Tsom Ntsoov rau Yexus Khetos thiab Nws Txoj Moo Zoo

Nyob hauv xyoo 1996, cov txiv neej Nigerian pawg ncaws pob tau yeej lub nqi zog kub ntawm kev sib tw Olympics uas nyob hauv lub zos Atlanta hauv lub teb chaws Amelikas. Tom qab kev sib tw tas, ib cov neeg coob coob uas zoo siab heev tau tawm rau tej kev ntawm txhua lub nroog thiab zos; tam sim ntawd lub teb chaws no uas muaj 200 plhom tus neeg tawm hauv lawv lub tsev mus rau ntawm txoj kev koom ua koob tsheej thaum ob moos sawv ntxov! Muaj kev xyiv fab, thiab kev zoo siab heev thaum tib neeg noj mov, hu nkauj thiab seev cev. Thaum lub sij hawm ntawd, Nigeria sib koom siab, thiab txhua tus neeg Nigerian txaus siab ua neeg Nigerian.

Ua ntej kev sib tw Olympics, pawg ncaws pob no tau muaj kev cov nyom ntau. Thaum kev sib tw pib, tsis muaj nyiaj txiag pab. Pawg ncaws pob ntawd tau sib tw ncaws pob txawm lawv tsis muaj tej khoom pab lawv, qhov chaw rau lawv xyaum, zaub mov zoo noj, los sis chaw ntxhua khaub ncaws.

Jerome Prevost/Getty Images

Muaj ib lub sij hawm thaum uas kev sib tw yuav luag tas es lawv yuav swb, tiam sis xyov ua cas pawg Nigerian ntawd ho kov yeej tau. Lub sij hawm tseem ceeb no ua rau lawv saib lawv tus kheej txawv qhov qub. Vim lawv ntseeg lawv tus kheej, thiab lawv txhua tus khwv ua hauj lwm thiab rau siab heev, lawv koom siab tsis mloog tej yam uas tab kaum thiab tsom ntsoov rau txoj kev yeej xwb. Kev tsom ntsoov li no cia lawv yeej tej lub nqi zog kub thiab cov neeg Nigerian hu pab ntawd ua “Pawg Ncaws Pob uas Txawj Tshaj.” Pawg Ncaws Pob uas Txawj Tshaj hauv xyoo 1996 Olympics ntawd los tib neeg tseem hais txog lawv thaum sib tham txog txoj kev ncaws pob hauv Nigeria.

David Cannon/Allsport/Getty Images

Thaum pawg ncaws pob tau kawm tias yuav tsum tsis txhob xav txog tej yam uas tab kaum lawv thiab tsom ntsoov rau lawv lub hom phiaj, lawv tau ua ntau tshaj qhov uas lawv xav tias lawv ua tau, thiab tau txais kev xyiv fab heev. (Thiab peb sawv daws hauv Nigeria los zoo siab thiab!)

Zoo ib yam li ntawd, thaum peb tsis txhob xav txog tej yam uas tab kaum peb ntawm lub ntiaj teb thiab tsom ntsoov rau Khetos thiab Nws txoj moo zoo, peb yeej yuav ua tau ntau tshaj qhov peb xav, thiab yuav txais kev xyiv fab heev. Thawj Tswj Hwm Russell M. Nelson qhia tias: “Thaum peb tsom ntsoov rau Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej.”

Kuv thov kom tus Vaj Ntsuj Plig Dawb Huv yuav pab peb txhua tus ua li Thawj Tswj Hwm Nelson tej lus caw kom tsom ntsoov rau “Yexus Khetos thiab Nws txoj moo zoo” peb thiaj li txais kev xyiv fab ntawm Khetos “txawm peb raug dab tsi los xij nyob hauv peb lub neej.”

Muaj ob peb zaj nyob hauv Phau Ntawv Maumoos txog tib neeg uas tau hloov lawv lub neej thaum lawv tsom ntsoov rau Yexus Khetos thiab Nws txoj moo zoo.

Cia li xav txog Amas tus Hluas. Nws tau ntxeev siab tawm tsam lub Koom Txoos. Nws txiv, Amas, tau thov thiab yoo mov. Ib tug tim tswv tau tshwm sim rau Amas tus Hluas thiab hais kom nws hloov siab lees txim. Thaum lub sij hawm ntawd, Amas tau pib raug “tej kev mob ntawm ib tug ntsuj plig uas raug txim.” Thaum lub sij hawm tsaus ntuj tshaj plaws no, nws nco qab nws txiv tej lus qhia txog tus Khetos uas yuav los theej neeg ntiaj teb lub txhoj. Thaum nws xav txog qhov no, nws thov Vajtswv kom hlub tshua nws. Nws tau txais kev xyiv fab, ib txoj kev xyiv fab uas nws hais tias zoo nkauj! Txoj kev hlub tshua thiab kev xyiv fab los rau Amas vim nws thiab nws txiv tsom ntsoov rau tus Cawm Seej.

Rau cov niam tsev txiv tsev uas muaj me nyuam uas tau khiav deb, cia li ua siab loj! Tsis txhob xav tias vim li cas ib tug tim tswv tsis los pab nej tus me nyuam hloov siab lees txim, paub tias tus Tswv twb muab cov tim tswv ntawm lub ntiaj teb rau nws lub neej: tus npisov, lwm cov thawj coj hauv lub Koom Txoos los sis ib tug kwv tij los sis ib tug viv ncaus uas txhawb pab. Yog nej rau siab yoo mov, thov, thiab yog nej tsis teem ib lub sij hawm rau Vajtswv, thiab yog nej tso siab tias tus Tswv yeej ncav Nws txais tes tau mus pab nej tus me nyuam, ces—yuav muaj ib hnub—nej yuav pom tus Tswv lub hwj chim tshoov nej tus me nyuam lub siab thaum nej tus me nyuam txiav txim siab mloog. Nov yog vim tias Khetos yog kev xyiv fab—Khetos yog kev cia siab; Nws yog kev cog lus tias tej yam zoo yuav los. Yog li ntawd, tso siab rau Yexus Khetos muab nej tus me nyuam rau Nws, vim Nws yog cov niam tsev txiv tsev lub dag zog thiab txhua tus me nyuam lub dag zog.

Thaum nws tau txais kev xyiv fab los ntawm Yexus Khetos, Amas tus Hluas muaj kev xyiv fab ntawd tas nws lub neej. Tiam sis nws ua li cas kom muaj kev xyiv fab ruaj nrees thaum raug xwm txheej nyuaj thiab tej kev sim siab. Nws hais tias:

“Txij li lub caij ntawd los txog nim no, kuv tau ua hauj lwm tsis tseg li, xwv kom kuv yuav coj tau tib neeg los rau txoj kev hloov siab lees txim; xwv kom kuv yuav coj tau lawv los saj txoj kev xyiv fab heev uas kuv tau saj lawm. …

“… Thiab … tus Tswv tau muab kev xyiv fab ntau heev rau kuv los ntawm tej txiv ntoo uas txi ntawm kuv tej hauj lwm. …

“Thiab Vajtswv tau pab kuv thaum muaj txhua yam kev sim siab.”

Kev xyiv fab los ntawm Khetos pib rau Amas thaum nws muab siab rau ntseeg Nws thiab thov kom txais kev hlub tshua. Amas muab siab rau ntseeg Khetos thaum nws ua hauj lwm pab lwm cov hnov txoj kev xyiv fab ntawd. Tej kev rau siab ua hauj lwm no ua rau Amas muaj kev xyiv fab heev, txawm nws raug kev sim siab thiab tej teeb meem txhua yam. Nej pom tias, “Tus Tswv nyiam thaum peb rau siab ntso,” thiab kev rau siab ntso tsom ntsoov rau Nws yuav ua rau peb txais tau koob hmoov. Tej kev sim siab uas nyuaj heev ntawd mas “txoj kev xyiv fab los ntawm Khetos [yuav] kov yeej tej kev txom nyem ntawd.”

Ib pab tib neeg hauv Phau Ntawv Maumoos uas tsom ntsoov rau Yexus Khetos thiab Nws txoj moo zoo thiab nrhiav tau kev xyiv fab yog cov neeg uas tau tsim lub zos Helas—ib qhov chaw uas lawv tu tau lawv cov me nyuam loj hlob thiab ua li lawv txoj kev ntseeg tau. Cov tib neeg uas ncaj ncees no tau los ua qhev los ntawm ib pab uas txwv tsis pub lawv ua li txoj cai ntawm txhua tus neeg kom ua raws li lawv txoj kev teev ntuj. Tej lub sij hawm tej yam phem raug tib neeg zoo:

“Txawm li ntawd los, tus Tswv pom tias tsim nyog qhuab ntuas nws cov neeg; muaj tseeb tiag, nws sim lawv kev ua siab ntev thiab lawv txoj kev ntseeg.

“Txawm li ntawd los—tus uas tso siab rau tus Tswv, tus Tswv yuav muab tus ntawd tsa sawv thaum txog hnub kawg. Muaj tseeb tiag, thiab tau muaj li no rau cov neeg no. Muaj tseeb tiag, thiab yuav muaj li rau cov neeg no.”

Cov tib neeg no ua li cas nyiaj tau lawv tej kev sim siab thiab kev txom nyem? Lawv tsom ntsoov rau Khetos thiab Nws txoj moo zoo. Lawv tej kev txom nyem tsis yog lub ntsiab ntawm lawv lub neej; tiam sis, lawv txhua tus tig mus rau Vajtswv vim lawv xav txog lawv tus kheej li lawv yog Vajtswv tus me nyuam, cov me nyuam ntawm kev khi lus, thiab Yexus Khetos cov thwj tim. Thaum lawv nco qab tias lawv yog leej twg thiab tau thov Vajtswv, lawv tau txais kev kaj siab lug, kev muaj zog, thiab taum kawg kev xyiv fab los ntawm Khetos:

“Amas thiab nws cov neeg tau … thov [Vajtswv] kawg siab kawg ntsws; thiab tus Tswv lawv tus Vajtswv twb paub txog tej kev xav ntawm lawv lub siab.

“Thiab tau muaj tias tus Tswv lub suab tau los rau lawv thaum lawv raug txom nyem, hais tias: Cia li tsa nej lub taub hau thiab cia li zoo siab, vim kuv paub txog kev khi lus uas nej tau khi rau kuv; thiab kuv yuav khi lus nrog kuv cov neeg thiab coj lawv dim ntawm kev ua qhev.”

Tus Tswv tau teb lawv tej lus thov thiab “ua rau tej nra uas nyob saum [lawv] xub pwg kom sib. … Muaj tseeb tiag, tus Tswv tau txhawb lawv lub dag lub zog es lawv thiaj ris tau lawv tej nra hnyav yam yooj yim, thiab lawv thiaj zoo siab hlo thiab ua siab ntev ywj rau tus Tswv lub siab nyiam tag nrho.” Cia li saib hais tias cov Neeg Ntseeg no cia Yexus Khetos txoj kev xyiv fab ua rau lawv txoj kev txom nyem thiab kev sim siab ploj mus! Ces, thaum kawg, Nws qhia ib txoj kev rau Amas mus kom lawv thiaj dim tau, thiab Amas—Vajtswv ib tug yaj saub—coj lawv mus rau kev nyab xeeb.

Thaum peb tsom ntsoov rau Khetos thiab ua raws li Nws tus yaj saub, peb yuav mus cuag Khetos thiab txoj kev xyiv fab los ntawm Nws txoj moo zoo. Thawj Tswj Hwm Nelson tau qhia: “Kev xyiv fab muaj hwj chim heev, thiab qhov uas peb tsom ntsoov rau kev xyiv fab, ua rau peb muaj Vajtswv lub hwj chim nyob hauv peb lub neej. Yexus Khetos yog tus uas coj yam ntxwv rau peb, ‘thaum luag muab nws ntsia rau saum ntoo khaub lig, nws zoo siab nyiaj tej kev txom nyem ntawd’ [Henplais 12:2].”

Tsis ntev tas los kuv niam tau tso lub ntiaj teb no tseg; ua rau kuv xav tsis thoob. Kuv hlub kuv niam thiab kuv tsis xav tias nws yuav tso peb tseg thaum tseem hluas. Tiam sis los ntawm nws txoj kev tso lub ntiaj teb no tseg, kuv tsev neeg thiab kuv tau txais kev tu siab thiab kev xyiv fab. Kuv paub vim los ntawm Khetos, kuv niam tsis tau tuag—nws muaj txoj sia nyob! Thiab kuv paub tias vim muaj Yexus Khetos thiab cov yawm sij uas tus Yaj Saub Joseph Smith tau muab txum tim rov qab los hauv lub Koom Txoos no, kuv yuav rov qab mus nrog nws nyob. Yexus Khetos txoj kev xyiv fab ua rau kuv txoj kev tu siab tias kuv niam tau xiam lawm ploj mus! Kuv tseem kawm tias “xav txog tej yam xilethi-aus!” thiab “cia Vajtswv yeej hauv peb lub neej” yuav tsum tsom ntsoov rau kev xyiv fab uas los ntawm Khetos.

Nws muaj lub siab hlub caw hais tias “Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.” Los ntawm Yexus Khetos lub npe, amees.