Zoo Siab Txais Tos Nej rau lub Koom Txoos ntawm Kev Xyiv Fab
Vim yog peb tus Cawm Seej, Yexus Khetos, lub neej thiab txoj hauj lwm, peb muaj peev xwm—thiab yuav tsum—ua cov neeg uas muaj kev xyiv fab ntau tshaj plaws hauv lub ntiaj teb no!
Kuv tau ua kev cai raus dej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thaum Hmo Ua Ntej Christmas 1987, yuav luag 37 xyoo tas los. Yog ib hnub zoo kawg hauv kuv lub neej, thiab hauv kuv txoj kev rov qab mus cuag Vajtswv, thiab kuv ua kuv cov phooj ywg uas tau npaj kuv thiab coj kuv los ua kev cai raus dej tsaug.
Txawm hais tias nej ua kev cai raus dej nag hmo los sis ntau xyoo dhau los, txawm tias nej sib ntsib hauv ib lub tsev teev ntuj loj tsawv los sis ib lub tsev pheeb suab ntaub, txawm tias nej txais lub cim nco txog tus Cawm Seej ua lus Thaib los sis Swahili, kuv xav hais rau nej hais tias, zoo siab txais tos nej rau lub koom txoos ntawm kev xyiv fab! Zoo siab txais tos nej rau lub koom txoos ntawm kev xyiv fab!
Lub Koom Txoos ntawm Kev Xyiv Fab
Vim yog Leej Txiv Saum Ntuj Ceeb Tsheej txoj hau kev rau Nws cov me nyuam txhua tus, thiab vim yog peb tus Cawm Seej, Yexus Khetos, lub neej thiab txoj hauj lwm, peb muaj peev xwm—thiab yuav tsum—ua cov neeg uas muaj kev xyiv fab ntau tshaj plaws hauv lub ntiaj teb no! Txawm tias peb muaj kev ntxhov siab los sis teeb meem nyuaj siab npaum li cas hauv lub neej no los, peb muaj kev xyiv fab thiab kev kaj siab lug tau vim yog peb txoj kev cia siab rau ntawm Khetos thiab qhov uas peb to taub zoo txog txoj kev cawm seej, txoj kev zoo siab.
Nyob hauv txhua zaj lus uas nws hais txij thaum nws los ua tus Thawj Tswj Hwm ntawm lub Koom Txoos, tus Tswv Thawj tug Thwj Tim, Thawj Tswj Hwm Russell M. Nelson, tau hais txog txoj kev xyiv fab uas los ntawm qhov uas tsom ntsoov Yexus Khetos. Nws hais zoo kawg hais tias: “Kev xyiv fab yeej los ntawm Nws thiab muaj kev xyiv fab vim muaj Nws. … Haiv Neeg Ntseeg hauv Hnub Nyoog Kawg xav tias Yexus Khetos yog kev xyiv fab!”
Peb yog mej zeej ntawm Yexus Khetos lub Koom Txoos. Peb yog mej zeej ntawm lub koom txoos ntawm kev xyiv fab! Thiab thaum peb sib sau ua ke txhua Hnub Caiv kom txais lub cim nco txog thiab teev tiam lub Hauv Paus ntawm kev xyiv fab tsim nyog uas peb muaj kev xyiv fab! Peb sib sau ua ke nrog cov ntseeg hauv peb ceg ntseeg los sis pawg ntseeg kom ua koob tsheej nco txog tus Tswv Pluas Hmo, peb txoj kev dim ntawm kev txhaum thiab kev tuag, thiab tus Cawm Seej txoj kev tshav ntuj! Nyob no peb tuaj nrog lwm cov ntseeg koom ua ke txais kev xyiv fab, kev so, kev zam txim, kev ua Vajtswv tsaug, thiab kev nrog koom siab ua nrhiav tau dhau ntawm Yexus Khetos!
Nej puas muaj kev xyiv fab txog Yexus Khetos li hais no? Nej puas coj kev xyiv fab nrog nej tuaj koom thiab? Tej zaum nej xav tias nej tsis tas ua dab tsi, los sis tej zaum nej swm tej yam uas tau ua ntev ntev lawm. Tiam sis peb sawv daws kuj pab tau, txawm tias peb muaj hnub nyoog li cas los sis ua hauj lwm pab dab tsi, peb pab tau kom peb tej kev sib ntsib noj lub cim nco txog muaj kev xyiv fab, tsom ntsoov tus Khetos, thiab coj kev tswm seeb.
Kev Xyiv Fab Yam Tswm Seeb Li
Kev xyiv fab yam tswm seeb li los? “Puas muaj tiag?” tej zaum nej yuav noog. Muaj los mas! Peb hlub, hwm, thiab saib peb tus Vajtswv rau nqi, thiab peb txoj kev tswm seeb los ntawm ib lub siab ntsws uas muaj kev xyiv fab vim yog Khetos txoj kev hlub, hlub tshua, thiab cawm seej! Peb yuav tsum muaj tej kev sib ntsib noj lub cim nco txog uas muaj kev xyiv fab yam tswm seeb li rau tus Tswv ntau dua.
Tsis kav, rau coob tug ntseeg, kev tswm seeb tsuas yog li no: quav npab, nyo hau, qi qhov muag, thiab nyob twj ywm—tsis paub kawg li! Tej zaum qhia kom ua li no zoo heev rau cov me nyuam yau uas txhoj puab me ntsis, tiam sis thaum peb loj hlob tuaj thiab kawm ntxiv, peb pom tau hais tias kev tswm seeb yeej loj dua qhov no. Yog tias tus Cawm Seej nrog peb nyob no peb puas yuav coj zoo li no? Tsis coj li no, vim “[Nws] nrog nraim peb ua rau peb xyiv fab zoo tag nrho”!
Rau peb coob tug qhov uas hloov peb tej kev sib ntsib noj lub cim nco txog yuav yog ib yam uas peb yuav tsum xyaum thiaj ua tau.
Mus Koom Piv rau Teev Tiam Vajtswv
Peb tsis sib sau ua ke thaum Hnub Caiv kom tuaj koom noj lub cim nco txog xwb thiab khij tias peb tau ua li ntawd. Peb sib sau ua ke kom thiaj teev tiam Vajtswv. Ob qho no yeej sib txawv heev. Tuaj koom txhais tias peb tuaj es nyob ntawd. Tiam sis kom teev tiam Vajtswv yog kev txhob txwm qhuas thiab hawm Vajtswv es peb thiaj hloov tau hauv nruab siab!
Nyob Saum lub Sam Thiaj thiab Hauv Pawg Ntseeg Mloog
Yog tias peb sib sau ua ke nco txog tus Cawm Seej thiab txoj kev txhiv dim Nws muab pub rau peb, peb tej ntsej muag yuav tsum qhia tias peb xyiv fab thiab ris Vajtswv txiaj npaum li cas! Muaj ib zaug Txwj Laug F. Enzio Busche qhia txog thaum nws ua ceg ntseeg tus thawj tswj hwm thiab ib tug me nyuam tub saib nws zaum saum lub sam thiaj thiab noog nrov nrov hais tias, “Vim li cas tus txiv neej ntawd hnyav?” Lawv cov uas zaum saum lub sam thiaj—cov hais lus, cov thawj coj, pawg hu nkauj—thiab lawv cov uas sib sau ua ke hauv pawg mloog qhia tias lawv xyiv fab npaum li cas hauv lawv tej ntseg muag!
Kev Hu Nkauj
Thaum peb hu nkauj, peb puas sib koom ua ke kom qhuas peb tus Vajtswv thiab Vaj Ntxwv, txawm tias peb lub suab zoo npaum li cas, los sis peb puas hais lus ntxhi xwb? Cov vaj lug kub hais tias cov neeg ncaj ncees hu nkauj yog ib txoj kev thov txog Vajtswv thiab ua rau Nws zoo siab heev. Cia peb hu nkauj! Thiab qhuas Nws!
Cov Lus Hais thiab cov Lus Tim Khawv
Peb cov lus hais thiab cov lus tim khawv yuav tsum tsom ntsoov Leej Txiv Saum Ntuj Ceeb Tsheej thiab Yexus Khetos thiab tej txiv uas muaj los vim ua neej raws li txoj moo zoo, tej txiv uas “qab tshaj txhua yam uas qab.” Ces peb kuj “noj cov txiv no kom txog thaum [peb] tsau plab, xwv kom [peb] tsis tshaib, thiab … tsis nqhis,” thiab peb tej nra cia li sib zuj zus, dhau ntawm leej Tub txoj kev xyiv fab.
Lub Cim Nco Txog
Lub ntsiab ntawm peb tej kev sib ntsib yog txoj koob hmoov uas txais lub cim nco txog, mov mog thiab dej, uas piv rau tus Tswv lub txiaj ntsim theej txhoj thiab yog vim li ntawd peb thiaj sib sau ua ke. Nov yog “ib lug sij hawm dawb ceev kom ua rau sab ntsuj plig rov qab muaj zog”, thaum peb rov qab ua pov thawj tias peb ris Yexus Khetos lub npe, thiab rov qab khi lus tias peb yuav nco ntsoov tus Cawm Seej thib coj raws li Nws tej lus txib.
Qee zaum, peb lub siab hnyav thiab peb ris nra hnyav thaum noj lub cim nco txog. Hos lwm zaum, peb tsis muaj kev txhawj xeeb los sis kev nyuaj siab li cas. Thaum peb ua tib zoo mloog txoj kev foom koob hmoov rau cov mov mog thiab cov dej thiab noj thiab haus tej cim ntawd, tej zaum peb yuav xav txog tus Cawm Seej txoj kev txi, Nws tej kev txom nyem hauv Khexemanes, Nws txoj kev ntxhov siab saum tus ntoo khaub lig, thiab tej kev tu siab thiab tej kev mob uas Nws nyiaj sawv cev tam peb sawv daws. Ua li ntawd yuav daws peb sab ntsuj plig, thaum peb muab peb tej kev txom nyem pub rau Nws. Hos lwm zaus, peb yuav xav tsis thoob thiab muaj txoj kev xyiv fab zoo kawg nkaus vim yog Yexus lub txiaj ntsim zoo kawg nkaus tau foom koob hmoov rau peb lub neej thiab peb lub neej nyob mus ib txhis! Peb yuav zoo siab kawg txog tej yam uas yuav muaj thaum yav tom ntej—peb yuav rov qab los koom ua ke nrog peb Leej Txiv thiab tus Cawm Seej uas tau sawv rov los.
Tej zaum peb xav tias lub ntsiab ntawm txoj kev noj lub cim nco txog yog zaum twj ywm thiab xav txog saib peb uas yuam kev li cas lub lis tiam ntawd. Tiam sis cia peb tsis txhob ua li ntawd ntxiv. Thaum peb nyob twj hwm ntawd, cia peb xav txog saib tus Tswv tau caum peb tsis tu tsis tseg li cas lub lim tiam ntawd! Peb xav txog saib qhov uas “nrhiav kev xyiv fab ntawm kev hloov siab lees txim txhua hnub” txhais li cas. Peb ua Vajtswv tsaug rau tej lub sij hawm uas tus Cawm Seej tau pab peb kov yeej peb tej kev cov nyom thiab peb tej kev muaj yeej thiab tej lub sij hawm uas peb xav txog Yexus txoj kev tshav ntuj, kev zam txim, thiab lub hwj chim uas muab zog rau peb kov yeej peb tej kev txom nyem thiab ua siab ntev ris peb nra.
Yog los mas, peb xav txog tej kev txom nyem thiab tej kev raug tsim txom uas peb tus Txhiv Dim raug vim yog peb tej kev txhaum, thiab uas li ntawd ua rau peb xav tob tob hauv nruab siab. Tiam sis qee zaum peb dim tsis tau tej ntawd—hauv lub vaj, nyob ntawm tus ntoo khaub lig, hauv lub qhov ntxa. Peb tsis ua tib zoo xav txog txoj kev xyiv fab uas los ntawm lub qhov ntxa qhib plho, txoj kev kov yeej kev tuag, thiab Khetos txoj kev muaj yeej txhua yam uas tab kaum peb rov qab mus cuag Vajtswv saum ntuj ceeb tsheej. Txawm tias peb los kua muag vim yog kev tu siab los sis kev ris Vajtswv txiaj thaum noj lub cim nco txog, cia peb xav tsis thoob txog Leej Txiv lub txiaj ntsim rau peb uas yog Nws Leej Tub!
Tej Niam Txiv uas Muaj Me Nyuam Me los sis Muaj tej Kev Xav Tau Tshwj Xeeb
Nim no, rau tej niam txiv uas muaj me nyuam me los yog muaj tej kev xav tau tshwj xeeb, tsis tshua muaj tej lub sij hawm uas ntsiag to kom thiaj xav tob tob thaum noj lub cim nco txog. Tiam sis tej lub sij hawm thoob plaws lub lim tiam, nej yuav qhia tau nej cov me nyuam thiab ua yam ntxwv txog txoj kev hlub, ris Vajtswv txiaj, thiab kev xyiv fab uas nej muaj rau tus Cawm Seej thaum nej saib xyuas thiab tu Nws cov me nyuam yaj. Ua li no tsis nkim sij hawm hlo li. Vajtswv paub txog nej txhua tus.
Tsev Neeg, Pawg Ntseeg, thiab Ceg Ntseeg tej Pawg Sab Laj
Ib yam li nyob hauv tsev, peb xav ua koj peb tej sij hawm nyob ntawm tshawj zoo zuj zus tuaj thiab. Hauv tsev neeg tej kev sib sab laj, peb sib tham tau saib txhua tus yuav ua li cas pab kom txais tos sawv daws rau lub koom txoos ntawm kev xyiv fab! Peb npaj siab thiab xav tias yuav muaj kev xyiv fab nyob tom tshawj.
Pawg ntseeg pawg sab laj tsim tau ib qho chaw puag ncig uas muaj kev xyiv fab yam tswm seeb li thaum noj lub cim nco txog, es txheeb xyuas tej cim uas yuav pab cov ntseeg ua li ntawd.
Kev Xyiv Fab
Kev xyiv fab yeej txawv ib leeg rau ib leeg. Rau ib txhia neeg, tej zaum yuav zoo siab hu tib neeg thaum lawv tuaj rau hauv lub tshawj. Rau lwm tus neeg, tej zaum yuav pab tib neeg nyob nyog thaum luag nyav thiab zaum npuab lawv ua siab zoo rau lawv. Rau lawv cov uas xav hais tias lawv nyob ntawm ntug, qhov uas txais tos lawv li no tseem ceeb heev. Thaum kawg, peb noog peb tus kheej saib tus Cawm Seej yuav xav kom peb txoj kev sib ntsib txais lub cim nco txog zoo li cas. Nws yuav xav kom peb txais tos, saib xyuas, pab, thiab hlub Nws cov me nyuam li cas? Nws xav kom peb xav li cas thaum peb tuaj txais dag zog dhau ntawm kev nco txog thiab kev teev tiam Nws?
Lus Kaw
Thaum kuv nyuam qhuav ua ntseeg tshiab, kuv nrhiav tau kev xyiv fab los ntawm Yexus Khetos, thiab qhov ntawd hloov kuv lub neej. Yog tias nej tseem tsis tau nrhiav kev xyiv fab no, cia li nrhiav kom tau. Nov yog ib txoj kev caw kom txais tus Cawm Seej lub txiaj ntsim ntawm kev kaj siab lug, kev kaj, thiab kev xyiv fab—ua koob tsheej nco txog qhov ntawd, xav tsis thoob txog, thiab muaj kev xyiv fab txhua Hnub Caiv.
Amoos hauv Phau Ntawv Maumoos qhia tawm kuv lub siab thaum nws hais tias:
“Puas tsim nyog uas peb yuav zoo siab heev? Muaj tseeb tiag, kuv hais rau nej tias, twb tsis tau muaj neeg uas tsim nyog zoo siab heev npaum li peb, txij thaum lub ntiaj teb chiv keeb los; muaj tseeb tiag, thiab ua rau kuv txoj kev xyiv fab puv npo, twb ua rau kuv khav txog kuv tus Vajtswv; vim nws muaj hwj chim tag nrho, muaj tswv yim tag nrho, thiab muaj kev to taub tag nrho; nws to taub txhua yam, thiab nws yog ib Tug uas muaj kev hlub tshua, nws thiaj muab txoj kev cawm seej, rau cov uas yuav hloov siab lees txim thiab ntseeg nws lub npe.
“Nim no yog tias hais li no es ho yog khav theeb, txawm li ntawd los kuv yuav khav; vim qhov no yog kuv txoj sia thiab kuv txoj kev kaj, … kuv txoj kev xyiv fab thiab kuv txoj kev cawm seej.”
Zoo siab txais tos nej rau lub koom txoos ntawm kev xyiv fab! Los ntawm Yexus Khetos lub npe, amees.