Lub Ntuj Ceeb Tsheej txoj Kev Coj Peb txoj Hau Kev
Thaum peb tsom ntsoov rau Yexus Khetos, peb yuav nrhiav tau peb txoj kev mus tsev, nyiaj mus kom txog thaum kawg thiab muaj txoj kev zoo siab mus txog thaum kawg.
Yexus Khetos tau hloov kuv lub neej thaum kuv muaj 26 xyoo thiab ua kev cai raus dej hauv kuv lub zos uas kuv nyiam heev Frutillar, Chile. Thaum lub sij hawm ntawd, kuv txoj hauj lwm cia kuv hla dej hiav txwv, dej ntws, thiab pas dej hauv lub teb chaws Chilean Patagonia. Tom qab kuv ua kev cai raus dej, kuv pom kuv txoj hauj lwm thiab kuv lub neej tshiab thiab txawv, ua rau kuv paub tiag tiag tias “txhua yam qhia tias muaj ib tug Vajtswv.”
Hauv lub ntiaj teb, cov ntses salmon yug nyob hauv cov dej ntws. Thaum txog lub sij hawm no hauv lawv lub neej, lawv yuav tsum ua luam dej mus nram dej hiav txwv, nyob ntawd lawv tau noj thiab muaj chaw rau lawv loj hlob tuaj.
Tiam sis dej hiav txwv yog ib qhov chaw uas lawv yuav raug xwm txheej, vim muaj tej yam tsiaj uas nrhiav lawv noj, thiab muaj tib neeg uas siv tej npev nuv ntses uas zoo nkaus li cov ntses cov zaub mov tiam sis yuav tsis pab lawv hlo li. Yog lawv nyiaj tau tej teeb meem no, lawv yuav npaj txhij siv lawv tus txheej txheem uas coj lawv txoj hau kev rov qab mus pem tib qhov chaw uas lawv tau yug los, thiab yuav raug tej teeb meem tshiab thiab tej teeb meem uas lawv paub lawm. Cov kws tshawb fawb science tau kawm txog cov ntse no txoj kev tsiv mus thiab rov qab los ntau xyoo thiab tau kawm tias cov ntse siv ib tug txheej txheem zoo li GPS, ib yam li hlau nplaum rub lawv mus, kom coj lawv rov qab los txog qhov chaw thiab tsis cia lawv mus yuam kev.
Yeej yuav muaj ib hnub uas peb sawv daws yuav rov qab mus cuag peb lub tsev nyob saum ntuj. Thiab zoo li cov ntses salmon, peb yeej muaj peb lub hlau nplaum, los sis Khetos txoj Kev Kaj, uas pab coj peb txoj hau kev mus ntawd. Yexus tau qhia Nws cov thwj tim, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”
Thaum peb tsom ntsoov rau Yexus Khetos, peb yuav nrhiav tau peb txoj kev mus tsev, nyiaj mus kom txog thaum kawg thiab muaj txoj kev zoo siab mus txog thaum kawg. Thawj Tswj Hwm Russell M. Nelson tau qhia hais tias: “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej.”
Peb tus Cwj Pwm thiab txoj Hmoov Los Saum Ntuj Los
Los ntawm zaj lus tshaj tawm txog tsev neeg, peb nyeem tias “[peb] txhua txhia tus yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub, thiab, yog li ntawd, txhua tus muaj ib tug cwj pwm thiab txoj hmoov los saum ntuj los. … Nyob rau lub qub neej, tej tub ntsuj plig thiab tej ntxhais ntsuj plig tau paub thiab teev tiam Vajtswv ua lawv Leej Txiv uas Nyob Mus Ib Txhis Li thiab lawv tau txais yuav Nws lub tswv yim uas npaj tseg hais tias Nws cov me nyuam yuav tau ib lub cev nqaij daim tawv thiab yuav tau ib lub sij hawm saum ntiaj teb no kom thiaj xyaum tau ua neeg zoo tag nrho thiab thaum kawg ncav tau lawv txoj hmoov los saum ntuj los ua cov uas txais txoj sia nyob mus ib txhis ua lawv tug.”
Ua ntej Nws yug los rau hauv ntiaj teb, Yexus Khetos tau tshwm sim rau Mauxes thiab sawv Leej Txiv cev sib tham nrog Mauxes. Nws qhia Mauxes tias Nws muaj ib txoj hauj lwm tseem ceeb rau Mauxes ua. Thaum lub sij hawm ntawd, tus Tswv hu nws ua “kuv tus tub” ob peb zaug.
Tom qab lub sij hawm ntawd, Dab Ntxwg Nyoog los ntxias nws, hais tias, “Neeg leej tub Mauxes, teev tiam kuv.”
Mauxes tsis ntseeg tej lus ntxias ntawd thaum nws nco qab nws tus cwj pwm los saum ntuj los, thiab hais tias, “Koj yog leej twg? Vim saib seb, kuv yog Vajtswv ib tug tub.” Qhov tseeb tau cawm Mauxes dim tus yeeb ncuab tej kev tawm tsam.
Cov kwv tij thiab cov muam es, tej npev nuv ntses ntawm lub neej no los muaj tiag. Tej no yeej ntxim nyiam, tiam sis tsuas muaj ib lub hom phiaj xwb: rub peb tawm ntawm cov dej uas cawm neeg txoj sia uas coj peb txoj hau kev mus rau Leej Txiv thiab txoj sia nyob mus ib txhis.
Kuv paub tias tej npev nuv ntses ntawm lub neej no zoo li cas. Muaj ib Hnub Caiv, thaum kuv tseem yog ib tug neeg hloov siab los ntseeg txoj moo zoo tshiab, kuv qhia chav pov thawj hwj thaum peb txoj sib tham ua rau kuv ntxhov siab. Nyuaj rau kuv qhia lawv mus txog thaum kawg. Kuv tu siab thiab xav tias lwm tus tau ua txhaum rau kuv. Kuv twb tsis hais ib lo lus dab tsi li, kuv cia li mus yuav tawm lub tsev ntawd, thiab txiav txim tias kuv yuav tsis tuaj lub koom txoos rau ib ntus.
Thaum lub sij hawm ntawd muaj ib tug uas tuav lub pov thawj hwj tau sawv ntawm kuv hauv ntej. Nws caw kuv nrog txoj kev hlub kom kuv tsom ntsoov rau Yexus Khetos thiab tsis txhob xav txog tej xwm txheej uas muaj hauv chav kawm ntawd. Thaum wb rov qab sib tham txog lub sij hawm ntawd, nws tau qhia kuv tias nws hnov ib lub suab qhia nws tias, “Mus caum nws qab; nws tseem ceeb rau kuv.”
Kuv cov phooj ywg zoo peb sawv daws tseem ceeb rau Nws. Thawj Tswj Hwm Nelson qhia, “Vim peb tau khi lus nrog Vajtswv, Nws yeej yuav siv zog pab peb tsis tu tsis tseg, thiab peb yeej yuav tsis ua rau Nws txoj kev hlub tshua peb tas lawm.” Peb tus cwj pwm los saum ntuj los thiab kev khi lus nrog Vajtswv ua rau peb muaj cai txais kev pab los saum ntuj los.
Yuav Tsum Tau txoj Kev Pab
Ib yam li cov ntses salmon yuav tsum tau noj hauv dej hiav txwv kom loj hlob tuaj, peb peb sab ntsuj plig kuj yuav tsum tau noj tau haus kom peb tus ntsuj plig noj qab nyob zoo. Kev thov Vajtswv, kev nyeem cov vaj lug kub, kev mus rau lub tuam tsev, thiab peb txoj kev mus koom tej kev sib ntsib thaum Hnub Caiv tseem ceeb rau peb sab ntsuj plig.
Thaum lub Kaum Ib Hlis Ntuj 1956, Ricardo García tau ua kev cai raus dej nyob hauv lub teb chaws Chile, thiaj li yog thawj cov me zeej hauv lub Koom Txoos hauv kuv lub teb chaws. Ib hnub ua ntej nws tau tso lub ntiaj teb no tseg, nws hais rau nws tsev neeg thiab phooj ywg, “Ntau xyoo tas los, cov tub txib tau caw kuv los muaj kev zoo siab nrog kuv tsev neeg. Kuv zoo siab kawg. Cia li qhia txhua tus nyob hauv Chile txoj moo zoo yog kev zoo siab.”
Tom qab Yexus Khetos txoj moo zoo tau txhawb nqa nws lub neej, Ricardo tau muab tag nrho nws lub neej fij rau kev ua hauj lwm rau Vajtswv thiab kev hlub nws tus neeg zej zog. Nws tus yam ntxwv ua ib tug thwj tim tau foom koob hmoov rau txhua tiam neeg, tsis hais kuv thiab. Tus Yaj Saub Joseph Smith qhia tias “b tug neeg uas muaj Vajtswv txoj kev hlub puv nkaus nws lub siab, yuav tsis zoo siab vim nws tsev neeg tau koob hmoov xwb, tiam sis nws xav tawm mus thoob plaws ntiaj teb no foom koob foom hmoov rau tib neeg sawv daws.”
Rov Qab Mus Peb lub Tsev Saum Ntuj Ceeb Tsheej
Peb txhua tus xav rov qab mus rau peb lub tsev saum ntuj ceeb tsheej, thiab Yexus Khetos yog lub ntuj ceeb tsheej txoj kev coj peb txoj hau kev. Nws yog txoj kev. Nws txoj kev theej txhoj qhib kev rau peb nrog Vajtswv sib khi lus dawb ceev. Thaum peb khi lus nrog Vajtswv, tej thaum peb yuav tsum ua luam dej mus rau ntawm cov dej ntws los. Tej xwm txheej txaus ntshai, kev poob siab, kev ntxias, thiab kev txom nyem yuav sim peb txoj kev ntseeg thiab peb txoj kev muaj zog ntawm sab ntsuj plig. Thov kom txais kev pab. Yexus Khetos to taub thiab yeej xav pab ris peb tej nra txhua zaus.
Nco qab tias Nws yog “ib tug neeg muaj kev nyuaj siab, thiab paub kev tu siab.” Tus Cawm Seej qhia tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.” Nws txoj kev txi theej txhoj ua rau peb txais tau kev zam txim rau peb tej kev txhaum Nws thiaj li tsis nco qab tej ntawd lawm.
Tej zaum peb tseem yuav nco qab txog peb tej kev txhaum me ntsis kom peb thiaj li yuav tsis rov qab ua ntxiv. Tiam sis, peb yuav nco qab Nws thaum peb txais lub cim nco txog hauv lub tsev koom txoos txhua Hnub Caiv. Txoj kab ke no yog ib feem tseem ceeb ntawm kev teev ntuj thiab kev loj hlob ntawm sab ntsuj plig. Yuav muaj kev xyiv fab thaum peb to taub tias hnub no tsis yog lwm hnub xwb. “Vajtswv tsim hnub caiv rau neeg,”kom cia peb so ntawm ntiaj teb thiab ua rau peb lub cev thiab ntsuj plig rov qab muaj zog.
Peb kuj nco qab Nws thaum peb mus rau lub tuam tsev—tus Tswv lub tsev. Cov tuam tsev pab peb to taub ntxiv txog Yexus Khetos uas yog tus nruab nrab ntawm kev khi lus uas coj peb mus kom txais tau txoj sia nyob mus ib txhis, “lub txiaj ntsim uas zoo tshaj ntawm … Vajtswv tej txiaj ntsim.”
Kev mus lub tuam uas rau kuv txais kev nplij siab thiab kev cia siab txog peb txoj hmoov nyob mus ib txhis. Kuv tau muaj tej lub sij hawm uas kuv tau txais kev sib txuas lus nrog tib neeg nyob ob sab ntawm daim ntaub thaiv. Kuv tau pom tej txuj ci tseem ceeb nyob hauv kuv cov me nyuam yaus lub neej, ob tug uas muaj tej yam mob uas txhua hnub yuav tsum tu nkawd tag nrho nkawd lub neej.
Peb tsev neeg muaj kev xyiv fab thaum peb hais txog txoj hau kev zoo siab. Kuv cov me nyuam muaj kev zoo siab thaum lawv hnov tias, vim muaj Yexus Khetos, lawv “tej kev nyuaj siab thiab [lawv] tej kev txom nyem yuav nyob ib nyuag ntus xwb.” Wb hlub wb cov me nyuam heev, thiab wb paub tias muaj ib hnub, ib yam li Thawj Tswj Hwm Jeffrey R. Holland tau qhia, lawv “yuav sawv ntawm peb muaj yeeb koob thiab muaj lub cev thiab lub hlwb uas zoo tag nrho.” Peb tej kev khi lus ua rau peb muab siab npuab Vajtswv ntxiv ua taus txhua yam uas ua tsis taus ua ntej, thiab muab tag nrho tej kev tsaus ntuj thiab kev tsis ntseeg hloov los muaj kev kaj nrig thiab kev kaj siab lug.
Vim muaj Yexus Khetos, peb muaj kev cia siab kom hlub, thov Vajtswv pab, thiab txhawb nqa cov neeg uas peb xav pab.
Kuv paub tias Nws muaj sia nyob. Nws paub peb thiab hlub peb. Nws yog txoj kev, qhov tseeb, thiab yog txoj sia.
Kuv caw peb sawv daws tsom ntsoov rau Yexus Khetos thiab tej yam Nws tau qhia hauv peb lub neej. Yog peb ua li no ces yuav pab peb tsis tom tej npev nuv ntses uas yog kev ntxias, kev tu siab, thiab kev khuv xim peb tus kheej. Peb yuav sawv ruaj nrees zoo li ib lub tuam tsev—dawb ceev, khov kho, thiab tsis tu tsis tseg. Peb yuav nyiaj tej cua dab cua dub, thiab peb yuav rov qab mus tsev, nyiaj mus kom txog thaum kawg thiab muaj txoj kev zoo siab mus txog thaum kawg. Los ntawm Yexus Khetos lub npe, amees.