Ceev Faj Kev Ntxias Zaum Ob
Tsis txhob khiav nkaum ntawm cov uas hlub thiab txhawb nqa nej; tiam sis, khiav mus rau lawv.
Ob peb xyoos tas los, thaum kuv muaj 12 xyoo, yog thawj zaug uas kuv yuav mus pw hav zoov nrog kuv pawg Pov Thawj Hwj Aloos. Kuv tau tos ntev ua li no vim kuv txiv yog ib tug thawj coj thiab nws tau mus pw tom hav zoo nrog cov tub hluas hauv peb pawg ntseeg ntau zaus tiam sis tseg kuv nyob hauv tsev xwb.
Thaum txog hnub ntawd, kuv zoo siab heev. Thiab kuv yuav tsum lees hais tias kuv xav xav nrog cov tub hluas uas hlob kuv sib haum. Kuv txiav txim siab ua rau lawv pom li ntawd. Yog li ntawd, tsis ntev ces lawv twb sim kuv seb kuv puas ua li lawv hais thiab nrog lawv sib haum.
Lawv txib kuv mus muab kuv txiv tej yawm sij tsav tsheb kom peb tso dag taus rau cov thawj coj. Kuv tsis nco qab kuv hais dab tsi rau kuv txiv kom nws muab nws cov yawm sij rau kuv, tiam sis kuv tau lawm, es kuv tuav cov yawm sij khiav mus rau pawg tub hluas ntawd, zoo siab uas kuv muaj cuab kav ua li ntawd.
Ces lawv txib kuv ua ib yam dab tsi ntxiv. Lawv hais kom kuv qhib lub tsheb lub qhov rooj thiab tso ib tug pas tuam rau ntawm lub rooj zaum mus rau lub kauj tsav tsheb kom nyem lub kes. Ces kuv yuav tsum muab lub qhov rooj xauv kom cov thawj coj tsis muaj txoj hau kev qhib lub tsheb thiab tshem tus pas ntawd thaum lub kes qw nrov.
Tam sim no zaj dab neeg no ua kuv txaj muag heev. Tom qab kuv tau muab tus pas tso haud, kuv xauv qhov rooj thiab khiav ceev mus nkaum hauv ib cov nroj nyob ze. Thaum kuv khoov rau hauv av, kuv hnov ib qho mob heev. Vim tsaus ntuj nti thiab kuv ua sai heev, kuv tau zaum rau ntawm ib tsob pos.
Vim lub kes nrov nrov, tsis muaj leej twg hnov kuv qw mob mob heev, thiab kuv yuav tsum maj mam mus kev ceg tawv rov qab mus rau lub tsheb, lees kuv txoj kev “ua txhaum,” thiab nrog kev txaj muag txais kev kho mob.
Ib tag hmo ntawd, kuv yuav tsum pw khwb rwg hauv lub tsev pheeb suab thaum kuv txiv siv rab ciaj rho cov pos tawm ntawm kuv lub … es nim no, cia kuv tsuas hais tias mus txog ob peb hnub tom qab ntawd kuv zaum tsis taus.
Kuv tau xav txog lub sij hawm ntawd ntau zaus. Tam sim no kuv luag tau thaum kuv xav txog kuv lub neej ua ib tug tub hluas ruam vim tias kuv tau los nkag siab tej lub ntsiab cai.
Muaj ntau tus txheej txheem ntawm tib neeg txoj kev coj cwj pwm uas ua li neeg ntawm sab cev nqaij daim tawv—txoj kev xav nrog lwm tus sib haum siab, xav ua rau lwm tus paub tias yus muaj cuab kav, kev ntshai tias yus ua tsis tau li lwm tus, thiab txoj kev xav khiav nkaum kom tsis txhob raug txim. Hnub no kuv xav hais txog qhov no—kev khiav nkaum tom qab peb ua ib yam dab tsi tsis yog.
Nim no, kuv tsis muab kuv txoj kev tso dag piv rau kev txhaum loj, tiam sis peb kawm tau tej yam uas yuav pab peb thau peb raug kev sim siab hauv lub neej no.
Nyob hauv lub Vaj Edees, Adas thiab Evas nyob nyab xeeb—muaj zaub mov txaus, lub vaj zoo nkauj heev—tiam sis tsis yog zoo nkauj xwb yog ib lub vaj uas tsis muaj nroj los sis pos chob.
Tiam sis, peb kuj paub tias nkawd lub neej hauv lub vaj ntawd twb tav nkawd kev kom hloov tsis taus ua neeg zoo zuj zus. Lub vaj ntawd tsis yog qhov chaw kawg tiam sis yog ib txoj kev sim siab, thawj txoj kev sim siab, uas yuav pab sim, npaj, thiab cia nkawd ua zoo zuj zus mus kom txog nkawd qhov chaw kawg rov qab mus rau ntawm Leej Txiv thiab Leej Tub lub xub ntiag.
Nej nco qab tias twb muaj qhov fab ntxeev nyob hauv lub vaj. Twb cia Luxifaws mus sim ntxias Adas thiab Evas. Thaum xub thawj nws sim ntxias Adas kom Adas noj cov txiv ntawm tsob ntoo ntawm kev paub qhov zoo thiab qhov phem. Vim Adas nco qab txoj lus txib kom txhob noj cov txiv ntawd, nws tsis noj. Ces Evas tus uas tau xaiv noj lub txiv ntawd, tau los rau Adas thiab hais kom Adas noj lub txiv thiab.
Tom qab ntawd, Adas thiab Evas tau tshaj tawm tias yuav tsum ua txoj kev txiav txim siab no kom thiaj li ua raws li Leej Txiv Saum Ntuj Ceeb Tsheej txoj hau kev. Tiam sis vim nkawd tau noj lub txiv, nkawd tau txhaum txoj cai—txoj cai uas Leej Txiv tau muab rau nkawd. Nkawd thiaj li tu siab heev vim tias nkawd to taub qhov zoo thiab qhov phem thaum nkawd hnov Leej Txiv lub suab hais tias Nws yuav rov qab los rau lub vaj. Nkawd pom tias nkawd liab qab, vim nkawd twb tsis muaj ris tsho, vim nkawd ib txwm nyob tsis muaj txim. Tiam sis thaum lub sij hawm ntawd, qhov uas ua rau nkawd tu siab tshaj qhov uas tsis muaj ris tsho hnav, yog qhov uas Vajtswv paub nkawd txoj kev txhaum lawm. Nkawd tsis muaj dab tsi tiv thaiv. Nkawd liab qab tag nrho.
Luxifaws pom lub cib fim no, nws paub nkawd tsis muaj dab tsi tiv thaiv nkawd, nws thiaj ntxias nkawd dua—zaum no kom khiav nkaum ntawm Vajtswv mus.
Txoj kev ntxias no—kuv yuav hu ua “kev ntxias zaum ob”—yog kev ntxias uas yuav ua rau peb raug txim loj tshaj plaws yog peb ua raws li txoj kev ntxias ntawd. Muaj tseeb tiag, zoo tshaj yog peb tsis ua raws li tej kev ntxias kom peb tsis mloog Vajtswv txoj kev cai, tiam sis peb paub hais tias sawv daws yuav ua raws li tej kev ntxias li no thaum peb nyob hauv lub ntiaj teb. Thaum peb loj hlob thiab to taub ntxiv, peb cia siab tias peb yuav muaj zog zuj zus kom tsis txhob ua raws li tej kev ntxias zaum ib thaum peb sim coj raws li peb tus Cawm Seej, Yexus Khetos, ntxiv.
Tej zaum ib txhia yuav khiav nkaum ntawm Vajtswv mus vim tias lawv tsis xav kom leej twg paub txog lawv tej kev txhaum, thiab lawv txaj muag los sis paub lawv lub txim txhaum. Tiam sis, muaj tej nqe vaj lug kub ntau uas qhia tias peb khiav nkaum tsis taus kom Vajtswv tsis pom. Kuv yuav hais ob peb nqe xwb.
Tus Tswv tau qhia Yelemis los ntawm tej lus nug no: “Tsis muaj leej twg yuav khiav nkaum rau ib qho twg uas kuv tsis pom li. tus Tswv hais li. Nej puas paub hais tias kuv nyob tau txhua qhov, tsis hais saum ntuj los sis hauv ntiaj teb no?”
Thiab Yauj tau qhia:
“Vajtswv saib ntsoov txhua tus neeg tshais ruam mus kev.
“Tsis muaj ib qhov tsaus ntuj uas thaiv tau kom Vajtswv tsis pom tus neeg txhaum li.”
Tus sau nkauj, Daviv, tau hais tias:
“Tus Tswv, koj tshawb saib kuv lub siab thiab lub neej, koj yeej paub zoo.
“Koj paub ib puas tsav yam uas kuv ua, txawm yog nyob deb los koj yeej paub tej uas kuv lub siab xav huv tib si. …
“Txawm yog thaum kuv tseem tsis tau hais lus los koj twb xub paub ua ntej lawm hais tias kuv yuav hais dab tsi. …
“Kuv yuav khiav mus nkaum qhov twg thiaj khiav dim koj? Kuv yuav khiav mus nkaum qhov twg, koj thiaj tsis pom kuv?
“Txawm yog kuv nce mus txog saum ntuj ceeb tsheej los koj yeej nyob saud, yog kuv nqis mus rau hauv tub tuag teb los koj yeej nyob hauv thiab.”
Cov Neeg Hloov Siab Los Ntseeg Tshiab
Hais rau nej cov uas tau los ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsis ntev tas los, txoj kev ntxias zaum ob yuav nyuaj me ntsis. Los ntawm nej txoj kev ua kev cai raus dej nej tau khi lus tias nej yuav ris Yexus Khetos lub npe, uas ua rau coob tus yuav tsum hloov lawv lub neej. Txoj kev hloov yus lub neej tsis yooj yim. Ntau zaus nej yuav tsum hloov tej yam nej pheej ua thiab tej zaum yuav tsum hloov cov neeg hauv nej lub neej kom mus ze nej Leej Txiv Saum Ntuj Ceeb Tsheej uas hlub nej.
Tus yeeb ncuab paub tias tej zaum nej yuav tsis muaj zog tiv thaiv nws tej kev tawm tsam uas nyuaj pom. Nws yuav ua rau nej xav tias nej lub neej yav tas los, uas ua rau nej tsis txaus siab dhau los, es tam sim no nej yuav ntshaw nej lub qub neej. Tus uas nkaug peb, li hu nws hauv phau ntawv Tshwm Sim, yuav ntxias nej kom xav tej yam xws li no: “Nej tsis muaj zog hloov tau nej lub neej; nej ua tsis taus qhov no; nej koom tsis tau nrog cov neeg no; lawv yuav tsis hlub nej; nej tsis muaj zog txaus.”
Yog nej cov uas nyuam qhuav pib taug txoj kev ua raws li nej tej kev khi lus xav hais tias tej lus no piav txog nej, peb thov nej kom tsis txhob ntseeg tus uas nkaug peb lub suab. Peb hlub nej; nej muaj peev xwm ua tau; peb yeej hlub nej; thiab, nrog tus Cawm Seej, nej yuav muaj lub zog ua txhua yam. Thaum lub sij hawm uas nej xav tau peb txoj kev hlub thiab kev txhawb nqa tshaj, tsis txhob raug kev ntxias xav hais tias peb yuav xyeej nej yog nej rov qab ua li nej lub neej yav tas los me ntsis. Los ntawm lub hwj chim ntawm Yexus Khetos txoj Kev Theej Txhoj, yeej yuav rov qab kho nej zoo. Tiam sis yog nej khiav nkaum ntawm Nws thiab tsis koom nrog nej pawg ntseeg, nej yuav txav deb ntawm lub hauv paus uas yuav ua rau nej muaj zog txaus kov yeej tau tej ntawd.
Kuv tus phooj ywg zoo, ib tug uas nyuam qhuav hloov siab los ntseeg, qhia tias nyuaj muaj kev ntseeg thaum nyob ib leeg xwb. Muaj dag zog thaum yus los koom thiab nyob nrog ib pawg uas pab tau yus—sawv daws ua yuam kev tiam sis vam meej zuj zus thaum lawv tau koob hmoov ntawm Yexus Khetos txoj kev hlub.
Thawj Tswj Hwm Russell M. Nelson tau qhia tias “Kev kov yeej lub ntiaj teb tsis yog ib yam uas yus ua tas lawm hauv ob peb hnub xwb. Yuav tsum siv ib sim neej thaum peb muab siab npuab Khetos cov lus qhuab qhia. Peb ntseeg Yexus Khetos ntxiv thaum peb hloov siab lees txim txhua hnub thiab ua raws li tej kev khi lus uas ua rau peb txais tau lub hwj chim. Peb taug txoj kev ua raws li peb tej kev khi lus thiab tau koob hmoov xws li kev muaj zog ntawm sab ntsuj plig, kev tshwm sim, kev ntseeg uas loj zuj zus, thiab cov tim tswv txoj kev txhawb pab.”
Yog nej lub cev raug mob dab tsi, nej lub cev yuav tsis muaj zog zuj zus thiab nej xiam tau nej txoj sia yog nej tsis nrhiav kev kho qhov mob ntawd. Qhov ntawd kuj muaj tseeb rau kev mob ntawm sab ntsuj plig thiab. Tiam sis kev mob ntawm sab ntsuj plig uas tsis txais kev pab kho yog tib qhov uas yuav ua kom nej tsis txais kev cawm seej mus ib txhis li. Tsis txhob khiav nkaum ntawm cov uas hlub thiab txhawb nqa nej; tiam sis, khiav mus rau lawv. Cov npisov zoo, ceg ntseeg cov thawj tswj hwm, thiab cov thawj coj pab tau nej txais Yexus Khetos txoj Kev Theej Txhoj lub hwj chim kho neeg.
Rau cov uas twb khiav nkaum lawm, peb thov kom nej rov qab los. Nej yeej xav tau tej yam los ntawm txoj moo zoo thiab Yexus Khetos txoj Kev Theej Txhoj, thiab peb xav tau tej yam kev pab uas nej muaj peev xwm ua. Vajtswv paub nej tej kev txhaum; nej khiav nkaum tsis tau kom Nws tsis pom nej. Cia li rov qab los sib raug zoo nrog Vajtswv.
Vim peb yog Nws cov Neeg Ntseeg, peb txhua tus yuav tsum ua kom txhua tus hauv lub Koom Txoos koom siab koom ntsws thiaj li muaj kev hlub, kev txais neeg, thiab kev txhawb nqa tag nrho cov uas xav ua raws li Nws txoj hau kev.
Ceev faj kev ntxias zaum ob no! Cia li coj raws li cov yaj saub thaum ub thiab niaj nub no tej lus qhia thiab paub tias nej khiav nkaum tsis tau ntawm ib Leej Txiv Saum Ntuj uas muaj siab hlub.
Tiam sis, cia nej tus kheej txais Yexus Khetos txoj Kev Theej Txhoj lub hwj chim kho taus neeg. Ntawm no yog lub ntsiab cai ntawm peb txoj kev ua neej nyob—kom txais ib lub cev uas tsis muaj zog uas tuag tau “uas raug ywj rau tag nrho tej kev tsis muaj peev xwm” thiab yuav raug ntau yam kev ntxias zaum ib; yuav tseem vam meej tuaj txawm peb raug tej kev ntxias no; thiab nrhiav Vajtswv txoj kev pab tom qab kom peb thiaj li yuav hloov los ua neeg zoo li peb tus Cawm Seej thiab peb Leej Txiv Saum Ntuj Ceeb Tsheej. Yeej yog Nws txoj hau kev. Tsuas yog tib txoj kev nkaus xwb. Kuv ua tim khawv txog tej yam tseeb no los ntawm Yexus Khetos lub npe, amees.