Koj Cia Li Zoo Hlo

Thaum kuv muaj tsib xyoos, kuv nrog kuv cov phooj ywg ua si football ze lub tsev teev ntuj hauv kuv lub zos me. Kuv nco qab tus xib hwb txoj kev hu nws pawg ntseeg kom ntxuav lawv tej ris tsho thiab tej daim tiab kom npaj rau tus Cawm Seej txoj kev los. Vim kuv tseem yog me nyuam yaus, kuv xav tias nws hais tiag tiag. Kuv twb khiav mus tsev ceev npaum li kuv khiav taus thiab taij kuv niam ntxuav kuv tej ris tsho kuv thiaj li yuav tsis muaj qhov tsuas li thiab npaj siab rau tus Cawm Seej txoj kev los tag kis. Txawm yog kuv niam tsis ntseeg tias tus Cawm Seej yuav los tag kis, nws tseem muab kuv ris tsho zoo tshaj plaws ntxuav huv.

Tag kis sawv ntxov, kuv twb muab ris tsho uas tseem ntub me ntsis hnav thiab tos ntsoov kev tshaj tawm txog tus Cawm Seej txoj kev los. Sij hawm dhau zuj zus ces tsis muaj dab tsi tshwm sim, kuv txiav txim siab mus rau lub tsev sib ntsib. Kuv poob siab thaum kuv pom tias tsis muaj neeg nyob hauv lub tsev teev ntuj thiab tus Cawm Seej tsis tau los. Nej yeej paub tias kuv xav li cas thaum kuv maj mam taug kev mus tsev.

Ntau xyoo tom qab ntawd, thaum kuv kawm cov tub txib tej zaj lus qhia kom npaj koom Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kuv twb nyeem hais tias: “Thiab tsis muaj ib yam uas tsis huv yuav muaj peev xwm nkag tau mus rau hauv nws lub nceeg vaj; yog li ntawd tsis muaj ib yam dab tsi nkag tau mus rau hauv nws qhov chaw so tsuas yog cov uas tau ntxuav lawv tej tsoos tsho nyob hauv kuv cov ntshav, vim yog lawv txoj kev ntseeg, thiab txoj kev hloov siab lees txim rau tag nrho lawv tej kev txhaum, thiab lawv txoj kev rau siab ntseeg kom mus txog thaum kawg.”

Tej lus qhia meej uas kuv txais thaum ntawd tau pab kuv to taub qhov tseeb tseem ceeb uas kuv tsis to taub thaum tseem yog me nyuam yaus. Tus xib hwb zaj lus twb hais txog qhov uas yuav tsum ua neeg huv ntawm sab ntsuj plig. Nws tau yaum nws pawg ntseeg kom hloov siab lees txim, hloov lawv lub neej, thiab tig mus rau tus Cawm Seej kom txais kev txhiv dim.

Peb Leej Txiv Saum Ntuj Ceeb Tsheej to taub peb lub neej hauv ntiaj teb yuav zoo li cas thiab peb yuav ua txhaum. Kuv ua Nws tsaug vim Nws tau npaj ib tug Cawm Seej kom theej peb lub txhoj. Dhau los ntawm tus Cawm Seej txoj kev theej txhoj, peb txhua tus muaj cib fim hloov siab lees txim thiab nrhiav kev zam txim thiab hloov los ua neeg huv. Peb yuav tsum muaj kev hloov siab lees txim, ib lub ntsiab cai tseem ceeb ntawm txoj moo zoo, kom peb sab ntsuj plig loj hlob tuaj thiab nyob ruaj khov thaum peb raug tej teeb meem hauv lub neej no.

Thaum lub Plaub Hlis Ntuj 2022 lub tuam rooj sab laj, Thawj Tswj Hwm Russell M. Nelson tau caw txhua tus mej zeej ntawm lub Koom Txoos kom muaj kev xyiv fab uas los ntawm kev hloov siab lees txim txhua hnub. Nws hais tias:

“Thov tsis txhob ntshai los sis tos kom hloov siab lees txim. Dab Ntxwg Nyoog nyiam thaum nej nyuaj siab. Tso nws tseg. Muab nws tso tseg tawm hauv nej lub neej mus. Pib hnub no kom muaj kev xyiv fab uas los ntawm kev tso tus neeg ntawm sab cev nqaij daim tawv tseg. Tus Cawm Seej yeej ib txwm hlub peb tiam sis qhov tseem ceeb Nws hlub peb thaum peb hloov siab lees txim. …

“Yog nej xav tias nej tau tawm txoj kev ua raws li nej tej kev khi lus ntev dhau lawm los sis tsis muaj ib txoj kev rov qab los, qhov ntawd yeej tsis muaj tseeb.”

Yog tias muaj ib yam dab tsi uas nej tsis tau hloov siab lees txim txog, kuv yaum kom nej ua raws li Thawj Tswj Hwm Nelson txoj kev hu kom txhob tos ua ntej nej hloov siab lees txim. Tej zaum yuav tsum ua siab loj kom ua raws li tus txheej txheem no; tiam sis, kuv qhia tseeb rau nej tias nej yuav muaj txoj kev xyiv fab loj tshaj qhov nej xav los ntawm kev hloov siab lees txim tiag tiag. Los ntawm kev hloov siab lees txim, yuav tshem lub txim ua peb ris thiab muaj kev kaj siab lug thiab kev nplij siab. Thaum peb rau siab hloov siab lees txim, tus Cawm Seej cov ntshav ntxuav peb los ua neeg huv, ua rau peb haj yam txawj mloog tej kev tshoov siab ntawm tus Vaj Ntsuj Plig Dawb Huv.

Kuv tus khub mus ib txhis li muaj teeb meem hnov lus txij thaum nws yug los es yog li ntawd nws yuav tsum siv ob lub tshuab pab hnov lus. Cov hmoov thiab kev tawm hws ua rau ob lub tshuab no khiav tsis zoo, yog li ntawd txhua sawv ntxov kuv saib nws rau siab so cov hlua ua ntej nws muab tso hauv nws lub qhov ntsej. Tus txheej txheem yooj yim no uas nws ua txhua zaus ua kom tsis muaj cov hmoov av, qhov ntub, los sis cov hws, nws thiaj li txawj hnov thiab sib txuas lus zoo. Thaum nws tsis nco qab ua li no, ua rau nws tsis tshua hnov tas ib hnub ntawd; nws hnov tsis tau tej lo lus zoo zuj zus ces thaum kawg nws hnov tsis taus hlo li. Ib yam li nws txoj kev so nws ob lub tshuab pab hnov lus txhua hnub pab nws hnov lus meej, kev hloov siab lees txim txhua hnub ua rau peb txawj to taub tus Tswv tej lus qhia dhau los ntawm tus Vaj Ntsuj Plig Dawb Huv.

Thaum yuav luag txog qhov kawg ntawm tus Tswv txoj hauj lwm qhuab qhia thiab ua ntej Nws tawm lub Vaj Khexemanes, Nws npaj Nws cov thwj tim kom tiv taus tej kev sim siab uas yuav muaj thaum yav tom ntej. Nws nplij lawv lub siab hais tias: “Tus Pab uas yog tus Vaj Ntsuj Plig Dawb Huv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.”

Ib txoj hauj lwm ntawm tus Vaj Ntsuj Plig Dawb Huv yog kom ceeb toom thiab coj txhua tus uas mloog lub suab yau yau no. Ib yam li tej hlua ntawm lub tshuab pab hnov lus uas lo hmoov av ua rau yus hnov tsis taus lus, peb sab ntsuj plig txoj kev txuas rau peb Leej Txiv Saum Ntuj Ceeb Tsheej yuav raug cuam tshuam, ua rau peb to taub yuam kev los sis tsis ua raws li Nws tej lus ntuas. Qhov uas peb muaj internet ua rau peb txais tau xov xwm ntau tshaj yav tas los. Ntshe ua rau peb mloog neeg ntiaj teb tej lus qhia thiab tsis mloog Vajtswv lus. Thawj Tswj Hwm Russell M. Nelson tau qhia hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”

Kuv ua Vajtswv tsaug vim peb txhua tus txais lub txiaj ntsim Vaj Ntsuj Plig Dawb Huv thaum lub sij hawm uas peb ua kev cai pom zoo. Tiam sis, Thawj Tswj Hwm Dallin H. Oaks ceeb toom hais tias “cov koob hmoov uas los ntawm lub txiaj ntsim Vaj Ntsuj Plig Dawb Huv nyob ntawm peb txoj kev ua neeg tsim nyog [thiab] ‘tus Tswv tus Ntsuj Plig tsis nyob hauv tej tuam tsev uas tsis dawb huv’ [Hilamas 4:24].”

Thaum peb txhob txwm xaiv kom ua raws li cov yaj saub thiab cov thwj tim tej lus qhia, peb yuav haj yam tsim nyog muaj tus Vaj Ntsuj Plig Dawb Huv ua peb tus khub nrog nraim peb. Tus Vaj Ntsuj Plig Dawb Huv pab peb txiav txim siab meej, Nws tshoov peb lub siab kom muaj tej kev xav uas yog raws nraim li Leej Txiv Saum Ntuj Ceeb Tsheej lub siab nyiam. Peb yuav tsum muaj tus Vaj Ntsuj Plig Dawb Huv nrog nraim peb nyob kom peb sab ntsuj plig loj hlob tuaj.

Tsis ntev tas los kuv txais kev txib mus tswj hwm ib ceg txheem ntseeg lub rooj sab laj nyob ntawm Ceg Txheem Ntseeg Salt Lake Granger West nyob hauv Utah. Thaum lub sij hawm no, kuv ntsib ib ceg txheem ntseeg tus thawj tswj hwm uas rau siab kawm kom txawj mloog tus Vaj Ntsuj Plig Dawb Huv tej kev tshoov siab los ntawm nws txoj kev ua neej ncaj ncees thiab kev hloov siab lees txim txhua hnub. Thaum wb mus txhawb pab lwm tus, wb tau mus rau peb tsev neeg. Tom qab wb tau mus xyuas tus kawg, tshuav 30 feeb ua ntej yuav tsum mus ua lwm yam. Thaum wb rov qab mus rau lub tsev ceg txheem ntseeg, Thawj Tswj Hwm Chesnut tau txais kev tshoov siab kom mus xyuas ib tsev neeg ntxiv. Wb pom zoo mus ua raws li kev tshoov siab ntawd.

Wb tau mus rau Jones tsev neeg, es wb ntsib Muam Jones uas pw hauv txaj vim nws raug mob. Wb pom tias nws xav tau ib txoj koob hmoov pov thawj hwj. Nws cia wb foom koob hmoov rau nws. Thaum wb npaj mus, Muam Jones nug seb ua li cas wb ho paub nws xav tau ib txoj koob hmoov. Qhov tseeb mas, wb tsis tau paub. Tiam sis, peb Leej Txiv Saum Ntuj Ceeb Tsheej, tus uas paub nws xav tau dab tsi, yeej paub thiab tau tshoov Thawj Tswj Hwm Chesnut lub siab kom mus xyuas nws lub tsev. Thaum peb kam mloog ib suab yau yau tej lus qhia, peb haj yam yuav txawj txhawb pab cov uas xav tau kev pab.

Kuv ua tim khawv tias Leej Txiv Saum Ntuj Ceeb Tsheej muaj lub siab dawb thiab hlub peb. Yexus Khetos yog tus Cawm Seej thiab tus Txhiv Dim ntawm neeg ntiaj teb. Kuv ua tim khawv tias Yexus Khetos txoj Kev Theej Txhoj muaj tseeb thiab thaum peb kawm ua raws li tus Vaj Ntsuj Plig Dawb Huv tej lus qhia, Nws yuav coj peb mus kom hloov siab lees txim thiab siv lub hwj chim ntawm tus Cawm Seej txoj Kev Theej Txhoj hauv peb lub neej. Thawj Tswj Hwm Russell M. Nelson yog tus Tswv tus yaj saub tseeb, uas muaj tag nrho cov yawm sij ntawm lub pov thawj hwj hauv lub ntiaj teb niaj hnub no. Los ntawm Yexus Khetos lub npe, amees.