Nrhiav Lus Teb rau tej Lus Nug ntawm Sab Ntsuj Plig
Peb cov lus nug uas xav paub tiag tiag txog txoj moo zoo pub cib fim rau Leej Txiv Saum Ntuj Ceeb Tsheej thiab Yexus Khetos pab peb loj hlob tuaj.
Kuv paub tias tej zaum qhov no yog qhov xav tsis thoob, tiam sis kuv nco thaum peb kawm tim tsev kawm ntawv tias muaj cuaj lub ntiaj teb planet uas ncig peb lub hnub nyob hauv qab ntuj khwb. Ib tug ntxhais hluas uas muaj kaum ib xyoo, Venetia Barney, uas nyob Oxford, England muab ib lub ntiaj teb hu ua, Pluto, tom qab nrhiav tau nyob rau xyoo 1930. Mus txog rau xyoo 1992, peb xav tias Pluto yog qhov nyob deb tshaj plaws ncig peb lub hnub hauv lub qab ntuj khwb no. Thaum lub sij hawm ntawd, ib yam uas yus niaj hnub pom thaum me nyuam nyob hauv chav kawm ntawv los kawm txuj ci yog muab ntawv siv los puab tej lub ntiaj teb ua qauv rau cov ntiaj teb ncig lub hnub, es txhua zaus mas muaj Pluto nyob nrug deb kawg nkaus. Ntau tus neeg kawm txuj ci science twb ntseeg tias tsis muaj dab tsi nyob dhau qhov chaw no.
Tiam sis, cov neeg kawm txuj ci science tshuav ib lo lus nug txog lub hauv paus ntawm ib hom hnub qub uas ya saum ntuj uas cov kws saib ntuj niaj hnub saib. Lawv muaj lo lus nug no tau ntau xyoo ua ntej nrhiav tau ib qho chaw deb ntxiv ntawm lub qab ntuj khwb uas ncig peb lub hnub. Txawm tias lawv paub ib feem xwb, cov neeg kawm txuj ci science siv tej xyoos ntawd kom tsim tej txuj ci technology ntxiv lawv thiaj li kawm tau ntxiv thiab nrhiav tej yam tshiab. Tej yam uas lawv kawm tshiab no twb ua rau peb xav txawv txog cov ntiaj teb uas ncig peb lub hnub, thiaj paub tias Pluto nyob hauv qhov chaw sab nraud ntawm lub qab ntuj khwb no thiab tsuas muaj yim lub ntiaj teb uas ncig peb lub hnub.
Ib tug neeg kawm txuj ci science uas yog tus tshuaj xyuas rau txoj hauj lwm New Horizons muaj txoj hauj lwm kawm txog Pluto thiab tau hais li no: “Peb tau xav tias peb to taub tej chaw ntawm tej uas ncig peb lub hnub. Tiam sis peb tsis to taub. Peb tau xav tias peb to taub tias muaj pes tsawg lub ntiaj teb ncig peb lub hnub hauv lub qab ntuj khwb no. Tiam sis peb yuam kev lawm.”
Qhov uas tseem ceeb heev rau kuv txog lub sij hawm thaum kawm txog lub qab ntuj khwb no yog tej yam uas zoo ib yam thiab tej yam sib txawv ntawm kev kawm txuj ci science kom to taub ntxiv thiab qhov uas peb, uas yog Vajtswv cov me nyuam, yuav tsum nrhiav tej lus teb rau peb tej lus nug txog tej yam ntawm sab ntsuj plig. Qhov tseem ceeb, peb yuav ua li cas kom to taub txog peb sab ntsuj plig ntxiv thiab npaj peb tus kheej kom loj hlob tuaj—thiab peb yuav txais kev pab nyob qhov twg.
Ib Nqe Lus Ntxiv rau Ib Nqe Lus
Qhov uas peb nug tej yam thiab nrhiav lub ntsiab yog ib feem ntawm peb lub neej nyob hauv lub ntiaj teb no. Tej lub sij hawm, qhov uas peb tsis paub tag nrho yuav ua rau peb mus rau tom ntug ntawm peb txoj kev nkag siab, thiab ntshe tej ciaj ciam no ua rau peb nyuaj siab los sis ntxhov siab heev. Tiam sis, Leej Txiv Saum Ntuj Ceeb Tsheej txoj hau kev zoo siab rau peb yog ib txoj hau kev uas yuav pab peb loj hlob txawm tias muaj tej ciaj ciam thiab pab peb ua taus tej yam uas peb ua tsis tau ib leeg, txawm tias peb tsis paub txhua yam. Vajtswv txoj hau kev muaj kev hlub tshua rau tej ciam ciam ntawm sab cev nqaij daim tawv; muab tus Cawm Seej, Yexus Khetos, los uas tus Tswv Yug Yaj Zoo rau peb; thiab ua rau peb xav siv peb txoj kev ywj siab xaiv Nws.
Txwj Laug Dieter F. Uchtdorf tau qhia tias “muaj lo lus nug tsis yog ib lub cim ntawm kev qaug zog,” tiam sis “pab peb loj hlob.” Thawj Tswj Hwm Russell M. Nelson hais txog peb txoj kev mob siab nrhiav qhov tseeb thiab tau qhia tias peb yuav tsum muaj ib “siab xav tob” thiab “thov nrog lub siab dawb paug [thiab] thov tiag tiag, muaj txoj kev ntseeg [Yexus] Khetos.” Nw kuj qhia tias “‘thov tiag tiag’ txhais tau tias ib tug neeg muaj siab xav tiag kom ua raws li cov lus qhia uas tau txais.”
Peb txoj kev mob siab muaj laj lim tswv yim ntxiv yuav pab peb xav txog peb tej lus nug, txawm tias nyuaj los sis tsis nyuaj los yog, seb tej yam twg ua kom muaj li ntawd, nrhiav thiab pom tej txheej txheem ces tawm tswv yim kom thiaj li to taub thiab kho tej yam uas peb tsis paub. Tiam sis, thaum peb xav txog peb txoj kev kawm txog sab ntsuj plig, tej thaum tej kev xav li no yeej pab, tiam sis yog tsuas ua li ntawd xwb yeej tsis txaus yog peb xav kawm tej yam txog Leej Txiv Saum Ntuj Ceeb Tsheej thiab peb tus Cawm Seej, Yexus Khetos, Nkawd txoj moo zoo, Nkawd lub Koom Txoos, thiab Nkawd txoj hau kev rau peb sawv daws.
Yog peb xav kom Vajtswv Leej Txiv thiab Nws Leej Tub faib Nkawd laj lim tswv yim rau peb ces peb yuav tsum caw tus Vaj Ntsuj Plig Dawb Huv lub hwj chim los qhia peb thaum peb tsom ntsoov rau Yexus Khetos hauv peb lub neej thiab thaum peb rau siab nrhiav nrhiav Nkawd tej lus teb thiab lub ntsiab uas Nkawd qhia txog. Nkawd caw kom peb kawm qhov tseeb los ntawm kev siv sij hawm kawm cov vaj lug kub thiab caw kom peb nrhiav tej lub tseeb ua tau tshwm sim hauv hnub nyoog kawg, los ntawm peb cov yaj saub thiab cov thwj tim. Nkawd caw kom peb siv sij hawm hauv tus Tswv lub tsev thiab txhos caug thov Vajtswv kom “txais xov xwm uas los saum ntuj ceeb tsheej los.” Yexus cov lus cog tseg rau cov uas mloog Nws zaj Lus Qhia Nyob Pem Roob yeej muaj tseeb rau peb niaj hnub no npaum li muaj tseeb thaum Nws ua hauj lwm qhuab qhia hauv lub ntiaj teb: “Cia li thov, thiab yuav muab rau nej; cia li nrhiav, thiab nej yuav ntsib; cia li khob, thiab yuav qhib rau nej.” Peb tus Cawm Seej qhia tias “nej Leej Txiv tus uas nyob saum ntuj ceeb tsheej haj yam yuav muab tej yam uas zoo ntau dua rau cov uas thov nws.”
Tus Tswv txoj kev qhia yog “ib nqe lus ntxiv rau ib nqe lus, ib ntsiab cai ntxiv rau ib ntsiab cai.” Tej zaum peb yuav tsum “cia siab tos ntsoov tus Tswv” raws li peb paub tam sim no ua ntej txog lub sij hawm uas peb yuav txais tej yam tshiab. Lub sij hawm dawb hu no yog ib lub sij hawm uas pab peb loj hlob ntawm sab ntsuj plig—lub sij hawm uas peb “ua siab ntev nyiaj” rau peb txoj kev mob siab nrhiav thiab txuas ntxiv peb lub zog kom ua raws li tej kev cog lus dawb huv uas peb tau cog rau Vajtswv los los ntawm peb tej kev khi lus.
Qhov uas peb tau nrog Leej Txiv Saum Ntuj Ceeb Tsheej thiab Yexus Khetos khi lus qhia tias peb yog cov pej xeem hauv Vajtswv lub nceeg vaj. Thiab peb yuav tsum ua neej raws li tej ntsiab cai dawb huv thiab siv zog loj hlob ntawm sab ntsuj plig kom muaj cai nyob haud.
Mloog Lus
Phau Ntawv Maumoos qhia txog ib lub ntsiab cai hais tias thaum Vajtswv cov me nyuam txiav txim siab mloog lus thiab ua raws li lawv tej kev khi lus, ces lawv txais kev pab ntawm sab ntsuj plig. Tus Tswv tau qhia peb tias los ntawm peb txoj kev mloog lus thiab txoj kev mob siab ua kom zoo ces peb yuav kawm ntxiv thiab txais kev txawj ntse thiab laj lim tswv yim. Vajtswv tej kev cai thiab tej lus txib tsis yog tsim los ua kom peb lub neej nyuaj tiam sis yog ib txoj kev rau peb txais kev tshwm sim rau peb tus kheej thiab kev kawm ntawm sab ntsuj plig. Thawj Tswj Hwm Nelson tau qhia txog txoj hau kev tseem ceeb tias “kev tshwm sim uas los ntawm Vajtswv yeej ib txwm haum Nws txoj kev cai mus ib txhis” thiab yeej “tsis hais txawv ntawm Nws cov lus qhuab qhia.” Qhov uas nej txaus siab ua raws li Vajtswv cov lus txib, txawm yog nej tsis paub tag nrho vim li cas, ua rau nej koom nrog Nws cov yaj saub. Mauxes tshooj 5 qhia peb txog Adas thiab tus Tswv ib tug tim tswv txoj kev sib tham.
Tom qab tus Tswv muab “tej lus txib [rau Adas thiab Evas], hais tias nkawd yuav tsum teev tiam tus Tswv nkawd tus Vajtswv, thiab yuav tsum muab thawj cov me nyuam tsiaj los txi rau tus Tswv,” cov vaj lus kub qhia tias “Adas tau ua raws li tus Tswv tej lus txib.” Peb nyeem tias “ntau hnub tom qab ntawd muaj tus Tswv ib tug tim tswv tshwm sim los rau Adas, hais tias: Vim li cas koj thiaj li ua kev txi rau tus Tswv? Thiab Adas hais rau nws tias: Kuv tsis paub, tus Tswv txib kom kuv ua xwb.”
Adas txoj kev mloog lus los ua ntej nws txoj kev to taub thiab pab kom nws npaj txais kev txawj ntse dawb huv tias nws ua raws li ib lub cim dawb ceev txog Yexus Khetos txoj Kev Theej Txhoj. Ib yam li ntawd, peb txoj kev txo hwj chim mloog lus yuav pab peb to taub ntawm sab ntsuj plig txog Vajtswv tej kev thiab Nws lub hom phiaj rau peb txhua tus. Sim ua kom mloog zoo dua yuav pab peb muab siab npuab peb tus Cawm Seej, Yexus Khetos, ntxiv, rau qhov txoj kev ua raws li Nws tej kev cai thiab lus txib yeej yog txoj kev ncav tes rau Nws.
Tsis tas li ntawd xwb, peb txoj kev ua raws nraim li kev txawj ntse uas peb tau txais los ntawm peb txoj kev rau siab ua raws li txoj moo zoo tej lub ntsiab cai thiab tej kev khi lus dawb ceev yeej tseem ceeb kom npaj peb txais tej lus qhia los ntawm tus Vaj Ntsuj Plig Dawb Huv.
Leej Txiv Saum Ntuj Ceeb Tsheej thiab Yexus Khetos yog lub hauv paus ntawm txhua qhov tseeb thiab Nkawd ua siab dawb faib Nkawd laj lim tswv yim. Tsis tas li ntawd xwb, txoj kev to taub tias peb tsis paub qhov tseeb tsuas yog Vajtswv yog tus uas muab rau peb yuav pab peb paub tias peb yuav tsum thov leej twg thiab tso siab rau leej twg.
Kev Tso Siab Loj Heev
Zaj lus nyob hauv Phau Qub uas piav txog Na-amas, tus thawj tub rog uas tus yaj saub Elisas tau kho nws txoj kev mob ruas, yog ib zaj uas kuv nyiam heev. Zaj dab neeg qhia txog txoj kev ntseeg ntawm ib tug “ntxhais” uas hloov ib tus txiv neej lub neej thiab, rau txhua tus uas ntseeg, qhia txog Vajtswv txoj kev hlub tshua rau cov uas tso siab rau Nws thiab Nws tus yaj saub. Txawm tias tsis muaj npe, tus ntxhais no pab peb to taub ntxiv. Thiab Na-amas txoj kev ntseeg tus ntxhais cov lus tim khawv tau tshoov nws lub siab kom nws mus thov Vajtswv tus tub qhe pab kho nws zoo.
Na-amas cov lus rau tus yaj saub Elisas tej lus qhia kom mus da dej hauv tus Dej Yauladees qhia tias nws tsis ntseeg thiab chim siab. Tiam sis kev caw kom nws mloog tus yaj saub cov lus qhia pab kho nws thiab pab nws paub tias muaj Vajtswv tiag.
Tej lub sij hawm tej yam uas peb nug txog sab ntsuj plig muaj tej lus teb uas meej thiab tsis ua rau peb nyuaj siab hlo li. Los sis, ib yam li Na-amas, tej zaum peb nrhiav tej yam uas nyuaj ntxiv thiab ua rau peb ntxhov siab. Los sis, ib yam li cov neeg kws saib ntuj xav li cas txog tej yam uas ncig peb lub hnub, thaum peb nrhiav qhov tseeb ntawm sab ntsuj plig, tej zaum peb yuav tsis to taub tag nrho yog tias peb tso siab rau peb txoj kev paub xwb, ib qho uas yuav tu siab thiab yuav coj peb mus deb ntawm txoj kev ua raws li peb tej kev khi lus. Thiab ntxiv mus, tej zaum yuav muaj lus nug uas yuav kav ntev mus txog thaum Vajtswv, tus uas “muaj hwj chim tag nrho” thiab “muaj tswv yim tag nrho, thiab muaj kev to taub tag nrho,” tus uas “to taub txhua yam” los ntawm Nws txoj kev hlub tshua, qhia rau peb to taub los ntawm peb txoj kev ntseeg Nws lub npe.
Ib lo lus ceeb toom los ntawm Na-amas zaj dab neeg yog tias txoj kev tsis xav ua raws li Vajtswv tej kev cai thiab tej lus txib yuav ua rau peb siv sij hawm ntev zog kom peb sab ntsuj plig loj hlob. Peb tau koob hmoov vim muaj Yexus Khetos ua peb tus Thawj Kws Kho Mob. Peb txoj kev ua raws li Vajtswv tej kev cai thiab tej lus txib yuav qhib kev rau tus Cawm Seej muab txoj kev to taub thiab kev kho mob uas Nws paub tias peb xav tau, raws li Nws txoj kev npaj kho rau peb.
Txwj Laug Richard G. Scott tau qhia tias “lub neej no yog ib lub cib fim tso siab rau—tso siab rau Yexus Khetos, tso siab rau Nws tej lus qhia, tso siab rau peb txoj kev muaj peev xwm cia tus Vaj Ntsuj Plig Dawb Huv coj peb mus kom ua raws li tej lus qhia ntawd thiaj muaj kev zoo siab tam sim no thiab muaj kev zoo siab ntawm txoj sia nyob mus ib txhis. Kev tso siab txhais tias yuav tsum mloog lus txawm tias tsis paub qhov kawg thaum peb nyob ntawm qhov pib (saib Paj Lug 3:5–7). Kom txi tau txiv hmab txiv ntoo, koj txoj kev tso siab rau tus Tswv yuav tsum muaj hwj chim thiab muaj zog tshaj koj txoj kev ntseeg koj tus kheej thiab koj tej kev xav.”
Txwj Laug Scott hais ntxiv tias: “Kev muab siab rau ntseeg yog kev tso siab rau tus Tswv hais tias Nws paub Nws ua dab tsi rau nej thiab Nws ua taus kom nej tau tej yam zoo mus ib txhis li txawm yog nej tsis to taub Nws yuav ua li cas kom muaj li ntawd.”
Zaj Lus Tim Khawv Kaw
Kuv cov phooj ywg zoo, kuv ua tim khawv tias peb tej lus nug uas xav paub txog txoj moo zoo tiag tiag yuav pub cib fim rau Leej Txiv Saum Ntuj Ceeb Tsheej thiab Yexus Khetos pab peb loj hlob tuaj. Kuv txoj kev siv zog nrhiav lus teb rau kuv tej lus nug ntawm sab ntsuj plig los ntawm tus Tswv—dhau los lawm thiab tam sim no—pab kuv siv lub sij hawm mloog Nws lus thiab ua raws li kev txawj ntse ntawm sab ntsuj plig uas kuv muaj tam sim no ua ntej kuv to taub tej yam uas Vajtswv to taub.
Kuv ua tim khawv tias txoj kev tso siab rau Leej Txiv Saum Ntuj Ceeb Tsheej thiab Nws cov yaj saub, uas Nws tau txib, yuav pab nej loj hlob ntawm sab ntsuj plig thiab pab nej nce mus rau Vajtswv lub ntuj ceeb tsheej. Nej txoj kev pom yuav hloov rau qhov nej yuav hloov. Vajtswv paub tias nej yim siab, nej yim pom tau deb. Peb tus Cawm Seej caw kom nej nce mus siab li ntawd. Los ntawm Yexus Khetos lub npe, amees.