Vajtswv Hlub Tag Nrho Nws cov Me Nyuam

Peb Leej Txiv Saum Ntuj Ceeb Tsheej xav tau dab tsi los ntawm nej? Nej puas to taub hais tias thaum nej nyob ua ntej lub neej no, Leej Txiv Saum Ntuj Ceeb Tsheej npaj nej rau nej lub neej hauv lub ntiaj teb no? Hais rau cov tub hluas ntxhais hluas, Thawj Tswj Hwm Russell M. Nelson qhia hais tias, “Peb Leej Txiv Saum Ntuj Ceeb Tsheej tau tshwj Nws cov me nyuam ntsuj plig zoo tshaj tseg—tej zaum … Nws pawg me nyuam zoo tshaj plaws—rau lub caij nyoog kawg no.” Vim peb nyob hauv lub caij nyoog kawg no, tseem ceeb tshaj plaws rau peb kawm ua Yexus Khetos cov thwj tim.

Tus Tswv Yexus Khetos yog tus Tswv Yug Yaj Zoo thiab paub Nws cov yaj, thiab pab yaj paub lawv tus Tswv vim “nws cuab nws pab yaj tej npe.” Nws yeej los hu peb, thiab Nws xuas peb, Nws cov tub qhe, kom pab coj Nws cov me nyuam los cuag Nws.

Ob peb xyoos dhau los, ib ceg txheem ntseeg tus thawj tswj hwm thiab kuv mus xyuas cov ntseeg ntawm peb lub Koom Txoos hauv ib lub zej zog Tom qab wb mus xyuas cov neeg uas twb teem tseg yuav ntsib, tus thawj tswj hwm noog kuv saib puas muaj sij hawm mus ntsib dua ib tse neeg. Nws tau kev tshoov siab hais tias wb yuav tsum mus ntsib lawv.

Wb khob qhov rooj thiab ib tug muam qhib qhov rooj. Nws saib kuv, tiam sis nws tsis paub tias kuv yog leej twg, ces nws tsis hais li cas. Kuv taw tes rau tus thawj tswj hwm, thiab nws tuav tus muam ntawd lub npe. Tus muam zoo siab heev pom nws, nws xyiv fab heev. Nkawd txawm sib qawm quaj sawv ntawm lub qhov rooj ntawd. Qhov no zoo heev rau wb. Wb tsis paub hais tias tus muam ntawd tau xa tshuaj tua kab mob kheesxaws hnub ua ntej ntawd. Nws tsis muaj zog txaus saib xyuas thiab tu nws tus tub uas xiam hoob khab. Ces, kuv pab tus thawj tswj hwm muab ris tsho rau tus tub hnav, thiab wb muab nws zaum rau hauv nws lub rooj zaum muaj log khiav. Wb pub mov rau tus tub uas lwm tus neeg hauv pawg ntseeg rau nqa tuaj, thiab wb pab ua lwm yam. Ua ntej wb mus tsev, wb tau foom koob hmoov rau nkawd.

Tag nrho txhua yam uas kuv xav txog hmo ntawd yog kev pom zoo hais tias Yexus Khetos hlub nkawd heev. Yexus to taub nkawd thiab paub Nws tus kheej saib nkawd mob npaum li cas tam sim no. Thaum wb xyuas nkawd wb twb tsis tham ntau. Thaum ntawd wb tsis qhia txog Vajtswv los sis hais txog nqe vaj lug kub uas wb nyiam tshaj plaws, tiam sis tus Tswv foom koob hmoov kom peb sawv daws hnov tau Nws tus Ntsuj Plig ntau nplua mias.

Leej Txiv Saum Ntuj Ceeb Tsheej tau xa nej nqis los rau hauv ntiaj teb lub caij nyoog kawg no xwv kom nej yuav ncav tau lub hom phiaj zoo tshaj plaws rau nej tus kheej. Phau ntawv Qhia Kuv txoj Moo Zoo qhia peb hais tias ua Khetos cov thwj tim, peb ib leeg yuav tsum tsis txhob muab ib leeg piv rau leej twg li. Nej rab peev xwm ntawm sab ntsuj plig yog ib qho txiaj ntsim tshwj xeeb li los ntawm nej Leej Txiv Saum Ntuj Ceeb Tsheej, thiab Nws xav pab nej ua kom nej tej kev txawj loj hlob tuaj. Yeej yuav muaj ib tug uas nej pab tau kom hnov nej Leej Txiv Saum Ntuj Ceeb Tsheej txoj kev hlub. Nej rab peev xwm los saum ntuj los. Txawm hais tias tseem ceeb heev kom npaj ua tej yam uas yuav ua rau nej vam meej hauv lub ntiaj teb no, qhov hauj lwm tseem ceeb tshaj plaws thoob plaws nej lub neej yog rais los mus ua Yexus Khetos ib tug thwj tim thiab ua raws li tus Ntsuj Plig tej kev tshoov siab. Thaum nej ua li no, Vajtswv yuav foom koob hmoov rau nej lub neej, Nws yuav foom koob hmoov rau nej tsev neeg los sis tsev neeg uas nej yuav muaj, thiab Nws yuav foom koob hmoov rau Nws cov me nyuam uas nej ntsib.

Peb ua neej nyob hauv ib lub caij nyoog muaj cib fim ntau. Txawm tias peb muaj kev cov nyom ntau, kuv paub tias ib feem ntawm tej kev cov nyom no yog kom cia peb pab lwm tus neeg paub txog peb Leej Txiv Saum Ntuj Ceeb Tsheej txoj kev hlub. Thawj Tswj Hwm Nelson tau hais tias: “Thaum yav tom ntej, peb yuav pom tej kev tshwm sim txog tus Cawm Seej lub hwj chim uas zoo tshaj plaws tej uas lub ntiaj teb yeej tsis tau pom dua.” Peb yuav muaj lub cib fim saib xyuas thiab tu cov neeg uas xav tau kev pab, leej twg khawm lawv, leej twg nplij lawv lub siab, los yog xav tau kom peb nrog lawv zaum ua ke nyob twj ywm xwb. Yog tias peb yuav pab lawv nqa lawv tej nra hnyav kom sib, twb yog rau ib pliag xwb los tau, ces peb yuav pom tau tej kev tshwm sim txog tus Cawm Seej lub hwj chim hauv lawv lub neej.

Ua Yexus Khetos cov thwj tim, Tsoom Haiv Neeg Ntseeg hauv Hnub Nyoog Kawg ua tau tej yam zoo hauv lub ntiaj teb. Peb qhov kev xyiv fab yuav ci rau hauv peb tej ntsej muag—ib txoj kev xyiv fab uas peb muab pub rau lwm tus neeg thaum peb hlub lawv thiab ua zoo rau lawv. Cia peb ua neeg zej zog zoo, ua neeg ntiav neeg ua hauj lwm zoo, thiab ua neeg ua hauj lwm zoo. Cia peb sim ua neeg Ntseeg Khetos zoo txhua lub sij hawm.

Tus Tswv tau txum tim Nws txoj moo zoo rov qab los kom muaj tej kab ke uas yuav tsum muaj xwv kom Leej Txiv Saum Ntuj Ceeb Tsheej cov me nyuam yuav txais tau tej kev cog lus uas muab peb khi ruaj nrees nrog rau Nws. Thaum peb pab peb cov kwv tij nus muag txhua hnub, cia peb nco qab ntsoov pab lawv khi thiab ceev tej kev khi lus nrog rau lawv Leej Txiv Saum Ntuj Ceeb Tsheej kom Nws thiaj li yuav cog lus tau tias lawv yuav txais tej koob hmoov zoo kawg hauv lub neej no thiab nyob mus ib txhis li. Tsuas muaj tej kev khi lus no vim yog txoj Kev Txum Tim Yexus Khetos txoj moo zoo thiab Nws cov yawm sij pov thawj hwj rov qab los xwb.

Los yog hais tias, peb pab tau lwm tus ua raws li lawv tej kev khi lus. Peb ib txhia tsis taug txoj kev khi lus qee zaum, thiab peb yuav tsum nco qab ntsoov hais tias rau peb Leej Txiv Saum Ntuj Ceeb Tsheej, peb yeej los muaj lub cib fim rov qab los taug txoj kev yog. Txawm tias peb txoj kev taug tsis tshua ncaj txhua lub sij hawm, tus Cawm Seej pab peb nco qab ntsoov hais tias “thaum twg [peb hloov siab lees txim] thiab [xav txais] kev zam txim tiag tiag, ces tus Tswv yuav [zam txim rau peb].”

Ib qho kev dag uas tus yeeb ncuab siv niaj hnub nim no yog ua rau peb xav thiab ntseeg hais tias peb tsis muaj peev xwm hloov tau los sis peb tsis muaj kev cia siab. Tej kev xav phem li no ua rau peb coob tug tsum tsis sim hloov mus tom ntej. Thiab yog thaum lub sij hawm no peb txoj kev hlub, peb cov lus yaum txhawb nqa, peb lub sij hawm, thiab peb txoj kev pab yuav ua rau ib tug neeg cia siab dua ib zaug ntxiv.

Tej zaum nej xav hais tias, “Ua li, tiam sis leej twg yuav txhawb pab kuv?” Thaum peb mus pab foom koob hmoov rau peb cov kwv tij nus muag, peb yuav hnov tej zaj lus tim khawv uas yuav ua rau peb haj yam muaj siab ntseeg rau ntawm tus Tswv Yexus Khetos. Tej lus tim khawv no yuav ntxiv dag zog rau peb thiab pab peb sim dua ib zaug ntxiv. Tus Vaj Ntsuj Plig Dawb Huv yuav tshoov peb lub siab thiab pab peb txais lus tim khawv ntxiv kom yeej meem tiv kom dhau peb tej kev cov nyom thiab tej kev sim siab. Thaum twg peb foom koob hmoov rau lwm tus neeg, tus Tswv haj yam muaj siab hlub tshua peb; Nws ntxiv dag zog rau peb thiab pab peb hauv peb lub neej.

Thov nco qab ntsoov hais tias tus Tswv Yexus Khetos yog nej tus Cawm Seej thiab to taub nej txhua tus zoo tag nrho. Nws paub txog qhov uas txais txoj hauj lwm hu thiab tso tej yam tseg kom mus pab Vajtswv cov me nyuam. Nws muaj lub hwj chim foom koob hmoov rau nej hauv txhua yam, yog tias nej ntseeg rau ntawm Nws thiab tsis txhob ua xyem xyav.

Kuv cov kwv tij thiab cov muam, hnub uas tus thawj tswj hwm ntawd tau kev tshoov siab kom mus xyuas ob niam tub ntawd, kuv ua tim khawv hais tias Vajtswv paub tias nkawd xav tau wb txoj kev pab. Thiab thaum kawg, ua li ntawd txhawb pab kuv ntau heev. Hnub ntawd, kuv kawm ntau yam txog tus Cawm Seej txoj kev hlub rau peb.

Kuv ua tim khawv hais tias Yexus Khetos yog lub ntiaj teb no tus Cawm Seej, hais tias Nws muaj sia nyob, thiab Nws ua neej nyob hauv lub ntiaj teb no thiab tuag theej peb sawv daws lub txhoj, thiab hais tias Nws sawv rov los kom peb thiaj yuav rov qab mus ntsib tau peb cov neeg uas twb tas sim neej lawm thiab uas tos ntsoov peb nyob ntawm daim ntaub thaiv sab nraud. Kuv paub hais tias Nws to taub nej thiab kuv yam zoo tag nrho li. Nws to taub txog peb tej kev cov nyom, thiab Nws muaj lub hwj chim pab peb hauv tej lub sij hawm uas peb tsis muaj zog. Kuv paub hais tias tus Tswv Yexus Khetos thiab peb Leej Txiv Saum Ntuj Ceeb Tsheej tau tshwm sim rau Joseph Smith pom kom thiaj txum tim txoj moo zoo rov qab los hauv hnub nyoog kawg no. Kuv paub hais tias peb tus yaj saub, Russell M. Nelson, yog tus Tswv ib tug yaj saub, thiab kuv ua tim khawv txog tej no los ntawm Yexus Khetos lub npe, amees.