Khi rau Yexus Khetos: Los Ua cov Ntsev uas Las Neeg Ntiaj Teb

Tus Cawm Seej tau qhia tias thaum tus Tswv “hu [peb] los rau [Nws] txoj moo zoo uas kav ib txhis, thiab khi lus nrog ib txoj kev khi lus uas kav ib txhis, yuav muab [peb] suav yam li cov ntsev ntawm lub ntiaj teb.” Cov ntsev yog los ntawm ob qhov keeb uas muab txuas ua ke. Peb ua tsis tau cov ntsev ntawm peb tus kheej xwb; yog tias peb xav hloov los ua cov ntsev uas las neeg ntiaj teb, peb yuav tsum nrog tus Tswv khi ua ke, thiab qhov ntawd yog qhov kuv pom thaum kuv ntsib cov mej zeej hauv lub Koom Txoos nyob thoob plaws lub ntiaj teb—kuv pom cov mej zeej ncaj ncees tau nrog tus Tswv khi ua ke, lawv tau cog lus tias lawv yuav pab lwm tus thiab los ua cov ntsev uas las neeg ntiaj teb.

Nej txoj kev mob siab yog ib tug yam ntxwv ci ntsa iab. Peb ua nej tsaug rau nej tes hauj lwm.

Peb cov tub hluas ntxhais hluas tau ua siab loj heev thiab mob siab. Lawv zoo siab txais tau txoj hauj lwm nrhiav tsev neeg zaj keeb kwm, thiab lawv txoj kev mus rau lub tuam tsev ntau zaus yog ib qho pov thawj rau lawv txoj kev mob siab. Lawv txaus siab siv sij hawm thiab siv zog mus ua tub txib thiab ntxhais txib thoob plaws ntiaj teb qhia txog lawv txoj kev ntseeg uas kav ntev. Lawv tsis lam ua xwb xwb tiam sis lawv coj txoj kev los ua cov thwj tim uas tau khi nrog Yexus Khetos. Lawv txoj kev pab ua rau neeg pom kev tshav ntuj thiab muaj kev cia siab, thiab lawv pab tau neeg coob. Hais rau nej, cov tub hluas thiab ntxhais hluas ntawm lub Koom Txoos, peb ua nej tsaug rau nej txoj kev pab. Nej tsis yog lub Koom Txoos rau yav tom ntej xwb tab sis kuj yog tam sim no. Thiab nej yog cov ntsev uas las neeg ntiaj teb tiag!

Kuv hlub tus Tswv Yexus Khetos thiab kuv zoo siab tau muaj lub cib fim ua hauj lwm nrog nej hauv tus Tswv lub Koom Txoos. Peb txoj kev koom siab thiab peb lub zog, uas los ntawm peb txoj kev ntseeg ib yam, pab peb paub tias peb tsis nyob peb ib leeg hauv lub neej no. Nyob ua ke, peb muaj peev xwm tsa tau Vajtswv lub nceeg vaj ntxiv, nrog kev pab, kev hlub, thiab kev ntseeg uas tsis poob siab.

Thaum Yexus Khetos qhia nyob rau ntawm ntug dej hiav txwv Kalilais, Nws siv tej yam uas cov neeg tuaj saib paub txog kom qhia tej yam tseeb ntawm sab ntsuj plig uas tseem ceeb. Ib qho yog ntsev. Yexus tshaj tawm, “[Nej] yog cov ntsev uas las neeg ntiaj teb,” ib zaj lus uas muaj ntsiab lus thiab tseem ceeb, qhov tseem ceeb tshaj yog rau cov neeg ntawm Nws lub caij nyoog uas nkag siab tias ntsev muaj nqi npaum li cas.

Txoj hauj lwm sau ntsev nyob Algarve, uas yog thaj tsam yav qab teb ntawm kuv lub teb chaws Portugal, yog ib txoj hauj lwm uas pib ntau txhiab xyoo tas los mus txog lub sij hawm uas Teb Chaws Loos kav. Xav tsis thoob uas cov neeg ua hauj lwm sau ntsev, hu ua marnotos, tseem siv tej txheej txheem li qub. Cov neeg ua hauj lwm siv tej txheej txheem raws li kab lis kev cai, lawv ua hauj lwm siv lawv txhais tes xwb, thiaj li txhawb nqa ib qho keeb kwm uas tau kav ntau pua xyoo.

Tus txheej txheem qub no sau khoom hu ua “cov paj ntawm cov ntsev.” Kom paub zoo txog tus txheej txheem sau cov paj ntawm cov ntsev, yuav tsum to taub qhov chaw uas ua tus txheej txheem ntawd. Algarve tej thaj av uas muaj muaj dej ntawm ntug dej hiav txwv yog ib qho chaw zoo heev kom tsim taus ntsev. Dej los ntawm dej hiav txwv mus rau hauv cov pas dej ntiav ntiav, hu ua lub yias ntsev, ces lub hnub ziab tshav ntuj kub kub kom cov dej yaj mus. Thaum cov dej yaj, cov paj los sis ntsiab ntawm cov ntsev tsim ib cov iav ci ci saum yias ntsev. Cov iav ci ci ntshiab heev thiab muaj qhov ruaj uas txawv heev. Cov marnotos siv tej cuab yeej maj mam tshem cov ntsiab ntsev uas ntab saum cov dej, yog ib txoj hauj lwm uas yuav tsum siv txuj ci kom ua ncaj heev. Nyob teb chaws Portugal, cov ntsiab ntsev zoo zoo no hu ua “ntsev rog mis nyuj” rau qhov luag muab tshem los zoo li tshem cov rog qab zib uas ntab saum cov mis nyuj. Neeg yeej nyiam cov ntsev no rau qhov nws dawb huv thiab qab heev, ua ib qho khoom muaj nqi thaum ua noj ua haus.

Ib yam li cov marnotos siv zog sau cov ntsev uas zoo tshaj plaws, yog li ntawd peb cov uas yog tus Tswv cov neeg khi lus kuj yuav tsum ua zoo npaum li peb ua tau kom peb txoj kev hlub thiab peb tus yam ntxwv qhia txog peb tus Cawm Seej, Yexus Khetos.

Nyob rau hauv lub ntiaj teb thaum ub, ntsev tsis yog siv los ua zaub mov saj zoo xwb—yog ib yam uas khaws cia thiab yog ib lub cim ntawm kev dawb huv thiab kev khi lus. Neeg paub tias ntsev yog ib qho tseem ceeb kom txuag zaub mov cia thiab ua kom zaub mov qab ntsev dua. Lawv kuj to taub tias yuav ua li cas yog ntsev tsuag lawm, yog tias muaj dab tsi xyaw, thiaj tsis huv.

Ib yam li cov ntsev hloov taus kom tsuag, peb lub zog ntawm sab ntsuj plig kuj ploj zuj zus yog tias peb txoj kev ntseeg Yexus Khetos yog ib yam peb lam ua. Tej zaum saib sab nraud peb zoo ib yam, tiam sis yog tsis muaj kev ntseeg ruaj khov sab haud, peb tsis muaj peev xwm ua kom pab neeg ntiaj teb thiab txhawb nqa cov neeg nyob ib puag ncig peb kom ua zoo.

Yog li ntawd peb yuav ua li cas siv peb lub zog thiab ua hauj lwm kom pab neeg ntiaj teb thiab pab neeg ntiaj teb hloov hauv peb lub caij nyoog? Peb yuav ua li cas kom ua cov thwj tim zoo mus ntxiv thiab coj yam ntxwv zoo?

Kuv tseem hnov peb tus yaj saub cov lus hauv kuv lub siab: “Vajtswv xav kom peb ua hauj lwm ua ke thiab ib leeg pab ib leeg. Yog vim li ntawd Nws thiaj li txib peb rau hauv lub ntiaj teb koom ib tsev neeg thiab muab peb faib hauv tej pawg ntseeg thiab ceg txheem ntseeg. Yog vim li ntawd Nws thiaj li hais kom peb ua hauj lwm thiab txhawb pab lwm tus. Yog vim li ntawd Nws thiaj li hais kom peb nyob hauv lub ntiaj teb tiam sis tsis txhob ua li neeg ntiaj teb.”

Thaum peb lub neej muaj lub hom phiaj thiab peb pab lwm tus, peb dim tau qhov uas peb sab ntsuj plig qaug zog zuj zus; tiam sis, thaum peb lub neej tsis muaj ib lub hom phiaj, peb tsis pab lwm tus, thiab tsis siv sij hawm xav ntsoov, ces peb tsuas muaj siab xav txog peb tus kheej xwb, peb thiaj li tsis muaj peev xwm las neeg ntiaj teb. Txoj kev daws qhov no yog kev pab lwm tus tas mus li—mob siab ua tej yam zoo thiab kho peb tus kheej thiab ua kom cov pej xeem zoo dua.

Kuv cov kwv tij thiab coj muam, yog ib txoj koob hmoov uas peb los koom Yexus Khetos lub Koom Txoos thiab muaj lub cib fim pab hauv Nws lub Koom Txoos. Peb tej xwm txheej sib txawv, tiam sis peb txhua tus muaj peev xwm pab tau.

Nco ntsoov txog cov marnotos, cov neeg ua hauj lwm sau cov ntsev; lawv siv cov cuab yeej yooj yim kom nrhiav cov iav ci ci zoo tshaj, cov ntsev zoo tshaj! Peb kuj ua tau tej yam yooj yim, nrog kev siv zog ua tej yam me me uas muaj nqis, kom peb txoj kev ua thwj tim thiab kev cog lus rau Yexus Khetos muaj zog zuj zus. Muaj plaub yam uas yooj yim tiam sis tseem ceeb uas peb ua tau kom hloov los ua cov ntsev uas las neeg ntiaj teb:

1. Tsom ntsoov rau tus Tswv lub tsev thaum peb pe hawm Nws. Tam sim no vim muaj cov tuam tsev nyob ze dua, yog peb tsom ntsoov rau kev pe hawm hauv tus Tswv lub tsev ces peb yuav txawj tsom ntsoov rau qhov tseem ceeb tshaj plaws thiab tsom ntsoov rau Yexus Khetos hauv peb lub neej. Nyob hauv lub tuam tsev, peb nrhiav tau lub hauv paus ntawm peb txoj kev ntseeg Yexus Khetos thiab lub ntsiab ntawm peb txoj kev mob siab rau Nws.

2. Ua tib zoo pab ntxiv dag zog rau lwm tus los ntawm kev ua neej raws li txoj moo zoo ua ke. Peb muaj peev xwm ntxiv dag zog rau peb tsev neeg los ntawm peb txoj kev siv zog ua raws li txoj moo zoo tej ntsiab cai rau hauv peb lub neej thiab rau peb lub tsev.

3. Txaus siab txais ib txoj kev hu thiab pab ua hauj lwm hauv lub Koom Txoos. Txoj kev pab hauv peb pawg ntseeg ua rau peb ib leeg txhawb nqa ib leeg thiab kawm ua ke. Txawm tias kev pab lwm tus tsis yooj yim los, yeej muaj nqis.

4. Thiab thaum kawg, muaj ib lub hom phiaj thaum siv tej cuab yeej sib tham saum huab cua. Hnub no, tej cuab yeej kom pab peb sib tham saum huab cua qhib ib txoj kev rau peb uas tsis muaj thaum yav tas los. Ib yam li nej, kuv siv tej cuab yeej no kom sib txuas lus nrog cov kwv tij thiab cov muam hauv lub Koom Txoos thiab nrog kuv tsev neeg thiab cov phooj ywg. Thaum kuv koom tes nrog lawv, kuv xav tias kuv nrog lawv sib raug zoo ntxiv; peb ib leeg txhawb pab tau ib leeg txwm yog peb tsis nyob tsis taus ntawm lub cev. Tej cuab yeej no yog ib txoj koob hmoov, tiam sis tej no kuj ua rau peb tsis txawj sib raug zoo nrog lwm tus thiab ua rau peb nkim peb lub sij hawm. Siv zog los ua cov ntsev uas las neeg ntiaj teb tsis yog nkim sij hawm saib vidi-aus hauv peb lub xov tooj.

Thaum peb tsom ntsoov rau tus Tswv lub tsev hauv peb lub neej, txhob txwm txhawb nqa lwm tus thaum peb ua raws li txoj moo zoo, txais kev hu kom pab lwm tus, thiab muaj lub hom phiaj siv tej cuab yeej saum huab cua, peb yuav tiv thaiv peb sab ntsuj plig lub zog. Ib yam li cov ntsev dawb huv las thiab txuag tau zaub mov, peb txoj kev ntseeg Yexus Khetos yuav txais kev pov hwm thiab kev txhawb nqa los ntawm peb txoj kev rau siab hlub thiab pab lwm tus ib yam li Yexus Khetos.

Thaum peb koom nrog tus Tswv, peb lub neej yuav muaj Nws txoj kev kaj, thiab peb yuav hloov los ua cov ntsev uas las neeg ntiaj teb. Thaum peb ua li no, peb yuav txhawb peb lub neej thiab yuav ntxiv dag zog rau peb tsev neeg thiab peb tej zej zog. Cia peb khaws cia peb txoj kev khi nrog tus Tswv muaj zog, yeej tsis tsuag lawm, thiab ua ib co iav ntsev ci ci uas tus Tswv xav kom peb ua. Los ntawm Yexus Khetos lub npe, amees.