Cov Tub Hluas Ntxhais Hluas uas Muaj Cai Txais Vaj Ntxwv lub Meej Mom
Ntawm tag nrho cov neeg hauv lub ntiaj teb no, Vajtswv tso siab rau nej, cov me nyuam khi lus, kom pab ua Nws txoj hauj lwm coj tag nrho Nws cov me nyuam rov qab los cuag Nws.
Txwj Laug Stevenson, nov yog ib lub rooj sab laj uas peb yeej yuav nco ntsoov.
Peb tsev neeg yeej nyiam ib phau ntawv hu ua Cov Me Nyuam Sau Ntawv rau Vajtswv. Nov yog ob peb zaj nyob haud:
“Nyob zoo Vajtswv, ua cas koj ho cia tib neeg tuag thiab yuav tsum tsim neeg tshiab, vim li cas koj tsis ceev cov uas koj muaj tam sim no cia xwb?”
“Vim li cas koj muaj kaum txoj kev cai, tiam sis peb lub tsev kawm ntawv muaj ib txhiab txoj kev cai?”
“Koj ua li cas ho muab ob lub qog tso tom qa yog tias yuav muab tshem xwb?”
Hnub no tsis muaj sij hawm teb tag nrho tej lus nug no, tiam sis muaj lwm lo lus nug uas kuv pheej hnov cov tub hluas ntxhais hluas nug uas kuv xav teb. Txij ntawm Ulaanbaatar, Mongolia, mus txog Thomas, Idaho, pheej nug ib yam tias: “Vim li cas? Vim li cas peb Haiv Neeg Ntseeg hauv Hnub Nyoog Kawg yuav tsum ua neej txawv lwm tus?”
Kuv paub tias yeej nyuaj ua txawv lwm tus—qhov tseem ceeb yog thaum nej tseem hluas thiab xav kom tib neeg nyiam nej. Txhua leej txhua tus xav sib haum, thiab nyob saum huab cua uas muaj kev sib tham social media thiab kev thuam lwm tus, ntshe txoj kev xav li no loj zuj zus thiaj tsis zoo.
Yog li ntawd, yog muaj kev yuam li no, vim li cas Haiv Neeg Ntseeg hauv Hnub Nyoog Kawg ua neej txawv lwm tus tiag? Muaj ntau lo lus teb uas zoo: Vim nej yog Vajtswv cov me nyuam. Vim twb tseg nej cia kom nyob tau hauv hnub nyoog kawg. Vim nej yog Yexus Khetos cov thwj tim.
Tiam sis tej lus teb no tsis ua rau nej tshwj xeeb. Txhua leej txhua tus yog Vajtswv tus me nyuam. Txhua tus hauv lub ntiaj teb no los Vajtswv twb xa los kom nyob hauv hnub nyoog kawg. Tiam sis lwm tus tsis ua raws li Txoj Lus Txawj Ntse los sis txoj kev cai coj dawb huv ib yam li nej. Muaj coob tug neeg uas coj raws li Yexus Khetos uas tsis yog mej zeej hauv lub Koom Txoos no. Tiam sis lawv tsis mus ua tub txib thiab ua cov kab ke hauv tus Tswv lub tsev kom sawv cev rau cov poj koob yawm txwv zoo li nej. Yeej yuav tsum muaj ntau ntxiv, thiab yeej yog li ntawd.
Hnub no kuv xav tsom ntsoov rau ib yam uas muaj nqis heev hauv kuv lub neej. Nyob rau xyoo 1988 ib tug Thwj Tim hluas hu ua Russell M. Nelson tau hais lus nyob ntawm Brigham Young University hais ib zaj hu ua “Ua Vajtswv Tsaug rau Kev Khi Lus.” Nyob hauv zaj no, Txwj Laug Nelson piav tias thaum peb siv peb txoj kev ywj siab xaiv kev ncaj ncees kom ua raws li peb tej kev khi lus nrog Vajtswv, ces peb hloov los ua cov uas txais tau txoj kev khi lus uas kav ib txhis uas Vajtswv tau khi nrog peb cov poj koob yawm txwv thaum ub hauv txhua lub caij nyoog tso cai. Los yog hais tias, peb los ua “cov me nyuam ntawm kev khi lus.” Qhov ntawd ua rau peb tsis zoo li lwm tus. Qhov ntawd ua rau peb muaj cai txais tau cov koob hmoov uas peb cov poj koob yawm txwv tau txais, tsis hais txoj cai txais peb qub txeeg qub teg.
Txoj cai txais qub txeeg qub teg! Tej zaum nej twb hnov lo lus ntawd. Peb kuj hu nkauj txog qhov no: “Cov tub hluas ntxhais hluas uas muaj cai txais vaj ntxwv lub meej mom!” Yog ib lo lus tseem ceeb. Tiam sis lo lus no txhais li cas?
Nyob hauv Phau Qub, yog tus txiv tsev xiam, tus tub uas muaj cai ua tus hlob lav ris txoj kev tu nws niam thiab cov muam. Nws cov kwv yuav txais lawv qub txeeg qub teg thiab tawm mus kom seb yuav ua neej li cas, tiam sis tus uas muaj cai ua tus hlob yuav tsis mus qhov twg. Nws yuav ib tug poj niam thiab nws muaj nws tsev neeg, tiam sis nws yuav nyob kom mus txog thaum nws tas sim neej thiab nws yuav saib xyuas nws txiv vaj tsev. Vim nws muaj kev lav ris no, ces yuav muab qub txeeg qub teg ntau dua li nws cov kwv. Qhov uas nws yuav tsum coj thiab tu lwm tus puas nyuaj dhau? Tsis yog thaum yus xav txog qhov uas nws yuav txais qub txeeg qub teg loj dua.
Hnub no peb tsis hais txog qhov uas nej yog tus me nyuam thib ib los thib ob hauv nej tsev neeg los sis tsis hais txog qhov uas poj niam thiab txiv neej muaj lub luag hauj lwm dab tsi hauv Phau Qub. Hnub no peb hais txog qhov uas nej txais qub txeeg qub teg dab tsi thaum nej koom nrog Yexus Khetos vim nej tau nrog Nws thiab nej Leej Txiv Saum Ntuj Ceeb Tsheej khi lus. Puas tsim nyog uas Vajtswv xav tias koj yuav ua neej txawv Nws lwm tus me nyuam kom nej thiaj li coj tau lawv thiab pab tau lawv? Yeej tsim nyog ua li ntawd thaum nej xav txog cov koob hmoov—ntawm sab cev nqaij daim tawv thiab sab ntsuj plig—uas nej tau lawm.
Qhov uas nej muaj cai txais qub txeeg qub teg puas qhia tias nej zoo dua li lwm tus? Tsis yog, tiam sis qhov no txhais tias Vajtswv xav kom nej pab lwm tus ua neeg zoo dua. Qhov uas nej muaj cai txais qub txeeg qub teg puas txhais tias twb xaiv nej lawm? Yog mas, tiam sis tsis tau xaiv kom nej kav lwm tus; twb xaiv nej kom pab lawv. Qhov uas nej muaj cai txais nej qub txeeg qub teg puas qhia tias Vajtswv hlub nej? Yog mas, tiam sis qhov tseem ceeb, qhov no qhia tias Nws tso siab rau nej.
Qhov uas Vajtswv hlub nej thiab qhov uas Nws tso siab rau nej los yeej tsis zoo ib yam. Nyob hauv phau Ntxiv Dag Zog rau cov Tub Hluas Ntxhais Hluas, peb nyeem hais tias: “Nej Leej Txiv Saum Ntuj Ceeb Tsheej tso siab rau nej. Nws tau muab cov koob hmoov zoo kawg rau nej, tsis hais txoj moo zoo thiab cov kab ke thiab tej kev khi lus uas khi nej rau Nws thiab ua rau nej muaj Nws lub hwj chim hauv nej lub neej. Cov koob hmoov no muaj tej kev lav ris ntxiv. Nws paub tias nej muaj peev xwm pab neeg ntiaj teb, nej thiaj li yuav tsum ua tej yam uas neeg ntiaj teb tsis ua.”
Peb lub neej hauv lub ntiaj teb no los piv tau rau ib lub nkoj uas Vajtswv tau xa tag nrho Nws cov me nyuam nyob haud thaum lawv hla dej hiav txwv. Yeej muaj tej lub cib fim kom kawm, vam meej, zoo siab, thiab ua zoo zuj zus, tiam sis kuj muaj tej xwm txheej txaus ntshai thiab. Vajtswv hlub tag nrho Nws cov me nyuam thiab txhawj txog lawv. Nws tsis xav xiam lawv ib tug hlo li, yog li ntawd Nws caw cov uas txaus siab los ua mej zeej hauv Nws pawg ua hauj lwm—yog nej ntag. Vim nej tau xaiv ua raws li nej tej kev khi lus, ces Nws tso siab rau nej. Nws tso siab rau nej ua neeg txawv, thiab cov neeg uas Nws muab tshwj tsegvim txoj hauj lwm uas Nws tso siab rau nej ua yeej tseem ceeb heev.
Cia li xav txog qhov no! Ntawm tag nrho cov neeg hauv lub ntiaj teb no, Vajtswv tso siab rau nej, cov me nyuam khi lus—cov hauv Nws pawg ua hauj lwm—kom pab ua Nws txoj hauj lwm coj tag nrho Nws cov me nyuam rov qab los cuag Nws. Ua rau kuv paub vim li cas Thawj Tswj Hwm Brigham Young hais tias, “Tag nrho cov tim tswv saum ntuj ceeb tsheej saib ntsoov pawg neeg me me no.”
Thaum nej saib tib neeg hauv lub nkoj loj uas yog lub ntiaj teb no, tej zaum nej yuav pom tib neeg uas zaum thiab haus cawv, twv txiaj, hnav ris tsho uas tsis npog lub cev, saib lub xov tooj tas li, thiab nkim sij hawm ua si xwb. Tiam sis tsis tas xav hais tias, “Vim li cas kuv ua tsis tau qhov ntawd?,” nej yuav tsum nco ntsoov tias nej tsis zoo li lwm tus. Nej yog ib tug uas ua hauj lwm pab neeg. Nej muaj tej kev lav ris uas cov neeg uas caij xwb tsis muaj. Ib yam li Muam Ardeth Kapp hais tias, “Ua tsis tau ib tug saib neeg ua luam dej yog koj zoo ib yam li lwm tus nyob ntawm ntug dej.”
Thiab ua ntej nej poob siab vim nej lav ris ua ntau yam, thov nco ntsoov tias cov hauv pawg ua hauj lwm txais ib yam uas cov uas caij xwb tsis muaj: nqi zog. Txwj Laug Neil L. Andersen hais tias, “Muaj ib lub hwj chim ntawm sab ntsuj plig ntau ntxiv rau cov neeg ncaj ncees,” tsis hais “kev nplij siab, kev pom zoo, thiab kev ua siab loj ntxiv.” Ib yam Anplaham puag thaum ub, nej txais kev zoo siab thiab kev kaj siab lug ntxiv, kev ncaj ncees ntxiv, thiab kev txawj ntse ntxiv. Nej nqi zog tsis yog ib lub tsev saum ntuj ceeb tsheej thiab tej kev uas yog kub ua. Yeej yooj yim rau Leej Txiv Saum Ntuj Ceeb Tsheej muab tag nrho txhua yam uas Nws muaj rau nej. Nws xav pab nej hloov los ua neeg zoo li Nws. Yog li ntawd, nej tau cog lus ua ntau yam ntxiv vim nej yuav tsum ua tej ntawd Vajtswv thiaj li pab tau nej hloov siab.
“Yog ib txoj kev lav ris hnyav heev, tiam sis nej tsis zoo li lwm tus”! Nej yog cov tub hluas ntxhais hluas uas muaj cai txais vaj ntxwv lub meej mom. Qhov uas nej tau khi lus nrog Vajtswv thiab Yexus Khetos yeej yog qhov uas nej ib leeg tso siab rau ib leeg nej thiaj li muaj Nkawd txoj kev tshav ntuj ntxiv—Nkawd txoj kev pab, Nkawd lub zog, thiab lub hwj chim. Lub hwj chim ntawd tsis yog kev lam xav, yog khoom uas muaj hmoov, los sis kev twv seb yav tom ntej yuav zoo li cas. Lub hwj chim ntawd los muaj tiag tiag.
Thaum nej ua raws li nej lav ris, nej yeej tsis nyob nej ib leeg. Tus Tswv ntawm lub vaj txiv hmab nrog nej ua hauj lwm ua ke. Nej nrog Yexus Khetos koom ua hauj lwm. Thaum nej khi lus tshiab—thiab thaum nej haj yam nrog Nws sib raug zoo—nej ib leeg tuav rawv ib leeg mus txog thaum nej koom ua ke ruaj khov. Los ntawm lub cim dawb ceev txog Nws txoj kev tshav ntuj, nej yuav muaj kev xav thiab lub zog ua raws nraim li tus Cawm Seej ua neej—uas txawv ntawm neeg ntiaj teb. Nej yeej ua taus vim Yexus Khetos txhawb nqa nej!
Nyob hauv 2 Nifais 2:6 peb nyeem hais tias, “Yog li ntawd, txoj kev txhiv dim los ntawm tus Mexiyas uas Dawb Huv; vim nws muaj kev tshav ntuj thiab kev tseeb nplua mias.” Vim Nws muaj tseeb tag nrho, Nws pom nej raws li nej yog tiag tiag—pom tej kev qaug zog, tej yam yus ua yuam kev, tej yam yus khuv xim, thiab txhua yam. Vim Nws muaj kev tshav ntuj, Nws pom nej qhov uas nej ua taus neeg zoo li cas. Nws ntsib nej nyob ntawm qhov chaw nej nyob tam sim no thiab pab nej hloov siab lees txim, kov yeej teeb meem, thiab hloov los ua neeg zoo.
“Cov tub hluas ntxhais hluas uas muaj cai txais vaj ntxwv lub meej mom!” Kuv ua tim khawv tias Vajtswv hlub nej—thiab tso siab rau nej—hnub no, 20 xyoo tom ntej, thiab mus ib txhis li. Tsis txhob muab nej lub meej mom muag kom tau ib co kua taum xwb. Tsis txhob muab txhua yam pauv kom tsis tau dab tsi. Tsis txhob cia lub ntiaj teb hloov nej vim nej twb yug los kom muab lub ntiaj teb no hloov. Los ntawm Yexus Khetos lub npe, amees.