Ua Kom Peb lub Siab Xav Koom Nws lub Siab Xav

Muaj ib zaug, Yexus hais txog ib tug tub luam uas nrhiav kom tau tej “hlaws zoo kawg.” Thaum kawg, tus tub luam nrhiav tau ib lub hlaws uas “muaj nqi heev.” Txawm yog li ntawd, kom thiaj yuav tau lub hlaws muaj nqi ntawd, tus tub luam yuav tsum muab tag nrho nws cov khoom qub txeeg qub teg muag, es nws zoo siab ua li ntawd tam sid.

Dhau ntawm zaj lus piv txwv no, tus Cawm Seej qhia tias lub ntuj ceeb tsheej lub nceeg vaj zoo ib yam li ib lub hlaws muaj nqi heev, twb yog qhov muaj nqi ntau tshaj plaws thiab uas peb yuav tsum ntshaw yuav ntau tshaj txhua yam. Qhov uas tus tub luam ntawd muab nws tej khoom qub txeeg qub teg muag tam sid kom thiaj yuav tau lub hlaws muaj nqi ntawd qhia meej meej tias peb yuav tsum ua kom peb lub siab xav nrog koom tus Tswv lub siab xav thiab ua txhua yam uas peb ua tau hauv lub neej no kom thiaj txais tau tej koob hmoov nyob mus ib txhis li hauv Vajtswv lub nceeg vaj.

Kom thiaj tsim nyog txais lub nqi zog zoo kawg nkaus no, peb yuav tsum rau rau siab muab tej yam uas peb lub siav xav tso tseg rau ib sab thiab tso peb tej kev txhaum tseg kom peb thiaj muab siab npuab rau tus Tswv thiab rau Nws tej kev dawb huv. Tus Thwj Tim Povlauj hais txog tej kev coj dawb huv no hais tias “muaj tus Khetos lub siab xav.” Yexus Khetos coj yam ntxwv rau peb txog qhov no, uas txhais tau tias “[ua] tej yam txhua lub sij hawm uas ua rau [tus Tswv] zoo siab” hauv peb lub neej, los sis ib yam li ib txhia neeg hais niaj hnub nim no “ua tej yam zoo rau tus Tswv.”

Hais txog txoj moo zoo, “[ua] tej yam txhua lub sij hawm uas ua rau [tus Tswv] zoo siab” hais txog ua kom peb lub siab xav nrog koom Nws lub siab xav. Tus Cawm Seej qhia hais tias txoj ntsiab cai no tseem ceeb npaum li cas thaum Nws qhia Nws cov thwj tim hais tias:

“Rau qhov kuv los saum ntuj los tsis yog los ua raws li kuv lub siab, tiam sis kuv los ua raws li tus uas txib kuv los lub siab nyiam.

“Tus uas txib kuv los kom kuv saib cov neeg uas nws pub rau kuv lawm, tsis txhob cia ib tug twg ploj li, thiab thaum txog hnub kawg kuv yuav tsa lawv txhua tus sawv hauv qhov tuag rov qab los.

“Rau qhov kuv Txiv xav kom txhua tus uas pom Leej Tub thiab ntseeg nws lawm muaj txoj sia ntev dhawv mus ib txhis. Thiab thaum txog hnub kawg kuv yuav tsa lawv sawv hauv qhov tuag rov qab los.”

Tus Cawm Seej yeej los ua raws li Leej Txiv lub siab xav thaum Nws ua kom Nws lub siab xav nrog koom Leej Txiv lub siab xav. Muaj ib zaug Nws hais tias, “Thiab tus uas txib kuv los yeej nrog kuv nyob; nws tsis tso kuv tseg ib zaug li, rau qhov kuv ua txhua yam raws li nws lub siab nyiam xwb.” Thaum tus Cawm Seej qhia tus Yaj Saub Joseph Smith txog tej kev ntxhov siab thiab tej kev txom nyem mob siab ntawm txoj Kev Theej Txhoj, tus Cawm Seej hais tias:

“Vim saib seb, kuv, Vajtswv, tau raug tej yam no rau tag nrho sawv daws, xwv kom lawv yuav tsis raug txom nyem yog hais tias lawv hloov siab lees txim; …

“Txoj kev raug txom nyem uas tau ua rau kuv, uas twb yog Vajtswv, tus zoo tshaj plaws ntawm tag nrho sawv daws, kom tshee hnyo vim yog txoj kev mob, thiab los ntshav ntawm txhua lub qhov hws, thiab raug txom nyem tag nrho sab cev nqaij daim tawv thiab sab ntsuj plig—thiab tau ua kom kuv tsis xav haus lub khob dej iab, thiab tsum—

“Txawm li ntawd los, cia Leej Txiv tau lub yeeb koob, thiab kuv tau haus thiab ua tiav kuv tej kev npaj rau noob neej.”

Thaum peb nyob hauv lub ntiaj teb no, feem ntau peb saib tej yam uas peb xav tias peb paub, tej yam uas peb xav tias zoo tshaj plaws, thiab tej yam uas peb saib rau nqi ntau dua qhov uas Leej Txiv Nyob Mus Ib Txhis paub tiag, qhov uas zoo tshaj plaws mus ib txhis li, thiab tej yam uas raug rau Vajtswv cov me nyuam zoo tshaj plaws hauv Nws lub tswv yim. Qhov teeb meem no yeej muaj kev cov nyom, twb yog thaum xav txog tej lus qhia qhov uas yuav muaj los yav tom ntej hauv tej vaj lug kub hais txog niaj hnub nim no: “Nco ntsoov hais tias thaum lub caij nyoog kawg … tej neeg nyias yuav xav txog nyias xwb, … nyiam kev lom zem heev dua nyiam Vajtswv txoj kev cai.”

Ib qho uas qhia tias muaj li no niaj hnub nim no yog qhov uas loj hlob tuaj hauv lub ntiaj teb no, uas yog tib neeg coob tug xav txog lawv tus kheej nkaus xwb thiab khav hais tias, “Txawm li cas los, kuv coj raws li kuv qhov tseeb los yog kuv ua raws li kuv lub siab nyiam xwb.” Ib yam li tus Thwj Tim Povlauj hais, lawv “tsuas xav txog lawv tej hauj lwm xwb, lawv tsis quav ntsej Yexus Khetos tej hauj lwm li.” Feem ntau xav li no yog txhais tau tias “qhia yus tus kheej yam tseeb tseeb li” rau lawv cov uas ua tej yam rau lawv tus kheej nkaus xwb, xaiv tej yam lawv nyiam txhua lub sij hawm, los sis ua tej yam los sis coj cwj pwm uas tsis phim Vajtswv lub tswv yim thiab Nws lub siab xav rau lawv. Yog tias peb cia peb lub siab lub ntsws xav li no, ces peb yuav tsim tej kev dawm ko taw rau peb tus kheej es ua rau peb yuav tsis tau lub hlaws muaj nqi uas Vajtswv npaj tseg rau Nws cov me nyuam—lub neej nyob mus ib txhis li.

Txawm tias muaj tseeb uas peb txhua tus nyias taug nyias txoj kev khi lus, rau rau siab tsom ntsoov Yexus Khetos los, peb yuav tsum ceev faj kom tsis txhob raug ntxias ua raws li tej kev xav phem uas hais no hauv peb lub neej. Txwj Laug Quentin L. Cook hais tias “coj ua zoo li tus Khetos yeej tseem ceeb dua qhov uas coj raws li yus lub siab nyiam.”

Kuv cov phooj ywg, thaum peb xaiv kom Vajtswv ua tus kav peb lub neej thiab kov yeej tej yam qia dub uas peb ua rau peb tus kheej, peb loj hlob tuaj tau rau ntawm txoj kev ua thwj tim thiab muaj zog ntau dua kom peb lub siab xav nrog koom tus Cawm Seej lub siab xav. Hos qhov fab ntxeev yog, thaum peb tsis cia Vajtswv txoj kev kav peb lub neej, peb nyob peb tus kheej nkaus xwb, thiab tsis muaj tus Tswv tej kev tshoov siab, peb yeej keb tau yuav luag txhua yam peb ua los tsis ua. Peb kuj keb tau peb tus kheej thaum peb ua tej yam peb ua raws li peb lub siab xav, hais tias, “Kuv ua kuv.”

Muaj ib zaug, thaum tus Cawm Seej qhia Nws tej lus, ib txhia neeg, twb yog cov Falixais uas muab hlob, xyeej Nws cov lus thiab hais tias lawv yog Anplaham cov me nyuam, es hais li ntawd lawv xav tias lawv muaj cai tshwj xeeb rau ntawm Vajtswv. Ua li no lawv vam khom lawv tus kheej tej kev to taub thiab tsis ntseeg tej yam uas tus Cawm Seej qhia lawv. Qhov uas cov Falixais xyeej Yexus li ntawd yog puav pheej hais tias lawv tus xeeb ceem muab hlob li ntawd tsis tseg chaw hauv lawv lub siab rau tus Cawm Seej cov lus thiab Vajtswv txoj kev. Teb lawv, Yexus tshaj tawm hais tias yog tias muaj tseeb uas lawv yog Anplaham cov me nyuam ntawm txoj kev sib khi lus, lawv yuav ua Anplaham tej hauj lwm, twb yog vim “Anplaham tus Vajtswv” tab tom sawv ntawm lawv tom hauv ntej thiab qhia lawv qhov tseeb tam sim ntawd.

Cov kwv tij thiab cov muam, qhov uas tib neeg xav li no thiab “ua raws li lawv lub siab xav” tsis ua “tej yam txhua lub sij hawm uas ua rau tus Tswv zoo siab” tsis yog ib yam tshiab hauv peb lub caij nyoog xwb. Yeej muaj tib neeg yav thaum ub uas xav li no thiab ib tiam dhau ib tiam txoj kev xav li no ua rau cov txawj ntse dig muag thiab ua rau Vajtswv cov me nyuam coob tug ntxhov siab thiab qaug zog. Muaj tseeb tiag, qhov kev xav no yog tus yeeb ncuab ib rooj cuab qub; yog ib txoj kev dag uas ua tib zoo coj Vajtswv cov me nyuam tawm ntawm txoj kev khi lus tseeb thiab coj ruaj nrees. Yeej muaj tej yam xws li keeb, chaw nyob, thiab tej kev cov nyom ntawm lub cev nqaij daim tawv los sis lub paj hlwb uas raug rau peb txoj kev taug mus hauv lub neej no los, hais txog tej yam uas tseem ceeb tshaj plaws, muaj ib qho chaw hauv nruab siab uas peb muaj kev ywj siab xaiv saib peb puas yuav ua raws li txoj kev uas tus Tswv npaj rau peb taug hauv peb lub neej no los tsis ua. Muaj tseeb tiag, “Nws tau qhia txoj kev thiab tau coj peb kev, Thiab txhua yam [qhia li ntawd].”

Ua Khetos cov thwj tim, peb xav taug txoj kev uas Nws tseg rau peb taug thaum Nws tseem ua neeg nyob. Tsis yog peb xav ua raws li Nws lub siab xav thiab lub siab nyiam xwb tiam sis peb xav yoog Nws ua tej yam Nws ua. Thaum peb rau rau siab ceev txhua txoj kev khi lus uas peb tau khi thiab ua neej raws li txhua lo lus uas Vajtswv lub qhov ncauj hais xwb,” Vajtswv yuav pov hwm peb kom tsis txhob qaug rau lub ntiaj teb no tej kev txhaum thiab tej kev yuam kev—tej kev xav yuam kev uas yuav coj peb tawm ntawm tej hlaws muaj nqi ntawd.

Kuv tau pom coob tug neeg uas yog Khetos cov thwj tim uas qhov uas lawv txiav txim siab ua tej hauj lwm rau tus Tswv thiab ua tej yam uas tus Tswv lub siab xav thiab lub siab nyiam tshoov kuv lub siab tiag. Kuv paub ib tug tub hluas uas tsis tshua paub saib nws puas yuav mus ua tub txib tiam sis thaum kawg nws txiav txim siab yuav mus ua hauj lwm pab tus Tswv thaum nws hnov lub Koom Txoos ib tug thawj coj hlob ua tim khawv txog txoj kev mus ua tub txib thiab tej yam dawb ceev uas muaj los rau nws thaum nws ua tub txib.

Ua nws cov lus, tus tub hluas no, uas twb mus ua tub txib rov qab los lawm, hais tias: “Thaum kuv mloog tus Thwj Tim ntawm tus Cawm Seej Yexus Khetos ua tim khawv, kuv txawm paub tias Vajtswv hlub kuv, thiab kuv xav qhia txoj kev hlub ntawd nrog rau lwm tus neeg. Thaum lub sij hawm ntawd kuv paub tias kuv yuav tsum ua tub txib txawm tias kuv ntshai, tsis paub txhua yam, thiab txhawj xeeb me ntsis. Kuv tso siab rau Vajtswv tej koob hmoov thiab tej lus cog tseg rau Nws cov me nyuam. Niaj hnub nim no, kuv yog ib tug neeg tshiab; kuv muaj lus tim khawv tias txoj moo zoo muaj tseeb thiab Yexus Khetos lub Koom Txoos txum tim rov qab los hauv lub ntiaj teb no.” Tus tub hluas no xaiv tus Tswv txoj kev thiab rais los mus ua ib tug yam ntxwv ntawm ib tug thwj tim tseeb.

Muaj ib tug ntxhais hluas uas txiav txim siab kom tsis ua txhaum nws tej kev cai hnav ris tsho thaum nws qhov chaw ua hauj lwm hais kom nws hnav ris tsho tsis npog nws lub cev zoo. Nws to taub hais tias nws lub cev yog ib lub txiaj ntsim dawb ceev los ntawm peb Leej Txiv Saum Ntuj Ceeb Tsheej thiab ib qho chaw rau tus Ntsuj Plig nyob, ces nws xav coj raws li ib txoj ntsiab cai uas siab dua lub ntiaj teb tej ntsiab cai. Lwm tus neeg pom tias nws ua neej raws li qhov tseeb ntawm Yexus Khetos txoj moo zoo thiab qhuas nws, thiab nws tsis poob hauj lwm, uas luag tias yuav poob xwb xwb li. Vim tus ntxhais hluas no kom ua raws li qhov uas tus Tswv lub siab xav thiab nyiam, tsis ua raws li lub ntiaj teb ua, tus ntxhais hluas no thiaj tso siab ua raws li nws tej kev khi lus thaum yuav tsum xaiv ua ib yam nyuaj.

Cov kwv tij thiab cov muam, txhua txhua hnub peb yuav tsum txiav txim siab ib yam li no. Yeej yuav tsum muaj siab loj thiab kam kom thiaj nres ib pliag thiab xav zoo zoo hauv lub nruab siab kom lees tias muaj tej kev qaug zog uas ua rau peb ua raws li Vajtswv lub siab nyiam, thiab thaum kawg ua raws li Nws txoj kev ua, tsis ua raws li peb txoj kev. Txoj kev sim siab loj tshaj plaws hais txog peb txoj kev ua thwj tim yog saib peb puas kam tso peb lub neej qub tseg thiab muab peb lub siab lub ntsws pub rau Vajtswv kom peb lub siab xav nrog koom Nws lub siab xav.

Ib lub sij hawm zoo kawg nkaus hauv peb lub neej muaj los thaum peb nrhiav tau txoj kev xyiv fab uas muaj los thaum peb ua tej yam txhua lub sij hawm uas “ua hauj lwm pab thiab ua rau tus Tswv zoo siab” thiab qhov uas “ua hauj lwm pab peb” rais los mus ua ib yam! Kom ua rau peb lub siab xav nrog koom tus Tswv lub siab xav peb yuav tsum ua thwj tim tiag tiag! Lub sij hawm ntawd, peb muab peb tus kheej fij rau tus Tswv, thiab peb nrog Nws koom ib lub siab. Kev nyoo ntawm sab ntsuj plig no yeej zoo nkauj, muaj hwj chim, thiab hloov tau peb yam zoo heev.

Kuv ua tim khawv hais tias thaum peb ua raws li tus Tswv lub siab xav hauv peb lub neej ces peb yuav nrhiav tau lub hlaws muaj nqi tshaj plaws hauv lub ntiaj teb no—lub ntuj ceeb tsheej lub nceeg vaj. Kuv thov Vajtswv kom peb txhua tus, raws li peb lub sij hawm thiab peb thib, yuav muaj peev xwm hais rau peb Leej Txiv Saum Ntuj Ceeb Tsheej thiab tus Cawm Seej Yexus Khetos hais tias “qhov twg yog qhov zoo rau Koj los yeej yog qhov zoo rau kuv thiab.” Kuv hais tej no los ntawm Yexus Khetos lub npe zoo, amees.