Vajtswv cov Tub thiab Ntxhais

Hnub no kuv xav qhia me ntsis txog txoj moo zoo ib qho tseeb zoo kawg nkaus uas Vajtswv tau muab tshwm sim. Tiam sis, yeej txawv heev vim yog ib qho tseeb uas lwm tus nyiam cem peb txog. Muaj ib lub sij hawm ob peb xyoos tas los lawm uas pab kuv to taub ntxiv txog txoj moo zoo qhov tseeb no.

Ua ib tug sawv tam rau lub Koom Txoos, lawv thiaj caw kuv mus koom ib lub rooj sab laj txog kev teev ntuj es lawv tshaj tawm tias lawv yuav lees txais yuav luag txhua yam kev cai raus dej los ntawm tej tsev teev ntuj uas ntseeg Yexus, yog tias txoj kab ke ntawd yog ua siv dej thiab ua hauv Leej Txiv thiab Leej Tub thiab tus Vaj Ntsuj Plig Dawb Huv lub npe. Ces lawv txawm hais tias txoj kev cai no yuav tsis muaj qab hau dab tsi yog ua kev cai raus dej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Tom qab lub rooj sab laj no kuv tau kawm ntxiv seb yog vim li cas tus thawj coj no tsis tau kam pom zoo rau peb txoj kev cai raus dej. Wb tau muaj lus sib tham zoo.

Thaum kawg, nws hais tias lawv tsis pom zoo rau peb vim yog peb txoj kev ntseeg txog Pawg Vajtswv, uas lwm txoj kev teev ntuj Ntseeg Yexus hu ua pawg Trinity. Kuv ua nws tsaug vim nws siv sij hawm nrog kuv tham thiab piav txog nws tej kev ntseeg thiab tej kev cai coj hauv nws lub koom txoos. Tom qab tham tag, wb sib khawm thiab hais sib ntsib dua.

Yav tom qab ntawd thaum kuv xav txog wb txoj kev sib tham, qhov uas tus thawj coj no hais txog Tsoom Haiv Neeg Ntseeg hauv Hnub Nyoog Kawg tsis to taub qhov uas nws hu ua “yam tsis paub txog Pawg Trinity” txob kuv siab heev. Nws hais txog dab tsi? Tiag tiag mas, nws hais txog peb txoj kev xav seb Vajtswv zoo li cas. Peb ntseeg hais tias Vajtswv Leej Txiv “yog ib tug txiv neej uas muab tsa nto lawm” uas muaj “lub cev muaj yeeb koob thiab muaj nqaij thiab muaj txha uas kov tau ib yam li tib neeg; [thiab] Leej Tub los muaj thiab.” Yog li ntawd, txhua zaus uas peb hais seb Vajtswv zoo li cas, peb kuj pib qhia seb peb yog neeg zoo li cas.

Thiab qhov no muaj tseeb vim hais tias peb raug tsim los “muaj [Nws] tus yam ntxwv, raws li [Nws] tus cwj pwm,” thiab raws li tus Kws Sau Phau Ntawv Nkauj hais, Vajtswv hais tias, “Nej yog tej vaj tswv, nej puav leej yog tus uas muaj Hwj Chim Loj kawg nkaus cov me nyuam.” Nov yog ib co lus qhuab qhia zoo kawg uas peb muaj vim muaj txoj Kev Txum Tim Rov Qab Los. Tej no tsuas yog tej lus qhia uas peb cov tub txib qhia hauv lawv thawj zaj lus qhia, hauv thawj nqe lus, hauv thawj kab lus hais tias: “Vajtswv yog peb Leej Txiv Saum Ntuj Ceeb Tsheej, thiab peb yog Nws cov me nyuam.”

Nim no, tej zaum nej yuav hais tias, “Tib neeg coob heev xav tias peb yog Vajtswv cov me nyuam.” Qhov no muaj tseeb tiag, tiam sis tej zaum lawv to taub txawv peb vim lawv tsis nkag siab seb qhov ntawd txhais tau li cas tiag. Rau ib Tsoom Haiv Neeg Ntseeg hauv Hnub Nyoog Kawg mas, zaj lus qhia no tsis yog ib qho piv txwv xwb. Tab sis mas, peb ntseeg tiag tiag hais tias peb txhua tus yeej yog Vajtswv cov me nyuam. Nws yeej yog “Leej Txiv rau [peb] cov ntsuj plig,”⁶ thiab vim yog li ntawd, peb thiaj muaj peev xwm peem los mus ua neeg zoo li Nws, es ib txhia xav tias muaj tsis tau li ntawd.

Twb yog 200 tawm xyoo tas los lawm thaum muaj Thawj Zaug Ua Yog Toog uas tau qhib lub qhov rooj rau txoj Kev Muab Txoj Moo Zoo Txum Txim Rov Qab Los. Lub sij hawm ntawd, tus tub hluas Joseph Smith xav tau lub ntuj txoj kev qhia seb nws yuav tsum koom lub koom txoos twg. Los ntawm kev tshwm sim uas nws txais hnub ntawd, thiab tej kev tshwm sim uas nws txais yav tom ntej, tus Yaj Saub Joseph thiaj kawm paub seb Vajtswv zoo li cas tiag thiab peb nrog Nws sib txheeb li cas vim peb yog Nws cov me nyuam.

Vim muaj li ntawd, peb kawm tseeb hais tias peb Leej Txiv Saum Ntuj Ceeb Tsheej twb qhia zaj lus qhuab qhia tseem ceeb no puag thaum chiv keeb los. Cia kuv qhia ob qho piv txwv txog qhov no hauv cov vaj lug kub.

Nej nco qab Vajtswv cov lus qhia rau Mauxes hauv phau Lub Hlaws uas Muaj Nqis Heev.

Peb nyeem hais tias “Vajtswv hais lus rau Mauxes hais tias: Saib seb, kuv yog tus Tswv Vajtswv uas Muaj Hwj Chim Tag Nrho.” Los yog hais tias, Mauxes, kuv xav kom koj paub hais tias kuv yog leej twg. Ces Nws hais ntxiv tias, “Saib seb, koj yog kuv tus tub.” Yav tom qab ntawd nws hais tias, “Thiab kuv muaj ib txoj hauj lwm rau koj ua, kuv tus tub Mauxes; thiab koj muaj yam ntxwv zoo li kuv Tib Leeg Tub” Ces thaum kawg, Nws xaus hais tias, “Thiab nim no, saib seb, kuv muab qhov no rau koj saib, kuv tus tub Mauxes.”

Zoo nkaus li Vajtswv yeej xav qhia qhov no rau Mauxes hais tias: “Koj yog kuv tus me nyuam,” uas Nws twb hais tseg peb zaug lawm. Nws yeej hais tsis tau Mauxes lub npe tsuas yog nws hais ntxiv hais tias Mauxes yog Nws tus tub thiab.

Tiam sis, tom qab ntawd thaum Mauxes nyob nws ib leeg xwb, nws qaug zog vim nws tsis nyob ntawm Vajtswv xub ntiag lawm. Ces thaum ntawd Dab Ntxwg Nyoog thiaj los ntxias nws. Nej puas pom tus txheej txheem no? Thawj yam uas Dab Ntxwg Nyoog hais rau nws yog, “Mauxes, neeg leej tub, cia li pe hawm kuv.”

Ua li no, Dab Ntxwg Nyoog txoj kev thov kom yuav tsum pe hawm nws yog lus dag ntxias xwb. Tiam sis tiag tiag lub sij hawm ntawd qhov uas yuav ntxias Mauxes thaum nws qaug zog li ntawd yog kom nws tsis paub meej thiab ntseeg tias nws tsuas yog “neeg leej tub,” es tsis yog Vajtswv ib tug me nyuam.

“Thiab tau muaj tias Mauxes ntsia Dab Ntxwg Nyoog thiab hais tias: Koj yog leej twg? Vim saib seb, kuv yog Vajtswv ib tug tub, uas muaj yam ntxwv zoo li nws Tib Leeg Tub.” Muaj hmoov, vim Mauxes tsis ntxhov siab thiab tsis kam mloog cov lus ntxias ntawd. Nws twb kawm seb nws yog leej twg tiag tiag lawm.

Lwm zaj lus piv txwv nyob rau hauv phau Mathais 4. Cov kws txawj ntawv hais tias yog “peb zaug uas ntxias Yexus” cuag li tus Tswv tsuas raug kev haub ntxias peb zaug xwb los.

Muaj neeg coob kawg nkaus uas sim piav seb tej kev haub ntxias no txhais tau li cas tiag. Tam li peb paub, tshooj no pib piav tias Yexus twb mus tom roob moj sab qhua lawm, “Yexus nyob tod tau plaub caug hnub plaub caug hmo, nws tsis tau noj ib yam dab tsi li. Thaum dhau lub sij hawm ntawd lawm nws tshaib plab heev.”

Dab Ntxwg Nyoog thawj txoj kev ntxias yog kom tus Tswv yuav ua raws li nws sab cev nqaij daim tawv xav tau. Nws twv Yexus hais tias, “Koj cia li hais kom lub pob zeb no txia ua mov.”

Txoj kev ntxias thib ob hais txog kev ntxias Vajtswv hais tias: “Koj cia li dhia rau hauv av, rau qhov Vajtswv txoj lus sau tseg hais tias, Vajtswv yuav kom nws cov tim tswv tsom kwm koj.”

Thaum kawg, Dab Ntxwg Nyoog ntxias nws txog kev muaj suab muaj npe thiab txais lub ntiaj teb no qhov yeeb koob. Tom qab twb cia Yexus pom “tag nrho tej teb chaws hauv ntiaj teb … Dab Ntxwg Nyoog hais rau Yexus hais tias, Yog koj txhos caug pe kuv, kuv yuav muab txhua yam no rau koj.”

Tiag tiag mas, Dab Ntxwg Nyoog txoj kev ntxias loj tshaj yeej tsis yog peb yam ntawd tab sis mas tsuas yog xav ntxias Yexus Khetos kom Nws xav paub seb Nws puas yog los saum ntuj los tiag. Muaj ob zaug, ua ntej ntxias nws Dab Ntxwg Nyoog liam hais tias “Yog koj yog Vajtswv tus Tub tiag”—los yog hais tias yog koj ntseeg li ntawd, ces cia li ua li no los sis ua li tod.

Thov kom nej nco qab hais tias tau muaj xwm dab tsi ua ntej Yexus tau mus hauv roob moj sab qhua yuav yoo mov thiab thov Vajtswv: muaj zaj lus uas hais txog Yexus Khetos txoj kev cai raus dej. Thiab thaum Nws tawm hauv dej los, muaj ib lub suab hais saum ntuj tuaj hais tias, “Tus no yog kuv tus Tub uas kuv hlub, kuv txaus siab rau nws.”

Peb puas pom seb tej no sib raug li cas? Peb puas pom ib tug txheej txheem?

Yog li ntawd peb thiaj to taub hais tias txhua zaus peb kawm tias peb los saum ntuj los thiab muaj peev xwm hloov los ua neeg zoo li cas, tus uas tawm tsam txhua yam ncaj ncees yeej los ntxias peb kom txhob ntseeg tej ntawd.

Peb yuav txiav txim txawv li cas yog tias peb paub hais tias peb yog leej twg tiag tiag li.

Peb nyob hauv ib lub ntiaj teb uas nyuaj kawg, ib lub uas haj yam muaj kev kub kev ntxhov, uas muaj tej tus neeg zoo uas sim kom peb saib peb rau nqi heev, xws li peb nyob hauv ib lub koom txoos thiab txais yuav txoj moo zoo uas pab peb tsa qhov muag thiab caw peb mus rau saum ntuj ceeb tsheej.

Yexus lo lus txib hais tias “nej yuav tsum ua zoo kawg nkaus ib yam li [peb] Leej Txiv tus uas nyob saum ntuj ceeb tsheej” qhia tseeb seb Nws xav kom peb ua li cas thiab tias peb muaj cuab kav nyob li cas tas mus ib txhis li. Nim no, yus ua tsis tau tej no hauv ib hnub nkaus. Raws li tus Thawj Tswj Hwm Jeffrey R. Holland hais,“nyob nyob ces” yuav muaj li ntawd Tiam sis muaj lus cog tseg hais tias yog peb “yuav los cuag Khetos” peb yeej yuav “los ua neeg zoo tag nrho vim yog los ntawm nws.” Yuav tsum ua hauj lwm ntau—tsis yog lam ua ib txoj hauj lwm twg, tiam sis ib txoj hauj lwm uas los saum ntuj los. Nws txoj hauj lwm ntag!

Nim no, txoj moo zoo yeej yog vim peb Leej Txiv Saum Ntuj Ceeb Tsheej twb hais tseg hais tias, “Vim saib seb, qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab kom tau txoj sia nyob mus ib txhis.”

Thawj Tswj Hwm Nelson txoj kev caw kom peb yuav “xav txog tej yam xilethi-aus” yeej ua rau peb nco qab tias peb los saum ntuj los, tuaj qhov twg tuaj, thiab seb peb ua tau neeg zoo li cas. Peb tsuas txais tau lub ntuj xilethi-aus dhau ntawm Yexus Khetos txoj kev theej txhoj.

Tej zaum yog vim li ntawd Dab Ntxwg Nyoog thiaj ntxias Yexus txij thaum chiv keeb mus txog thaum kawg Nws xaus nws txoj kev qhuab qhia tib neeg ntiaj teb. Mathais sau hais tias thaum Yexus tseem raug ntsia saum nto khaub lig “cov uas dhau ntawm nws mus yeej luag thuam nws, … hais tias, … Yog koj yog Vajtswv tus tub tiag, koj cia li pab kom koj dim thiab nqis kiag saum tus ntoo khaub lig ko los.” Vajtswv tau yeeb koob vim Nws tsis quav ntsej tej lus ntawd tiam sis tau ua txhua yam kom peb thiaj muaj cuab kav txais yuav tag nrho tej koob hmoov xilethi-aus.

Cia peb nco qab ntsoov, yeej tau them ib tug nqi hnyav heev kom peb thiaj muaj tau kev zoo siab.

Kuv hais lus tim khawv nrog tus Thwj Tim Povlauj tias “Vajtswv tus Ntsuj Plig qhia tseeb rau peb hais tias, peb twb yog Vajtswv cov me nyuam lawm, thiab yog peb yog Vajtswv cov me nyuam peb thiaj yuav tau tej uas Vajtswv npaj tseg rau peb cov uas yog Vajtswv haiv neeg; thiab peb yuav muaj feem tau tej uas Vajtswv npaj tseg rau Yexus Khetos; yog peb raug kev txom nyem ib yam li Yexus Khetos raug, peb yuav tau Yexus Khetos lub hwj chim ci ntsa iab.” Los ntawm Yexus Khetos lub npe, amees.