Yexus Khetos cov Lus Qhuab Qhia uas Meej

Peb txhua tus muaj ib tug uas peb hlub hauv peb tsev neeg uas raug Dab Ntxwg Nyoog tej kev ntxias thiab tej kev sim siab, tus uas tsim kev puas tsuaj, tus uas xav ua kom tag nrho Vajtswv cov me nyuam tu siab. Muaj ntau hmo uas peb feem coob pw tsis tsaug zog. Peb twb sim txhawb nqa cov neeg uas pheej hmoo kom lawv muaj txhua yam uas pab tau lawv zoo. Peb twb thov Vajtswv kom pab lawv. Peb hlub lawv. Peb twb coj yam ntxwv zoo rau lawv.

Amas, ib tug yaj saub puag thaum ub uas muaj tswv yim, twb raug kev sim siab li no thiab. Cov neeg uas nws coj thiab hlub pheej raug ib tug yeeb ncuab tawm tsam, tiam sis lawv tseem sim tu cov me nyuam ncaj ncees hauv ib lub ntiaj teb uas ua phem ua qias. Amas twb cia siab rau ib yam uas ntshe tej lub sij hawm peb tsis xav txog thiab tsis siv ntau. Nws tau thov Vajtswv pab.

Amas paub tias yog Vajtswv yuav pab, cov uas nws coj yuav tsum hloov siab lees txim, ib yam li nws cov yeeb ncuab. Yog li ntawd, nws twb siv ib txoj kev txawv kom tawm tsam qhov no.

Phau Ntawv Maumoos qhia li no tias: “Thiab nim no, vim txoj kev qhia txog txoj lus muaj hwj chim coj tau cov neeg mus ua tej yam uas ncaj ncees—muaj tseeb tiag, txoj kev qhia txog txoj lus muaj hwj chim hloov cov neeg lub siab xav tshaj rab ntaj, los sis tshaj lwm yam huv tib si, uas tau tshwm sim rau lawv—yog li ntawd Amas thiaj xav tias tsim nyog rau lawv sim lub hwj chim ntawm Vajtswv txoj lus.”

Vajtswv txoj lus yog cov lus qhuab qhia uas Yexus Khetos thiab Nws cov yaj saub qhia. Amas paub tias cov lus qhuab qhia muaj hwj chim heev.

Nyob hauv tshooj 18 ntawm phau Lus Qhuab Qhia thiab Kev Khi Lus, tus Tswv tau qhia txog lub hauv paus ntawm Nws cov lus qhuab qhia:

“Vim saib seb, kuv txib kom tag nrho neeg qhov txhia chaw hloov siab lees txim. …

“Vim, saib seb, tus Tswv neb tus Txhiv Dim tau raug kev tuag ntawm sab cev nqaij daim tawv; yog li ntawd nws tau raug tag nrho tib neeg tej kev mob, xwv kom tag nrho tib neeg yuav hloov siab lees txim thiab los cuag nws.

“Thiab nws tau sawv hauv qhov tuag rov qab los, xwv kom nws yuav coj tau tag nrho tib neeg los cuag nws, yog tias lawv hloov siab lees txim.”

“Thiab neb yuav txhos caug ntua thiab teev tiam Leej Txiv los ntawm kuv lub npe.

“… Nej cia li hloov siab lees txim thiab los ua kev cai raus dej, los ntawm Yexus Khetos lub npe.”

“Tuav kuv lub npe thov Leej Txiv los ntawm txoj kev ntseeg, hais tias neb yuav tau txais, ces neb yuav muaj tus Vaj Ntsuj Plig Dawb Huv.”

“Thiab nim no, tom qab neb tau txais qhov no, neb yuav tsum ua raws li kuv tej lus txib thaum ua txhua yam tsav.”

“Cia li ris Khetos lub npe, thiab ua zoo hais qhov tseeb.

“Thiab tag nrho cov uas hloov siab lees txim thiab ua kev cai raus dej los ntawm kuv lub npe, uas yog Yexus Khetos, thiab nyiaj mus kom txog thaum kawg, cov ntawd yuav txais kev cawm dim.”

Nyob hauv tej nqe vaj lug kub no, tus Cawm Seej coj yam ntxwv zoo tag nrho txog qhov uas peb yuav tsum qhia Nws cov lus qhuab qhia li cas. Cov lus qhuab qhia no hais tias kev ntseeg tus Tswv Yexus Khetos, kev hloov siab lees txim, kev cai raus dej, kev txais lub txiaj ntsim Vaj Ntsuj Plig Dawb Huv, thiab kev nyiaj mus kom txog thaum kawg yeej foom koob hmoov rau tag nrho Vajtswv cov me nyuam.

Thaum peb qhia tej lub ntsiab cai no rau cov uas peb hlub, tus Vaj Ntsuj Plig Dawb Huv yuav pab peb paub qhov tseeb. Vim peb xav tau tus Vaj Ntsuj Plig Dawb Huv tej kev tshoov siab, peb yuav tsum tsis txhob twv txog yav tom ntej los sis qhia tias peb xav li cas txog tej yam uas tsis nyob hauv cov lus qhuab qhia tseeb.

Yuav nyuaj ua li no thaum yus hlub tus neeg uas yus sim pab. Tej zaum tus ntawd tsis quav ntsej txog cov lus qhuab qhia uas nws twb kawm lawm. Peb raug ntxias los sim ib yam tshiab los sis tseem ceeb heev. Tiam sis tus Vaj Ntsuj Plig Dawb Huv yuav qhia qhov tseeb tsuas yog thaum peb ceev faj thiab ua tib zoo tsis txhob qhia tej yam uas tsis yog cov lus qhuab qhia tseeb. Ib qho uas pab tau peb kom tsis txhob qhia tej lus qhuab qhia cuav yog kom qhia tej lus meej meej xwb. Thaum qhia meej meej li ntawd, yuav tsis xiam ub no.

Thaum peb qhia cov lus qhuab qhia uas cawm neeg txoj sia meej thaum ntxov, ces cov me nyuam yuav tsis ntseeg tus dab phem tej kev ntxias, vim lawv twb kawm qhov tseeb ntev tas los ua ntej social media, cov phooj ywg, thiab lawv tej teeb meem yuav ua rau lawv tsis ntseeg. Peb yuav tsum siv txhua lub cib fim kom qhia Yexus Khetos cov lus qhuab qhia rau cov me nyuam. Tej lub sij hawm qhia lawv yeej muaj nqis heev thiab peb ua tsawg dua li tus dab phem tawm tsam lawv. Txhua zaus nej qhia cov lus qhuab qhia rau nej cov me nyuam, muaj ntau zaus uas cov yeeb ncuab hais tej zaj thiab xa duab uas tsim txom tej lus tseeb ntawd los sis qhia lawv kom tsis txhob mloog tej lus tseeb ntawd.

Tej zaum nej ib txhia xav paub seb puas zoo dua yog nej sib raug zoo nrog nej cov me nyuam thaum nej muaj kev lom zem xwb, los sis nej yuav nug seb tus me nyuam puas pib txhawj txog tej yam uas nej qhia. Tiam sis, peb yuav tsum xav tias, “Vim tsis muaj sij hawm ntev thiab tsis muaj cib fim ntau, kuv yuav qhia cov lus qhuab qhia twg kom txhawb lawv dag zog lawv thiaj yuav kov yeej tej yam uas tawm tsam lawv txoj kev ntseeg?” Tej lus uas nej qhia hnub no yog tej lus uas lawv yuav nco ntsoov, thiab tsis ntev hnub no yuav tiav lawm.

Kuv ib txwm qhuas kuv pog koob Mary Bommeli txoj kev muaj siab xav qhia Yexus Khetos cov lus qhuab qhia. Cov tub txib tau qhia nws tsev neeg nyob hauv Switzerland thaum nws muaj 24 xyoos.

Tom qab nws ua kev cai raus dej, Mary xav koom Haiv Neeg Ntseeg nyob hauv Teb Chaws Amelikas, nws thiaj li tawm Switzerland mus rau Berlin thiab ib tug poj niam ntiav nws ua hauj lwm kom ntos ntaub rau nws tsev neeg. Mary tau nyob hauv ib chav rau cov tub qhe thiab siv nws lub ntos hauv lub tsev chav nyob.

Thaum lub sij hawm ntawd, yuav txhaum cai yog yus qhia cov lus qhuab qhia ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyob hauv Berlin. Tiam sis Mary muaj siab xav qhia tej yam uas nws twb kawm lawm. Tus poj niam thiab nws cov phooj ywg yuav koom ua ke nyob ib ncig lub ntos kom mloog Mary qhia. Nws hais txog qhov uas Leej Txiv Saum Ntuj Ceeb Tsheej thiab Yexus Khetos tau tshwm sim rau Joseph Smith pom, cov tim tswv tau los xyuas, thiab txog Phau Ntawv Maumoos. Vim nws nco txog Amas tej zaj lus, nws qhia txog Kev Sawv Rov Lus. Nws tau ua tim khawv tias tej tsev neeg nyob tau ua ke hauv lub nceeg vaj xilethi-aus.

Ntshe qhov uas Mary xav qhia lwm tus txog txoj moo zoo twb tsim teeb meem rau nws. Tsis ntev ces cov tub ceev xwm muab Mary tso hauv lub tsev rau txim. Mary tau nug tus tub ceev xwm seb tus txiav txim lub npe uas nws yuav ntsib thaum sawv ntxov yog leej twg. Nws kuj nug txog nws tsev neeg thiab nws puas yog ib tug txiv tsev zoo. Tus tub ceev xwm piav tias tus txiav txim yog ib tug uas nyiam tej yam ntawm lub ntiaj teb.

Nyob hauv lub tsev rau txim, Mary thov kom tau ib tug cwj mem qhuav thiab ib co ntawv. Hmo ntawd nws sau ib tsab ntawv rau tus txiav txim, ua tim khawv txog Yexus Khetos txoj Kev Sawv Rov Los raws li muaj hauv Phau Ntawv Maumoos, hais txog lub ntuj ntsuj plig, thiab piav txog kev hloov siab lees txim. Nws sau hais tias tus txiav txim yuav tsum muaj sij hawm xav txog nws lub neej ua ntej kev txiav txim zaum kawg. Mary sau hais tias nws paub tus txiav txim muaj ntau yam uas ua rau nws yuav tsum hloov siab lees txim, ntau yam yuav ua rau nws tsev neeg thiab nws muaj kev tu siab kawg. Thaum sawv ntxov, tom qab nws sau nws tsab ntawv, nws thov kom tus tub ceev xwm xa mus rau tus txiav txim, thiab tus tub ceev xwm pom zoo.

Tom qab ntawd, tus txiav txim hais kom tus tub ceev xwm tuaj rau nws hoob kas. Tsab ntawv uas Mary sau yeej ua pov thawj tias nws qhia cov lus qhuab qhia ntawm txoj moo zoo thiab, vim nws ua li ntawd, nws txhaum cai tiag. Tiam sis, tsis ntev tom qab ntawd tus tub ceev xwm rov qab los rau Mary chav raug kaw. Tus tub ceev xwm qhia nws tias twb muab kev liam tso tseg thiab nws mus tau. Qhov uas nws qhia txog cov lus qhuab qhia ntawm Yexus Khetos txoj moo zoo twb ua rau nws raug tso hauv lub tsev kaw. Thiab qhov uas nws qhia txog cov lus qhuab qhia ntawm kev hloov siab lees txim rau tus txiav txim ua rau nws dim lub tsev kaw.

Tsis yog zaum kawg uas Mary Bommeli qhia li no thaum lawv muab nws tso tawm. Nws tej lus uas hais txog cov lus qhuab qhia tseeb twb hais rau ntau tiam neeg uas tseem tsis tau yug los thaum muaj xwm txheej ntawd. Nws txoj kev ntseeg tias ib tug hloov siab los ntseeg tshiab muaj peev xwm qhia txog Yexus Khetos cov lus qhuab qhia yeej tau pab nws cov xeeb ntxwv muaj zog tawm tsam kev phem thiab.

Txawm yog peb qhia cov uas peb hlub txog Yexus Khetos cov lus qhuab qhia zoo, ib txhia yuav tsis ntseeg. Tej zaum yuav ua rau nej ua xyem xyav. Tej zaum nej yuav xav paub seb nej puas paub tus Cawm Seej cov lus qhuab qhia zoo txaus kom qhia taus. Thiab yog nej twb sim qhia lawm, ces tej zaum nej yuav xav paub seb vim li cas tsis pom dab tsi zoo los ntawm nej txoj kev qhia. Tsis txhob ua xyem xyav li no. Cia li tig mus rau Vajtswv kom Nws pab nej.

“Muaj tseeb tiag, thiab thov Vajtswv rau txhua yam uas koj xav tau noj tau haus; … muab txoj kev hlub hauv koj lub siab tso rau tus Tswv mus ib txhis.”

“Thiab nim no kuv xav kom nej txo hwj chim, thiab mloog lus thiab muaj siab mos siab muag; yooj yim qhia; muaj kev ua siab ntev puv npo thiab ua siab ntev nyiaj; tswj nej tus kheej rau txhua yam; rau siab coj Vajtswv tej lus txib txhua lub sij hawm; thov txais txhua yam uas nej xav tau, tsis hais sab cev nqaij daim tawv thiab sab ntsuj plig los yog; ua Vajtswv tsaug tas mus li rau txhua yam uas nej tau txais.”

Yog nej thov Vajtswv, yog nej nrog Vajtswv tham, thiab yog nej thov kom Nws pab tus uas nej hlub, thiab yog nej ua Nws tsaug rau Nws txoj kev pab thiab kev ua siab ntev thiab kev muaj lub siab mos muag uas los thaum yus tsis txais txhua yam uas yus xav tau tam sim no, ces kuv cog lus rau nej tias nej yuav muab siab npuab Nws ntxiv. Nej yuav rau siab thiab txawj nyiaj mus ntev. Ces nej thiaj paub tias nej twb ua txhua yam nej ua tau kom pab cov uas nej hlub thiab cov uas nej thov Vajtswv pab kom txhob raug Dab Ntxwg Nyoog tej kev ntxias.

“Tiam sis cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.”

Nej yeej nrhiav tau kev cia siab los ntawm cov vaj lug kub uas hais txog tej tsev neeg. Peb nyeem txog cov uas ntxeev siab rau tej yam uas lawv twb kawm los sis cov uas thov Vajtswv kom zam txim pub rau lawv, xws li Amas tus Hluas, Mauxiyas cov tub, thiab Enos. Thaum lawv raug xwm txheej nyuaj heev, lawv nco txog lawv niam lawv txiv tej lus, yog Yexus Khetos cov lus qhuab qhia. Qhov uas lawv nco qab twb cawm lawv txoj sia. Lawv yuav nco qab nej txoj kev qhia lawv txog cov lus qhuab qhia dawb ceev ntawd.

Kuv ua tim khawv txog txoj hauj lwm dawb huv uas yog kev qhia Leej Txiv Saum Ntuj Ceeb Tsheej cov me nyuam txog Yexus Khetos cov lus qhuab qhia uas meej heev, uas ntxuav peb sab ntsuj plig kom huv thiab thaum kawg yuav ua rau peb tsim nyog nrog Vajtswv thiab Nws Leej Tub nyob tas mus li nrog peb tsev neeg. Los ntawm Yexus Khetos lub npe, amees.