Txoj Cai Los Saum Ntuj Los, cov Tub Hluas Zoo Kawg Nkaus

Ua tsaug, Txwj Laug Andersen, rau koj tej lus qhia txog lub pov thawj hwj lub hwj chim thiab lub hwj chim ntawm tus Cawm Seej txoj Kev Theej Txhoj.

Ib Hnub Caiv thaum lub Ib Hlis Ntuj tas los no, thaum kuv zaum hauv kuv txoj kev sib ntsib txais lub cim nco txog, twb muaj kaum ob tug tub hluas uas peb txhawb nqa pom zoo txais lub Pov Thawj Hwj Aloos. Zoo li kuv pom hais tias lub ntiaj teb tab tom hloov hlo.

Kuv txawm xav tsis thoob vim hais tias thoob ntiaj teb no, hauv txhua lub sij hawm, hauv tej kev sib ntsib txais lub cim nco txog, ntau txhiab tus dikas, xib hwb, thiab pov thawj—zoo li Thawj Tswj Hwm Holland tus phooj ywg, Easton tag kis no—tab tom raug pom zoo yuav muab tsa los ua tej hauj lwm hauv lub pov thawj hwj uas yuav sau tau haiv neeg Ixayees los ua ke.

Txhua lub Ib Hlis Ntuj, peb tso tes rau coob tshaj 100,000 tus tub hluas, ua ib txoj kab ke tsa lawv los muaj txoj cai ib yam li muaj los ntawm lub caij nyoog Muab Txoj Moo Zoo Txum Tim Rov Qab Los thaum muab rau Joseph thiab Oliver, los ntawm Yauhas tus uas Muab Neeg Ua Kev Cai Raus Dej thiab Yexus Khetos.

Nim no, tej lub sij hawm peb lub koom txoos tsis nthuav dav dav rau luag tej pom. Txog qhov no peb tsis tshua hais txaus.

Tiam sis, qhov uas pom coob tus neeg uas tuav lub pov thawj hwj nyob thoob plaws ntiaj teb, kuv xav paub seb vim—muaj “lub koom txoos uas muaj kev zoo siab” li no—puas tsim nyog ua ib qho uas yuav tsum qw tshaj tawm rau txhua leej txhia tus. Kuv xav tias “Niaj hnub no yuav tsum tshuab raj thiab ntaus nkauj thiab tua phom ua koob tsheej. Yuav tsum taug kev tsheej pab ua zoo siab!”

Vim kuv paub tias Vajtswv lub hwj chim zoo li cas tiag, peb tau pom Vajtswv txoj cai puv lub ntiaj teb no kom tej txheej txheem ntawm lub ntiaj teb ploj mus.

Tej kab ke no ua rau cov tub hluas no pib lub neej uas pab lwm tus thaum lawv nrhiav thiab muaj cib fim uas lawv mus pab tau thiab lawv tej kev thov Vajtswv thiab Vajtswv lub hwj chim lub pov thawj hwm uas lawv tuav yuav muaj nqis heev.

Qhov no yeej pib nyob ntawm ib tug tim tswv uas Vajtswv tau txib los. Yauhas tus uas Muab Neeg Ua Kev Cai Raus Dej uas sawv rov los tau tshwm los rau Joseph thiab Oliver pom, es tso nws ob txhais tes rau nkawd lub taub hau, thiab hais tias, “Rau neb kuv ob tug kwv luag tub qhe, los ntawm Mexiyas lub npe, kuv muab lub Pov Thawj Hwj Aloos rau neb, uas tuav cov yawm sij ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum” (Lus Qhuab Qhia thiab Kev Khi Lus 13:1).

Yauhas hu txoj cai no ua lub “Pov Thawj Hwj Aloos,” raws li Mauxes tus kwv thiab tus khub hauv lub pov thawj hwj. Puag thaum ub, cov uas tuav lub pov thawj hwj Aloos no yuav tsum qhia thiab pab ua cov kab ke—cov kab ke yog pab tib neeg ua cov thwj tim rau tus Mexiyas, tus Tswv Yexus Khetos, uas tseem yuav los (saib 2 Kev Cai 33:10).

Phau Teev Npe yeej tsa cov neeg uas tuav lub pov thawj hwj Aloos los saib xyuas tej khoom uas siv ua tej kab ke no. “Koj yuav tsum tsa Aloos thiab nws cov tub ua cov pov thawj … lawv lub luag hauj lwm yog tu … lub rooj … [thiab] tej khoom uas cov pov thawj siv nyob hauv chav dawb huv” (Teev Npe 3:10, 31).

Txoj kab ke muab tsiaj tua fij yeej ua tiav los thiab tus Cawm Seej lub neej thiab txoj Kev Theej Txhoj muab txoj kab ke no pauv. Tus Tswv Rooj Mov uas peb hu ua lub cim nco txog twb pauv txoj kab ke qub ntawd chaw.

Tus Tswv hu cov neeg uas tuav lub pov thawj hwj Aloos los ua li lawv ua puag thaum ub: kom qhia neeg thiab saib xyuas tej kab ke—txhua yam no pab peb nco txog Nws txoj Kev Theej Txhoj.

Thaum cov dikas, cov xib hwb, thiab cov pov thawj pab muab lub cim nco txog, lawv txais tej koob hmoov zoo li sawv daws: thaum lawv ua raws li tej kev khi lus uas lawv khi tseg thaum lawv noj daim mov mog thiab haus cov dej thiab. Tiam sis thaum lawv ua tej hauj lwm dawb ceev no, lawv kuj kawm ntxiv txog lawv lub pov thawj hwj tej hauj lwm thiab kev lav ris.

Lub Pov Thawj Hwj Aloos yog lub pov thawj hwj uas pab neeg npaj siab vim lawv pib kawm kev lav ris thiab kev zoo siab uas los thaum ua tus Tswv tej hauj lwm, lawv thiaj npaj rau tej hauj lwm ntawm lub pov thawj hwj rau yav tom ntej, xwv kom thaum yuav hu lawv los ua tej hauj lwm uas tsis tau paub ua ntej—xws li foom koob hmoov rau tib neeg raws li lawv txais kev tshoov siab thaum muaj kev cia siab thiab ua npau suav, thiab muaj teeb meem ntawm tib neeg txoj sia thiab kev tuag tib si.

Thaum muaj tej xwm txheej loj li no yuav tsum ua tib zoo npaj siab.

Phau Lus Qhuab Qhia thiab Kev Khi Lus piav tias cov dikas thiab cov xib hwb “yuav tsum ceeb toom, piav, ntuas, thiab qhia, thiab caw tag nrho sawv daws kom los cuag Khetos.” (Lus Qhuab Qhia thiab Kev Khi Lus 20:59). Cov pov thawj muaj tej hauj lwm no thiab lawv yuav tsum “mus qhuab qhia … thiab muab neeg ua kev cai raus dej” (Lus Qhuab Qhia thiab Kev Khi Lus 20:50).

Auj, zoo nkaus li yog ib txoj hauj lwm loj kawg, tiam sis hauv ntiaj teb no, yeej ib txwm muaj li no, thoob plaws ntiaj teb no.

Ib tug npisov qhia nws pawg dikas pawg thawj tswj hwm tshiab txog lawv txoj kev lav ris ua tej yam no. Yog li ntawd pawg thawj tswj hwm no tau pib sib tham seb yuav ua li cas hauv lawv pawg dikas thiab pawg ntseeg. Lawv thiaj txiav txim siab tias lawv yuav mus xyuas txhua tus neeg laus laus hauv lawv pawg ntseeg thiab nug seb lawv xav tau kev pab dab tsi ces mam li pab ua li ntawd.

Nyob hauv lawv pawg ntseeg muaj ib tug neeg zej zog laus hu ua Alan, uas ib txwm ua nchav thiab hais lus phem ntau. Alan tus poj niam, Wanda, yog ib tug mej zeej hauv lub Koom Txoos, tiam sis Alan mas nws ua heev thiab tsis ntseeg.

Tab sis mas, cov dikas tau pib ua hauj lwm, tsis quav ntsej nws tej lus thuam, thaum lawv kaus cov daus thiab nqa khib nyiab mus. Nyuaj rau tib neeg ntxub cov dikas, nyob nyob ces Alan pib hlub lawv. Muaj ib zaug lawv thiaj caw nws tuaj lub koom txoos.

Nws teb tias, “Kuv tsis nyiam mus.”

Lawv teb hais tias “Tab sis, koj nyiam peb nev. “Ces cia li nrog peb tuaj. Tuaj koom peb pawg pov thawj hwj txoj kev sib ntsib yog koj xav ua li ntawd xwb.”

Ces tom qab tus npisov pom zoo, nws txawm tuaj—thiab pheej rov tuaj.

Cov dikas tau loj hlob ua cov xib hwb, thiab lawv tseem mus ua hauj lwm pab nws, nws tau qhia lawv kho tsheb thiab ua ub ua no. Txog thaum cov dikas loj hlob ua xib hwb ces loj hlob ua cov pov thawj, Alan twb hu lawv ua “kuv cov tub.”

Lawv tab tom npaj yuav mus ua tub txib thiab nug seb nws puas kam lawv xyaum qhia cov tub txib tej zaj lus qhia rau nws. Nws cav hais tias nws yeej yuav tsis mloog los sis yeej yuav tsis ntseeg, tiam sis nws tau cia lawv los xyaum qhia hauv nws tsev.

Ces Alan txawm muaj mob muaj nkees. Thiab nws lub siab mos muag me ntsis.

Ces muaj ib hnub hauv pawg pov thawj txoj kev sib ntsib, nws ua zoo nug lawv seb lawv puas kam thov Vajtswv pab nws txiav kev haus luam yeeb, ces lawv tau ua li ntawd. Tiam sis lawv raws nws qab mus tsev thiab pab tshem txhua yam luam yeeb ntawm nws vaj tsev.

Vim Alan muaj mob heev nws tau mus pw hauv tsev kho mob ob peb zaug, “Alan cov tub” no tseem ua hauj lwm pab nws, siv lub pov thawj hwj thiab lawv txoj kev hlub dawb paug (saib Lus Qhuab Qhia thiab Kev Khi Lus 121:41).

Ces txawm muaj ib qho txuj ci ntxiv thaum Alan thov lawv muab nws ua kev cai raus dej—tiam sis nws txawm tau tso lub neej no tseg ua ntej nws ua tau. Raws li nws thov, cov dikas uas yog pov thawj lawm no tau ua cov uas nqa nws lub hleb thiab hais lus hauv nws lub ntees tuag, nyob ntawd lawv tau ceeb toom, piav, ntuas thiab qhia, thiab caw txhua tus kom los cuag Khetos.

Nyob nyob ces, nyob rau hauv lub tuam tsev muaj ib tug ntawm “Alan cov tub” no tau muab tus thawj tswj hwm rau pawg dikas ua kev cai raus dej sawv Alan cev.

Txhua yam uas Yauhas tus uas Muab Neeg Ua Kev Cai Raus Dej txib kom ua, lawv twb ua lawm. Lawv twb ua tej yam uas cov dikas, cov xib hwb, thiab cov pov thawj ua nyob hauv tag nrho lub Koom Txoos no thiab nyob thoob plaws lub ntiaj teb.

Ib yam uas cov uas tuav Aloos lub pov thawj hwj yuav tsum ua yog kev ua txoj kab ke muab lub cim nco txog.

Xyoo tas los no kuv ntsib ib tug npisov zoo thiab nws tus poj niam. Thaum ib hnub Saturday tsis ntev tas los no, uas nkawd tsav tsheb mus rau nkawd tus tub txoj kev ua kev cai raus dej txawm muaj xwm txheej ceev ces nkawd tus me ntxhais, Tess, uas muaj ob xyoo, twb xiam.

Ces tag kis sawv ntxov, cov neeg hauv lawv pawg ntseeg tau sib sau ua ke hauv txoj kev sib ntsib txais lub cim nco txog sawv daws muaj kev khuv leej, lawv kuj tu siab vim xiam tus me ntxhais tsim txiaj no. Tsis muaj leej twg xav tias tus npisov tsev neeg yuav tuaj teev ntuj tag kis ntawd, tiam sis ob peb feeb ua ntej yuav pib txoj kev sib ntsib, lawv maj mam nkag los thiab mus zaum.

Tus npisov mus rau ntawm lub sam thiaj thiab taug kev mus dhau plaws nws lub rooj zaum nruab nrab nws ob tug pab cuam thiab tau mus zaum nruab nrab ob tug pov thawj uas yuav foom koob hmoov rau lub cim nco txog.

Hmo ua ntej thaum nws nyuaj siab thiab tsis tsaug zog ces tau nrhiav lus teb thiab kev kaj siab, nws tau ib txoj kev tshoov siab hais tias qhov uas nws tsev neeg xav tau tshaj plaws—qhov uas nws pawg ntseeg xav tau tshaj. Yog kom lawv hnov lawv tus npisov lub suab, tus uas yog lawv pawg ntseeg tus thawj tswj hwm ntawm lub Pov Thawj Hwj Aloos, thiab lawv txiv uas nyuaj siab, los hais tej lus cog tseg ntawm txoj kab ke txais lub cim nco txog.

Nyob nyob ces, nws txhos caug nrog ob tug pov thawj ntawd thiab tau hais lus rau Nws Leej Txiv. Vim txo hwj chim ntawd, nws tau hais tej lo lus muaj hwj chim zis tshaj txhua zaus hauv nws lub neej es hais nrov rau sawv daws mloog.

Tej lus uas kav mus ib txhis.

Tej lus ntawm txoj kab ke.

Tej lus ntawm kev sib khi lus.

Tej lus qhuab qhia uas muab peb txuas rau tej ntsiab lus ntawm lub neej no—thiab tej hauj lwm tseem ceeb tshaj plaws hauv Leej Txiv Saum Ntuj Ceeb Tsheej txoj hau kev uas tau npaj tseg rau peb.

Nej xam puas tau seb pawg ntseeg ntawd tau hnov dab tsi hauv chav teev ntuj hnub ntawd—twb yog cov lus uas peb hnov txhua Hnub Caiv hauv peb tej tsev teev ntuj?

“Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov mov mog no dawb huv rau txhua leej txhua tus uas noj, kom lawv yuav noj nco txog koj Leej Tub lub cev, thiab ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv txaus siab ris koj Leej Tub lub npe, thiab nco ntsoov txog nws thiab ua raws li nws tej lus txib uas nws tau muab rau lawv; kom lawv yuav muaj nws tus Ntsuj Plig nrog lawv nyob tas mus li. Amees” (Lus Qhuab Qhia thiab Kev Khi Lus 20:77).

Thiab ces: “Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov [dej] no dawb huv rau txhua leej txhua tus uas haus, kom lawv yuav haus nco txog koj Leej Tub cov ntshav, uas tau nrog theej lawv; kom lawv yuav ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv nco ntsoov txog nws, kom lawv yuav muaj nws tus Ntsuj Plig nrog lawv nyob. Amees” (Lus Qhuab Qhia thiab Kev Khi Lus 20:79).

Leej txiv zoo no thiab leej niam tau hais lus tim khawv tias twb muaj raws li txoj kev cog lus ntawd. Muaj tseeb tiag, nkawd tau txais kev nplij siab vim, “muaj nws tus Ntsuj Plig nrog [nkawd] nyob tas mus li.”

Kuv zoo siab kawg uas cov uas tuav lub Pov Thawj Hwj Aloos, nrog rau nws tej hwj chim, kab ke, thiab tej kev lav ris, yeej foom koob hmoov rau peb sawv daws los ntawm cov yawm sij “ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum” (Lus Qhuab Qhia thiab Kev Khi Lus 13:1). Los ntawm Yexus Khetos lub npe, amees.