Ua Neej Raws Li Nej tej Meej Mom

Tsis ntev tas los no, kuv tus txiv, Greg, tau txais xov xwm hais tias nws muaj ib tug mob uas yuav raug phais loj heev thiab yuav tau tso tshuaj chemotherapy mus ntau hli. Zoo ib yam li nej cov uas tau raug tej yam zoo li no lawm thiab, peb cia li pib thov Vajtswv kom tau kev pab saum ntuj ceeb tsheej thiab kom muaj Vajtswv lub hwj chim los pab. Hnub Sunday tom qab Greg raug phais tas lawm, lawv nqa lub cim nco txog los rau hauv chav wb nyob hauv lub tsev kho mob.

Lub sij hawm no, yog kuv ib leeg noj lub cim nco txog xwb. Ib daim mov mog. Ib khob dej. Nyob hauv lub tsev koom txoos, kuv tau xav txog txoj kev muab lub cim nco txog - kev npaj, kev foom koob hmoov, thiab kev nqa los. Tab sis hnub ntawd, kuv tau xav txog lub txiaj ntsim ntawm Vajtswv lub hwj chim uas yuav ncav tau los ntawm tej ke kab dawb ceev thiab tej kev khi lub cog tseg uas kuv khi thaum kuv noj daim mov mog thiab haus khob dej. Nov yog lub sij hawm uas kuv xav tau hwj chim saum ntuj ceeb tsheej los. Thaum muaj ntau yam kev mob siab, kev sab lim, thiab kev tsis paub tseeb, kuv xav txog lub txiaj ntsim no uas yuav qhib kev rau Vajtswv lub hwj chim uas kuv xav tau heev li. Kev noj lub cim nco txog yuav ua rau kuv muaj tus Tswv tus Ntuj Plig, ua rau kuv ncav tau lub txiaj ntsim ntawm Vajtswv lub hwj chim, xws li kev txhawb pab ntawm cov tim tswv thiab tus Cawm Seej txoj kev txhawb nqa kom kuv muaj zog kov yeej lub ntiaj teb.

Yav tas los kuv yeej tsis tau paub tseeb npaum tam sim no, uas kuv paub meej hais tias tsis yog cov coj ua ntawm tej kab ke thiaj tseem ceeb xwb, tej yam uas muaj nyob hauv cov kab ke thiab tej kev khi lus los kuj tseem ceeb thiab. Tej kab ke pov thawj hwj thiab kev khi lus cog tseg yuav ua rau Vajtswv ntxuav kom peb dawb huv thiab pab peb ua tau tej zam zoo hauv peb lub neej. Tab sis yuav ua li cas thiaj muaj tau li no?

Qhov ib, kom muaj tej kab ke uas pom tau Vajtswv lub hwj chim tshwm sim los, ces yuav tsum yog ua los ntawm txoj cai ntawm Vajtswv Leej Tub. Txoj kev muaj cai los ntawm Vajtswv tseem ceeb heev. Leej Txiv tso siab rau Yexus Khetos thiab tso tej yawm sij thiab txoj cai rau Yexus kom Nws saib xyuas txoj kev muab tej kab ke pov thawj hwj. Los ntawm Yexus txoj kev saib xyuas, ntawm Nws lub pov thawj hwj, Vajtswv tsa nws cov tub los sawv cev rau Leej Tub.

Qhov ob, tsis yog peb khi lus cog tseg xwb, peb yuav tsum ua raws li tej kev khi lus thiab. Muaj ntau txoj kab ke hauv txoj moo zoo, uas peb khi lus dawb ceev nrog Vajtswv; Nws cog lus tias Nws yuav foom koob hmoov rau peb yog tias peb ua raws li peb tej kev khi lus ntawd. Peb puas paub hais tias yuav tsum yog tej kab ke pov thawj nrog rau kev ua raws li tej kev khi lus cog tseg thiaj yuav pab peb ncav tau Vajtswv lub hwj chim?

Hnub ntawd kuv tau xav tias, kuv uas yog Vajtswv ib tug ntxhais ntawm kev khi lus, puas to taub hais tias yuav ua li cas thiaj ncav tau lub txiaj ntsim ntawm Vajtswv lub hwj chim pov thawj hwj tej kab ke thiab kuv yuav ua li cas thiaj paub hais tias Vajtswv lub hwj chim tab tom pab kuv no.

Thaum xyoo 2019 tus yaj saub tau qhia cov poj niam hauv lub Koom Txoos, hais tias yuav tsum ua li cas thiaj li yuav muaj tau tus Cawm Seej lub hwj chim los rau hauv peb lub neej. Thawj Tswj Hwm Russell M. Nelson tau caw kom peb los kawm hauv Lus Qhuab Qhia thiab Kev Khi Lus 25, uas yog ib zaj lus tshwm sim uas tau muab rau Emma Smith hauv Harmony, Pennsylvania. Ua raws li txoj kev caw no kuv lub neej hloov lawm ntau.

Lub hli tas los no kuv tau mus rau hauv Harmony. Nyob hauv cov qab ntoo ntawd, tau muab lub pov thawj hwj txum tim rov qab los rau Joseph Smith thiab Oliver Cowdery. Joseph thiab Emma nkawd lub tsev lub qhov rooj txuas nyob ze ntawm cov ntoo ntawd. Hauv lub tsev ntawd muaj ib lub qhov rais nyob ntawm lub qhov cub sab tid. Kuv sawv ntawm lub qhov rais thiab xav hais tias thaum Emma nyob ntawd nws tau xav txog dab tsi thaum nws sawv ntawd ntsia cov ntoo.

Thaum lub Xya Hli Ntuj 1830, Emma muaj 26 xyoo; nws hluas heev . Nws yuav txiv tau peb xyoos thiab ib nrab xwb. Nws thawj tug me nyuam tub tau tuag lawm. Tus me nyuam tub lub me nyuam ntxa nyob tsis deb ntawm lub tsev. Sawv ntawm lub qhov rai ntawd, ua rau kuv xav tias thaum ntawd nws xav txog dab tsi. Nws yeej xav txog nkawd tej nyiaj txiag, xav txog txoj kev tsim txom hauv nkawd lub neej, thiab xav txog nkawd lub neej yav tom ntej. Tab sis Vajtswv txoj hauj lwm yeej nyob txhua qhov txhia chaw ntawm nws ib ncig. Nws puas tau xav txog tias nws yuav muaj hauj lwm dab tsi hauv Vajtswv txoj hau kev, nws lub hom phiaj hauv Vajtswv lub nceeg vaj yog dab tsi, thiab tias Vajtswv puas pom nws txoj kev muaj peev xwm?

Kuv xav tias tej zaum nws yeej xav txog tej no.

Nyob rau sab tid, yog qhov chaw uas Vajtswv lub pov thawj hwj txoj cai thiab tej yawm sij tau muab txum tim rov qab los rau lub ntiaj teb. Nov yog lub sij hawm uas Emma xav tau hwj chim saum ntuj ceeb tsheej los. Thaum muaj ntau yam kev mob siab, kev sab lim, thiab kev tsis paub tseeb, kuv xav hais tias Emma yuav xav txog lub txiaj ntsim ntawm Vajtswv lub pov thawj hwj uas yuav qhib kev rau Vajtswv lub hwj chim uas nws xav tau heev.

Tab sis Emma tsis cia sawv ntsug ntawm lub qhov rais es xav txog xwb.

Thaum tus Yaj Saub Joseph tseem tab tom kawm txog tej yawm sij, tej luag hauj lwm, tej kab ke, thiab kev pab ua hauj lwm ntawm lub pov thawj hwj, ces tus Tswv txawm muab kev tshwm sim rau Nws tus yaj saub los hais rau Emma. Txoj kev tshwm sim no tsis yog hais rau tus thawj tswj hwm hauv Koom Haum Niam Tsev Emma hauv Nauvoo—tab sis yog hais rau tus Emma uas muaj 26 xyoo nyob hauv Harmony. Dhau los ntawm txoj kev tshwm sim no, Emma yuav paub txog txoj kev ntxuav dawb huv thiab kev khi lus uas yuav pab nws ncav tau tej kab ke pov thawj hwj uas yuav pab nws hauv nws lub neej.

Qhov ib, tus Tswv qhia Emma txog nws txoj hauj lwm hauv tus Tswv txoj hau kev, qhia tias Emma yog leej twg thiab hais tias nws yog ib tug ntxhais hauv tus Tswv lub nceeg vaj. Hais kom nws taug txoj “kev tsim txiaj,” uas yog ib txoj kev yuav qhib qhov rooj rau Vajtswv lub hwj chim yog hais tias Emma ua raws li nws tej kev khi lus.

Qhov ob, thaum lub sij hawm uas nws muaj kev tu siab loj heev, tus Tswv muab kev cia siab rau nws. Tsis yog tias Emma nyob ntawm ib sab ntsia txoj kev Txum Tim Rov Qab Los xwb; nws yog ib tug tseem ceeb pab ua txoj hauj lwm no. Nws yuav yog ib tug uas raug tsa los “piav tej vaj lug kub, thiab ntuas cov ntseeg.” Nws lub sij hawm yuav yog los “sau ntawv, thiab [los] kawm ntau yam.” Emma yuav tau txoj hauj lwm dawb ceev uas los pab npaj cov Neeg Ntseeg los teev tiam; cov nkauj uas lawv hu rau tus Tswv yuav zoo li cov lus thov Vajtswv thiab “tus Tswv yuav teb nrog ib txoj koob hmoov los rau saum lawv taub hau”.

Qhov kawg, tus Tswv qhia txog txoj kev ntxuav dawb huv uas yuav npaj Emma los rau txoj kev tsa nto. Thiab tus Tswv piav rau nws hais tias, “Yog koj tsis ua li no, ces koj yuav los tsis tau ntawm qhov chaw uas kuv nyob.”

Yog peb ua tib zoo nyeem tshooj 25, peb yuav pom tias muaj ib qho tseem ceeb heev ntawm kev loj hlob zuj zus tuaj. Emma yog ib tug ntxhais hauv lub nceeg vaj ces yuav los ua ib tug “poj niam tau xaiv tseg” ces mam los ua ib tug niam vaj ntxwv. Lub pov thawj hwj Aloos thiab Mekhixedes nrog rau nws tej kev ua raws li tej kev khi lus cog tseg yuav pab nws muaj tus Ntsuj Plig thiab cov tim tswv nrog nws, kom thiaj pab coj nws txoj hau kev. Dhau los ntawm Vajtswv lub hwj chim, Nws yuav kho Emma txoj kev tu siab, yuav pab kom nws ua tau ntau yam, thiab yuav pab nws hloov los ua ib tug neeg uas Vajtswv pom tias nws yeej muaj peev xwm ua tau. Dhau los ntawm tej kab ke ntawm lub Pov Thawj Hwj Mekhixedes ces yuav pom “lub hwj chim ua li Vajtswv” rau hauv nws lub neej thiab tus Tswv yuav qhib daim ntaub thaiv kom nws thiaj li txais tau kev to taub ntawm tus Tswv. Thaum muaj Vajtswv lub hwj chim hauv peb lub neej ces yuav zoo li no tiag.

Thawj Tswj Hwm Russell M. Nelson tau qhia hais tias:

Txhua yam uas tshwm sim hauv [Harmony] twb muaj nqis rau nej lub neej. Kev muab lub pov thawj hwj txum tim rov qab los, nrog rau tus Tswv tej lus qhia Emma, yeej yuav pab thiab foom koob hmoov rau nej txhua leej txhua tus. …

“… Yog nej xav tau Vajtswv lub hwj chim hauv nej lub neej nej yuav tsum ua tej yam uas tus Tswv tau qhia kom Emma ua thiab kom [peb] txhua tus ua.”

Muaj tej yam tseem ceeb rau ntawm ob sab qhov rai nyob hauv Harmony, muaj kev tshwm sim los rau tus poj niam tau xaiv tseg uas tus Tswv tau hu—txoj kev tshwm sim uas ntxiv dag zog, pab txawb nqa, thiab qhia rau Emma Smith, uas yog Vajtswv tus ntxhais.

Thaum tis npe thiab foom koob hmoov rau wb tus ntxhais xeeb ntxwv Isabelle, nws txiv foom koob hmoov rau nws kom nws to taub txog lub pov thawj hwj; kom thaum nws loj hlob tuaj nws yuav paub txog qhov koob hmoov ntawm lub pov thawj hwj hauv nws lub neej; thiab kom nws txoj kev ntseeg lub pov thawj hwj loj hlob tuaj thaum nws txoj kev to taub loj tuaj lawm.

Tsis tshua muaj ntau zaj koob hmoov rau ib tug me nyuam ntxhais me me ua hais kom nws to taub lub pov thawj hwj thiab kawm txog tej kab ke thiab kev khi lus cog tseg uas yuav pab nws ncav tau Vajtswv lub hwj chim. Tab sis kuv nco txog Emma thiab kuv xav rau kuv tus kheej hais tias, Ua cas tsis muaj? Tus me nyuam ntxhais me me no yeej muaj peev xwm los ua tau ib tug poj niam tau xaiv tseg hauv Vajtswv lub nceeg vaj thiab yuav rais los mus ua tau ib tug niam vaj ntxwv. Dhau los ntawm Vajtswv lub pov thawj hwj thiab kev ua raws li tus me nyuam ntxhais no tej kev khi lus cog tseg, Vajtswv lub hwj chim yuav pab nws kov yeej tej yam hauv nws lub neej thiab pab nws rais los ua tau ib tug poj niam uas Vajtswv paub hais tias nws muaj peev xwm ua tau. Nov yog ib qho uas kuv xav kom txhua tus ntxhais hauv lub nceeg vaj to taub.

“Ua neej raws li nej tej meej mom.”

Kawm kom paub hais tias lub pov thawj hwj tej kab ke thiab kev khi lus cog tseg yuav pab nej ncav tau Vajtswv lub hwj chim hauv nej lub neej li cas, yuav pab nej ua neej zoo li cas kom nej thiaj li ncav tau nej lub phom phiaj thiab kev muaj peev xwm.

Ua tib zoo kawm thiab xav txog tej kab ke ntawm lub pov thawj hwj Aloos thiab Mekhixedes, tej kev khi lus uas peb cog tseg, thiab Vajtswv lub hwj chim uas peb yuav ncav tau los ntawm tej no.

Nco ntsoov hais tias tsis yog cov coj ua ntawm tej kab ke thiaj tseem ceeb xwb, tej yam uas tej kab ke thiab tej kev khi lus yuav muab tau rau peb kuj tseem ceeb thiab.

Kev noj mov mog thiab haus dej txhua lub lim tiam ua rau nej nco ntsoov Nws lub hwj chim uas yuav pab nej kov yeej lub ntiaj teb. Kev hnav cev tsoos tsho ntawm lub pov thawj hwj txhua hnub ua rau nej nco ntsoov lub txiaj ntsim ntawm Nws lub hwj chim uas yuav pab nej hloov los ua neeg zoo li Nws.

Peb txhua tus yeej ncav tau lub txiaj ntsim ntawm Vajtswv lub hwj chim.

Txhua lub sij hawm thaum peb noj lub cim nco txog.

Txhua lub sij peb thaum peb mus hauv lub tuam tsev.

Nov yog ib qhov zoo heev ntawm Hnub Caiv rau kuv. Vim yog li no kuv thiaj li saib kuv daim ntawv tso cai nkag tuam tsev muaj nqis.

“Yog li ntawd, los ntawm tej kab ke ntawd, thiaj pom lub hwj chim ua li Vajtswv tshwm sim.”

Kuv hais lus tim khawv txog lub txiaj ntsim no los ntawm tus Tswv Yexus Khetos lub npe, amees.