Tej Hnub uas Yuav Nco Ntsoov

Kuv cov kwv tij thiab cov muam, zaj keeb kwm txog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg hauv lub caij nyoog kawg no los muaj ntau zaj uas qhia tias tus Tswv coj Nws lub Koom Txoos li cas. Tiam sis muaj kaum xyoo nyob hauv peb zaj keeb kwm uas yeej tseem ceeb tshaj lwm lub sij hawm—xyoo 1820 mus txog xyoo 1830. Pib thaum tus Yaj Saub Joseph Smith nyob hauv Koog Ntoo Dawb Ceev pom Vajtswv Leej Txiv thiab Nws Leej Tub, Yexus Khetos, nyob rau xyoo 1820 lub caij nplooj ntoo hlav, mus txog lub Plaub Hlis Ntuj hnub tim 6, xyoo 1830, mas kaum xyoo ntawd yeej tsis zoo li lwm lub sij hawm.

Cia li xav txog tej lub sij hawm zoo kawg no! Tus yaj saub sib tham nrog tus tim tswv Maulaunais, txhais cov phiaj kub, thiab muab Phau Ntawv Maumoos luam! Twb tau muab lub Pov Thawj Hwj Aloos thiab lub Pov Thawj Hwj Mekhixedes txum tim rov qab los dhau ntawm nws, ces nws txhim tsa lub Koom Txoos! Oliver Cowdery piav tias tej hnub no yog tej uas “yuav tsis hnov qab hlo li.” Txij thaum ntawd los twb pom tej txuj ci tseem ceeb ntxiv.

Xyoo no twb pib kaum xyoo uas tej zaum yuav tseem ceeb tshaj lwm lub sij hawm txij thaum thawj kaum xyoo uas pib ob puas xyoo tas los.

Cia kuv piav rau nej. Txij xyoo 2024 no, mus txog xyoo 2034, yuav muaj tej xwm txheej tseem ceeb kawg nkaus uas ua rau peb muaj cib fim pab lwm tus, koom siab nrog cov mej zeej thiab cov phooj ywg, thiab qhia txog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg rau tib neeg coob dua li yav tas los.

Peb nyuam qhuav pom ib lub sij hawm zoo kawg nkaus uas peb yuav nco ntsoov thaum peb ua koob tsheej nrog neeg coob txog Thawj Tswj Hwm Russell M. Nelson hnub yug thib 100.

Nyob hauv zaj xov xwm txog Thawj Tswj Hwm Nelson hnub yug, Newsweek sau hais tias “Lub Ntiaj Teb tus Thawj Coj Teev Ntuj Laus Tshaj Muaj 100 Xyoo.” Ces lawv sau 10 tus thawj coj teev ntuj hauv lub ntiaj teb uas laus laus—xws li Pope Francis thiab tus Dalai Lama; Thawj Tswj Hwm Nelson yog tus thib ib.

Ib nqe lus los ntawm New York Times ib zaj lus yog lub ntsiab ntawm tej yam uas lwm cov ntawv xov xwm thoob plaws lub ntiaj teb sau txog nws hais tias, “Nyob hauv ib lub caij uas yuav xaiv [Teb Chaws Amelikas] tus tsav thawj thaum tib neeg xav seb puas zoo ua ib tug thawj coj laus, Yawg Nelson hnub yug ua rau tib neeg xav tias, nyob hauv nws lub koom txoos, qhov uas yus muaj ib puas tawm xyoos los tsis ua li cas. Cov mej zeej hauv lub koom txoos nyiam nws heev, lawv saib lawv tus thawj tswj hwm tsis yog ib tug thawj coj xwb tiam sis yog ib tug ‘yaj saub, tus pom tau, thiab tus txais kev tshwm sim.’”

Peb zoo siab uas Thawj Tswj Hwm Nelson hnub yug ua rau peb muaj cib fim qhia cov neeg thoob plaws lub ntiaj teb txog Vajtswv ib tug yaj saub, yog kev ua koob tsheej uas yeej yuav nco ntsoov.

Nyob hauv lub caij nplooj ntoo hlav no, twb qhib ib qhov chaw tshiab nkag hauv tshav tuam tsev—uas muaj ntau daim chij los ntawm tej lub teb chaws uas cia lub Koom Txoos tshaj tawm txoj moo zoo. Qhov chaw nkag hauv tshav tuam tsev muaj ib lub pob zeb loj uas muaj tus yaj saub tej lus no kos rau: “Yav tom ntej no lub roob uas lub tuam tsev nyob rau saud yuav siab dua tej hau roob txhua lub huv tib si; ntau haiv neeg yuav sau nthwv tuaj rau saum lub roob ntawd.”

Tej zaum tej xwm txheej tseem ceeb uas yuav muaj 10 xyoo tom ntej no yuav ua kom muaj raws li Yaxayas tej lus.

Cia li xav txog qhov uas yuav qhib tuam tsev saib thiab muab lub tuam tsev fij tseg pes tsawg zaus hauv kaum xyoo tom ntej no, nyaj yuav muaj 164 lub tuam tsev thiab ntxiv. Cia li xav tias yuav zoo li cas yog nej thiab nej cov phooj ywg coob taug kev hauv tus Tswv lub tsev. Lub cim txog tej xwm txheej tseem ceeb no yog qhov uas tau rov qab muab lub Tuam Tsev Salt Lake fij tseg thiab tej yam ntxim saib ntxim ua thaum ua li no. Peb yeej yuav nco ntsoov tej hnub ntawd.

Xyoo 2030 yuav ua rau peb muaj cib fim nyob thoob plaws lub ntiaj teb kom ua koob tsheej nco txog ob puas xyoo tom qab tau muab lub Koom Txoos txhim tsa. Tseem ntxov dhau kom paub tias lub Koom Txoos yuav ua li cas kom nco txog lub sij hawm no, tiam sis peb yuav muaj cib fim caw peb tsev neeg, phooj ywg, cov neeg nrog peb ua hauj lwm, thiab cov neeg qhua tseem ceeb kom “los thiab saib” thiab to taub tias lub Koom Txoos muaj hwj chim hauv lub Koom Txoos cov mej zeej lub neej.

Nyob rau xyoo 2034, cov thawj coj, cov neeg tuaj xyuas, thiab cov neeg kws xyaum txuj tes taw nyob thoob plaws lub ntiaj teb yuav tuaj rau lub nroog Salt Lake City, uas yog qhov chaw rau tej kev sib tw hauv lub caij no no Winter Olympic Games. Tej zaum tsis muaj ib yam dab tsi uas ua rau tib neeg koom siab thoob plaws lub ntiaj teb tshaj cov Olympic Games. Txhua tus hauv lub ntiaj teb yuav saib lub Koom Txoos thiab cov mej zeej, ua rau peb muaj cib fim ua siab dawb pab, thiab qhia txoj moo zoo siab los ntawm tej yam zoo peb ua—yog ib lub sij hawm uas yeej yuav nco ntsoov.

Tej lub sij hawm thaum yav tom ntej no yuav ua rau cov mej zeej ntawm lub Koom Txoos muaj cib fim ntxiv kom qhia Yexus Khetos txoj moo zoo siab los ntawm tej yam peb hais thiab ua, yog kaum xyoo uas yeej yuav nco ntsoov.

Nyob hauv ib txoj kev sib ntsib ua ntej nws hnub yug, Thawj Tswj Hwm Nelson qhia vim li cas nws nyiam lo lus “txoj moo zoo siab.” Nws hais tias thaum yus xav txog ib me ntsis ces ua rau yus xav txog kev xyiv fab thiab kev zoo siab. Tiam sis “txoj moo zoo siab” yeej muaj ib lub ntsiab loj tshaj qhov ntawd. Nws piav tias lo lus no yog los ntawm lo lus Kilis euangelion, uas txhais tias “txoj moo zoo.” Peb yuav muaj kev zoo siab thiab kev xyiv fab hauv lub neej no thiab lub neej tom ntej vim peb muaj Yexus Khetos txoj moo zoo. Yog li ntawd lo lus “txoj moo zoo siab” muaj ob lub ntsiab no.

“Muaj tib neeg xwv kom lawv yuav muaj kev xyiv fab.” Leej Txiv Saum Ntuj Ceeb Tsheej twb tau npaj txoj hau kev zoo siab kom muaj kev xyiv fab los ntawm Nws cov koob hmoov. Xws li peb yuav nrog Nws thiab peb tsev neeg nyob ua ke mus ib txhis li. Yexus Khetos txoj Kev Theej Txhoj yeej yog lub ntsiab ntawm Vajtswv txoj hau kev kom txhiv peb dim. Kom txais tau txoj sia nyob mus ib txhis, peb yuav tsum los cuag Khetos. Thiab thaum peb “pab lwm tus ua li ntawd, peb koom tes ua Vajtswv txoj hauj lwm cawm seej thiab kev tsa nto.”

Zaj xov ntawm Yexus Khetos txoj moo zoo siab yog zaj xov tseem ceeb kawg nkaus hauv lub ntiaj teb. Thiab cov tub hluas ntxhais hluas ntawm lub Koom Txoos yuav pab.

Nim no, txawm kaum xyoo tom ntej no yuav muaj tej hnub uas txhua tus mej zeej ntawm lub Koom Txoos yeej yuav nco ntsoov, qhov no muaj tseeb rau nej cov ntawm tiam neeg uas tab tom loj hlob tuaj. Nej nyob hauv lub ntiaj teb tam sim no vim twb xaiv nej nyob no. Nej muaj zog thiab muaj peev xwm los ua Yexus Khetos cov thwj tim zoo dua li qub.

Thawj Tswj Hwm George Q. Cannon qhia tias, “Vajtswv tau muab cov ntsuj plig tshwj tseg rau lub caij nyoog no cov uas ua siab loj thiab rau siab xav kov yeej lub ntiaj teb thiab tus dab phem tej lub hwj chim, [thiab] … txhim tsa peb tus Vajtswv lub Xi-oos thiab tsis ntshai peb yuav raug dab tsi.”

Yog li ntawd, kuv xav hais lus rau nej cov ntawm tiam neeg uas tab tom loj hlob tuaj, kom caw nej xav seb kaum xyoo tom ntej yuav zoo npaum li cas, uas nej yuav nco ntsoov. Kuv thiaj li hais ob peb lo lus ntuas thiab txhawb nqa uas tej zaum yuav pab nej muaj hwj chim ua tej yam tseem ceeb hauv kaum xyoo tom ntej no.

Ib yam li nej feem coob, kuv muaj ib lub xov tooj uas tej lub sij hawm thaum twg kuv tsis ua dab tsi, kuv khaws ib co duab kom tso ua ke txog tej yam uas kuv ua thaum ib hnub. Ua rau kuv xav tsis thoob kom pom tias tej yam ntau tau hloov rau kuv thiab kuv tsev neeg.

Cia li xav seb cov duab hauv nej lub xov tooj yuav zoo li cas 10 xyoos tom ntej! Tej zaum nej yuav xav pom nej txoj kev kawm high school tiav, kev txais nej vaj txiaj ntsim, kev mus ua tub txib, yuav poj niam los yuav txiv, thiab muaj nej tus me nyuam hlob. Rau nej mas, nej yuav nco ntsoov kaum xyoo tom ntej no. Tiam sis nej haj yam yuav nco ntsoov yog tias nej rau siab ua ib lub teeb rau neeg ntiaj teb paub tias txoj moo zoo siab ntawm Yexus Khetos yuav ua rau nej lub neej muaj nqis heev thiab pab nej tsev neeg, cov phooj ywg, thiab cov uas nrog nej sib tham hauv social media.

Tej zaum nej xav paub seb yuav tsum ua li cas kom ua taus li no.

Vajtswv cov yaj saub tau qhia peb tias peb ua tau li no thaum ua plaub yam yooj yim, hais txog tej kev lav ris uas Vajtswv muab rau peb: qhov thib ib, ua neej raws li Yexus Khetos txoj moo zoo; qhov thib ob, saib xyuas cov uas xav tau kev pab; qhov thib peb, caw txhua tus los txais txoj moo zoo; thiab qhov thib plaub, muab tsev neeg koom ua ke mus ib txhis li. Zoo siab uas peb ua tau txhua yam los ntawm tej yam tsis txawv thiab yooj yim hais.

Kuv cog lus rau nej tias nej yuav nco ntsoov kaum xyoo tom ntej no yog tias nej ua raws li plaub txoj kev lav ris uas Vajtswv muab rau nej ua. Cia peb xav seb nej yuav tsum ua li cas.

Qhov thib ib, ua neej raws li Yexus Khetos txoj moo zoo. Cia li kawm cov yaj saub tej lus thiab kawm kom hlub nej Leej Txiv Saum Ntuj Ceeb Tsheej. Muab siab npuab Nws thiab siv zog kom taug Nws txoj kev. “Cia siab rau nej tej kev khi lus” raws li Txwj Laug Soares tau piav. Kev cia siab no yog los ntawm tej kev khi lus hais tias nej yuav coj raws li Yexus Khetos, vim nej paub tias tus Cawm Seej yuav ntxiv dag zog rau nej thiab txhawb nqa nej.

Cia nej cov phooj ywg pom kev xyiv fab los ntawm nej txoj kev ua neej raws li txoj moo zoo ces nej yuav qhia zaj xov txog txoj moo zoo uas zoo tshaj plaws.

Qhov thib ob, ua lub siab zoo ncav tes pab cov uas xav tau kev pab. Nej tiam neeg yeej nco txog cov uas tsis muaj hmoov zoo npaum li nej. Thaum tib neeg raug xwm txheej phem thiab lub Koom Txoos cov mej zeej los pab tshem cov khoom uas raug puas tsuaj thiab nplij cov neeg lub siab, yeej zoo li feem coob ntawm cov uas hnav lub tsho “Txhais Tes Pab” yog cov tub hluas ntxhais hluas. Nej yeej muaj lub siab xav “ib leeg ris ib leeg tej nra” thiab “Nplij cov uas xav tau kev nplij siab.” Thaum peb ua li no peb “coj raws li Yexus Khetos txoj kev cai.”

Evan yog ib tug me nyuam tub hauv lub Koom Haum Me Nyuam Yaus, es nws txiav txim siab siv nws lub sij hawm phav kawm ntawv kom khaws tej khoom kom ua cov sandwich uas pleev huab xeeb thiab cov pleev nplev muab rau qhov chaw ceev zaub mov hauv zej zog. Nws nrhiav tau qhov no nyob hauv JustServe qhov website. Evan kuj hais kom nws chav kawm ntawv pab khaws 700 lub hub uas muaj cov pleev nplev! Cia li qhia cov neeg ua nej pab hais tias nej txoj kev txhawj txog lawv nyob ntawm nej txoj kev hlub Vajtswv thiab nej txoj kev xav ua rau nej cov neeg zej zog ib yam li nej ua rau nej tus kheej.

Qhov thib peb, caw txhua tus los txais txoj moo zoo. Xyoo no peb tau qhib 36 qhov chaw tshaj tawm txoj moo zoo tshiab kom thiaj muaj chaw txaus rau tag nrho cov uas xav ua tub txib. Nyob hauv ib lub caij nyoog thaum cov tub hluas ntxhais hluas feem coob tsis xav mus teev ntuj hlo li, qhov no qhia tias nej zaj lus tim khawv muaj zog npaum li cas. Txawm nej ua tub txib los sis tsis ua, thov nco qab txog nej txoj kev muaj peev xwm kom yaum nej cov phooj ywg thaum nej hlub, qhia, thiab caw lawv kom kawm txog Yexus Khetos txoj moo zoo.

Qhov thib plaub, pab tej tsev neeg koom ua ke mus ib txhis li. Thaum kuv mus xyuas cov tuam tsev nyob thoob plaws lub ntiaj teb, kuv xav tsis thoob vim muaj cov tub hluas ntxhais hluas coob tsis coob hauv qhov chaw ua kev cai raus dej thiab cov tub hluas ntxhais hluas coob uas ua cov coj kab ke. Tsis ntev tas los, ib pawg cov tub hluas ntxhais hluas uas muaj 600 tawm tus tub hluas ntxhais hluas los ntawm Scotland thiab Ireland tau mus rau lub Tuam Tsev Preston England, tau ua 4,000 txoj kab ke, feem ntau yog rau lawv cov poj koob yawm txwv! Kuv yaum kom nej nrhiav nej tsev neeg zaj keeb kwm, siv sij hawm hauv lub tuam tsev, thiab ua tib zoo npaj nej tus kheej kom ua ib tug neeg uas yuav txiv los yuav poj niam tsim nyog hauv lub tuam tsev. Ua raws li ib tug txheej txheem hauv nej lub neej tam sim no kom mus rau lub tuam tsev ntau zaus.

Kuv cov kwv tij thiab cov muam, kuv cov phooj ywg hluas, yeej yuav muaj tej yam nyuaj rau peb txhua tus thaum yav tom ntej. Tiam sis, thaum peb pib kaum xyoo uas muaj tej xwm txheej tseem ceeb kawg nkaus, thov kom peb yuav qhia txoj moo zoo rau lwm tus los ntawm peb txoj kev ua neej, saib xyuas lwm tus, caw lawv, thiab pab lawv koom siab. Thaum peb ua li ntawd, tus Tswv yuav foom koob hmoov rau nej kom nej yuav nco ntsoov tas mus li.

Kuv ua tim khawv tias cov uas thov tus Tswv nrog lub siab dawb paug, nrog kev mob siab tiag, rau nej cov uas hais tus Cawm Seej lub npe thiab tus Vaj Ntsuj Plig Dawb Huv hauv nej lub siab, es nej cov uas pib ua txoj hwm zoo kawg nkaus no yuav tau cov koob hmoov xilethi-aus ntau nplua mias thiab txais kev ua tim khawv tias Vajtswv hnov nej lus, paub nej, thiab hlub nej. Yuav muaj tej hnub tom ntej uas nej yeej yuav nco ntsoov. Los ntawm Yexus Khetos lub npe, amees.