Nws Kho Peb Sab Ntsuj Plig Zoo Hlo

Kaum tus neeg mob ruas hu rau tus Cawm Seej, “Thov koj hlub peb.” And Jesus did. Nws hais kom mus cuag tus pov thawj thiab, thaum lawv mus, lawv tej ruas twb zoo lawm.

Lawv cov ntawd muaj ib tug pom hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug. Nws rov qab mus cuag tus Cawm Seej, txhos caug ntawm Nws ko taw, thiab ua Yexus tsaug.

Thiab tus Cawm Seej hais rau tus uas ris txiaj, “Koj txoj kev ntseeg twb ua rau koj … zoo [hlo] lawm.”

Yexus Khetos tau kho kaum tus neeg mob ruas zoo. Tiam sis ib tug, uas rov qab los rau tus Cawm Seej, txais ib qho ntxiv. Yexus twb kho nws sab ntsuj plig zoo hlo.

Twb kho cuaj tus neeg mob ruas sab cev nqaij daim tawv.

Tiam sis tsuas muaj ib tug uas Yexus kho nws sab cev nqaij daim tawv thiab sab ntsuj plig zoo hlo.

Thaum xav txog zaj dab neeg no, kuv tau xav seb qhov fab ntxeev puas muaj tseeb thiab. Yog tias kev kho mob thiab kev zoo hlo tsis yog tib yam, Nws puas kho tau ib tug neeg sab ntsuj plig zoo hlo tiam sis tsis kho tus mob ntawm sab cev nqaij daim tawv los sis sab siab ntsws?

Tus Thawj Kws Kho Mob yuav kho peb tej kev txom nyem—ntawm sab cev nqaij daim tawv thiab sab siab ntsws—raws li Nws lub sij hawm. Tiam sis thaum yus tseem tos kev kho mob, kho puas tau yus sab ntsuj plig zoo hlo?

Qhov uas yus sab ntsuj plig zoo hlo txhais li cas?

Yexus Khetos kho peb sab ntsuj plig zoo hlo thaum peb siv peb txoj kev ywj siab coj raws li Nws los ntawm txoj kev ntseeg, ywj peb lub siab rau Nws kom Nws thiaj muab hloov tau, coj raws li Nws tej lus txib, thiab nkag mus rau kev sib cog lus rau Nws, txo hwj chim kav mus thiab kawm los ntawm tej teeb meem ntawm lub ntiaj teb no mus txog thaum peb rov mus rau ntawm Nws lub xub ntiag thiab txais kev kho mob txhua yam. Kuv sab ntsuj plig yuav zoo hlo thaum kuv tos kev kho mob, yog tias kuv nrog Nws sib raug zoo kawg siab kawg ntsws.

Kev ntseeg Yexus Khetos ua rau peb muaj kev cia siab. Kuv nrhiav kev cia siab thaum siv zog xav zoo hlo—txoj kev zoo hlo uas los ntawm kev ntseeg Yexus Khetos. Kev ntseeg Nws ua rau kuv muaj kev cia siab tias kuv yuav txais kev kho zoo hlo, thiab kev cia siab ntawd pab txhawb kuv txoj kev ntseeg Yexus Khetos. Ib qho txhawb ib qho kom muaj hwj chim.

Tus Tswv qhia Enauj tias nws txoj kev ntseeg ua rau nws “huv.” Enauj sab ntsuj plig txawm zoo hlo thaum nws xav txog nws txiv uas yog tus yaj saub Yakhauj tej lus, thaum nws xav to taub lub cib fim muaj txoj sia nyob mus ib txhis, nws thiaj li thov Vajtswv kawg siab kawg ntsws. Thiab thaum nws muaj siab xav thiab txo hwj chim, tus Tswv lub suab los rau nws, qhia tias twb zam txim rau nws tej kev txhaum lawm Thiab Enauj nug tus Tswv, “Ua li cas thiaj ua tau li ntawd?” Thiab tus Tswv teb hais tias, “Vim yog koj txoj kev ntseeg Khetos. … koj txoj kev ntseeg tau ua rau koj huv.”

Los ntawm peb txoj kev ntseeg Yexus Khetos, peb nrhiav kev kom peb sab ntsuj plig yuav zoo hlo thaum peb tseem tos thiab cia siab rau kev kho mob ntawm sab cev nqaij daim tawv thiab sab siab ntsws.

Los ntawm Nws txoj kev theej txhoj, thiab thaum peb rau siab hloov siab lees txim, tus Cawm Seej kho peb zoo kom dim kev txhaum, ib yam li Nws tau kho Enauj zoo hlo. Nws txoj Kev Theej Txhoj yeej ncav cuag peb tej kev tu siab thiab nyuaj siab.

Tiam sis tej zaum Nws yuav tsis kho peb tej kab mob—xws li kev mob ntev heev, kev mob multiple sclerosis, kheesxawj, kev ntxhov siab, kev nyuaj siab, thiab tej yam zoo li ntawd. Kev kho li ntawd yeej yog raws li tus Tswv lub sij hawm. Thiab nyob rau lub sij hawm no, peb xaiv tau kom Nws kho peb sab ntsuj plig zoo hlo thaum peb ntseeg Nws!

Kev zoo hlo txhais tias yus huv lawm thiab muaj lub siab puv npo. Ib yam li tsib tug hluas nkauj uas muaj tswv yim uas lawv lub teeb puv roj thaum tus nraug vauv los txog, Yexus Khetos kho tau peb zoo hlo thaum peb muab roj puv peb lub teeb cov roj ntawm kev hloov siab los ntseeg Nws. Yog li ntawd, peb thiaj li npaj rau lub rooj tshoob ntawd, uas yog Nws txoj Kev Los Zaum Ob.

Nyob hauv zaj lus piv txwv no kaum tus hluas nkauj yeej nyob hauv qhov chaw yog, tos tus nraug vauv. Txhua tus nqa ib lub teeb tuaj.

Tiam sis thaum Nws los txog, thaum ib tag hmo, tsib tug hlas nkauj uas tsis muaj tswv yim tsis muaj roj txaus taws lawv lub teeb. Tsis yog tias lawv ua siab phem tiam sis lawv tsis muaj tswv yim. Cov uas tsis muaj tswv yim tsis tau npaj muaj roj ntawm kev hloov siab los ntseeg txaus kom taws tau lawv lub teeb ci.

Ces, thaum teb lawv tej kev thov kom nkag mus noj tshoob, tus nraug vauv teb tias, “Nej tsis paub kuv.”

Txhais tias, tsib tug hluas nkauj muaj tswv yim yeej paub Nws. Nws kho lawv sab ntsuj plig zoo hlo.

Lawv lub teeb muaj cov roj ntawm kev hloov siab los ntseeg puv nkaus ua rau cov hluas nkauj muaj tswv yim nkag mus noj tshoob nyob rau ntawm tus nraug vauv sab xis.

Ib yam li tus Cawmseej tau hais, “Rau siab ntseeg, thov Vajtswv tas mus li, muab neb lub teeb yim thiab ua kom cig, thiab nqa roj nrog neb, xwv kom neb yuav npaj txhij thaum tus Nraug Vauv los.”

Tsib tug Hluas Nkauj Muaj Tswv Yim, los ntawm Ben Hammond

Ib lub khoom puab zoo kawg li uas qhia txog Tsib tug Hluas Nkauj Muaj Tswv Yim tau muab tso ntawm Tshav Tuam Tsev nyob ntawm lub qhov rooj mus rau lub Tsev rau Koom Haum Niam Tsev thiab nyob hauv tus duab ntxoov ntxoo ntawm lub Tuam Tsev Salt Lake.

Yog ib qho chaw ntxim qhia txog zaj lus piv txwv no. Rau qhov thaum peb ua raws li peb tej kev khi lus, qhov tseem ceeb yog tej kev khi lus los ntawm tus Tswv lub tsev, peb npaj cov roj ntawm kev hloov siab los ntseeg tseg cia.

Txawm tias cov hluas nkauj uas muaj tswv yim tsis faib lawv cov roj ntawm kev hloov siab los ntseeg, lawv yeej faib qhov kaj thaum lawv tuav lawv lub teeb uas puv roj thiab ci ntsa iab. Qhov tseem ceeb, lawv ib leeg txhawb nqa ib leeg—xub pwg rau xub pwg, ib sab caj npab khawm lwm tus, ib leeg ntsia ib leeg.

Tiag tiag, “[peb] yog lub teeb uas ci rau neeg ntiaj teb pom kev.” Tus Cawm Seej qhia tias:

“Kuv muab nej ua lub teeb rau cov neeg no. Lub nroog uas nyob saum roob yeej tsis muaj ib yam dab tsi yuav thaiv tau lub nroog ntawd.

“… [Peb puas] taws teeb thiab muab phiab khwb rau? Tiam sis tsuas muaj yuav muab txawb rau qhov chaw siab kom txhua tus uas nyob hauv lub tsev pom kev;

“Yog li ntawd cia nej lub teeb ci li no rau cov neeg no, xwv kom lawv yuav pom tej yam uas nej ua zoo thiab muab yeeb koob rau nej Leej Txiv tus uas nyob saum ntuj ceeb tsheej.”

Tus Tswv txib peb kom muab Nws txoj kev kaj ci rau lwm tus. Yog li ntawd npaj nej lub teeb kom puv cov roj ntawm kev hloov siab los ntseeg Yexus Khetos thiab npaj kom nej lub teeb ci ntsa iab. Ces cia lub teeb ci ntsa iab. Thaum peb faib peb lub teeb, peb nqa kev nplij siab los ntawm Yexus Khetos rau lwm tus, peb txoj kev hloov siab los ntseeg Nws tob dua, thiab peb zoo tag nrho txawm tias peb tos kev kho. Thiab thaum peb cia peb lub teeb ci ntsa iab, peb muaj kev zoo siab thaum peb tos.

Ib qho piv txwv los ntawm cov vaj lug kub pab qhia txoj ntsiab cai uas qhia tias peb yuav zoo hlo thaum peb hloov siab los ntseeg Yexus Khetos thiab txais Nws lub dag zog, tsis hais thaum peb tseem tos Nws kho peb zoo.

Tus Thwj Tim Povlauj raug ib qho mob—uas nws piav tias zoo li ib lub pos chob uas nws tau thov peb zaug kom tus Tswv muab tshem tawm. Thiab tus Tswv hais rau Povlauj, “Kuv pom zoo hlub koj ces txaus lawm. Kuv yuav pub kuv lub hwj chim rau tus uas qaug zog.” Povlauj hais li no txog qhov no:

“Qhov uas kuv qaug zog ua rau kuv zoo siab kawg li, rau qhov Yexus Khetos lub hwj chim yuav tsom kwm kuv.

“Kuv yog tus uas ua Yexus Khetos tes hauj lwm, yog li ntawd txawm yog kuv qaug zog, … rau qhov thaum kuv qaug zog thaum ntawd kuv yuav muaj zog.”

Povlauj tus piv txwv qhia tias txawm tias peb muaj kev qaug zog, peb txoj kev muag zog ntawm Yexus Khetos thiaj li zoo kawm nkaus—los sis, puv nkaus thiab zoo tag nrho. Cov uas raug kev tawm tsam thiab tig mus rau Vajtswv nrog kev ntseeg li Povlauj yuav muaj peev xwm txais tej koob hmoov uas los ntawm txoj kev sib raug zoo nrog Vajtswv.

Povlauj tsis txais kev kho nws tej kev txom nyem, tiam sis nws zoo tag nrho ntawm sab ntsuj plig los ntawm Yexus Khetos. Thiab txawm tias nws muaj kev ntxhov siab, lub teeb ntawm nws txoj kev hloov siab los ntseeg thiab lub zog los ntawm Yexus Khetos ci ntsa iab thiab nws zoo siab. Nyob hauv nws Tsab Ntawv mus rau cov neeg Filipis nws hais tias, “Nej yuav tsum niaj hnub zoo siab, rau qhov nej twb nrog tus Tswv koom ib txoj sia lawm. Kuv rov hais ib los ntxiv hais tias: nej cia li zoo siab.”

Cov viv ncaus thiab cov nus, Nws yeej kho tau peb sab ntsuj plig zoo hlo, txawm yog peb tseem tos kom Nws kho peb sab ceb nqaij daim tawv thiab sab siab ntsws zoo. Kev zoo hlo tsis txhais tias yuav kho txhua yam mob ntawm sab cev nqaij daim tawv los sis sab siab ntsws hauv lub neej no. Kev zoo hlo yog los ntawm kev hloov siab los ntseeg Yexus Khetos thiab cia lub teeb ntawm kev hloov siab ci ntsa iab.

“Cov uas tau hu lawm muaj coob, tiam sis cov uas xaiv [kom tus Tswv xaiv lawv los] muaj tsawg.”

Yeej yuav kho txhua yam ntawm sab cev nqaij daim tawv thiab sab siab ntsws thaum peb sawv rov los. Tiam sis nej puas kam xaiv tam sim no kom Nws kho nej sab ntsuj plig zoo hlo?

Kuv zoo siab tshaj tawm tias kuv tau hloov siab los ntseeg tus Tswv Yexus Khetos. Kuv siv zog cia Nws kho kuv sab ntsuj plig zoo hlo. Kuv paub tias txhua yam yuav rov qab los thiab kev kho yuav los, raws li Nws lub sij hawm, rau qhov Nws muaj txoj sia nyob.

Maivliag Madalas yog ib tug poj niam uas Yexus Khetos kho. Thiab nws yog ib tug poj niam Yexus Khetos tau kho nws sab ntsuj plig zoo hlo. Nws yog tus Cawm Seej ib tug thwj tim thiab nws raws Yexus mus thoob plaws Kalilais thiab txhawb pab Yexus.

Nws nyob ntawm tus ntoo khaub lig, thiab ua tim khawv txog tus Cawm Seej txoj kev tuag.

Nws mus rau Yexus lub qhov ntxa kom mus npaj lub cev faus cia thiab pom tias twb muab daim txiag zeb uas npog lub rooj ntxa twb dov rau ib cag lawm, thiab tus Tswv lub cev tsis nyob haud. Maivliag nyob tim lub qhov ntxa quaj thaum cov tim tswv ces tus Cawj Seej nug tias, “Me ntxhais, ua li cas koj quaj? koj tuaj nrhiav leej twg?”

Maivliag quaj hais tias “Xyov lawv coj kuv tus Tswv mus tso rau qhov twg lawm, kuv tsis paub li.”

Thiab Yexus maj mam hu nws lub npe, “Maivliag.” Thiab nws paub Nws thiab teb hais tias, “Launpaunis; … Xib Hwb.”

Thaum tshaj tawm txog tus Cawj Seej, Yaxayas hais tias, “Tus Tswv uas kav ib puas tsav yam yuav rhuav txoj kev tuag kom puas tsuaj mus ib txhis; nws yuav so txhua tus lub kua muag.”

Nws txoj Kev Sawv Rov Los pab so Maivliag tej kua muag. Tiag mas Nws yuav so nej tej kua muag thiab.

Maivliag yog thawj tug tim khawv txog tus Cawm Seej uas sawv rov los. Thiab nws yog thawj tug uas qhia lwm tus txog tej yam uas nws tau pom.

Kuv txo hwj chim koom nrog Maivliag hais kuv zaj lus tim khawv. Nws twb sawv rov los. Yexus Khetos muaj txoj sia nyob. Thaum kawg Nws yuav kho txhua yam mob ntawm sab cev nqaij daim tawv thiab sab siab ntsws zoo. Thiab thaum peb tos kev kho mob ntawd, kev ntseeg tus Thawj Kws Kho Mob yuav ua rau peb sab ntsuj plig txawm zoo hlo. Los ntawm Yexus Khetos lub npe, amees.