Nyob hauv Ib Ntus uas Twb Tsis Muaj Ntau Xyoo
Yog peb tsis rau siab ntseeg thiab mloog lus, ces peb yuav muab Vajtswv txoj kev foom kev vam meej rau peb hloov los ua ib txoj kev foom phem ntawm kev muab hlob uas ua rau peb tsis nco qab txog tej lus tseeb.
Kuv cov kwv tij thiab cov muam, hnub no thaum kuv zaum saum sam thiaj no, kuv twb pom lub Tsev rau Rooj Sab Laj no puv tas peb zaug lawm, yog thawj zaug txij thaum pib mob COVID los. Nej yog Yexus Khetos cov thwj tim uas mob siab xav kawm. Kuv qhuas nej vim nej rau siab ntseeg. Thiab kuv hlub nej.
Ezra Taft Benson yog tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txij thaum lub Kaum Ib Hlis Ntuj xyoo 1985 mus txog lub Tsib Hlis Ntuj xyoo 1994. Kuv twb muaj 33 xyoos thaum Thawj Tswj Hwm Benson los ua tus Thawj Tswj Hwm ntawm lub Koom Txoos thiab kuv muaj 42 xyoos thaum nws tas sim neej. Thiab nws tej lus qhia thiab zaj lus tim khawv twb hloov kuv lub siab ntau heev.
Ib yam ntawm Thawj Tswj Hwm Benson txoj hauj lwm qhuab qhia uas tib neeg nco ntsoov yog nws txoj kev tsom ntsoov rau Phau Ntawv Maumoos lub hom phiaj thiab qhov uas phau no tseem ceeb npaum li cas. Nws pheej hais tias “Phau Ntawv Maumoos yog lub plawv zeb ntawm peb txoj kev teev ntuj—yog lub plawv zeb ntawm peb zaj lus tim khawv, lub plawv zeb ntawm peb cov lus qhuab qhia, thiab lub plawv zeb ntawm txoj kev ua tim khawv txog peb tus Tswv thiab tus Cawm Seej.” Nws kuj hais ntau txog tej lus qhia thiab tej lus ceeb toom txog kev txhaum uas yog kev muab hlob raws li zaj lus tim khawv txog Yexus Khetos hauv hnub nyoog kawg no hais txog.
Ib yam uas Thawj Tswj Hwm Benson qhia twb hloov kuv lub siab ntau thiab tseem hloov kuv txoj kev kawm Phau Ntawv Maumoos. Nws hais tias:
“Phau Ntawv Maumoos … yeej yog ib phau rau peb lub caij nyoog. Cov Neeg Nifais yeej tsis tau muaj phau no; cov Neeg Lamas puag thaum ub kuj tsis muaj thiab. Twb sau rau peb. Maumoos twb sau ntawv thaum haiv neeg Nifais yuav tiav tas lawm. Raws li Vajtswv qhia, tus uas pom txhua yam txij thaum chiv keeb los, [Maumoos] tau sau tej ceev xwm txheej kom luv, nws twb xaiv tej zaj dab neeg, tej zaj lus, thiab tej xwm txheej uas yuav pab peb ntau tshaj.
Thawj Tswj Hwm Benson hais ntxiv hais tias: “Txhua tus uas sau Phau Ntawv Maumoos tau ua tim khawv tias nws sau rau cov neeg uas yuav nyob thaum yav tom ntej. … Yog lawv pom peb lub caij nyoog, thiab tau xaiv tej yam uas yuav muaj nqis tshaj rau peb, ces ua cas peb tsis xav ntsoov txog qhov no thaum peb kawm Phau Ntawv Maumoos? Peb yuav tsum nug peb tus kheej tas li hais tias, ‘Vim li cas tus Tswv tau tshoov Maumoos lub siab kom sau [zaj no] nyob hauv nws phau ceev xwm txheej? Kuv yuav kawm dab tsi los ntawm [cov lus qhuab qhia no] kom pab kuv ua neej hauv hnub nyoog kawg no?’”
Thawj Tswj Hwm Benson tej zaj lus pab peb to taub tias Phau Ntawv Maumoos tsis yog ib phau ceev xwm txheej uas qhia txog ib lub caij puag thaum ub xwb. Tiam sis, phau vaj lug kub no hais txog tej yam uas yuav muaj los yav tom ntej thiab tej lub ntsiab cai, tej lus ceeb toom, thiab tej lus qhia tseem ceeb uas hais txog tej xwm txheej thiab tej teeb meem ntawm peb lub caij nyoog. Yog li ntawd, Phau Ntawv Maumoos yog ib phau hais txog lub sij hawm uas peb nyob tam sim no thiab yuav nyob thaum yav tom ntej.
Kuv thov kom tus Vaj Ntsuj Plig Dawb Huv pab kuv thaum peb xav txog tej zaj lus qhia tseem ceeb rau peb los ntawm phau Hilamas nyob hauv Phau Ntawv Maumoos.
Cov Neeg Nifais thiab cov Neeg Lamas
Hilamas thiab nws cov tub cov ceev xwm txheej piav txog ib haiv neeg uas tos txais Yexus Khetos txoj kev yug los. Tsib caug xyoo hauv phau vaj lug kub no piav txog cov Neeg Lamas txoj kev hloov siab los ntseeg thiab txoj kev ncaj ncees thiab cov Neeg Nifais txoj kev ua phem, kev tso qhov tseeb tseg, thiab kev ua phem ua qias.
Qhov uas peb muab cov Neeg Nifais piv rau cov Neeg Lamas los ntawm cov ceev xwm txheej puag thaum ub no los yeej qhia peb ntau yam niaj hnub no.
“Feem coob ntawm cov Neeg Lamas tau hloov los ua ib co neeg ncaj ncees, ua rau lawv txoj kev ncaj ncees ntau tshaj cov Neeg Nifais, vim yog lawv txoj kev ruaj nrees thiab lawv txoj kev nyob khov kho ntawm lawv txoj kev ntseeg.”
“[Thiab] muaj cov Neeg Nifais coob leej tau hloov los ua siab tawv thiab tsis kam hloov siab lees txim thiab phem heev kawg li, lawv thiaj xyeej Vajtswv txoj lus thiab tag nrho tej kev qhuab qhia thiab txoj kev qhia tej yuav muaj los yav tom ntej uas tau los rau hauv lawv.”
“Thiab yog li ntawd peb pom tias cov Neeg Nifais pib tso txoj kev ntseeg tseg zuj zus, thiab ua kev phem thiab kev qias ntau zog, tiam sis cov Neeg Lamas pib paub ntau txog lawv tus Vajtswv; muaj tseeb tiag, lawv pib ua raws li nws tej kev cai thiab tej lus txib, thiab taug kev raws li kev tseeb thiab kev ncaj rau ntawm nws.
“Thiab yog li ntawd peb pom tias tus Tswv tus Ntsuj Plig pib thim ntawm cov Neeg Nifais mus, vim yog txoj kev phem thiab txoj kev tawv ntawm lawv lub siab.
“Thiab yog li ntawd peb pom tias tus Tswv pib pub nws tus Ntsuj Plig nplua mias rau cov Neeg Lamas, vim lawv txoj kev yooj yim thiab txaus siab los ntseeg nws tej lus.”
Tej zaum qhov xav tsis thoob txog cov Neeg Nifais txoj kev tso qhov tseeb tseg no yog qhov uas “txhua yam kev ua phem no tau los rau lawv nyob hauv ib ntus uas twb tsis muaj ntau xyoo.”
Cov Neeg Nifais Ntxeev Siab rau Vajtswv
Ib co neeg ncaj ncees yuav ua li cas kom hloov los ua ib cov neeg siab tawv thiab siab phem sai ua luaj li? Tib neeg yuav ua li cas kom tsis nco qab txog Vajtswv, tus uas tau foom koob hmoov rau lawv ntau nplua mias, sai npaum li ntawd?
Cov Neeg Nifais txoj kev coj yam ntxwv phem yeej qhia tau rau peb zoo heev.
“Txoj kev muab hlob … tau pib nkag los … rau hauv cov neeg lub siab uas hais tias lawv zwm rau Vajtswv lub koom txoos … vim yog lawv txoj kev nplua nuj thiab lawv txoj kev vam meej heev nyob hauv thaj av.”
“[Lawv] muab [lawv] lub siab tso rau tej kev nplua nuj thiab tej yam tsis muaj nuj nqis ntawm lub ntiaj teb no” “vim yog txoj kev muab hlob ntawd uas [lawv] tau cia los nkag rau hauv [lawv] lub siab, uas tau tsa [lawv] mus siab tshaj li qhov uas zoo vim yog [lawv] tej kev nplua nuj heev!”
Cov neeg puag thaum ub los ntawm hmoov av thov peb niaj hnub no kom peb kawm zaj lus qhia uas kav ib txhis no: kev vam meej, tej yam khoom, thiab kev nplua nuj yog tej yam uas yeej coj taus cov neeg ncaj nees haus cov tshuaj lom uas yog kev muab hlob.
Qhov uas peb cia kev muab hlob nkag hauv peb lub siab yuav ua rau peb thuam tej yam uas dawb ceev; tsis ntseeg cov yaj saub thiab kev tshwm sim; muab Vajtswv tej lus txib tsuj rau hauv lawv qab xib taws; xyeej Vajtswv txoj lus; ntiab, thuam, thiab tawm tsam cov yaj saub; thiab tsis nco qab tus Tswv peb tus Vajtswv, thiab “tsis xav kom tus Tswv [peb] tus Vajtswv, tus uas tau tsim [peb], [ua] tus uas tswj thiab kav [peb].”
Yog li ntawd, yog peb tsis rau siab ntseeg thiab mloog lus, ces peb yuav muab Vajtswv txoj kev foom kev vam meej rau peb hloov los ua ib txoj kev foom phem ntawm kev muab hlob uas ua rau peb tsis nco qab txog tej lus tseeb mus ib txhis li thiab tsis nco qab txog tej yam tseem ceeb rau peb sab ntsuj plig. Peb yeej yuav tsum tiv thaiv kom txog muaj kev muab hlob thiab xav tias peb tseem ceeb, xav tias peb muaj txaus ua txhua yam peb tus kheej, thiab nrhiav kev kom ua raws li peb lub siab nyiam thiab tsis pab lwm tus li.
Thaum peb muab hlob tsom ntsoov rau peb tus kheej, peb kuj tsis pom tej yam ntawm sab ntsuj plig thiab tsis pom tej yam feem ntau, los sis tej zaum tsis pom tag nrho tej yam uas tshwm sim nyob ib puag ncig peb. Peb tsis muaj peev xwm tsom ntsoov rau Yexus Khetos uas yog “lub hom phiaj” yog tias peb xav txog peb tus kheej xwb.
Kev dig muag ntawm sab ntsuj plig zoo li no yuav ua rau peb tig mus tsis taug txoj kev ncaj ncees, poob mus rau tej kev uas txwv tsis pub mus, thiab ploj mus. Yog peb “tig mus rau [peb] tus kheej tej kev” thiab taug tej kev lug uas ua rau peb raug puas tsuaj, peb vam khom peb li kev txawj ntse, khav theeb txog peb tus kheej lub zog, thiab vam khom rau peb tus kheej lub tswv yim.
Xamuyees uas yog tus Neeg Lamas sau ntsiab lus qhia meej txog cov Neeg Nifais txoj kev ntxeev siab rau Vajtswv: “Nej tau nrhiav tag nrho nej lub neej rau tej uas nej tsis muaj peev xwm muab tau; thiab nej tau nrhiav kev zoo siab los ntawm kev ua phem, qhov uas twb tsis raws li txoj kev ncaj ncees ntawd ntawm peb tus Thawj uas Nyob Mus Ib Txhis uas muaj hwj chim loj.”
Tus yaj saub Maumoos hais tias, “Feem coob ntawm cov neeg yeej tseem muaj lawv txoj kev muab hlob thiab kev phem, thiab feem tsawg los Vajtswv pom tias lawv taug kev ceev faj zog.”
Cov Neeg Lamas Tig Mus rau Vajtswv
Nyob hauv Phau Hilamas, cov Neeg Lamas txoj kev ncaj ncees zuj zus yeej txawv qhov uas cov Neeg Nifais sab ntsuj plig ploj mus sai zuj zus.
Cov Neeg Lamas tau tig mus rau Vajtswv thiab los paub qhov tseeb vim lawv ntseeg tej lus qhia los ntawm cov vaj lug kub thiab cov yaj saub, muab siab rau ntseeg tus Tswv Yexus Khetos, hloov siab lees txim rau lawv tej kev txhaum, thiab tau hloov siab loj heev.
“Yog li ntawd, tag nrho cov uas tau los rau qhov no, nej yeej paub ntawm nej tus kheej tias lawv yeej nyob ruaj nrees thiab khov kho coj raws li txoj kev ntseeg, thiab kev cawm seej uas tau ua rau lawv dim.”
“Xav kom nej pom tias feem coob ntawm [cov Neeg Lamas] yeej nyob rawv ntawm lawv txoj kev ua lawv tej dej num, thiab Vajtswv pom tias lawv yeej taug kev ceev faj, thiab lawv yeej mob siab ua raws li nws tej lus txib thiab nws tej kev cai thiab nws tej kev txiav txim. …
“… Lawv tab tom rau siab ntso yam tsis nkees kiag xwv kom lawv yuav coj tau lawv cov kwv tij uas tseem tshuav los paub txog qhov tseeb.”
Yog li ntawd, “ua rau [cov Neeg Lamas] txoj kev ncaj ncees ntau tshaj cov Neeg Nifais, vim yog lawv txoj kev ruaj nrees thiab lawv txoj kev nyob khov kho ntawm lawv txoj kev ntseeg.”
Lus Ceeb Toom thiab Lus Cog Tseg
Maulaunais hais tias: “Saib seb, tus Tswv tau ua rau kuv paub tej yam uas tseem ceeb thiab zoo kawg nkaus ntsig txog tej uas tsis ntev no yeej yuav muaj los, nyob rau hnub ntawd thaum uas tej yam no yeej yuav muaj los nyob hauv nej.
“Saib seb, kuv hais rau nej ib yam li nej nyob ntawm no, thiab tiam sis nej tsis nyob. Tiam sis saib seb, Yexus Khetos tau ua rau kuv pom nej, thiab kuv paub tej uas nej ua.”
Nco ntsoov hais tias Phau Ntawv Maumoos tau pom yav tom ntej thiab muaj tej lus ntsiab cai, tej lus ceeb toom, thiab tej zaj lus qhia tseem ceeb uas hais rau kuv thiab nej txog tej xwm txheej thiab tej teeb meem ntawm peb lub caij nyoog.
Muaj kev tso qhov tseeb tseg nyob ntawm ob theem—hauv ib lub koom haum thiab hauv ib tug neeg lub siab. Nyob hauv peb lub koom haum, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yuav tsis tso qhov tseeb tseg los sis raug tshem ntawm lub ntiaj teb no mus li.
Tus Yaj Saub Joseph Smith tshaj tawm tias: “Twb tau tsa tus Chij rau Qhov Tseeb lawm; tsis muaj ib txhais tes uas tsis dawb huv yuav nres tau txoj hauj lwm no … ; Vajtswv txoj lus tseeb tseem yuav tawm mus nrog kev ua siab loj, kev hwm, thiab nyob nws tus kheej, mus txog thaum qhov tseeb tau nkag mus hauv txhua thaj av, tau xyuas txhua txhia qhov chaw, tau mus thoob plaws txhua lub teb chaws, thiab txhua tus neeg tau hnov, txog thaum Vajtswv cov hom phiaj muaj tiav tas, thiab tus Yehauvas uas Muaj Hwj Chim yuav hais tias txoj hauj lwm twb tiav lawm”
Hais txog peb tus kheej, los peb txhua tus yuav tsum “ceev raj rau txoj kev muab hlob tsam [peb] los ua neeg zoo li cov Neeg Nifais puag thaum ub.”
Yog tias nej los sis kuv ntseeg tias peb muaj zog txaus thiab ncaj ncees txaus kom tsis txhob raug kev muab hlob, ces tej zaum peb twb raug kab mob ntawm sab ntsuj plig no tag lawm. Los yog hais tias, yog nej los sis kuv tsis ntseeg tias peb yuav raug kev muab hlob, ces ntshe peb yuav tsum ceev faj ntshe yuav raug xwm txheej rau peb sab ntsuj plig. Nyob hauv ib ntus uas tsis muaj ntau hnub, lub lim tiam, lub hlis, los sis xyoo, ntshe peb yuav tso peb lub meej mom ntawm sab ntsuj plig tseg kom tau ib co kua taum xwb.
Tiam sis yog tias nej los sis kuv ntseeg tias peb raug taus kev muab hlob, ces peb yuav ua tej yam me thiab yooj yim tas zog uas yuav pov hwm thiab pab peb hloov los ua “zoo li ib tug me nyuam, mloog lus, muaj siab mos siab muag, txo hwj chim, ua siab ntev, muaj kev hlub puv npo, txaus siab ua txhua yam uas tus Tswv pom tias tsim nyog muab rau [peb] ua.” “Cov uas txo lawv lub hwj chim es tsis yog raug txhib los txo hwj chim tau koob hmoov.”
Thaum peb ua raws li Thawj Tswj Hwm Benson tej lus qhia thiab nug peb tus kheej seb vim li cas tus Tswv tau tshoov Maumoos lub siab kom sau tej zaj lus, tej lus qhuab ntuas, thiab tej lus ceeb toom ntawd hauv Phau Hilamas, kuv cog lus tias peb yuav paub tias tej lus qhia no muaj nqis dab tsi rau peb hauv peb lub neej thiab hauv peb tsev neeg niaj hnub no. Thaum peb kawm thiab xav txog phau ceev xwm txheej no, peb yuav tau koob hmoov muaj qhov muag uas txawj pom kev, pob ntseeg uas txawj hnov, lub hlwb uas txawj paub, thiab lub siab uas txawj to taub tej yam uas peb yuav tsum kawm kom “ceev faj rau txoj kev muab hlob, nyob tsam [peb] yuav pib ua raws li kev haub ntxias.”
Kuv zoo siab kawg ua tim khawv tias Vajtswv Leej Txiv uas Nyob Mus Ib Txhis yog peb Leej Txiv. Yexus Khetos yog Nws Tib Leeg Tub thiab Leej Tub uas Nws Hlub. Nws yog peb tus Cawm Seej. Thiab kuv ua tim khawv tias thaum peb taug kev raws tus Tswv tus Ntsuj Plig, peb yuav dim tau kev muab hlob thiab muaj Nws txoj kev kaj siab lug. Kuv ua tim khawv li no los ntawm Yexus Khetos lub npe dawb ceev, amees.