Tus Tswv Yexus Khetos Yuav Rov Qab Los

Kuv cov kwv tij thiab cov muam, kuv zoo siab uas tus Tswv tau foom koob hmoov rau kuv kom hais lus rau nej.

Nyob hauv rooj sab laj no, tus Tswv tau hais lus rau peb dhau los ntawm Nws cov tub qhe. Kuv xav kom nej kawm lawv tej zaj lus. Siv lawv tej lus kom thiaj paub tej yam twg muaj tseeb thiab tej yam twg tsis muaj tseeb thaum rau lub hlis tom ntej no.

Twb ua hauj lwm kom kho lub Tuam Tsev Salt Lake thiab lwm qhov chaw hauv Tshav Tuam Tsev rau tsib xyoos lawm. Tam sim no xav tias yuav ua txoj hauj lwm tiav thaum xyoo 2026 kawg. Peb hais ua tsaug rau txhua tus uas ua txoj hauj lwm loj no.

Thaum rau lub hli tas los lawm, peb tau muab cuaj lub tuam tsev fij tseg los sis rov qab fij tseg nyob hauv tsib lub teb chaws. Txij no mus txog xyoo kawg, peb yuav muab tsib lub ntxiv fij tseg.

Hnub no peb zoo siab tshaj tawm tias yuav ua 17 lub tuam tsev ntxiv. Thov mloog twj ywm thaum kuv tshaj tawm tej qhov chaw no.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Kuv cov kwv tij thiab cov muam, nej puas pom tej yam uas tshwm sim rau nej qhov muag pom? Kuv thov kom peb yuav tsom ntsoov rau lub sij hawm zoo kawg nkaus no! Tus Tswv yeej khiav Nws txoj hauj lwm nrawm nroos.

Vim li cas peb ua cov tuam tsev sai dua li yav tas los? Vim li cas? Vim tus Tswv tau qhia peb kom ua li no. Cov koob hmoov ntawm lub tuam tsev pab muab Ixayees sau los ua ke nyob ob sab ntawm daim ntaub thaiv. Cov koob hmoov no kuj pab npaj ib haiv neeg uas yuav npaj lub ntiaj teb rau tus Tswv txoj Kev Los Zaum Ob!

Ib yam li tus yaj saub Yaxayas hais, thiab raws li nco txog hauv Handel zaj nkauj Tus Mexiyas, thaum Yexus Khetos rov qab los, “tus Tswv yuav muab nws lub hwj chim uas ci ntsa iab nthuav qhia rau neeg txhua tus pom.”

Hnub ntawd, “Nws yuav ua tus kav pab, nws lub npe yuav hu ua Tus Tuav Xam, tus uas muaj Txuj Ci, Vajtswv tus muaj hwj chim, Vaj Leej Txiv tus uas nyob mus ib txhis, Vaj ntxwv tus uas muaj kev thaj yeeb.”

Yexus Khetos yuav kav Yeluxalees qub thiab Yeluxalees Tshiab uas “txhim tsa rau hauv sab ntuj Amelikas.” Los ntawm ob qhov chaw no, Nws yuav coj tej xwm ntawm Nws lub Koom Txoos.

Hnub ntawd, peb yuav hu tus Tswv ua “tus Vaj Ntxwv ntawm cov Vaj Ntxwv, thiab tus Tswv rau cov Tswv.” Cov uas nrog Nws koom ua ke los yuav hu lawv ua cov uas Nws hu, xaiv, thiab cov uas rau siab ntseeg.

Cov kwv tij thiab cov muam, tam sim no yog lub sij hawm rau nej, thiab rau kuv, npaj rau peb tus Tswv thiab tus Cawm Seej, Yexus uas yog tus Khetos, txoj Kev Los Zaum Ob. Tam sim no yog lub sij hawm rau peb tsom ntsoov rau peb txoj kev ua Nws cov thwj tim. Nyob hauv ib lub ntiaj teb uas muaj tej yam ntau uas meem txom peb, peb yuav ua li cas?

Kev teev tiam hauv lub tuam tsev yuav pab peb. Nyob hauv tus Tswv lub tsev, peb tsom ntsoov rau Yexus Khetos. Peb xav kawm txog Nws. Peb khi lus tias peb yuav coj raws li Nws. Peb los paub Nws zuj zus. Thaum peb ua raws li peb tej kev khi lus ntawm lub tuam tsev, peb txais tau tus Tswv lub hwj chim uas ntxiv zog rau peb zuj zus. Nyob hauv lub tuam tsev, peb txais kev tiv thaiv kom txhob raug neeg ntiaj teb tej kev tawm tsam. Peb txais tau Yexus Khetos thiab peb Leej Txiv Saum Ntuj Ceeb Tsheej txoj kev hlub dawb paug ntau nplua mias! Peb txais kev kaj saib lug thiab kev nplij siab, uas txawv kev kub ntxhov ntawm lub ntiaj teb.

Kuv cog lus li no rau nej: Tus uas muaj siab xav nrhiav Yexus Khetos tiag tiag tus ntawd yuav nrhiav Nws hauv lub tuam tsev. Nej yuav paub Nws txoj kev hlub tshua. Nej yuav nrhiav tej lus teb rau nej tej lus nug nyuaj heev. Nej yuav to taub txoj kev xyiv fab ntawm Nws txoj moo zoo.

Kuv tau kawm tias lo lus tseem ceeb tshaj plaws uas peb txhua tus yuav tsum teb yog li no tias: Kuv yuav muab kuv lub neej rau leej twg los sis muab ua dab tsi?

Kuv txoj kev txiav txim tias kuv yuav coj raws li Yexus Khetos yog txoj kev txiav txim tseem ceeb tshaj plaws hauv kuv lub neej. Thaum kuv kawm ua tus kws kho mob kuv twb los paub tias muaj Vajtswv tus uas yog Leej Txiv thiab Nws Leej Tub, Yexus Khetos. Txij thaum ntawd los peb tus Cawm Seej yog lub pob zeb uas kuv ua kuv lub neej saud. Txoj kev xaiv kom ua li ntawd los twb pab kuv ntau kawg! Txoj kev txiav txim ntawd twb ua yooj yim rau kuv txiav txim siab txog lwm yam. Txoj kev txiav txim ntawd twb ua rau kuv muaj ib lub hom phiaj thiab paub mus qhov twg. Twb pab kuv nyiaj tau tej cua daj cua dub ntawm lub neej no. Cia kuv qhia txog ob qho piv txwv rau nej.

Zaum thib ib yog thaum kuv tus poj niam Dantzel tau tso lub ntiaj teb no tseg, es kuv hu tsis tau wb cov me nyuam ib tug twg. Kuv nyob kuv ib leeg, nyuaj siab kawg nkaus, thiab thov Vajtswv pab. Zoo siab uas dhau los ntawm Nws tus Ntsuj Plig, tus Tswv tau qhia kuv vim li cas Nws tau coj kuv tus me Dantzel rov mus saum ntuj ceeb tsheej. Thaum kuv to taub lawm, ua rau kuv txais kev nplij siab. Thaum sij hawm dhau mus, kuv txawm muaj peev xwm nyiaj kuv txoj kev tu siab. Tom qab ntawd, kuv twb yuav kuv tus poj niam Wendy. Nws yog ib tug tseem ceeb ntawm kuv zaj lus piv txwv thib ob.

Thaum Wendy thiab kuv wb ua hauj lwm hauv lwm lub teb chaws, cov tub sab xuas phom tso rau ntawm kuv lub taub hau thiab nyem tus qib phom. Tiam sis rab phom tsis txhais. Thaum lub sij hawm ntawd, wb ob leeg raug tsim txom. Tiam sis Wendy thiab kuv wb nyob kaj siab lug xwb. Yog kev kaj siab lug uas “yeej tsis muaj leej twg … to taub.”

Cov kwv tij thiab cov muam, tus Tswv yuav nplij nej lub siab thiab! Nws yuav ntxiv dag zog rau nej. Nws yuav foom koob hmoov rau nej kom muaj kev kaj siab lug, txawm yog txhua yam kub ntxhov los yog.

Cia li mloog Yexus Khetos cov lus cog tseg rau nej: “Kuv yuav nyob ntawm nej sab xis thiab nyob ntawm nej sab laug, thiab kuv tus Ntsuj Plig yuav nyob hauv nej lub siab, thiab kuv cov tim tswv nyob ib puag ncig nej, los txhawb nqa nej.”

Tus Cawm Seej txoj kev muaj peev xwm pab nej los tsis muaj ciaj ciam. Nws txoj kev raug txom nyem hauv Khexemanes thiab nyob saum roob Khaulakhauthas yog kom cawm nej dim! Nws txoj Kev Theej Txhoj uas kav ib txhis yog ua rau nej!

Kuv yaum kom nej siv sij hawm txhua lub lim tiam—mus tas nej lub neej—kom to taub txog Yexus Khetos txoj Kev Theej Txhoj ntxiv. Kuv nyuaj siab xav txog cov uas ua txhaum thiab tsis paub yuav ua li cas kom dim tau. Kuv quaj txog cov uas nyuaj rau lawv sab ntsuj plig los sis cov uas ris tej nra hnyav vim lawv tsis to taub Yexus Khetos tau ua dab tsi kom pab lawv.

Yexus Khetos twb ris nej tej kev txhaum, nej tej kev mob kev nkees, nej tej kev nyuaj siab, thiab nej txoj kev txom nyem. Nej tsis tas ris nej ib leeg xwb! Nws yuav zam txim rau nej thaum nej hloov siab lees txim. Nws yuav foom koob hmoov rau nej kom muaj txaus. Nws yuav kho nej sab ntsuj plig uas raug mob. Thaum nej khi nej tus kheej rau Nws, nej yuav xav tias nej tej nra tsis hnyav. Yog nej yuav ua raws li nej tej kev khi lus thiab coj raws li Yexus Khetos, nej yuav kawm tias tej yam nyuaj siab ntawm nej lub neej yuav kav ntev li ib ntus xwb. “Txoj kev xyiv fab los ntawm Khetos [yuav] kov yeej [nej] tej kev txom nyem.”

Yeej tsis ntxov dhau los sis lig dhau rau nej los ua Yexus Khetos ib tug thwj tim uas rau siab heev. Ces nej thiaj li yuav txais tag nrho cov koob hmoov los ntawm Nws txoj Kev Theej Txhoj. Nej kuj yuav muaj peev xwm ntxiv kom pab muab Ixayees sau los ua ke.

Kuv cov kwv tij thiab cov muam, thaum yav tom ntej, Yexus Khetos yuav rov qab los rau hauv lub ntiaj teb ua tus Mexiyas uas qhib lub caij milenias. Yog li ntawd hnub no kuv hais kom nej rov qab muab nej lub neej fij tseg rau Yexus Khetos. Kuv hais kom nej pab muab Ixayees sau los ua ke thiab npaj neeg ntiaj teb rau tus Tswv txoj Kev Los Zaum Ob. Kuv hais kom nej hais txog Khetos, ua tim khawv txog Khetos, ntseeg Khetos, thiab zoo siab txog Khetos!

Cia li los cuag Khetos thiab “muab tag nrho nej lub siab lub ntsws” rau Nws. Nov yog lub ntsiab ntawm ib lub neej uas muaj kev xyiv fab!

Tej yam zoo tshaj tseem yuav los, kuv cov kwv tij thiab cov muam, vim tus Cawm Seej yuav rov qab los! Tej yam zoo tshaj tseem yuav los vim tus Tswv khiav Nws txoj hauj lwm nrawm nroos. Tej zoo tshaj tseem yuav los thaum peb hloov siab thiab hloov peb lub neej kom ua raws li Yexus Khetos.

Kuv ua tim khawv tias Yexus Khetos yog Vajtswv Leej Tub. Kuv yog Nws tus thwj tim. Kuv zoo siab uas kuv yog Nws tus tub qhe. Thaum Nws Los Zaum Ob, “tus Tswv yuav muab nws lub hwj chim uas ci ntsa iab nthuav qhia rau neeg txhua tus pom.” Hnub ntawd yog ib hnub uas muaj kev xyiv fab rau cov neeg ncaj ncees!

Dhau los ntawm lub hwj chim ntawm cov yawm sij pov thawj hwj dawb huv uas kuv tuav, kuv tshaj tawm qhov tseeb rau nej thiab rau neeg ntiaj teb tag nrho! Los ntawm Yexus Khetos lub npe, amees.