“Nej Yog Kuv cov Phooj Ywg”

Thaum lub Kaum Ob Hlis Ntuj xyoo 1832, thaum “tej kev kub ntxhov nyob hauv cov teb chaws” tab tom “haj yam pom tseeb” tshaj lwm lub sij hawm txij thaum txhim tsa lub Koom Txoos los, Tsoom Haiv Neeg Ntseeg hauv Hnub Nyoog Kawg cov thawj coj hauv Kirtland, Ohio, tau koom ua ke hauv ib lub rooj sab laj. Lawv tau thov Vajtswv “nyias thov nyias thiab thov nrov nrov rau tus Tswv kom qhia nws lub siab nyiam rau [lawv].” Kom teb cov mej zeej uas rau siab ntseeg no tej lus thov thaum muaj kev kub ntxhov loj no, tus Tswv nplij lawv lub siab, thiab tau hais rau Haiv Neeg Ntseeg hauv Hnub Nyoog Kawg peb zaug thaum nws hais tej lus no: “kuv cov phooj ywg.”

Yexus Khetos ib txwm tau hu cov uas rau siab ntseeg coj raws li Nws ua Nws cov phooj ywg. Kaum plaub zaug nyob hauv phau Lus Qhuab Qhia thiab Kev Khi Lus , tus Cawm Seej hais lo lus phooj ywg kom hais txog ib tug uas nrog Nws sib raug zoo. Kuv tsis hais txog lo lus phooj ywg zoo li neeg ntiaj teb xav—tsis yog kev siv social media kom lwm tus “nyiam” xwb. Yeej tsis yog ib qho hashtag los sis tus naj npawb hauv Instagram los sis X.

Thaum kuv yog ib tug tub hluas, kuv nco ntsoov tej lub sij hawm thaum kuv hnov tej lus nyuaj siab no “Ua phooj ywg xwb puas tau?” los sis “Cia wb ua phooj ywg xwb.” Tsis muaj ib nqe vaj lug kub uas Nws hais tias, “Nej yog kuv cov phooj ywg xwb.” Tiam sis, Nws qhia tias “tus uas muaj kev hlub loj tshaj plaws yog tus uas zoo siab tuag theej nws cov phooj ywg.” Thiab “nej yog cov uas kuv Txiv tau muab pub rau kuv; nej yog kuv cov phooj ywg.”

Qhov uas Nws hais yeej meej heev: tus Cawm Seej suav peb txhua tus thiab saib xyuas peb. Qhov no tsis yog ib qho uas Nws lam ua. Tiam sis yog ib qho uas muab peb tsa nto mus ib txhis li. Kuv xav tias tus Cawm Seej tej lus “nej yog kuv cov phooj ywg” yog ib txoj kev hu peb los nrog tag nrho Vajtswv cov me nyuam sib raug zoo yam li ua siab thiab dawb huv ntxiv “kom peb yuav yog ib tug.” Peb ua li no thaum peb koom ua ke nrhiav tej lub cib fim kom koom ib lub siab thiab kom txhua tus sib haum xeeb.

Tus Cawm Seej tau coj yam ntxwv txog qhov no thaum Nws hu peb “los, nrog kuv mus.” Nws tau siv tej txuj ci thiab xeeb ceem ntawm ib co neeg uas sib txawv kom hu Nws cov Thwj Tim. Nws tau hu cov neeg nuv ntse, cov neeg kub siab, ob tug kwv tij uas siab ceev heev, thiab ib tug uas sau se. Lawv txoj kev ntseeg tus Cawm Seej thiab txoj kev xav nyob ze Nws twb ua rau lawv koom ib lub siab. Lawv ntsia ntsoov Nws, pom Vajtswv hauv Nws, thiab “tam sim ntawd … txawm tso plhuav [lawv] lub vas tseg thiab nrog Yexus mus.”

Kuv kuj tau pom tias qhov uas peb txhawb nqa peb tej kev sib raug zoo kom siab thiab dawb huv dua yuav pab peb koom ib lub siab. Kuv tus poj niam, Jennifer, thiab kuv wb tau koob hmoov uas wb tu wb tsib tug me nyuam nyob hauv New York City. Nyob hauv lub nroog loj ntawd, wb tau nrog cov neeg zej zog, cov phooj ywg hauv tsev kawm ntawv, cov neeg ua lag luam, cov thawj coj teev ntuj, thiab Haiv Neeg Ntseeg tsim tej kev sib raug zoo uas dawb ceev.

Thaum lub Tsib Hlis Ntuj xyoo 2020, thaum lub ntiaj teb raug ib phaum mob loj heev, cov mej zeej hauv lub koom haum rau cov thawj coj teev ntuj New York City Commission of Religious Leaders tau maj sib ntsib saum huab cua. Tsis tau muaj ntsiab lus sib tham txog. Tsis muaj cov neeg qhua tshwj xeeb. Tsuas muaj kev xav koom ua ke sib tham txog tej teeb meem uas cov thawj coj teev ntuj raug. Qhov chaw tswj phaum mob Centers for Disease Control twb qhia tias peb lub nroog yog qhov chaw nruab nrab ntawm phaum mob COVID-19 nyob hauv Teb Chaws Amelikas. Thiaj li tsis pub sib sau ua ke. Tsis pub tib neeg koom ua ke.

Rau cov thawj coj teev ntuj no, qhov uas txhawb pab tsis taus, tsis pub pawg ntseeg koom ua ke, thiab tsis muaj kev sib ntsib teev ntuj txhua lub lim tiam yog ib yam nyuaj kawg nkaus. Peb pawg me me—uas muaj cov thawj coj xws li ib tug cardinal, cov xib hwb, cov rabbi, imam, pastor, minister, thiab ib tug txwj laug—peb ib leeg mloog, nplij, thiab txhawb nqa ib leeg. Peb tsis tau sib tham txog tej yam sib txawv, peb tsuas pom tej yam uas peb muaj zoo sib xws. Peb tau hais txog tej yam peb ua taus ces tej yam uas tej zaum yuav muaj. Peb tau sib sau ua ke teb tej lus nug txog kev ntseeg thiab yav tom ntej. Ces peb tau thov Vajtswv. Auj, peb tau thov Vajtswv tiag.

Nyob hauv ib lub nroog uas muaj neeg sib txawv heev vim muaj tej kab lig kev cai ntau, peb pom tej yam sib txawv ntawd ploj mus thaum peb koom ua ke ua ib co phooj ywg uas koom ib lub suab, ib lub hom phiaj, thiab ib zaj lus thov Vajtswv.

Tsis yog peb zaum ntawm lub rooj ib leeg saib ib leeg tiam sis peb koom ua ke saib saum ntuj. Peb koom ib lub siab tawm kev sib ntsib ntawd npaj lawm yuav mus khwv ua hauj lwm. Lub sij hawm peb koom tes ntawd thiab tej kev pab uas peb muab rau txhiab txhiab tus neeg New York twb qhia kuv tias nyob hauv ib lub ntiaj teb uas hais kom tib neeg sib nrug, tsis sib haum, thiab tsis sib raug zoo, yeej muaj ntau yam uas ua rau peb koom ib lub siab ntau tshaj tej yam uas ua rau peb sib nrug. Tus Cawm Seej hais tias, “Cia li ua ib lub siab; thiab yog nej tsis ua ib lub siab ces nej tsis yog kuv li.”

Cov kwv tij thiab cov muam, peb yuav tsum tsis txhob nrhiav tej yam uas ua rau peb sib faib thiab nrhiav cib fim kom “koom ib lub siab.” Nws tau foom koob hmoov rau peb kom muaj tej lub txiaj ntsim thiab tej txuj ci uas pab peb ib leeg kawm ntawm ib leeg thiab vam meej. Kuv yeej ib txwm qhia kuv cov tub ntxhais kawm ntawv tias yog kuv txawj ua tej yam nej ua thiab nej txawj ua tej yam kuv ua, ces peb tsis tas sib pab. Tiam sis vim nej tsis ua tej yam kuv txawj ua thiab kuv tsis ua tej yam nej txawj ua, ces peb yuav tsum sib pab. Thiab qhov uas yuav tsum sib pab ua rau peb koom ua ke. Tus yeeb ncuab txoj hau kev yog kom peb sib nrug thiab ib tug kav ib tug kom tej kev ua phooj ywg, tsev neeg, thiab kev ntseeg raug puas tsuaj. Tus Cawm Seej yog tus uas ua rau neeg koom siab.

Ib yam uas tus Tswv cog lus thaum peb “koom ib lub siab” yog ib txoj kev sib haum xeeb. Txwj Laug Quentin L. Cook qhia tias “lub ntsiab ntawm kev koom siab tiag tiag yog kev koom siab nrog Khetos.”

Thaum kuv nrog kuv tsev neeg mus rau lub teb chaws Ghana hauv Afikas Sab Hnub Poob, kuv nyiam lawv txoj kab lig kev cai. Thaum tuaj txog lub tsev koom txoos los sis ib lub tsev, lawv hais tej lus “zoo siab tos txais nej.” Thaum lawv muab zaub mov rau yus noj, lawv yuav hais li no, “Peb caw nej.” Tej lus no los lawv yeej txhob txwm hais kom muaj ib lub hom phiaj. Zoo siab tos txais nej. Peb caw nej.

Peb muaj tej daim phiaj uas muab dai rau ntawm peb lub tsev sib ntsib lub qhov rooj uas sau tej lus dawb ceev zoo li ntawd. Tiam sis ib daim uas hais tias Zoo Siab Tos Txais cov Qhua yeej tsis txaus. Peb puas zoo siab tos txais txhua tus uas nkag hauv lub qhov rooj. Cov kwv tij thiab cov muam, yeej tsis txaus zaum hauv chav teev ntuj xwb. Peb yuav tsum ua raws li tus Cawm Seej hais kom sib raug zoo yam li siab thiab dawb huv ntxiv nrog tag nrho Vajtswv cov me nyuam. Peb yuav tsum ua neej raws li peb ntseeg! Kuv txiv pheej hais rau kuv tias kev zaum hauv chav teev ntuj thaum Hnub Caiv tsis ua rau yus ua ib tug neeg ntseeg Khetos zoo ib yam li kev pw hauv chaw nres tsheb yeej tsis ua rau yus ua ib lub tsheb.

Peb yuav tsum ua neej kom neeg ntiaj teb tsis pom peb tiam sis pom taus tus Cawm Seej dhau los ntawm peb. Tsis yog yuav ua li no thaum Hnub Caiv xwb. Yuav tsum ua li no hauv tsev muag khoom, chaw sam roj, kev sib ntsib hauv lub tsev kawm ntawv, lub zej zog kev ua si—txhua qhov chaw uas cov mej zeej ua hauj lwm thiab ua neej nyob, tsis hais lawv ua kev cai raus dej los tsis tau ua los yog.

Kuv teev tiam Vajtswv thaum hnub Sunday kom nco qab tias peb ib leeg xav tau ib leeg thiab nyob ua ke peb xav tau Nws. Peb tej txuj ci thiab txiaj ntsim uas ua rau peb txawv lwm tus hauv lub ntiaj teb no kuj ua rau peb koom siab ua ke. Tus Cawm Seej tau hu peb los sib pab thiab kom peb ib leeg txhawb nqa ib leeg. Nws twb ua li no thaum Nws kho tus poj niam uas coj khaub ncaws tsis tu, kho tus mob ruas uas thov kom Nws muaj kev hlub tshua, hais rau tus tub hluas seb nws yuav ua li cas ntxiv, hlub Nikaudemaus uas ntseeg tiam sis tsis ua li nws ntseeg, thiab nrog tus poj niam zaum ntawm lub qhov dej thiab qhia tus poj niam txog Nws ntiag tug hauj lwm uas tus Mexiyas txawm yog tus poj niam tsis ua raws li tib neeg kab lig kev cai ntawm lub caij nyoog ntawd. Nov yog lub koom txoos—ib qho chaw rau peb sib sau ua ke thiab rov qab zoo. Ib yam li Thawj Tswj Hwm Russell M. Nelson qhia: “Lub vas ntawm txoj moo zoo yog lub vas loj tshaj plaws hauv lub ntiaj teb. Vajtswv tau caw peb txhua tus los cuag Nws. … Muaj chaw rau txhua leej txhua tus.”

Tej zaum nej ib txhia twb raug xwm txheej uas ua rau nej xav tias nej tsis haum. Tus Cawm Seej hais zoo ib yam rau nej thiab kuv: “Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.” Yexus Khetos txoj moo zoo yeej yog qhov chaw zoo tshaj plaws rau peb. Thaum peb mus rau lub koom txoos peb txais kev cia siab tias yav tom ntej yuav zoo dua, peb tsis nyob peb tus kheej xwb, thiab muaj ib tsev neeg uas xav tau peb txoj kev pab ib yam li peb xav tau lawv. Txwj Laug D. Todd Christofferson twb qhia tias “qhov uas peb koom ua ke nrog Leej Txiv, Leej Tub, thiab tus Ntsuj Plig Dawb Huv yeej yog kev haum xeeb zoo tshaj plaws.”” Rau nej cov uas twb ncaim mus thiab nrhiav kev rov qab los, kuv xav hais ib yam uas muaj tseeb mus ib txhis thiab caw nej: Nej muaj chaw nyob no. Cia li rov qab los. Twb txog sij hawm lawm.

Nyob hauv ib lub ntiaj teb uas sib cav sib ceg thiab tsis sib haum xeeb, kuv ua tim khawv tias tus Cawm Seej Yexus Khetos yog tus uas ua kom txhua tus koom siab. Kuv xav caw peb txhua tus kom peb tsim nyog ua raws li tus Cawm Seej txoj kev caw peb kom “koom ib lub siab” thiab tshaj tawm zoo li nws hais tias, “Nej yog kuv cov phooj ywg.” Los ntawm Yexus Khetos lub npe dawb ceev, amees.