Cov Vaj Lug Kub Dawb Huv—lub Hauv Paus ntawm Kev Ntseeg
Peb tsis pom qab hais tias qhov uas cov vaj lug kub tseem ceeb npaum li cas rau lawv txoj kev hloov siab los ntseeg thiab txoj kev rau siab ntseg ua raws li txoj moo zoo.
Kuv tus poj niam, Mary, thiab kuv wb pom ib lub tsho uas muaj daim duab txog ib phau ntawv thiab ib nqe lus uas hais tias: “Phau Ntawv: Thawj lub Tshuab Nqa ntawm Tes.”
Kuv xav txog nqe lus tseem ceeb no thiab qhov uas txhua tus siv tej lub tshuab nqa ntawm tes txhua hom. Thaum kuv xav txog ntxiv, kuv to taub tias ib lub tshuab twg tsis hais ib lub uas muaj artificial intelligence los yeej yuav tsis tseem ceeb npaum li tej lus uas los ntawm tej kev tshwm sim rau peb sab ntsuj plig.
Txawm yog nyob hauv ib phau ntawv los sis hauv lub tshuab nqa ntawm tes, Phau Vaj Lug Kub Npaivnpaum thiab Phau Ntawv Maumoos: Ib zaj Tim Khawv Ntxiv txog Yexus Khetos muab tej lus qhia rau peb sab ntsuj plig uas los ntawm Yexus Khetos, tus Cawm Seej ntawm lub ntiaj teb. Peb saib ob phau no muaj nqis vim ob phau no hais txog Vajtswv tej lus qhia rau cov yaj saub thiab cov neeg thaum ub thiab muaj tej lus uas pab peb paub ua neej nyob li cas.
Nrog rau cov yaj saub uas muaj niaj hnub no tej lus qhia, cov vaj lug kub dawb huv no muab cov lus qhuab qhia kom pab peb ua neej hauv lub ntiaj teb no. Cov vaj lug kub no muaj hwj chim kawg nkaus li vim muaj tej lus qhia, tej lus ntuas, thiab kev nplij siab rau tib neeg thiab tsev neeg uas xav tau tus Tswv tej kev qhia.
Cov vaj lug kub, nrog rau tus Vaj Ntsuj Plig Dawb Huv tej kev tshoov siab, yeej yog lub hauv paus tseem ceeb tshaj uas txhawb nqa kev hloov siab los ntseeg ntawm cov uas muaj lub siab mob thiab lub siab xav ua zoo thiab xav coj raws li Yexus Khetos. Cov vaj lug kub pab txhim tsa ib lub hauv paus uas muaj zog txaus tiv taus tus yeeb ncuab tej kev tawm tsam kom txoj kev ntseeg ploj mus.
Cov neeg hloov siab los ntseeg tshiab yeej yog koob hmoov thiab txoj kev txhawb nqa rau lub Koom Txoos txij thaum chiv keeb los. Ib tug yam ntxwv yeej muaj nqis rau kuv. Thaum kuv yog ib tug npisov hluas, ob tug ntxhais txib mus qhia William Edward Mussman thiab nws tsev neeg. Tus txiv tsev, yog ib tug thawj kws lij choj zoo rau ib lub koom haum loj heev. Nws tus poj niam, Janet, yeej pab nkawd tsev neeg ua neej raws li Yexus Khetos.
Nkawd tus tub thiab tus ntxhais, uas muaj 20 tawm xyoo, kuj kawm thiab. Lawv plaub leeg tau kawm tej zaj lus qhia lawm thiab mus koom lub koom txoos txhua lub lim tiam. Ob tug ntxhais txib twb hais kom lawv nyeem Phau Ntawv Maumoos thiab thov Vajtswv kom txais lus tim khawv txog phau vaj lug kub dawb huv ntawd. Xav tsis thoob uas tsev neeg no twb siv sij hawm luv kom nyeem Phau Ntawv Maumoos tag lawm.
Cov ntxhais txib hauv ceg txheem ntseeg, ob tug uas dhau los yog pawg ntseeg lub Koom Haum Niam Tsev tus thawj tswj hwm, tau koom nrog tsev neeg no mus rau kev sib ntsib txais lub cim nco txog.
Thaum txog sij hawm uas tsev neeg no yuav ua kev cai raus dej, lawv tau txais cov ntawv uas tawm tsam lub Koom Txoos. Yog ib lub sij hawm ua ntej muaj internet, tiam sis cov ntawv ntawd twb puv ib lub thawv loj.
Ob tug ntxhais txib caw kuv, uas yog ib tug npisov tshiab uas muaj 34 xyoos xwb, los pab teb tsev neeg no tej lus nug. Thaum peb koom ua ke, lub thawv loj uas puv cov ntawv tawm tsam lub Koom Txoos nyob nruab nram ntawm chav nyob. Kuv twb thov Vajtswv txog txoj kev txib no. Thaum peb thov Vajtswv qhib, tus Ntsuj Plig ntxhi lus rau kuv tias, “Nws paub tias Phau Ntawv Maumoos muaj tseeb.” Qhov no yeej tseem ceeb. Ob tug ntxhais txib ntseeg tias nws tsev neeg muaj ib zaj lus tim khawv lawm. Tiam sis nkawd tsis paub tseeb txog tus txiv tsev.
Tam sim ntawd kuv qhia nws tias tus Ntsuj Plig tau tshoov kuv lub siab tias nws muaj ib zaj lus tim khawv lawm. “Puas yog li ntawd?” Nws ntsia ntsoov kuv thiab hais tias tus Ntsuj Plig tau qhia nws tias Phau Ntawv Maumoos thiab lub Koom Txoos muaj tseeb tiag.
Ces kuv nug nws seb puas tsim nyog nyeem cov ntawv ntawd, yog tias tus ntsuj plig twb qhia nws lawm.
Tus txiv tsev teb tias tsis tas ua li ntawd. Tsev neeg ntawd twb pom zoo rau nws tej lus teb.
Nws hais tias nws muaj ib lo lus nug tseem ceeb: Muaj ib yam uas ua rau lawv txais tau cov ntawv uas tawm tsam lub Koom Txoos npaum li ntawd; lawv yog mej zeej hauv lwm lub koom txoos. Tsis tas li ntawd, nws twb cog lus tias yuav them nyiaj ntau rau lawv ua ib lub tsev teev ntuj tshiab rau lub koom txoos ntawd. Nws tau qhia kuv tias ob tug ntxhais txib tau qhia nws txog kev cai them ib feem kaum, es nws txaus siab ua raws li txoj kev cai ntawd, tiam sis nws xav paub seb puas ua txhaum yog nws tseem ua raws li nws tau cog lus lawm. Kuv qhia nws tias kev them nyiaj raws li nws tau cog lus los yeej yog qhov ncaj thiab tsim nyog.
Tsev neeg Mussman nrog nkawd tus tub, tus nyab, thiab tus ntxhais.
Tsev neeg tag nrho ntawd twb ua kev cai raus dej. Ib xyoos tom qab ntawd lawv tsev neeg ua kev cai sib khi ua ke nyob hauv lub Tuam Tsev California Oakland. Kuv zoo siab muaj cib fim nrog lawv nyob thaum ntawd. Tus tub tau kawm ntawv lij choj, xeem ntawv California Bar Exam, thiab tom qab ntawd mus ua tub txib rau Nyijpooj Teb. Ib xyoos dhau ib xyoos kuv saib tsev neeg no thaum txhua tiam neeg rau siab ntseeg txoj moo zoo tsis tseg li. Kuv zoo siab kuv muaj cib fim ua tus coj muab ib tug ntxhais xeeb ntxwv ua kev cai sib khi.
Tej kev hloov siab los ntseeg uas muaj niaj hnub no los yeej zoo kawg thiab. Lub Rau Hli Ntuj tas los Coach Andy Reid, tus thawj coj pawg football Kansas City Chiefs, thiab kuv, nrog rau lwm tus twb sawv cev rau peb txoj kev ntseeg thiab lwm txoj kev teev ntuj, twb hais nyob hauv ib txoj kev sib ntsib rau cov neeg ntawm ntau yam kev teev ntuj hauv lub koom txoos Riverside Church nyob hauv New York City. Coach Reid hais txog kev zam txim cia tib neeg sim ib zaug ntxiv thiab kev ua raws li tej lub cib fim uas yog lub ntsiab ntawm Yexus Khetos txoj moo zoo Tag kis, nrog wb ob tug poj niam, Tammy Reid thiab Mary, peb tau koom kev sib ntsib txais lub cim nco txog nyob hauv pawg ntseeg Manhattan Second Ward. Peb twb hnov tus Ntsuj Plig. Muaj neeg hloov siab los ntseeg tshiab coob hauv pawg ntseeg ntawd. Tsib tug mej zeej uas nyuam qhuav ua kev cai raus dej, plaub tug txiv neej thiab ib tug tub hluas, tau koom nrog cov uas tuav lub Pov Thawj Hwj Aloos ua ke muab lub cim nco txog rau cov mej zeej. Kuv zoo siab qhia nej tias muaj cov mej zeej tshiab li no nyob thoob plaws lub Koom Txoos.
Peb zoo siab ua Vajtswv tsaug rau qhov muaj coob tug ntxiv uas teb lwm tus tej lus caw, hloov lawv lub neej, thiab lees txais lub cib fim kom coj raws li Yexus Khetos. Lawv pib taug txoj kev ua raws li lawv tej kev khi lus los ntawm kev ntseeg, kev hloov siab lees txim, kev cai raus dej, thiab kev cai pom zoo raws li qhia nyob hauv Phau Vaj Lug Kub Npaivnpaum thiab Phau Ntawv Maumoos.
Peb tsis pom qab hais tias qhov uas cov vaj lug kub tseem ceeb npaum li cas rau lawv txoj kev hloov siab los ntseeg thiab txoj kev rau siab ntseg ua raws li txoj moo zoo. Cov yaj saub hauv Phau Ntawv Maumoos tau paub txog Yexus Khetos ntiag tug hauj lwm thiab tau qhia txog Nws txoj moo zoo. Phau Ntawv Maumoos pab peb nyob ze Vajtswv thaum peb kawm, to taub, thiab ua raws li tej lus qhia ntawd. Tus Yaj Saub Joseph Smith hais tias “Tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv.”
Yog peb xav paub tias Phau Ntawv Maumoos yog Vajtswv txoj lus, peb yuav tsum nyeem, xav txog, thiab thov kom paub txog phau no ces ua raws li tej lub ntsiab cai uas nyob haud. Tus yaj saub Maulaunais tau cog lus tias Vajtswv yuav qhia tias phau no muaj tseeb thaum peb mob siab, xav paub tiag, thiab muaj kev ntseeg Yexus Khetos thov Vajtswv. Peb yuav tsum kawm Phau Ntawv Maumoos yog tias yuav hloov siab los ntseeg kav ntev mus.
Thaum peb xav txog qhov uas Phau Vaj Lug Kub Npaivnpaum thiab Phau Ntawv Maumoos yog tej cuab yeej nqa ntawm tes, tej zaum ua rau yus xav txog ib lo lus nug. Ob phau yuav zoo siv thiab sib phim npaum li cas yog tias tus Tswv hais tias yuav muab ob phau no koom ua ke kom ua ib phau hauv nej txhais tes? Tus Tswv twb hais li no txog “Yudas tus pas,” uas yog Phau Vaj Lug Kub Npaivnpaum, thiab “Yauxej tus pas,” los yog Phau Ntawv Maumoos.
Phau Ntawv Maumoos qhia cov lus qhuab qhia tseem ceeb ntau uas txhawb nqa cov lus hauv Phau Vaj Lug Kub Npaivnpaum. Cov lus qhuab qhia txog Yexus Khetos txoj Kev Theej Txhoj yog ib qho piv txwv txog qhov no.
Phau Vaj Lug Kub Npaivnpaum hais ncaj txog Yexus Khetos txoj hauj lwm qhuab qhia hauv lub ntiaj teb, tsis hais Nws txoj kev tuag thiab txoj Kev Sawv Rov Los. Phau Ntawv Maumoos hais ncaj qha ntxiv txog Yexus Khetos txoj Kev Theej Txhoj, uas cov yaj saub piav meej txog ua ntej Nws tau tuag.
Zaj lus piav txog Amas tshooj 42 qhia tias Yexus Khetos txoj Kev Theej Txhoj tseem ceeb rau cov lus qhuab qhia npaum li cas.
Zaj lus no hais tias: “Lub neej uas txawj ploj tuag yog ib lub caij sim siab kom tib neeg muaj peev xwm hloov siab lees txim thiab teev tiam Vajtswv—Txoj Kev Poob coj tau kev tuag ntawm sab cev nqaij daim tawv thiab sab ntsuj plig los rau tag nrho noob neej—Kev txhiv dim yuav los ntawm kev hloov siab lees txim—Vajtswv tus kheej theej neeg ntiaj teb tej kev txhaum—Kev hlub tshua yog rau cov uas hloov siab lees txim—Tag nrho lwm cov uas tsis hloov siab lees txim yuav raug Vajtswv txoj kev txim lij—Txoj kev hlub tshua los vim yog txoj Kev Theej Txhoj—Tsuas yog cov uas hloov siab lees txim tiag xwb thiaj li yuav txais kev cawm dim.”
Thawj Tswj Hwm Russell M. Nelson tau hais tias, “Thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub.” Nws kuj cog lus hais tias yog “nej rau rau siab nyeem Phau Ntawv Maumoos nej yuav tiv thaiv nej tus kheej tawm ntawm tej kev phem uas muaj niaj hnub nim no.”
Ib yam li kuv tau hais, kuv txais kev tshoov siab txog lub ntsiab ntawm thawj lub tshuab uas nqa ntawm tes—ib phau ntawv. Tiam sis, kuv paub tias qhov internet tseem ceeb npaum li cas hauv lub ntiaj teb hnub no. Ib yam lub tshuab nqa ntawm tes muaj xov xwm ntau npaum li ib lub tsev qiv ntawv muaj dhau los. Peb zoo siab ua neej nyob hauv ib lub caij zoo li no. Kuv yeej zoo siab uas peb muaj cov ntawv dawb ceev thiab lub Koom Txoos cov ntaub ntawv saum huab cua. Qhov internet yog ib lub cuab yeej uas muaj hwj chim kom pab yus kawm txoj moo zoo. Hnub no, neeg coob xa tej nqe vaj lug kub rau cov phooj ywg li no. Ua piv txwv, qhov app Phau Ntawv Maumoos yog ib txoj kev zoo kawg kom qhia cov phooj ywg txog Phau Ntawv Maumoos raws li tej kev uas tsis txawv thiab yooj yim txawm nej nyob qhov twg los xij.
Txawm yog internet muaj cov koob hmoov ntau, tu siab uas ib yam li cov ntawv uas cem lub Koom Txoos raws kuv hais txog los, twb siv Internet kom tib neeg ua xyem xyav thiab tawm tsam kev ntseeg txoj moo zoo tej lub ntsiab cai uas muaj nqi. Yog ib feem ntawm “tej kev phem uas muaj niaj hnub nim no” li Thawj Tswj Hwm Nelson hais.
Tus yeeb ncuab thiab cov uas pab nws, txawm yog lawv paub los sis tsis paub, twb tsim tej yam hauv internet uas zoo ib yam li lub thawv puv cov ntawv uas tawm tsam lub Koom Txoos raws li kuv piav txog, uas muaj lub hom phiaj kom rub nej mus deb ntawm Vajtswv txoj lus tseeb.
Tej teeb meem uas lawv hais txog kom tib neeg ua xyem xyav los ib xyoos dhau ib xyoos yeej tsis sib txawv. Qhov no muaj tseeb thaum yus muab peb hnub nyoog piv rau hnub nyoog 1960, thaum kuv muaj 20 tawm xyoo.
Cov vaj lug kub qhia kom peb txiav txim zoo thiab muaj laj lim tswv yim ua txhua yam. Qhov internet los siv tau ua tej yam zoo los sis ua tej yam kom raug puas tsuaj.
Cov mej zeej uas twb koom ntev lawm thiab cov tshiab uas kawm txog txoj moo zoo yuav tsum ua tib zoo paub tias lawv nyeem dab tsi. Tsis txhob nyeem cov ntawv uas tsis coj dawb huv, tsis hais tseeb, los sis tsis ncaj ncees. Yog nej ua li ntawd, ntshe yuav coj nej mus taug ib txoj kev uas ua rau nej txoj kev ntseeg puas tsuaj thiab tav nej txoj kev xav vam meej mus ib txhis li. Muaj tej yam uas yuav ua zoo rau nej los sis ua phem rau nej. Cia li nrhiav kev ncaj ncees thiab tsis txhob nkag mus hauv tej qhov tsaus ntuj thiab saib tej yam tas li tas li. Nyob hauv nej lub neej cia li khaws tej lub tswv yim ncaj ncees thiab zoo; muaj kev zoo siab; muaj kev lom zem tiam sis tsis txhob ua tej yam ruam. Yeej sib txawv. Nqe kev ntseeg thib 13 yog ib nqe zoo uas qhia tau peb paub ua li cas. Qhov tseem ceeb tshaj, nyeem Phau Ntawv Maumoos tas li, kom tus Ntsuj Plig los hauv nej lub neej thiab pab nej paub qhov tseeb thiab qhov cuav.
Kuv xav hais rau cov neeg uas twb tawm txoj kev ua raws li lawv tej kev khi lus kom lawv rov qab los nyeem cov vaj lug kub dawb huv, ua raws li cov yaj saub qhia, teev ntuj hauv tsev, thiab mloog cov nkauj txog kev ntseeg. Tus Tswv saib txhua tus muaj nqi. Peb xav tau nej! Tus Tswv xav tau nej, thiab nej xav tau Nws! Peb yeej yuav zoo siab tos txais nej. Ntau xyoo uas kuv tau ua hauj lwm hauv lub Koom Txoos kuv zoo siab rau cov neeg uas twb rov qab los ua raws li lawv tej kev khi lus ces lawv pab thiab foom koob hmoov rau txhua tus uas lawv hlub thiab txhua tus uas lawv ntsib.
Cov vaj lug kub dawb huv thiab cov yaj saub yog ib txoj kev tseem ceeb uas Leej Txiv Saum Ntuj Ceeb Tsheej muab Nws txoj hau kev zoo siab rau tag nrho Nws cov me nyuam.
Kuv ua tim khawv tseeb txog qhov uas Yexus Khetos yog los ntawm Vajtswv los thiab Nws txoj Kev Theej Txhoj, los ntawm Yexus Khetos lub npe, amees.