Khetos txoj Lus thiab tus Vaj Ntsuj Plig Dawb Huv Yuav Coj Peb Mus rau Qhov Tseeb
Qhov uas peb paub txog txoj hau kev zoo kawg no yuav pab peb paub tias peb yog Vajtswv cov me nyuam thiab peb muaj peev xwm hloov los ua neeg zoo li Nws.
Vajtswv yog peb Leej Txiv Saum Ntuj. Peb yog Nws cov me nyuam ntsuj plig, thiab Nws tau tsim peb kom muaj yam ntxwv zoo li Nws. Yog li ntawd, peb txhua tus, vim peb yog Vajtswv cov me nyuam, muaj peev xwm hloov los ua zoo li Nws.
Peb yog cov ntsuj plig uas tau nrog Nws nyob ua ntej peb los rau hauv lub ntiaj teb no. Leej Txiv Saum Ntuj Ceeb Tsheej, vim Nws yog peb Leej Txiv, hlub peb, xav kom peb tau tej yam zoo, thiab tau npaj ib txoj hau kev rau peb txais tau Nws cov koob hmoov zoo tshaj plaws, uas yog kev tsis txawj tuag thiab txoj sia nyob mus ib txhis. Raws li txoj hau kev no, peb, uas yog cov me nyuam ntsuj plig, yuav muaj kev ywj siab xaiv Nws txoj hau kev. Thaum peb los rau hauv lub ntiaj teb, peb ncaim Vajtswv mus, tsis nco qab peb lub neej ua ntej lub neej no, txais lub cev nqaij daim tawv, kawm los ntawm tej yam uas peb raug, thiab muaj kev ntseeg. Vim peb muaj cev nqaij daim tawv, ib yam li neeg ntiaj teb, peb yuav raug kev ntxias, hloov los ua neeg tsis huv uas nyob deb ntawm Vajtswv, thiaj li tsis tsim nyog rov qab mus nyob rau ntawm Nws lub xub ntiag dawb huv. Vim Leej Txiv Saum Ntuj Ceeb Tsheej hlub peb mus ib txhis li, Nws txib Nws tus Tub Hlob, Yexus Khetos, los ua peb tus Cawm Seej. Dhau los ntawm Nws txoj kev txi, txoj Kev Theej Txhoj, Yexus Khetos tau qhib kev rau peb txais kev txhiv dim ntawm peb tej kev txhaum thiab tsa peb sawv rov los thiab txais txoj sia nyob mus ib txhis.
Kuv yeej zoo siab kawg rau tej lus tseeb no—tej yam uas peb hu ua Leej Txiv txoj hau kev cawm seej, Nws txoj hau kev hlub tshua, los sis Nws txoj hau kev zoo siab. Kev kawm tej lus tseeb no tau pab kuv paub kuv yog leej twg tiag tiag thiab cov koob hmoov zoo kawg uas yog kev tsa nto thiab txoj sia nyob mus ib txhis li uas Vajtswv tau npaj rau peb. Tus yaj saub Nifais tau qhia txoj kev no rau peb: “Yog li ntawd, … mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.” Nws kuj hais tias, “Yog nej yuav nkag mus rau hauv txoj kev, thiab txais yuav tus Vaj Ntsuj Plig Dawb Huv, nws yuav qhia rau nej txhua yam uas nej yuav tsum ua.” Hnub no kuv xav qhia nej tias Khetos tej lus thiab tus Vaj Ntsuj Plig Dawb Huv tau pab kuv li cas kom nrhiav tau tej lus tseeb no thaum kuv tseem yog ib tug tub hluas.
Khetos tej Lus Yuav Qhia Nej Txhua Yam uas Nej Yuav Tsum Ua
Ib yam li Nifais hais nyob hauv thawj nqe ntawm phau 1 Nifais, kuv kuj “yug los ntawm niam thiab txiv uas zoo.” Kuv loj hlob tuaj nyob hauv Nagano, Nyijpooj Teb, nyob hauv ib lub tsev uas saib taus kev ua siab ncaj, kev rau siab, thiab kev txo hwj chim, thiab yuav tsum ua raws nraim li tej kab lig kev cai qub. Kuv txiv yog ib tug uas teev ntuj heev. Kuv twb saib nws thov ntuj rau ntawm ob lub thaj Shinto thiab Hauj Sam txhua tag kis thiab txhua hmo. Txawm yog kuv tsis to taub hlo li nws thov leej twg thiab nws thov kom tau dab tsi, kuv ntseeg tias muaj ib lub hwj chim los yog ib tug Vajtswv uas “muaj hwj chim cawm tau” los sis yuav pab peb yog peb thov tiag tiag.
Ib yam li lwm tus tub hluas ntxhais hluas, kuv raug tej yam nyuaj ntau heev. Kuv ntxhov siab, vim kuv xav tias kuv lub neej tsis ncaj thiab tej lub sij hawm lub neej zoo thiab tej lub sij hawm lub neej raug phem. Kuv kho siab heev, vim kuv xav tias tsis muaj nqis rau kuv lub neej. Zoo li lub neej tsis muaj nqis pes tsawg vim yuav kawg thaum kuv tuag. Lub neej no thaum tsis paub txog txoj hau kev cawm seej ua rau kuv tsis paub ua li cas.
Tsis ntev tom qab kuv pib kawm lus Askiv nyob hauv lub tsev kawm ntawv qib nrab, tag nrho cov tub ntxhais hauv peb lub tsev kawm ntawv tau txais ib Phau Tshiab los ntawm Phau Vaj Lug Kub Npaivnpaum. Txawm yog peb nyuam qhuav pib kawm lus Askiv xwb, peb tus xib hwb qhia peb tias peb yuav tau kawm lus Askiv thaum peb nyeem phau no. Kuv nthuav phau ntawd thiab saib cov lus haud. Tej lus hauv Phau Tshiab nyuaj kawg rau kuv. Cov lus Nyijpooj kuj nyuaj rau kuv nyeem thiab. Tiam sis, kuv nyiam saib tej nqe lus thiab tej lus nug txog yus sab ntsuj plig uas twb tso hauv phau Npaivnpaum Gideon no ua ntej—tej lus nug txog kev kho siab, kev tsis ntseeg yus tus kheej, kev ntxhov siab, kev raug tej kev sim siab hauv lub neej no, li ntawd. Tom qab txhua lo lus nug twb sau ib nqe vaj lug kub hauv Phau Tshiab. Ua rau kuv nyiam nqe lus uas hais tias “Ua li cas thaum koj sab sab.” Nqe no ua rau kuv nthuav phau ntawv mus rau Mathais 11:28–30, thaum Yexus hais rau Nws cov thwj tim:
“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.
“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”
Nov yog thawj zaug uas kuv nco qab tias kuv nyeem txog Yexus Khetos tej lus. Txawm yog kuv tsis to taub tag nrho tej lus uas Nws hais, Nws tej lus tau nplij kuv lub siab, txhawb nqa kuv sab ntsuj plig, thiab ua rau kuv muaj kev cia siab. Kuv yim nyeem Nws tej lus ntxiv, kuv yim xav tias kuv yuav tsum sim seb yuav ua li cas yog kuv ua raws li Nws tej lus. Kuv ib txwm tsis xav zoo li kuv xav hnub ntawd. Kuv xav tias muaj neeg hlub kuv. Kuv twb xav tias Yexus Khetos yog ib tug uas kuv paub lawm.
Thaum kuv tseem kawm ntxiv, kuv xav tias Nws hais lus ncaj qha rau kuv thaum Nws hais tias: “Cov uas xav ua raws li Vajtswv lub siab nyiam, cov ntawd tau koob hmoov: Vajtswv yuav muab rau lawv kom txaus nkaus li lawv lub siab xav.”
Nws tej lus puv kuv lub siab, txawm yog kuv tsis txawj piav zoo tias kuv lub siab xav li cas thaum ntawd. Txawm yog Yexus Khetos ua neej nyob ntau xyoo tas los hauv ib lub teb chaws uas kuv tsis paub hlo li, kuv xav tias kuv yuav muaj cuab kav tso siab rau Nws tej lus kawg siab kawg ntsws. Kuv cia siab tias thaum yav tom ntej kuv yuav txais Yexus Khetos tej lus ntxiv.
Tus Vaj Ntsuj Plig Dawb Huv Yuav Qhia rau Nej Txhua Yam uas Nej Yuav Tsum Ua
Hnub ntawd twb los ob peb xyoos tom qab ntawd. Kuv ntsib cov tub txib hluas ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thiab tsis ntev tom qab ntawd kuv tau ntsib ib pawg Haiv Neeg Ntseeg hauv Hnub Nyoog Kawg uas ua siab zoo thiab zoo siab vim lawv siv zog coj raws li Yexus Khetos qhia. Txawm yog kuv twb siv sij hawm ntev me ntsis kom tso siab rau lawv tag nrho, kuv twb kawm tias txoj moo zoo uas tau muab txum tim rov qab los yog qhov uas kuv xav tau thaum kuv kawm Phau Tshiab—yog Yexus Khetos tej lus thiab kev cia siab thiab kev kaj siab los ntawm tej lus ntawd.
Ib lub sij hawm dawb ceev heev yog thaum ob tug tub txib qhia kuv paub thov Vajtswv. Kuv kawm tias peb yuav tsum hais Vajtswv lub npe. Thaum peb thov, peb yuav tsum thov txog tej yam hauv peb lub siab, hais ua tsaug, thiab qhia txog tej yam uas peb xav tau thiab tej kev cia siab. Tom qab peb hais txhua yam uas peb xav hais, peb kaw peb zaj lus thov thaum peb hais tias, “Los ntawm Yexus Khetos lub npe, amees.” Peb ua li no vim Yexus tau txib peb kom thov Vajtswv los ntawm Nws lub npe. Kev thov Leej Txiv Saum Ntuj Ceeb Tsheej tau pab kuv paub tias Nws yog leej twg thiab kuv txheeb ze Nws li cas—kuv yog Nws tus tub ntsuj plig. Kuv kawm tias vim Leej Txiv Saum Ntuj Ceeb Tsheej paub kuv thiab hlub kuv, Nws yuav hais lus rau kuv tus kheej, raws li ib txoj kev uas kuv yuav to taub dhau los ntawm tus Vaj Ntsuj Plig Dawb Huv.
Twb muaj ib lub sij hawm thaum kuv tsis tshua paub tus Vaj Ntsuj Plig Dawb Huv zoo li cas. Kuv tsis to taub zoo, kuv xav tias kuv yuav tsum ua raws li tej yam no thaum kuv thov Vajtswv ces yuav muaj dab tsi tshwm sim. Muaj ib hnub, thaum ob tug tub txib qhia kuv, kuv mus rau lwm chav kom so me ntsis. Kuv tseem ntxhov siab txog qhov uas kuv yuav tsum ua li cas yog tias Yexus Khetos txoj moo zoo muaj tseeb tiag.
Thaum kuv yuav rov qab mus hauv chav uas ob tug tub txib tos kuv, kuv hnov ib tug tub txib lub suab. Kuv hnov kuv lub npe. Kuv tsis tau qhib qhov rooj, tiam sis kuv nyob ntawm lub qhov rooj mloog lub suab ntawd. Ua rau kuv xav tsis thoob. Nkawd thov Leej Txiv Saum Ntuj Ceeb Tsheej xwb. Tus uas thov Vajtswv thov kom Vajtswv yuav hnov kuv tej lus thov. Txawm yog nws hais lus Nyijpooj tsis meej, qhov uas kuv hnov nws tej lus thov ua rau kuv lub siab mos muag. Kuv xav paub seb vim li cas nkawd hlub kuv npaum li ntawd. Ces kuv to taub tias nkawd zaj lus thov kom pab kuv yeej qhia tias Leej Txiv Saum Ntuj Ceeb Tsheej thiab tus Cawm Seej hlub kuv npaum li cas. Txoj kev hlub ntawd ua rau kuv cia siab, thiab tom qab ntawd, kuv twb muaj kev ntseeg thov Vajtswv thiab kuv thov tiag tiag. Thaum kuv ua li ntawd, kuv txais kev xyiv fab thiab kev kaj siab thaum kuv paub tias kuv yog Vajtswv ib tug me nyuam thiab kuv muaj peev xwm thiab txoj hmoov los ua neeg zoo li Nws. Txoj hau kev cawm seej los twb nkag tob hauv kuv lub siab.
Thawj Tswj Hwm Russell M. Nelson hais tias, “Qhov uas nej xav li cas txog nej tus kheej yeej hloov … txhua txoj kev txiav txim uas nej yuav txiav.” Qhov no muaj tseeb rau kuv. Qhov uas kuv txiav txim coj raws li tus Cawm Seej Yexus Khetos thaum kuv ua kev cai raus dej thiab txais lub txiaj ntsim Vaj Ntsuj Plig Dawb Huv twb foom koob hmoov rau kuv lub neej ntau tshaj qhov kuv xav. Thaum peb khi lus rau Vajtswv los ntawm kev ua kev cai raus dej, peb cog lus tias peb txaus siab ris Yexus Khetos lub npe, coj raws li Vajtswv tej lus txib, thiab ua hauj lwm rau Nws kom tas peb lub neej. Ces peb Leej Txiv Saum Ntuj Ceeb Tsheej cog lus rau peb tias peb yuav muaj Nws tus Ntsuj Plig nrog nraim peb nyob—yog tus Vaj Ntsuj Plig Dawb Huv txoj kev coj peb kev mus li.
Kuv caw nej kom ntseeg tej lus uas Nifais tau qhia rau peb—tias Khetos tej lus thiab tus Vaj Ntsuj Plig Dawb Huv yuav “qhia rau nej txhua yam uas nej yuav tsum ua.” Txhua yam! Nov yog ib qho txiaj ntsim zoo kawg nkaus los ntawm Vajtswv los.
Cov kwv tij thiab cov muam, kuv ua Vajtswv tsaug rau peb Leej Txiv Saum Ntuj Ceeb Tsheej txoj hau kev cawm seej. Vim Nws hlub peb, Nws tau npaj ib txoj kev rau peb kom rov qab mus rau hauv Nws lub xub ntiag dhau los ntawm Nws Tib Leeg Tub, Yexus Khetos. Qhov uas peb paub txog txoj hau kev zoo kawg no yuav pab peb paub tias peb yog Vajtswv cov me nyuam thiab peb muaj peev xwm hloov los ua neeg zoo li Nws. Kuv ua Vajtswv tsaug rau qhov tseeb no. Kuv ua tim khawv rau nej tias Yexus Khetos tej lus thiab tus Vaj Ntsuj Plig Dawb Huv yuav coj peb mus kom txais txoj sia nyob mus ib txhis li. Kuv paub tej no muaj tseeb. Los ntawm Yexus Khetos lub npe dawb ceev, amees.