Kev Siab Hlub—Ib lub Cim Qhia tias Ua Thwj Tim Tiag

Ib tug thwj tim yog ib tug uas raws lwm tus qab los sis yog ib tug tub kawm lwm tus tej kev qhia. Cov thwj tim yog cov uas “xyaum ua” es siv tag nrho lawv lub neej rais los mus ua neeg zoo li lawv tus xib hwb. Yog li ntawd, kev ua Yexus Khetos ib tug thwj tim txhais tau tias yus tsis yog ntseeg Nws tej kev qhia thiab cov lus qhuab qhia nkaus xwb. Qhov no yeej muaj lub ntsiab ntau tshaj qhov uas yus lees paub tias Nws los saum ntuj los thiab txais Nws ua peb tus Cawm Seej thiab tus Txhiv Dim, txawm tias qhov ntawd yeej tseem ceeb.

Thawj Tswj Hwm Dallin H. Oaks piav tias: “Txoj kev raws Khetos qab tsis yog ib yam yus lam tau lam ua los sis xyaum ua tej lub sij hawm xwb. Yeej yog ib txoj kev cog lus thiab ib txoj kev ua neej uas peb yuav tsum ua txhua lub sij hawm thiab nyob txhua qhov chaw.” Kev ua thwj tim yog thaum peb txhob txwm pauv peb lub neej thaum peb siv tus Tswv txoj kev txi theej txhoj thiab Nws lub hwj chim. Qhov kawg uas ib tug thwj tim xav ua yeej yog kom rais los mus ua neeg zoo ib yam li Yexus Khetos—xwv kom peb yuav txais tau Nws “tus yam ntxwv rau [peb] lub ntsej muag.”

Yog yuav ua tus Tswv cov thwj tim, peb yuav tsum txhob txwm ua raws nraim li Nws ua thiab xav txhua txhua hnub—piv xam hais tias, Nws txoj kev mloog lus, kev txo hwj chim, thiab kev ua siab ntev. Thaum peb maj mam kho peb tej cwj pwm kom ua zoo li Nws, peb thiaj pib “txais yuav [Nws] lub hwj chim saum ntuj ceeb tsheej.” Txoj kev coj raws li tus Cawm Seej tej cwj pwm twb yog lub ntsiab ntawm txoj kev pe hawm Nws. Xws li Thawj Tswj Hwm Nelson qhia, “Txoj kev qhia peb txoj kev hlub rau Yexus zoo tshaj plaws twb yog peb txoj kev coj raws li Yexus ua xwb.”

Nyob ntawm Yexus Khetos tej cwj pwm uas peb yoog tau, muaj ib tug cwj pwm uas tseem ceeb tshaj thiab piav txog txhua yam tsav. Qhov cwj pwm ntawd yog Nws txoj kev hlub dawb paug, los yog kev siab hlub. Tus yaj saub Maumoos thiab tus Thwj Tim Povlauj qhia peb tias yog tsis muaj kev siab hlub, “[peb] tsis muaj nqis dab tsi.” Los yog, raws li qhia rau tus Yaj Saub Joseph Smith, yog tsis muaj “kev siab hlub, [peb] yuav tsis muaj peev xwm ua tau ib yam dab tsi li.”

Tus Cawm Seej Kiag qhia tias kev hlub yog ib lub cim los sis cim hom uas Nws cov thwj tim tseeb yuav muaj thaum Nws tshaj tawm hais tias:

“Nim no kuv yuav muab ib txoj kev cai tshiab rau nej, Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg.

“Yog nej ib leeg hlub ib leeg, , sawv daws thiaj yuav paub hais tias nej yog kuv cov thwj tim.”

Kev siab hlub yog ib yam nyuaj qhia seb yog dab tsi tiag tiag tiam sis sawv daws yeej paub thaum lawv tau hnov lawm. Qhia Kuv txoj Moo Zoo qhia tias “kev siab hlub, ib yam li kev ntseeg, ua rau yus ua tej yam.” Muaj tseeb tiag, kev siab hlub yog “kev hlub uas kom neeg ua ib yam dab tsi.” Thaum piav li no peb thiaj to taub tag nrho tus Cawm Seej lub neej vim—Nws “mus thoob plaws qhov txhia chaw ua tej hauj lwm zoo.”

Ua cov neeg ntseeg Yexus Khetos, peb yuav tsum mob siab sim ua raws li peb tus Xib Hwb ua thaum Nws muaj kev hlub dawb paug rau lwm tus neeg. Txawm tias tus Cawm Seej ua ntau yam qhia txog kev siab hlub, kuv xav qhia ntxiv txog peb yam ntawm Nws txoj kev siab hlub uas peb pom tau hauv Nws cov thwj tim tseeb.

Qhov thib ib, tus Cawm Seej qhia tias Nws muaj siab hlub thaum Nws muaj kev khuv leej. Thaum nws ua Nws txoj hauj lwm qhuab qhia cov Neeg Nifais raws li sau tseg hauv Phau Ntawv Maumoos, tus Tswv caw cov neeg kom rov mus tsev thiab ntsuam xav txog tej yam Nws twb qhia lawm thiab npaj rau Nws txoj kev rov qab los hnub tom qab ntawd. Ces phau no sau li no:

“Lawv los kua muag, ntsia ntsoov Nws zoo li lawv xav thov kom nws nrog lawv nyob ib nyuag ntev me ntsis.

“Thiab nws hais rau lawv tias: Saib seb, kuv lub siab muaj kev khuv leej puv npo rau nej.”

Kev khuv leej yog ib qho ntawm kev siab hlub uas pab nplij neeg lub siab. Vim muaj kev khuv leej puv npo, tus Tswv tau kho cov neeg mob thiab neeg txom nyem hauv pab neeg ntawd. Tom qab ntawd, Nws tau foom koob hmoov rau lawv cov me nyuam thaum uas ib pab tim tswv tau nqi los saum ntuj los thiab puav lawv ib ncig. Nws tau ua siab zoo li no, hlub lawv, thiab ntau yam ntxiv, vim Nws tau “muaj kev khuv leej.”

Thaum kuv ua tub txib hauv Amelikas Qab Teb, kuv muaj ib tug phooj ywg uas muaj kev khuv leej rau kuv. Muaj ib hmos kuv tab tom tsav tsheb nrog kuv tus khub los ntawm peb qhov chaw tshaj tawm txoj moo zoo tus thawj tswj hwm lub tsev, ces ib tug tub hluas uas caij lub luv thij tig los rau pem hauv ntej kuv lub tsheb. Ua ceev ceev ntawd kuv tig tsis tau ces tau tsoo nws. Tu siab kawg, vim tus tub hluas no txawm tuag vim tsoo nws. Kuv nyuaj siab kawg vim nws tuag. Kuv ntshai heev thiab xav tsis thoob thaum kuv xav txog qhov no, es lawv coj kuv mus kaw qhov taub. Kuv tsis tau nyob kuv ib leeg xwb thiab ntshai npaum li no dua ib zaug. Kuv poob siab nthav thiab ntshai hais tias kuv yuav raug kaw qhov taub rau tag nrho kuv lub neej.

Muaj dua ib tug tub txib, Txwj Laug Brian Kochevar, uas kawm txog qhov xwm txheej no thiab tau muaj kev khuv leej. Nws los rau hauv lub qhov taub thiab taij thov cov tub ceev xwm kom lawv yuav cia nws los nrog kuv nyob hauv qhov taub xwv kom kuv yuav tsis nyob kuv ib leeg xwb. Muaj hmoov, vim lawv kam. Txog niaj hnub nim no, kuv muaj kev ris txiaj heev vim tus thwj tim no muaj kev hlub rau kuv ib yam li Yexus muaj, uas pab kuv nyob tus me ntsis, nplij kuv lub siab thaum muaj kev nyuaj siab tshaj plaws hauv kuv lub neej. Nws txoj kev khuv leej ntawd yog ib lub cim txog nws txoj kev ua thwj tim. Xws li Thawj Tswj Hwm Nelson qhia, “Txoj kev yooj yim tshaj kom paub tias leej twg yog tus coj raws li Yexus Khetos tiag tiag yog kev saib tus ntawd ua siab zoo rau lwm tus npaum li cas.”

Lwm qhov piv txwv txog tus Cawm Seej txoj kev hlub yog qhov uas Nws pom thiab txhawb nqa lwm tus neeg tej kev xav tau txawm lawv tsis hais qhia tawm. Rau tus txiv neej uas ceg tawv rau 38 xyoo tsis muaj leej twg pab nws, tus Tswv tau kho nws thiab yaum kom nws yuav ua neej ncaj ncees. Tus poj niam uas tau deev luag txiv, Nws muab kev cia siab rau nws thiab nplij nws siab tsis tau rau txim rau nws. Rau tus txiv neej uas tuag tes tuag taw uas lawv muab dauv los ntawm ru tsev los, tus Tswv tau zam txim rau nws tej kev txhaum, tsis yog kho nws sab cev nqaij daim tawv xwb.

Thaum Vajtswv hu kuv los ua ib tug npisov, wb rau tus me nyuam ua rau tej kev sib ntsib noj lub cim nco txog nyuaj heev rau kuv tus poj niam, Cristin, vim nws tau tswj xyuas lawv nws ib leeg vim kuv tau zaum saum lub sam thiaj. Nyaj nej yuav paub tias, feem ntau wb cov me nyuam yeej tsis tswm seeb txhua lub sij hawm. Muaj ob tug mej zeej hauv wb pawg ntseeg, John thiab Debbie Benich, pom nws raug xwm dab tsi ces nkawd cia li los nrog nws zaum ua ke txhua Hnub Caiv los pab tswj wb cov me nyuam. Nkawd tau pab wb rau ntau xyoo tom qab ntawd, ces nkawd txawm uas pog yawg rau wb tsev neeg. Zoo li tus Tswv, ob tug thwj tim no pom hais tias xav tau kev pab txawm wb tsis tau thov ces tau ua ib yam dab tsi vim muaj kev hlub—uas yog ib lub cim tseem ceeb txog nkawd txoj kev ua thwj tim.

Qhov kawg, tus Cawm Seej txoj kev hlub zoo tag nrho yog kom pab Vajtswv txhua tus me nyuam yuav ua raws li lawv lub peev xwm uas los saum ntuj los xwv kom peb yuav “los txais nws txoj kev cawm seej, thiab lub hwj chim ntawm nws txoj kev txhiv dim.” Thaum peb rais los mus ua neeg zoo li peb tus Xib Hwb, peb txoj kev xav pab peb cov kwv tij thiab cov muam ua raws li lawv tej kev khi lus yuav loj hlob tuaj mus.

Piv xam hais tias, peb mam li txhawb nqa thiab ua phooj ywg rau cov uas tu siab thiab cov uas luag tej tsis quav ntsej lawm, yuav pab tos txais cov neeg tshiab hauv peb pawg ntseeg, los sis caw cov phooj ywg tuaj nrog peb pe hawm hauv txoj kev sib ntsib noj lub cim nco txog—tej zaum tsim nyog ua li ntawd hnub Easter tuaj no. Muaj ntau txoj kev rau peb txhawb nqa thiab pab lwm tus neeg loj hlob tuaj yog tias peb rau siab thov Vajtswv pab qhib peb qhov muag thiab kom peb muaj lub siab uas xav tib yam li Yexus Khetos lub siab xav txog lawv.

Txoj kev pab lwm tus neeg taug txoj kev khi lus muaj tau lwm yam kev pab thiab. Piv xam hais tias, tas sim no kuv ua hauj lwm saib xyuas Philippines teb, kuv thiaj tau kawm txog yim neeg Agamata. Lawv tau ua kev cai raus dej hauv xyoo 2023, ces lawv thiaj tau teem sij hawm rau lawv tsev neeg ua kev cai sib khi ua ke hauv lub Tuam Tsev Urdaneta Philippines. Tab sis mas, ua ntej lub sij hawm uas lawv tsev neeg tau teem tseg, muaj cua daj cua dub hauv lawv thaj chaw. Tij Laug Agamata, ua yog neeg ua teb cog nplej, cog tsis tau nplej vim muaj cua daj cua dub loj heev. Thaum ntsiag lawm, yuav tsum cog nplej sai sai thaum av tseem nkos nkos—uas yog qhov zoo tshaj plaws thaum yuav cog nplej. Tu siab kawg, lawv thiaj tau laug lub sij hawm yuav mus rau lub tuam tsev.

Ob tug thwj tim, Txwj Laug thiab Muam Cauilan, nrog peb tus tub txib hluas, hnov txog yim neeg Agamata qhov teeb meem no thiab tau tuaj pab txawm hais tias lawv tsis txawj ua liaj ua teb hlo li. Thaum tshav ntuj kub kub, lawv tuaj pab cog nplej, ua li yim neeg Agamata thiaj ua tau lawv tej hauj lwm thiab tau mus ua kev sib khi hauv lub tuam tsev raws li twb teem tseg lawm. Txwj Laug Cauilan qhia tias “[yim neeg Agamata] cov ntsej muag tau ci ntsa iab thaum peb pom lawv hnav tsoos tsho dawb hauv tus Tswv lub tsev. Peb muaj kev zoo siab tshaj vim ua hauj lwm pab ib tug ntawd yus muab piv tsis tau rau lwm yam kev zoo siab!”

Tsam no yim neeg Agamata muaj koob hmoov vim lawv tsev neeg tau ua kev cai sib khi ua ke ua ib tse neeg tas mus li vim ob peb tug thwj tim muaj kev siab hlub—uas yog ib lub cim ntawm lawv txoj kev ua thwj tim—vim lawv txiav txim siab los pab lawv cov kwv tij thiab cov muam taug lawv txoj kev sib khi lus.

Cov kwv tij thiab cov muam, kev ua Yexus Khetos cov thwj tim yog tib txoj kev uas coj kev zoo siab uas kav mus ib txhis los rau yus. Nws yog ib txoj kev uas tib neeg txhob txwm rau siab ntso ua tej yam uas qhia lawv txoj kev hlub rau lwm tus neeg. Txawm tias txoj kev ua thwj tim yuav nyuaj thiab muaj teeb meem los, thiab yuav muaj tej lub sij hawm uas peb raug kev cov nyom thiab poob qab, peb yuav tsum paub hais tias Vajtswv yeej paub txog peb thiab yeej xav ncav tes los pab peb txhua txhua lub sij hawm uas peb sim ua. Yaxayas qhia peb tias “Vajtswv yuav tuav rawv [peb] sab tes xis, hais tias … , Tsis txhob ntshai kuv yuav pab nej.”

Thaum peb to taub tias peb Leej Txiv Saum Ntuj Ceeb tsheej yuav ua li no, kuv thov kom peb yuav ua raws li Thawj Tswj Hwm Nelson kev caw los rau siab ntso ua cov thwj tim. Thov kom peb yuav “thov Leej Txiv kawg siab kawg ntsws” kom “yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag; … xwv kom thaum nws yuav tshwm los peb yuav zoo li nws,” vim peb muaj ib lub cim qhia tias peb yog cov thwj tim tiag, uas yog “kev siab hlub … uas yog Yexus Khetos kev hlub dawb paug.”

Kuv hais lus tim khawv tias Yexus Khetos yog peb tus Cawm Seej, tus Txhiv Dim, tus Yam Ntxwv, thiab tus Phooj Ywg. Los ntawm Yexus Khetos lub npe, amees.