“Tig Rov Los Cuag Kuv … Xwv Kom Kuv Yuav Kho Tau Nej”

Yav dhau los peb nyob hauv ib lub tsev uas muaj tej tsob ntoo siab heev nyob ib puag ncig. Nyob ze qhov chaw nkag hauv tsev yog ib tug ntoo willow uas zoo nkauj heev. Muaj ib hmo muaj cua daj cua dub, es tus ntoo ntawd tau vau. Cov cag twb tawm cov av los es pom li ntawd mas yus khuv xim tus ntoo ntawd.

Kuv tab tom npaj yuav muab rab kaw txiav tus ntoo rau cov ntoo taws thaum peb tus neeg zej zog khiav los hais kom kuv txhob ua li ntawd. Nws cem kuv vim kuv yuav tso tus ntoo tseg thiab thov kom peb tsis txhob ua li ntawd. Ces nws taw tes rau ib cag ntoo uas tseem nyob hauv av thiab hais tias yog peb muab tus ntsoo tsa, txiav ceg ntoo, thiab tu zoo zoo ces cov cag yuav rov qab ncav mus nyob ruaj hauv av.

Kuv tsis tshua ntseeg hais tias ib tug ntoo uas tau vau li no thiab tuag yuav ua li cas ho rov qab ciaj taus. Kuv xav tias txawm yog tus ntoo yuav rov loj hlob tuaj, ntshe yeej yuav tiv tsis taus cua daj cua dub ntxiv. Tiam sis vim peb paub tias peb tus neeg zej zog ntseeg tias tus ntoo tiv taus, peb twb ua raws li nws hais.

Es tom qab ntawd nev? Dhau sij hawm mus me ntsis, peb tau pom tias tus ntoo tseem ciaj vim tuaj cag ntxiv. Es tam sim no, 12 xyoos tom qab ntawd, tus ntoo muaj sia muaj zog, cov cag nyob ruaj hauv av, thiab pab kom cov uas saib xav tias nws zoo nkauj.

Thaum kuv ntsib Tsoom Haiv Neeg Ntseeg hauv Hnub Nyoog Kawg nyob thoob plaws lub ntiaj teb, ua rau kuv nco txog tus ntoo willow no thiab qhov uas tseem muaj kev cia siab txawm yog yus xav tias txhua yam tsis zoo lawm. Ib txhia dhau los muaj zaj lus tim khawv txog txoj moo zoo uas muaj sia muaj zog ib yam li tus ntoo no. Ces, nyias ua nyias tej yam kom tej zaj lus tim khawv ntawd qaug zog zuj zus, ces thaum kawg lawv thiaj li tsis ntseeg lawm. Lwm tus tseem tshuav ib tug cag xwb nyob hauv cov av ntawm txoj moo zoo.

Tiam sis muaj ntau lub sij hawm uas kuv hnov txog tej zaj dab neeg ntawm cov uas tau xaiv kom rov qab ntseeg thiab rov qab los rau lub Koom Txoos. Lawv tsis tso lawv txoj kev ntseeg tseg thiab xav tias lawv zoo li cov ntoo taws uas tsis muaj nqis li, tiam sis lawv twb mloog tej kev tshoov siab thiab tej lus caw ntawm cov uas hlub lawv kom rov qab los.

Muaj ib ceg txheem ntseeg lub rooj sab laj nyob hauv Kaublim Teb thaum ib tug mej zeej uas rov qab los qhia tias: “Kuv ua cov tij laug tsaug vim lawv txaus siab zam txim rau kuv txoj kev tsis ntseeg thiab tej kev qaug zog, vim lawv pheej hu kuv, thiab rau cov mej zeej uas ib txwm ua siab zoo rau kuv. Kuv tseem muaj cov phooj ywg coob uas tsis tshua muaj siab ntseeg. Txaus luag heev, tiam sis lawv ib leeg qhia ib leeg hais kom rov qab mus rau lub Koom Txoos thiab rov qab ntseeg. Nyaj lawv txhua tus xav xav ntseg.”

Rau nej txhua tus uas xav xav ntseeg, peb caw nej rov qab los. Kuv cog lus tias nej txoj kev ntseeg txais tau dag zog thaum nej rov qab nrog Tsoom Haiv Neeg Ntseeg pe hawm Vajtswv.

Ib tug tub txib dhau los los ntawm Afikas Teb tau sau ntawv rau ib tug thawj coj hauv lub Koom Txoos, thov txim thiab xav txais kev zam txim vim nws tu siab txog tus thawj coj tej lus qhia txog ib kab lig kev cai, uas ua rau nws tso lub Koom Txoos tseg. Nws txo hwj chim hais tias: “Qhov uas kuv tu siab txog qhov no 15 xyoos tas los lawm ua rau kuv yuav tsum them ib tug nqi loj heev. Ua rau kuv poob ntau yam—ntau tshaj qhov kuv xav. Kuv txaj muag heev vim kuv twb ua txhaum rau lwm tus, tiam sis qhov tseem ceeb kuv zoo siab kawg uas kuv tau nrhiav txoj kev rov qab los.”

Rau tag nrho cov uas paub lawm txog tej yam uas nej ua poob, peb caw nej rov qab los nej thiaj li yuav rov qab noj tau cov txiv qab heev ntawm txoj moo zoo.

Ib tug poj niam nyob hauv Teb Chaws Amelikas tau ncaim lub Koom Txoos mus rau ntau xyoo. Zaj lus txog nws txoj kev rov qab los muaj tej zaj lus qhia tseem ceeb rau cov niam tsev txiv tsev thiab tsev neeg uas txhawj heev thaum cov uas lawv hlub khiav deb ntawm lawv txoj kev ntseeg. Nws sau hais tias:

“Kuv yeej hais tau ntau yam qhia vim li cas kuv tau muab lub Koom Txoos, txoj moo zoo, thiab kuv tsev neeg tso tseg.” Tiam sis tej ntawd los yeej tsis muaj qab hau. Kuv tsis tau txiav txim siab ib zaug xwb hais tias kuv yuav tawm lub Koom Txoos mus—zoo li kuv xaiv ib txhiab yam. Tiam sis ib yam uas kuv yeej ib txwm paub yog qhov uas kuv niam kuv txiv tau txiav txim ib yam tseem ceeb heev thiab nkawd yeej ib txwm ua raws li nkawd txiav txim. Nkawd txiav txim siab hlub kuv.

“Ntshe kuv tsis paub nkawd tau los kua muag ntau npaum li cas, nkawd pw tsis tsaug zog pes tsawg hmo, los sis nkawd tau hais pes tsawg lo lus taij thov Vajtswv kom pab kuv. Nkawd tsis tau hais kuv txog kuv tej kev txhaum; tiam sis, nkawd tau hu kuv los thaum kuv ua txog ua txhaum. Nkawd tsis tau ua rau kuv tsis xav tuaj hauv nkawd tsev thiab koom nrog peb tsev neeg; tej kev xav li ntawd los yeej yog los ntawm kuv xwb. Tiam sis, nkawd tseem thov kuv tuaj. Nyaj nkawd tau pom kuv txoj kev kaj qauj les zuj zus. Tiam sis nkawd paub tias txawm kuv yog ib tug neeg zoo li cas thaum ntawd mas kuv yeej yuav hloov los ua ib tug neeg zoo dua.

“Ib yam li txoj kev uas kuv taug kom ncaim lub Koom Txoos mus yeej yog ib txoj kev nyuaj to taub, kuv txoj kev rov qab los kuj nyuaj to taub thiab. Tiam sis ib yam uas tsis nyuaj txog kuv txoj kev rov qab los yog txoj kev xav tias kuv twb rov qab los txog kuv tsev.”

Kuv zaj lus hnub no yog hais rau txhua tus uas twb hnov tus Ntsuj Plig dhau los tiam sis xyov tsis paub puas muaj ib txoj kev rov qab los los sis puas muaj chaw rau nej hauv Yexus Khetos lub Koom Txoos. Kuv kuj hais rau cov uas yuav luag yuav mus los sis cov uas tab tom raug ntxias kom tawm mus.

Zaj lus no tsis yog ib txoj kev twv nej, thiab tsis yog kev rau txim. Yog ib txoj kev caw nej, vim kuv hlub nej thiab muaj siab xav kom nej rov qab los rau nej lub tsev ntawm sab ntsuj plig.

Kuv twb thov hais tias nej yuav hnov tus Vaj Ntsuj Plig Dawb Huv tej lus tim khawv thaum nej mloog peb tus Cawm Seej, Yexus Khetos, tej lus caw thiab tej lus cog tseg zoo kawg.

“Nim no nej puas tseem tsis kam tig rov los cuag kuv, thiab hloov siab lees txim ntawm nej tej kev txhaum, thiab hloov siab los ntseeg, xwv kom kuv yuav kho tau nej?”

Txhua lub lim tiam neeg coob ua raws li tus Cawm Seej caw lawv thaum lawv rov qab los ua Nws cov thwj tim thiab koom lub Koom Txoos, maj mam thiab txo hwj chim thov txais Yexus tej lus cog tseg kom kho lawv. Thiab tsis raws li tej zaj lus uas ib txhia neeg nyiam hais, peb cov tub hluas ntxhais hluas feem coob tab tom xaiv kom lawv txoj kev ntseeg Yexus Khetos muaj zog thiab loj tuaj.

Thaum ib txhia ntawm Yexus cov thwj tim hauv Kapena-us xav tias Nws tej lus qhia nyuaj rau lawv to taub, Nws tau tig mus rau Nws cov Thwj Tim thiab nug tias, “Nej yuav tso kuv tseg thiab los?”

Nov yog lo lus nug uas peb txhua tus yuav tsum teb txhua zaus peb raug kev sim siab. Petus tej lus teb Yexus los yeej muaj nqis thiab tseem ceeb: “Peb yuav mus cuag leej twg? koj tej lus pub tau txoj sia ib txhis rau neeg.”

Yog li ntawd thaum nej xav txog tus Cawm Seej tej lus caw nej rov qab los cuag Nws, nej kawm dab tsi los ntawm zaj dab neeg txog tus ntoo willow?

1. Txoj kev rov qab los yeej tsis yooj yim, tiam sis muaj nqis heev. Thaum peb rov qab muab tus ntoo willow tsa, twb txiav tag nrho cov ceg ntoo. Tsis zoo nkauj li. Tej zaum peb yuav xav tias peb tsis tsim nyog thaum peb tso tej yam qub tseg thiab rhuav peb txoj kev muab hlob. Qhov uas nej tsom ntsoov rau kev ntseeg Yexus Khetos thiab Nws txoj moo zoo—yog lub cev ntoo thiab cag ntoo—yuav ua rau nej muaj kev cia siab thiab ua siab loj kom los ib ruam.

2. Twb siv ntau xyoo rau peb tus ntoo willow rov qab muaj zog thiab zoo nkauj li qub. Tam sim no tus ntoo no muaj zog thiab zoo nkauj tshaj. Ua siab ntev thaum nej txoj kev ntseeg thiab zaj lus tim khawv loj tuaj. Xws li tsis txhob tu siab yog muaj neeg tsis txawj xav hais tej yam xws li “Nej nyob qhov twg tau ntev?”

3. Ntshe tus ntoo yeej yuav tsis ciaj yog tias tsis muaj neeg tu thiab saib xyuas tsis tu tsis tseg. Nej yuav tu nej txoj kev ntseeg thiab zaj lus tim khawv thaum nej los txais lub cim nco txog txhua lub lim tiam thiab pe hawm Vajtswv hauv tus Tswv lub tsev.

4. Ib yam li tus ntoo xav tau kev tshav ntuj kom ceg ntoo thiab cov nplooj yuav rov qab tuaj, ces nej zaj lus tim khawv yuav loj tuaj thaum nej ua tib zoo mloog tus Ntsuj Plig tej lus tim khawv. Cia li kawm los ntawm Amulej, uas piav txog lub sij hawm uas nws yog ib tug mej zeej uas tsis tshua muaj siab ntseeg hais tias, “Vajtswv twb hu kuv ntau zaus thiab kuv tsis kam mloog.”

5. Kuv tus neeg zej zog paub tias tus ntoo yuav rov qab muaj sia. Yog li ntawd tus Tswv paub tias nej muaj peev xwm ua dab tsi thiab nej txoj kev ntseeg thiab nej zaj lus tim khawv yuav zoo li cas. Nws yeej yuav tsis tso nej tseg. Dhau los ntawm Yexus Khetos txoj Kev Theej Txhoj, Nws kho tau txhua yam uas tu lawm.

Kuv ua tim khawv hais tias cov nyob saum ntuj ceeb tsheej zoo siab kawg txog cov uas rov qab los. Xav tau nej thiab muaj neeg hlub nej. Kuv ua tim khawv tias Yexus Khetos yog peb tus Cawm Seej thiab Nws yuav foom koob hmoov rau txhua tus kom lawv muaj kev kaj siab lug thiab kev xyiv fab ntxiv yog lawv rov qab mus cuag Nws. Nws txhais caj npab hlub tshua cev tuaj rau nej. Yeej tsis lig dhau rau nej rov qab los. Peb teb tag siab ntsws hais tias, peb zoo siab tos txais nej rov qab los tsev. Los ntawm Yexus Khetos lub npe, amees.