Vajtswv tej Kev Pab Peb hauv lub Neej No

Dhau los ntawm tus Yaj Saub Joseph Smith, tus Tswv tau qhia ntau yam txog peb lub neej ua ntej peb yug los hauv ntiaj teb no. Nyob ntawd, peb yog Vajtswv cov me nyuam ntsuj plig. Vim Vajtswv xav pab Nws cov me nyuam ua zoo zuj zus, Nws tau txiav txim siab tsim ib lub ntiaj teb kom peb txais tau ib lub cev, kawm los ntawm peb lub neej, muaj tej cwj pwm zoo li Nws, thiab raug kev sim siab seb peb puas yuav ua raws li Vajtswv cov lus txib. Cov uas tsim nyog yuav “tau yeeb koob ntxiv rau saum lawv lub taub hau mus ib txhiab thiab ib txhis” (Anplaham 3:26).

Xwv kom muaj raws li Vajtswv txoj hau kev no, Vajtswv tau xaiv Nws Tib Leeg Tub los ua peb tus Cawm Seej. Luxifaws, tus uas hais kom ua rau tib neeg txoj kev ywj siab xaiv puas tsuaj, tau los ua Dab Ntxwg Nyoog thiab raug “ntiab tawm.” Vim nws raug ntiab tawm mus nyob hauv lub ntiaj teb thiab yuav tsis muaj cib fim muaj ib lub cev nqaij daim tawv, twb cia Dab Ntxwg Nyoog sim “dag ntxias thiab ua rau neeg dig muag, thiab txhom coj lawv raws li nws siab nyiam, twb coj tag nrho cov uas tsis kam mloog [Vajtswv] lub suab” (Mauxes 4:4).

Ib qho tseem ceeb rau Vajtswv txoj hau kev kom Nws cov me nyuam ua zoo zuj zus hauv lub ntiaj teb yog qhov uas lawv yuav raug “txhua yam … qhov fab ntxeev” (2 Nifais 2:11). Ib yam li peb tej thooj nqaij yuav tsis loj tuaj yog tsis muaj dab tsi uas ua rau peb siv zog tawm tsam, kev hloov los ua neeg zoo zuj zus hauv lub ntiaj teb los kuj yuav tsum siv zog tawm tsam Dab Ntxwg Nyoog tej kev ntxias thiab lwm yam kev tawm tsam hauv lub neej no. Qhov tseem ceeb tshaj plaws kom pab yus sab ntsuj plig ua zoo zuj zus yog lub hwj chim uas Vajtswv muab kom xaiv qhov yog thiab paub qhov zoo thiab qhov phem. Cov uas xaiv qhov yog yuav vam meej kom txais tau lawv ntiag tug mus ib txhis li. Cov uas xaiv kev phem—uas tej lub sij hawm txhua tus yuav ua raws li tej kev ntxias hauv lub ntiaj teb no—yuav tsum pab cawm lawv dim, uas Vajtswv tus uas hlub tib neeg muab los.

Qhov uas pab peb hauv lub ntiaj teb zoo tshaj plaws yog qhov uas Vajtswv tau npaj ib tug Cawm Seej, Yexus Khetos, uas yuav raug txom nyem kom them tus nqi thiab muab kev zam txim rau tej kev txhaum tom qab peb hloov siab lees txim. Txoj Kev Theej Txhoj uas yog muab los ntawm kev hlub tshua thiab muaj yeeb koob piav yog vim li cas kev ntseeg tus Tswv Yexus Khetos yog thawj txoj ntsiab cai hauv txoj moo zoo. Nws txoj Kev Theej Txhoj “ua rau cov tuag sawv rov los” (Amas 42:23), thiab “theej rau neeg ntiaj teb tej kev txhaum” (Amas 34:8), kom ua rau tag nrho peb tej kev txhaum ploj mus yog peb hloov siab lees txim thiab ua rau tus Cawm Seej muaj hwj chim pab peb thaum peb raug kev mob kev nkees thiab kev qaug zog hauv lub neej no.

Ntxiv rau kev ua rau peb tej kev txhaum ploj mus thiab txais kev zam txim, Leej Txiv thiab Leej Tub uas hlub peb Nkawd txoj hau kev muaj ntau lub txiaj ntsim uas tiv thaiv peb, tsis hais tej kev tiv thaiv peb kom pab tsis txhob ua txhaum. Peb lub neej hauv ntiaj teb no yeej pib nrog ib leej txiv thiab ib leej niam. Qhov zoo tshaj plaws yog thaum nkawd ob leeg nyob thiab nyias muaj nyias tej txiaj ntsim kom pab peb loj hlob tuaj. Yog tsis zoo li ntawd, ces qhov uas tsis muaj nkawd yog ib qho teeb meem uas peb yuav tsum kov yeej.

Peb Leej Txiv Saum Ntuj Ceeb Tsheej txoj hau kev muab lwm yam kev pab kom coj peb mus hauv peb lub neej. Kuv yuav hais txog plaub yam no. Thov tsis txhob yuam kev suav plaub yam xwb, vim tej kev pab no los yeej sib tshooj. Tsis tas li ntawd xwb, muaj lwm yam kev hlub tshua uas tiv thaiv peb thiab.

Yam thib ib, kuv hais txog Khetos txoj Kev Kaj los sis Khetos tus Ntsuj Plig. Nyob hauv phau Maulaunais, Maulaunais hais txog nws txiv tej lus qhia hais tias “twb muab … tus Ntsuj Plig [no] rau txhua tus neeg, xwv kom nws yuav paub qhov zoo thiab qhov phem” (Maulaunais 7:16). Peb nyeem txog tib zaj lus qhia no nyob hauv kev tshwm sim hauv lub caij nyoog kawg no:

“Thiab tus Ntsuj Plig muab qhov kaj rau txhua tus neeg uas los rau hauv lub ntiaj teb; thiab tus Ntsuj Plig ua rau txhua tus neeg to taub thoob plaws lub ntiaj teb, cov uas mloog tus Ntsuj Plig lub suab” (Lus Qhuab Qhia thiab Kev Khi Lus 84:46).

“Vim twb tau xa kuv tus Ntsuj Plig mus rau hauv ntiaj teb mus ua rau cov neeg txo hwj chim thiab muaj siab xav ua zoo thiaj to taub, thiab mus rau txim rau cov tsis mloog Vajtswv lus” (Lus Qhuab Qhia thiab Kev Khi Lus 136:33).

Thawj Tswj Hwm Joseph Fielding Smith tau piav txog tej nqe vaj lug kub no: “Tus Tswv tsis tau cia tib neeg (thaum lawv yug los hauv lub ntiaj teb no) tsis muaj kev pab hlo li, kom lawv xuas tsaus ntauj nti nrhiav kev kaj thiab qhov tseeb, tiam sis txhua tus neeg … thaum nws yug los nws muaj cai txais tej kev coj, tej kev qhia, thiab tej lus ntuas los ntawm Khetos txoj Kev Kaj los sis Kev Kaj ntawm Qhov Tseeb.”

Txoj kev pab thib ob uas tus Tswv muab kom pab peb xaiv qhov zoo yog Vajtswv tej lus qhia sib txheeb hauv cov vaj lug kub uas piav txog txoj hau kev cawm seej (los yog txoj hau kev zoo siab). Tej lus qhia no yog cov lus txib, cov kab ke, thiab tej kev khi lus.

Cov lus txib qhia tias peb Leej Txiv Saum Ntuj Ceeb Tsheej tau npaj txoj kev twg rau peb kom ua zoo zuj zus thiaj tau txoj sia nyob mus ib txhis. Tib neeg uas xav tias tej lus txib yog tej uas Vajtswv siv kom txiav txim siab yuav rau txim rau leej twg tsis to taub lub ntsiab no txog Vajtswv txoj hau kev zoo siab. Nyob hauv txoj kev no, peb nrog tus Cawm Seej sib raug zoo zuj zus thiab los ua neeg tsim nyog haj yam txais tau Nws lub hwj chim kom pab peb mus ua raws li lub hom phiaj uas Nws xav kom peb txhua tus ua. Peb Leej Txiv Saum Ntuj Ceeb Tsheej xav kom tag nrho Nws cov me nyuam rov qab los rau lub nceeg vaj xilethi-aus, qhov chaw uas Vajtswv thiab peb tus Cawm Seej nyob, thiab muaj lub neej ib yam li cov nyob hauv lub yeeb koob xilethi-aus muaj.

Cov kab ke thiab tej kev khi lus yog ib feem ntawm txoj kev cai uas yog txoj kev mus rau txoj sia nyob mus ib txhis. Cov kab ke, thiab tej kev khi lus dawb ceev uas peb nrog Vajtswv khi thaum ua cov kab ke ntawd, yog tej yam uas yuav tsum ua thiab pab coj peb txoj hau kev. Kuv nyiam xav hais tias tej kev khi lus qhia hais tias raws li Vajtswv txoj hau kev, Nws muab Nws cov koob hmoov zoo tshaj plaws rau cov uas cog lus ua ntej hais tias lawv yuav ua raws li tej lus txib thiab ua raws li tej lus cog tseg ntawd.

Lwm yam uas Vajtswv muab kom pab peb xaiv qhov zoo yog tus Vaj Ntsuj Plig Dawb Huv tej kev tshwm sim. Tus Vaj Ntsuj Plig Dawb Huv yog tus thib peb hauv Pawg Vajtswv. Nws txoj hauj lwm, raws li qhia hauv cov vaj lug kub, yog kom ua tim khawv txog Leej Txiv thiab Leej Tub, qhia peb, thiab ua rau peb nco txog txhua yam, thiab coj peb kev mus kom paub tag nrho tej yam tseeb. Cov vaj lug kub muaj ntau zaj lus piav txog tus Vaj Ntsuj Plig Dawb Huv tej kev tshwm sim, xws li thaum ua tim khawv rau yus sab ntsuj plig thaum thov seb Phau Ntawv Maumoos puas muaj tseeb. Yeej yuav tsum tsis txhob xav tias kev tshwm sim yog lub txiaj ntsim Vaj Ntsuj Plig Dawb Huv uas yuav muab tom qab yus ua kev cai raus dej.

Ib yam tseem ceeb kawg ntawm Vajtswv tej kev pab rau Nws cov me nyuam uas rau siab ntseeg yog lub txiaj ntsim Vaj Ntsuj Plig Dawb Huv. Peb paub tias lub txiaj ntsim no tseem ceeb heev vim yog ib yam uas yus txais tom qab yus hloov siab lees txim thiab ua kev cai raus dej, ces “tom qab ntawd [cov vaj lug kub piav hais tias] kev zam txim rau nej tej kev txhaum los ntawm hluav taws thiab los ntawm tus Vaj Ntsuj Plig Dawb Huv” yuav los (2 Nifais 31:17). Cov neeg uas txais kev zam txim no—ces ib sij rov qab hloov siab lees txim txhua hnub thiab ua neej raws li tej kev khi lus uas lawv khi los ntawm txoj kab ke txais lub cim nco txog—tsim nyog txais lo lus cog tseg uas hais tias yuav muaj tus Vaj Ntsuj Plig Dawb Huv, tus Tswv tus Ntsuj Plig, “niaj hnub nrog lawv nyob” (Lus Qhuab Qhia thiab Kev Khi Lus 20:77).

Yog li ntawd, tus Thawj Tswj Hwm Joseph F. Smith qhia tias tus Vaj Ntsuj Plig Dawb Huv yuav “ua rau tib neeg to taub meej txog tej yam ntawm Vajtswv, ua kom lawv ntseeg tias thaum lawv hloov siab los ntseeg lawv tau ua raws li Leej Txiv lub siab nyiam, thiab ua ib tug khub uas ua tim khawv rau lawv tsis tu tsis tseg tas lawv lub neej, coj lawv mus rau qhov tseeb tiag thiab niaj hnub ua rau lawv muaj kev xyiv fab thiab kev zoo siab, uas muaj siab xav ua zoo rau txhua tus neeg, xav raug lwm tus tej kev ua txhaum tshaj lawv xav ua txhaum, thiab ua neeg siab dawb siab zoo, uas siab ntev thiab muaj lub siab hlub tshua. Txhua tus uas muaj lub txiaj ntsim uas muaj nqis loj kawg, lub hlaws uas muaj nqis heev, yeej yuav xav xav ua ncaj ncees. Thawj Tswj Hwm Smith xaus lus hais tias, “Yog tsis muaj tus Vaj Ntsuj Plig Dawb Huv ntshe tsis muaj ib tug neeg uas taug taus txoj kev ti thiab nqaim.”

Vim peb muaj ntau yam kev pab coj peb txoj hau kev hauv lub neej no, ua rau peb poob siab uas tshuav neeg coob uas tsis tau npaj ntsib peb tus Cawm Seej thiab tus Txhiv Dim, Yexus Khetos. Nws zaj lus piv txwv txog kaum tus hluas nkauj, uas twb hais ntau zaus hauv lub rooj sab laj no, ua rau peb xav tias ntawm cov uas Nws caw lawv tuaj ntsib nws, ntshe ib nrab yuav tsis npaj siab.

Peb txhua tus paub txog neeg coob uas tsis npaj siab li no: cov tub txib uas rov qab los tsev thiab nres tsis pab lawv sab ntsuj plig loj hlob tuaj vim lawv muaj tej lub caij thaum lawv tsis tshua muaj siab ntseeg, cov tub hluas ntxhais hluas uas tsis mloog lub Koom Txoos tej lus qhia thiab mus koom tej yam ntxim saib ntxim ua, cov txiv neej uas tos tsis ua kab ke kom txais lub Pov Thawj Hwj Mekhixedes, cov txiv neej thiab cov poj niam—ib txhia uas yog cov xeeb ntxwv ntawm cov pioneer los yog niam thiab txiv zoo—uas tau tso lawv tej kev khi lus tseg los yog tsis kam khi lus hauv lub tuam tsev.

Cov mej zeej pheej ua yuam kev li no thaum lawv tsis ua raws nraim li tus txheej txheem pab txhawb nqa lawv sab ntsuj plig uas yog kev thov Vajtswv yus tus kheej, kev kawm vaj lug kub txhua hnub, thiab kev hloov siab lees txim txhua hnub. Tiam sis, ib txhia tsis rov qab khi lus txhua lub lim tiam vim lawv tsis txais lub cim nco txog. Ib txhia hais tias lub Koom Txoos tsis pab lawv; lawv thiaj muab pauv kom ua tej yam li lawv xav tias yuav pab lawv thaum yav tom ntej thiab tsis ua raws li tej lub cib fim uas tus Tswv tau qhia thiab muab rau peb kom pab lwm tus.

Kev txo hwj chim thiab kev tso siab rau tus Tswv yeej yuav kho tej kev ua yuam kev li ntawd. Ib yam li Phau Ntawv Maumoos qhia, tus Tswv “yeej foom koob hmoov thiab ua kom vam meej rau cov uas tso siab rau nws” (Hilamas 12:1). Kev tso siab rau tus Tswv yog ib yam uas txhua tus uas ua yuam kev saib Vajtswv cov lus txib thiab Nws cov yaj saub tej lus qhia rau nqi kom tawm tsam tib neeg tej lub tswv yim thiab kev txawj ntse.

Kuv twb hais txog ntau yam kev pab uas peb Leej Txiv Saum Ntuj Ceeb Tsheej uas hlub peb tau muab kom pab Nws cov me nyuam rov qab los cuag Nws. Nyob hauv txoj hau kev no, peb yuav tsum tso siab rau Vajtswv thiab thov thiab siv tej kev pab no, qhov tseem ceeb no yog Nws Tib Leeg Tub txoj Kev Theej Txhoj, peb tus Cawm Seej thiab tus Txhiv Dim, Yexus Khetos. Kuv thov kom peb yuav txawj qhia thiab ua neej raws li cov ntsiab cai no, los ntawm Yexus Khetos, amees.