Kev Tso Siab rau Peb Leej Txiv
Vajtswv tso siab rau peb txiav txim txog tej yam tseem ceeb feem ntau, thiab thaum ua txhua yam Nws hais kom peb tso siab rau Nws.
Thaum lub Rau Hli Ntuj 1, 1843, Addison Pratt tawm Nauvoo, Illinois, mus qhia txoj moo zoo rau cov neeg hauv cov Pov Txwv Hawaiian, nws thiaj li cia nws tus poj niam, Louisa Barnes Pratt, nyob kom tu nkawd tsev neeg.
Thaum Haiv Neeg Ntseeg raug kev tsim txom ntau ntxiv nyob hauv Nauvoo, lawv yuav tsum tawm mus, thiab thaum lawv nyob hauv Winter Quarters kom npaj mus rau lub Hav Salt Lake, Louisa yuav tsum txiav txim seb nws puas mus. Yeej yuav yooj yim nyob ntev zog thiab tos Addison rov qab los thiaj li tsis mus nws ib leeg.
Ob zaug, nws twb thov kom tus yaj saub Brigham Young qhia nws xav li cas, es Brigham Young tau hais kom nws mus. Txawm yog nyuaj npaum li cas thiab txawm yog nws tsis tshua xav mus los, ob zaug no los nws twb mus zoo.
Thaum xub thawj, Louisa tsis nyiam taug kev mus hlo li. Tiam sis, tsis ntev nws pib zoo siab pom cov nyom ntsuab xiab, cov paj uas muaj ntau yam xim, thiab cov av nyob ob sab ntawm tus dej. Nws sau hais tias, “Kev nyuaj siab los twb ploj zuj zus thiab tsis muaj ib tug poj niam uas zoo siab tshaj kuv nyob hauv tag nrho kuv pawg.”
Louisa zaj dab neeg twb tshoov kuv lub siab heev. Kuv qhuas nws txoj kev txaus siab tso nws lub siab nyiam tseg, nws txoj kev tso siab rau Vajtswv thiab qhov uas nws txoj kev muab siab rau ntseeg tau pab nws xav txawv txog nws tej xwm txheej.
Nws tau pab kuv nco qab tias peb muaj ib Leej Txiv Saum Ntuj Ceeb Tsheej, tus uas hlub peb thiab saib xyuas peb txawm peb nyog qhov twg los thiab nco qab tias peb tso siab rau Nws ntau tshaj lwm tus los tau.
Lub Hauv Paus ntawm Qhov Tseeb
Vajtswv tso siab rau peb txiav txim txog tej yam tseem ceeb feem ntau thiab thaum ua txhua yam, Nws hais kom peb tso siab rau Nws. Qhov no yeej nyuaj heev thaum peb txoj kev txiav txim los sis cov pej xeem txoj kev xav yeej tsis zoo ib yam li Nws lub siab nyiam rau Nws cov me nyuam.
Ib txhia hais tias peb yuav tsum rov qab txiav txim siab seb qhov twg yog qhov yog thiab qhov twg yog kev txhaum vim lawv hais tias qhov tseeb yeej nyob ntawm yus, tej yam uas muaj tiag nyob ntawm yus xav li cas, los sis Vajtswv muaj lub siab dawb Nws tsis xav li cas txog tej yam uas peb ua.
Thaum peb nrhiav kev to taub thiab lees txais Vajtswv lub siab nyiam, peb yuav tsum nco ntsoov tias peb tsis muaj cai txiav txim tias qhov twg yog qhov yog thiab qhov twg yog qhov txhaum. Vajtswv tau tsim tej ciaj ciam no, raws li tej lus tseeb mus ib txhis li kom peb tau koob hmoov zoo.
Tib neeg txoj kev xav muab Vajtswv tej lus tseeb mus ib txhis hloov los yeej muaj puag thaum ub thiab. Ua ntej ntuj tsim teb raug, thaum Dab Ntxwg Nyoog ntxeev siab tawm tsam Vajtswv txoj hau kev, nws xav ua raws li nws lub siab nyiam xwb kom rhuav tib neeg txoj kev ywj siab xaiv. Raws li tus txheej txheem no, tib neeg zoo li Seles, Nihos, thiab Khaulihos tau cav hais tias kev ntseeg yog kev ruam, kev tshwm sim tsis muaj qab hau, thiab peb xav ua li cas los yeej zoo xwb. Tu siab uas muaj neeg coob uas raug kev nyuaj siab vim lawv khiav ntawm Vajtswv tej lus tseeb mus.
Txawm yog muaj tej yam uas hloov nyob ntawm seb yus raug xwm txheej dab tsi los, tsis yog txhua yam yuav hloov li no. Thawj Tswj Hwm Russell M. Nelson tau qhia tas li hais tias Vajtswv tej lus los muaj tseeb tiag, txawm raug dab tsi los xij, thiab Vajtswv yog tus uas qhia lub ntsiab txog tej lus tseeb ntawd.
Peb txoj Kev Xaiv
Peb xaiv kom tso siab rau leej twg los yeej yog ib txoj kev txiav txim tseem ceeb hauv lub neej no. Vaj Ntxwv Npeyamis tau qhia nws cov neeg tias, “Cia li ntseeg Vajtswv; ntseeg tias muaj nws … ; ntseeg tias nws muaj laj lim tswv yim tag nrho … ; ntseeg tias tib neeg yeej tsis to taub txhua yam uas tus Tswv muaj peev xwm to taub.”
Zoo siab uas peb muaj cov vaj lug kub thiab cov yaj saub tej lus kom pab peb to taub Vajtswv tej lus tseeb. Yog tias yuav tsum piav ntxiv kom thiaj li to taub, Vajtswv qhia tej lus ntawd rau Nws cov yaj saub. Thiab Nws yuav teb peb tej lus thov dhau los ntawm tus Vaj Ntsuj Plig Dawb Huv thaum peb nrhiav kev to taub tej lus tseeb uas peb tseem tsis to taub zoo.
Txwj Laug Neil L. Andersen qhia tias peb tsis tas xav tsis thoob “yog tias thaum xub thawj [peb] tej kev xav tsis yog raws nraim li tus Tswv tus yaj saub tej lus qhia. Yog tej lub sij hawm uas peb yuav kawm, txo hwj chim, thaum peb txhos caug thov Vajtswv. Peb mus tom ntej nrog kev ntseeg, tso siab rau Vajtswv, vim peb paub hais tias yuav muaj ib lub sij hawm thaum peb Leej Txiv Saum Ntuj Ceeb Tsheej yuav qhia meej dua ntxiv.”
Txhua lub sij hawm, peb yuav tsum nco txog Amas tej lus qhia tias Vajtswv muab Nws tej lus rau peb raws li peb txoj kev mloog lus thiab txoj kev siv zog ua raws li tej yam uas Nws hais. Yog peb ua raws li Vajtswv txoj lus, peb yuav txais ntxiv; yog peb tsis quav ntsej txog Nws tej lus ntuas, peb yuav txais tsawg zuj zus mus txog thaum peb tsis muaj ntxiv li lawm. Qhov uas tej yam peb paub lawm ploj mus li no tsis txhais tias qhov tseeb ntawd tsis yog lawm; tiam sis, peb poob txoj kev txawj to taub xwb.
Ntsia Ntsoov tus Cawm Seej
Nyob hauv Kapena-us, tus Cawm Seej tau qhia txog qhov uas Nws yog leej twg thiab Nws ntiag tug hauj lwm. Neeg coob xav tias Nws tej lus nyuaj rau lawv mloog, lawv thiaj li ntxeev siab thiab “tsis nrog nws mus lawm.”
Vim li cas lawv tsis nrog Nws mus lawm?
Vim lawv tsis nyiam tej yam uas Nws hais. Yog li ntawd, vim lawv tso siab rau lawv tus kheej, lawv twb ncaim mus, thiaj li tsis tau cov koob hmoov uas lawv yuav muaj yog tias lawv nrog Nws nyob.
Yeej yooj yim rau peb txoj kev muab hlob tav peb kev kom txhob txais tau qhov tseeb mus ib txhis li. Thaum peb tsis to taub, peb nres tau, cia peb lub siab nyob kom txhob ntxhov ntxhov, ces xaiv seb peb yuav ua li cas. Tus Cawm Seej tau hais kom peb “ntsia ntsoov [Nws] nrog txhua txoj kev xav; tsis txhob ua xyem xyav, tsis txhob ntshai.” Thaum peb tsom ntsoov rau tus Cawm Seej, peb txoj kev ntseeg yuav pib kov yeej peb tej kev txhawj xeeb.
Ib yam li Thawj Tswj Hwm Dieter F. Uchtdorf hais kom peb ua: “Kuv thov nej, ua xyem xyav txog tej yam nej tsis paub tseeb ua ntej nej ua xyem xyav txog nej txoj kev ntseeg. Peb yeej yuav tsum tsis txhob cia peb tej kev ua xyem xyav ntes peb thiab cia peb tsis txais kev hlub, kev kaj siab lug, thiab tej txiaj ntsim uas los ntawm kev ntseeg tus Tswv Yexus Khetos.”
Cov Koob Hmoov Los rau cov uas Nyob
Hnub ntawd taum ib co thwj tim ncaim tus Cawm Seej mus hnub ntawd, Nws nug Kaum Ob tug Thwj Tim tias, “Nej yuav tso kuv tseg thiab los?”
Petus teb hais tias:
“Tus Tswv, peb yuav mus cuag leej twg? Koj tej lus pub tau txoj sia ib txhis rau neeg.
“Nim no peb ntseeg thiab paub tseeb hais tias koj yog tus [Khetos, Vajtswv Leej Tub].”
Kaum Ob tug Thwj Tim twb nyob hauv tib lub ntiaj teb, thiab lawv hnov cov pej xeem tej lus yuam ib yam li cov thwj tim uas ncaim mus. Tiam sis, thaum lub sij hawm no, lawv xaiv kev ntseeg thiab tso siab rau Vajtswv, lawv thiaj li tau cov koob hmoov uas Vajtswv pub rau cov uas nyob nrog nraim Nws.
Tej zaum nej zoo li kuv, es tej lub sij hawm nej twb txiav txim siab ob yam no huv tib si. Tej lub sij hawm thaum ua nyuaj rau peb to taub los sis xav ua raws li Vajtswv lub siab nyiam, qhov uas peb paub tias Nws hlub peb tam sim no, txawm peb zoo li cas los xij. Thiab Nws muaj ib yam zoo dua rau peb. Yog peb thov Nws, Nws yuav pab peb.
Txawm yog peb xav tias yuav nyuaj rau peb thov Nws, ib yam li leej txiv ua xav kom tus Cawm Seej kho nws tus tub, tus Cawm Seej hais tias, “Yog leej twg ntseeg [ces] yeej ua tau txhua yam huv tib si.” Thaum ua nyuaj rau peb, peb kuj thov tau, “Thov koj pab kom [peb] muaj kev ntseeg ntxiv.”
Kev Ywj rau Nws lub Siab Xav
Txwj Laug Neal A. Maxwell qhia tias “txoj kev txo hwj chim yog tib yam los ntawm peb tus kheej uas peb tso taus rau saum Vajtswv lub thaj.” Yog li ntawd Vaj Ntxwv Npeyamis xav xav kom nws cov neeg hloov los ua “zoo li ib tug me nyuam, mloog lus, muaj siab mos siab muag, txo hwj chim, ua siab ntev, muaj kev hlub puv npo, txaus siab ua txhua yam uas tus Tswv pom tias tsim nyog muab rau nws ua, ib yam li ib tug me nyuam yaus txaus siab ua txhua yam rau nws txiv.”
Txhua lub sij hawm, tus Cawm Seej coj yam ntxwv zoo tag nrho rau peb. Txawm Nws nyuaj siab los, thiab Nws paub tias Nws yuav raug mob loj tshaj plaws, Nws tseem ywj Nws lub siab rau Vajtswv, kom ua raws li Nws ntiag tug hauj lwm cawm neej txoj sia thiab qhib kev rau peb txais tau tej lus cog tseg mus ib txhis li.
Kev xaiv ywj rau Vajtswv lub siab nyiam yeej yog ib yam los ntawm kev ntseeg uas yog lub ntsiab ntawm peb txoj kev ua thwj tim. Thaum peb xaiv ua li ntawd, peb kawm tias peb txoj kev ywj siab xaiv tsis ploj mus; tiam sis, peb txais nqi zog vim tus Vaj Ntsuj Plig Dawb Huv los nrog peb nyob, Nws ua rau peb muaj tej lub hom phiaj, kev xyiv fab, kev kaj siab lug, thiab kev cia siab uas tsis muaj nyob lwm qhov chaw.
Ob peb lub hlis tas los, ib ceg txheem ntseeg tus thawj tswj hwm thiab kuv wb mus xyuas ib tug poj niam hauv nws ceg txheem ntseeg thiab nws tus tub. Ntau xyoo tom qab nws tau ncaim lub Koom Txoos mus, ua loj leeb hauv tej kev uas nyuaj thiab phem, nws tau rov qab los. Thaum peb sib tham, wb nug nws seb vim li cas nws rov qab los.
Nws hais tias, “Kuv twb ua rau kuv lub neej piam tag, thiab kuv paub kuv yuav tsum ua dab tsi.”
Ces kuv nug nws seb nws tau kawm dab tsi hauv nws lub neej.
Nws los kua muag qhia hais tias nws tau kawm tias nws yuav tsum mus koom lub koom txoos ntev txaus kom thiaj li swm tuaj thiab nws yuav tsum nyob kom mus txog thaum nws xav nyob ntawd. Nyuaj rau nws rov qab los, tiam sis thaum nws muab siab rau ntseeg Leej Txiv txoj hau kev, nws hnov tus Ntsuj Plig lo
Ces nws hais tias, “Kuv tau kawm ntawm kuv tus kheej tias Vajtswv yeej zoo thiab Nws tej kev zoo dua kuv tej kev.”
Kuv ua tim khawv txog Vajtswv, peb Leej Txiv uas Nyob Mus Ib Txhis, tus uas hlub peb; txog Nws Leej Tub, Yexus Khetos, tus uas tau cawm peb dim. Nkawd paub peb tej kev mob kev nkees thiab tej teeb meem. Nkawd yeej yuav tsis tso peb tseg thiab paub zoo tag nrho yuav ua li cas kom pab tau peb. Peb yuav zoo siab kawg thaum peb tso siab rau Nkawd ntau tshaj peb tso siab rau lwm tus los sis rau lwm yam. Los ntawm Yexus Khetos lub npe dawb ceev, amees.