev ntseeg thiab txoj kev pe hawm.
Txawm li ntawd los, peb yeej yuav tsum nco qab ua tej kev pe hawm Vajtswv uas peb ua peb tus kheej thiab nyob hauv tsev. Tus Cawm Seej hais rau peb tias, “Txawm li ntawd los nej yuav tsum coj ncaj ncees ua nej tej kev cog lus txhua hnub thiab txhua lub sij hawm.” Ib tug poj niam muaj tswv yim tau hais li no tias, “Kuv yeej tsis paub ib txoj kev pe hawm Vajtswv zoo tshaj qhov uas peb tos Nws cov me nyuam yaus los rau hauv peb lub neej thiab tu lawv thiab qhia lawv txog Nws txoj hau kev rau lawv.”
Amas thiab Amulej tau qhia cov neeg Xaulas uas raug ntiab tawm ntawm lawv tej tsev teev ntuj tias lawv yuav tsum tsis txhob pe hawm Vajtswv ib zaug ib lub lim tiam xwb tiam sis yuav tsum pe hawm Nws txhua lub sij hawm thiab “nyob txhua qhov chaw uas nej nyob.” Nkawd hais tias kev thov Vajtswv yog kev pe hawm:
“Nej yuav tsum thov Vajtswv kawg siab kawg ntsws nyob hauv nej tej chav teev tiam, thiab nej tej chaw uas tsis muaj neeg paub txog, thiab nyob hauv nej tej hav zoov.
“Muaj tseeb tiag, thiab thaum nej tsis thov tus Tswv, cia nej lub siab puv npo, thov nws tas mus li tsis tu ncua.”
Nkawd kuj hais txog kev nyeem vaj lug kub, kev ua tim khawv txog Yexus Khetos, ua tej kev pab dawb, kev txais tus Vaj Ntsuj Plig Dawb Huv, thiab kev ua Vajtswv tsaug txhua hnub. Cia li xav txog qhov no: “ua neej nyob ua tsaug txhua hnub.” Qhov no yeej yog kuv lub ntsiab cai thib ob:
Tej Kev Xav Thaum Pe Hawm Vajtswv
Qhov uas peb ris Vajtswv txiaj thiab ua Nws tsaug yeej yog qhov uas ua rau peb zoo siab pe hawm Nws thiab tsis xav tias yog ib txoj hauj lwm peb yuav tsum ua xwb.
Kev pe hawm tiag tiag txhais tias peb hlub Vajtswv thiab ywj peb lub siab rau Nws—yog lub txiaj ntsim zoo tshaj plaws uas peb tiam tau. Thaum muaj neeg nug nws seb txoj lus txib tseem ceeb tshaj plaws hauv txoj kev cai yog dab tsi, Yexus teb hais tias, “Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.” Nws kuj hu txoj lus txib no ua nqe thib ib.
Nov yog tus txheej txheem ntawm Yexus txoj kev pe hawm Nws Txiv. Nws lub neej thiab Nws txoj kev txi theej txhoj yog ua kom Leej Txiv tau yeeb koob. Peb nco txog Yexus cov lus thov thaum Nws raug txom nyem thiab raug nyuaj siab tshaj qhov neeg txawj xav tawm: “Kuv Txiv, yog koj pom zoo, thov koj tshem lub khob no ntawm kuv mus,” tiam sis nws txawm ywj rau Nws Txiv hais tias “txawm yog li cas los thov koj tsis txhob ua raws li kuv lub siab nyiam, tiam sis cia ua raws li koj lub siab nyiam xwb.”
Kev teev tiam yog kev siv zog coj raws li Nws tus yam ntxwv zoo tag nrho. Peb yuav tsis ua neeg zoo tag nrho yog siv ib hnub xwb, tiam sis txhua hnub uas peb “yuav muab lub siab mob thiab lub siab xav ua zoo ua kev txi rau [Nws],” ces Nws yuav muab Nws tus Ntsuj Plig los rau peb kom peb muaj Nws txoj kev tshav ntuj puv npo.
Qhov thib Peb, txoj Kev Teev Tiam Vajtswv Ib Leeg Xwb
Nyob hauv tshooj ib hauv phau Lus Qhuab Qhia thiab Kev Khi Lus, tus Tswv tshaj tawm kev txiav txim rau lub ntiaj teb no:
“Lawv tau ua yuam kev tsis ua raws li kuv cov kab ke, thiab tau rhuav kuv txoj kev khi lus uas kav ib txhis;
“Lawv tsis nrhiav tus Tswv los tsa nws txoj kev ncaj ncees, tiam sis txhua tus neeg nyias taug nyias tus kheej txoj kev xwb, thiab raws li tus yam ntxwv ntawm nws tus kheej tus vaj tswv, uas muaj tus yam ntxwv zoo li neeg ntiaj teb.”
Yeej zoo rau peb nco txog tus yam ntxwv ntawm peb tug tub hluas neeg Yudais, Hananiyas, Misayees, thiab Axaliyas, uas raug coj mus ua qhev tsis ntev tom qab Lihais thiab nws tsev neeg tawm Yeluxalees mus. Ib tug thawj coj Npanpiloos tau tis npe tshiab rau lawv ua Sadalas, Mesakas, thiab Anpenekaus. Tom qab ntawd, thaum lawv peb leeg tsis kam pe hawm ib tug mlom uas tus Vaj Ntxwv Nenpukajnexales tsa, nws txib kom muab lawv pov rau hauv ib lub qhov cub, hais rau lawv tias, “Nej xav hais tias tseem yuav muaj dua ib tug vaj tswv nyob qhov twg los pab tau nej thiab no los?”
Nej yeej nco ntsoov lawv teb li cas:
“Tiam sis yog hais tias tus Vajtswv uas peb hwm pom zoo pab peb, nws yeej yuav pab kom peb dim ntawm cov nplaim taws thiab ntawm koj txhais tes[, auj vaj ntxwv].
“Txawm yog nws tsis pab peb los peb hais rau koj hais tias peb yeej yuav tsis hwm thiab tsis pe tus mlom kub uas koj teeb tseg ntawd li.”
Qhov cub kub dhau thiaj li kub cov tub rog uas muab lawv pov rau haud, tiam sis Sadalas, Mesakas, thiab Anpenekaus tsis raug dab tsi. “Vaj ntxwv [Nenpukajnexales] hais tias, Thov ua Sadalas, Mesakas thiab Anpenekaus tus Vajtswv tsaug, [vim] Nws txib nws tus tim tswv los cawm peb tug txiv neej uas pe hawm thiab tso siab rau nws … lawv yeem tso lawv txoj sia tseg zoo dua li uas pe tej vaj tswv uas tsis yog tus Vajtswv tiag.” Lawv tso siab rau Yehauvas kom cawm lawv dim, tiam sis “txawm yog nws tsis pab,” los yog hais tias, yog Vajtswv tsis tiv thaiv kom lawv tsis txhob tuag, ces lawv tseem yuav mob siab ntseeg Nws.
Tej yam twg uas neeg saib tseem ceeb dua kev pe hawm Leej Txiv thiab Leej Tub yog ib tug mlom. Cov uas xyeej Vajtswv yog lub hauv paus ntawm qhov tseeb, los sis hais tias lawv tsis lav ris dab tsi rau Nws, zoo li lawv muab lawv tus kheej tsa ua lawv tus vaj tswv. Tus uas tso siab rau ib pawg twg los sis lub hom phiaj tshaj nws tso siab rau Vajtswv tej lus qhia tus ntawd pe hawm ib tug vaj tswv cuav. Cov uas hais tias lawv pe hawm Vajtswv tiam sis tsis ua raws li Nws cov lus txib nyias taug nyias txoj kev: “Lawv txav ze kuv nrog lawv di ncauj, tiam sis lawv lub siab nyob deb ntawm kuv.” Tus uas peb pe hawm yeej ib txwm yog “Vajtswv [tib leeg thiab] Yexus Khetos, tus uas Nws txib los” nkawd xwb.
Qhov Kawg, Yuav Tsum Coj Raws Li Leej Txiv thiab Leej Tub
Qhov tseem ceeb, peb ua neej zoo li cas yeej yog txoj kev pe hawm Vajtswv uas zoo tshaj plaws. Qhov uas peb muab siab npuab Leej Txiv thiab Leej Tub txhais tias peb coj raws li Nkawd tus yam ntxwv—ua kom peb muaj Nkawd tej cwj pwm. Yog raws li neeg hais tias, kev xyaum raws ib tug yog txoj kev qhuas zoo tshaj plaws, ces tej zaum hais txog Vajtswv mas peb hais tau tias, kev coj raws li Nws tus yam ntxwv yog kev pe hawm Nws zoo tshaj plaws. Ua li no los peb yuav tsum siv zog tsis tu tsis tseg kom nrhiav kev ua dawb huv. Tiam sis kev ua neeg zoo li Yexus Khetos yeej yuav los ntawm tej yam peb ua kom teev tiam Vajtswv. Txwj Laug Kearon tej lus uas kuv hais lawm txog kev pe hawm hais tias, “peb thiaj hloov tau hauv nruab siab” yog ib qho tseem ceeb. Kev pe hawm Vajtswv tiag yuav hloov peb lub siab.
Nov yog qhov zoo tshaj plaws ntawm txoj kev ua raws li peb tej kev khi lus—yog ib txoj kev uas peb pe hawm, hlub, thiab muab siab npuab Vajtswv. Peb taug txoj kev ntawd thaum peb ua kev cai raus dej, cog lus tias peb yuav ris Khetos lub npe thiab coj raws li Nws tej lus txib. Peb txais lub txiaj ntsim Vaj Ntsuj Plig Dawb Huv, tus uas qhia txog tus Cawm Seej txoj kev tshav ntuj uas txhiv peb dim thiab ntxuav peb kom tsis muaj kev txhaum thaum peb hloov siab lees txim. Peb hais tau tias thaum peb hloov siab lees txim peb teev tiam Nws.
Kuj muaj cov kab ke pov thawj hwj thiab tej kev khi lus uas peb ua hauv tus Tswv lub tsev uas ua rau peb ua neeg dawb huv ntxiv Cov kab ke ntawm lub tuam tsev yog ib txoj kev pe hawm Vajtswv uas siab dua.
Thawj Tswj Hwm Russell M. Nelson tau qhia tias “txhua tus txiv neej thiab txhua tus poj niam uas ua cov kab ke pov thawj hwj thiab ua raws li lawv tej kev khi lus nrog Vajtswv yeej yuav txais tau Vajtswv lub hwj chim.” Nov tsis yog ib lub hwj chim uas peb siv kom pab thiab foom koob hmoov rau lwm tus xwb. Nov kuj yog Vajtswv lub hwj chim uas nyob hauv peb kom peb hloov los ua neeg dawb huv ntxiv. Thaum peb ua raws li peb tej kev khi lus, “thiaj pom lub hwj chim ua li Vajtswv tshwm sim” nyob hauv peb.
Thov kom peb yuav ua li cov Neeg Nifais thiab cov Neeg Lamas puag thaum ub, “vau rau ntawm Yexus ko taw, thiab teev tiam nws.” Thov kom peb yuav ua raws li Yexus txib, “txhos caug ntua thiab teev tiam Leej Txiv los ntawm [Leej Tub] lub npe.” Thov kom peb yuav txais yuav tus Vaj Ntsuj Plig Dawb Huv thiab ywj peb lub siab rau Vajtswv, tsis muaj lwm tus vaj tswv, thiab vim peb yog Yexus Khetos cov thwj tim cia li coj raws li Nws tus yam ntxwv hauv peb lub neej. Kuv ua tim khawv tias thaum peb ua li ntawd, peb yuav muaj kev xyiv fab uas los ntawm kev teev tiam. Los ntawm Yexus Khetos lub npe, amees.