Nws Txhais Tes uas Tos Ntsoov Pab Peb
Thaum peb muaj kev ntseeg ncav cuag Yexus Khetos, Nws yeej yuav nyob ntawd.
Thaum kuv yog ib tug me nyuam, kuv tsev neeg tau mus ua si rau tim ntug dej hiav txwv nyob hauv kuv lub teb chaws, Chile. Kuv zoo siab siv sij hawm ua si hauv lub caij ntuj sov nrog kuv tsev neeg. Kuv kuj zoo siab vim kuv xav tias kuv yuav muaj cib fim koom nrog kuv ob tug tij laug ua si hauv cov dej.
Muaj ib hnub, kuv ob tug tij laug mus ua si rau ntawm qhov chaw uas muaj tej nthw dej loj, thiab kuv xav tias kuv loj txaus kom ua li nkawd. Thaum kuv tab tom mus rau qhov chaw ntawd, kuv pom tias tej nthwv dej loj dua li kuv xav dhau los thaum kuv nyob rau ntawm ntug dej. Ua ciav, ib nthw dej los muab kuv ntaus tshoob mus. Zoo li cov dej tshoob kuv mus rau hauv qab dej thiab kuv raug rub mus rau hauv dej hiav txwv. Kuv tsis pom los sis hnov qhov twg li thaum kuv raug rub rau ub rau no. Tib lub sij hawm uas kuv xav tias tej zaum kuv yuav tuag, kuv hnov ib sab tes rub kom kuv los rau saum nplaim dej. Zoo siab uas kuv pom tau lub hnub thiab ua taus pa.
Kuv tij laug Claudio tau pom kuv txoj kev sim ua li ib tug neeg laus thiab tau los cawm kuv dim. Kuv nyob tsis deb ntawm ntug dej. Txawm yog cov dej ntiav los, kuv tsis pom qab thiab tsis paub tias kuv txawj pab tau kuv tus kheej. Claudio tau qhia kuv tias kuv yuav tsum ceev faj thiab yog kuv xav, nws txawj qhia kuv los tau. Txawm yog kuv twb nqos dej ntau kawg li, kuv txoj kev xav ua ib tug tub loj zog ua rau kuv hais tias, “Xav mas.”
Claudio qhia kuv tias kuv yuav tsum dhia mus hauv tej nthw dej. Kuv qhia kuv tus kheej tias kuv yeej yuav poob dej yog tias kuv dhia hauv tej nthwv dej loj zoo li ntawd.
Thaum ib nthw dej tab tom los, Claudio hais tsuag tsuag hais tias, “Saib kuv; yus cia li ua li no.” Claudio khiav ncaj qha mus rau nthwv dej uas los thiab dhia hauv ua ntej nthwv dej ntawd nphau nphwv. Kuv ntsia ntsoov nws txoj kev dhia hauv dej kuv thiaj li tsis pom nthwv dej uas los. Yog li ntawd, kuv rov qab raug rub hauv cov dej hiav txwv thiab cov dej tshoob kuv mus rau ub rau no ib zaug ntxiv. Ib me pliag tom qab ntawd, ib txhais tes tuav kuv tes, ces kuv tus tij laug rub kuv saum nplaim dej thiaj ua tau pa. Kuv txoj kev khav theeb pib ploj zuj zus.
Lub sij hawm no, kuv tus tij laug caw kuv dhia hauv dej nrog nws. Raws li nws caw kuv, kuv tau coj raws li nws, thiab wb dhia hauv dej ua ke. Kuv xav tias zoo li kuv kov yeej qhov nyuaj tshaj plaws. Muaj tseeb tiag, yeej tsis yooj yim, tiam sis kuv twb ua, vim kuv tus tij laug pab kuv thiab coj yam ntxwv rau kuv xyaum. Nws txhais tes twb cawm kuv dim ob zaug; nws tus yam ntxwv tau qhia kuv paub kov yeej kuv qhov teeb meem hnub ntawd.
Thawj Tswj Hwm Russell M. Nelson tau caw peb xav txog tej yam xilethi-aus, thiab kuv xav ua raws li nws qhia thiab ua li ntawd rau kuv zaj lus txog lub caij ntuj sov.
Tus Cawm Seej lub Hwj Chim Kov Yeej tus Yeeb Ncuab
Yog peb xav txog tej yam xilethi-aus, peb yuav to taub tias peb lub neej yuav raug tej teeb meem uas loj dua li peb xav tias peb muaj peev xwm kov yeej. Nyob hauv lub neej hauv lub ntiaj teb no, peb raug tus yeeb ncuab tej kev tawm tsam. Ib yam li tej nthwv dej muaj hwj chim tshoob kuv mus poob rau hauv dej thaum lub caij ntuj sov ntawd, peb xav tias peb tsis muaj hwj chim thiab xav tias peb yuav ploj mus xwb. Ntshe “tej nthwv dej phem” yuav tshoob peb mus rau ub rau no. Tiam sis cia li nco ntsoov tias tus uas muaj hwj chim kov yeej tej nthwv dej ntawd, thiab, muaj tseeb tiag, muaj hwj chim kov yeej txhua yam. Tus ntawd yog peb tus Cawm Seej, Yexus Khetos. Nws muaj hwj chim pab peb tawm txhua txoj kev tu siab los sis xwm txheej phem. Txawm yog peb tsis xav tias peb nyob ze Nws los, Nws tseem ncav tau cuag peb nyob ntawm qhov chaw peb nyob tam sim no.
Thaum peb muaj kev ntseeg ncav tes rau Nws, Nws yeej yuav nyob ntawd, thiab raws li Nws lub sij hawm, Nws yuav npaj siab thiab txaus siab tuav peb tes thiab coj peb mus rau ib qho chaw nyab xeeb.
Tus Cawm Seej Ua Yam Ntxwv txog Kev Txhawb Pab
Yog peb xav txog tej yam xilethi-aus, peb yuav paub tias Yexus Khetos yog tus uas coj yam ntxwv zoo tag nrho txog kev txhawb pab. Muaj ib tug txheej txheem nyob hauv cov vaj lug kub thaum Nws los sis Nws cov thwj tim tau ncav tes thaum lawv yuav mus pab ib tug neeg, cawm lawv dim, los sis foom koob hmoov rau lawv. Ib yam li nyob hauv kuv zaj dab neeg, kuv paub tias kuv tus tij laug nyob ntawd, tiam sis qhov uas nws nyob ntawd xwb los tsis txaus. Claudio paub tias kuv muaj teeb meem, thiab nws mus pab tsa kuv tawm hauv cov dej.
Tej lub sij hawm, peb xav tias peb yuav tsum nyob ntawd kom pab ib tug uas xav tau kev pab xwb, thiab ntau lub sij hawm, muaj ntau yam ntxiv uas peb ua tau. Qhov uas peb muaj ib lub zeem muag pom mus ib txhis li yuav pab peb txais kev tshwm sim kom muab kev pab raws lub sij hawm uas tib neeg xav tau. Peb tso siab tau rau tus Vaj Ntsuj Plig Dawb Huv tej kev tshoov siab kom paub tias tib neeg xav tau kev pab li cas, txawm yog kev txhawb nqa ntawm sab cev nqaij daim tawv xws li kev txhawb lub siab ntsws, zaub mov, los sis kev pab ua tej hauj lwm txhua hnub, los yog kev pab ntawm sab ntsuj plig kom pb lwm tus thaum lawv npaj thiab ua raws li tej kev khi lus.
Tus Cawm Seej Npaj Cawm Peb Dim
Thaum Petus, tus thawj Thwj Tim, “mus ko taw saum nplaim dej mus cuag Yexus … nws ntshai kawg li, ces nws txawm tog zog rau hauv dej, [ces] nws hu nrov nrov hais tias, Tus Tswv, thov koj pab kuv.” Yexus paub tias Petus muaj kev ntseeg kom Nws los mus ko taw saum nplaim dej. Nws kuj paub txog Petus txoj kev ntshai. Raws li zaj no hais, Yexus “txawm cev loo tes mus tuav nkaus Petus,” thiab hais tej lus no tias: “Ua li cas koj kev ntseeg yuav tsawg ua luaj li! Ua li cas koj tsis cia siab?” Nws tsis hais li ntawd kom cem Petus tiam sis kom nws nco ntsoov tias, Yexus yog tus Mexiyas uas nrog nws thiab cov thwj tim nyob.
Yog peb xav txog tej yam xilethi-aus, peb yuav txais kev pom zoo hauv peb lub siab tias Yexus Khetos yog peb tus Cawm Dim tiag, tus uas Tuaj Peb Tog thov Leej Txiv, thiab peb tus Txhiv Dim. Thaum peb muab siab rau ntseeg Nws, Nws yuav cawm peb dim peb txoj kev poob, kov yeej peb tej teeb meem, tej kev mob kev nkees, thiab tej kev xav tau hauv lub neej no, thiab muab lub txiaj ntsim uas loj tshaj plaws, uas yog txoj sia nyob mus ib txhis li.
Tus Cawm Seej Tsis Tso Peb Tseg
Kuv tus tij laug tsis tau tso kuv tseg hnub ntawd tiam sis nws qhia kuv tas li kom kuv kawm tau ua kuv tus kheej. Nws tsis tau tu, txawm yog nws yuav tsum cawm kuv dim ob zaug. Nws tsis tau tso kuv tseg txawm yog kuv tsis txawj ua thaum xub thawj. Nws twb nyiaj mus kom kuv kov yeej tau qhov teeb meem ntawd thiab muaj peev xwm ua. Yog peb xav txog tej yam xilethi-aus, peb yuav paub tias peb tus Cawm Seej yeej yuav nrog peb nyob pes tsawg zaus los xij kom pab peb yog peb xav kawm, hloov, kov yeej, nyiaj mus, los sis vam meej ua tej yam uas yuav ua rau peb muaj kev zoo siab tseeb thiab kav ib txhis hauv peb lub neej.
Tus Cawm Seej Txhais Tes
Cov vaj lug kub hais txog lub cim ntawm tus Cawm Seej txhais tes thiab qhia txog vim li cas Nws txhais tes tseem ceeb. Thaum Nws theej peb lub txhoj, Nws txhais tes raug ntsia hlau kom muab Nws ntsia saum tus ntoo khaub lig. Tom qab Nws Sawv Rov Los, Nws tau tshwm sim rau Nws cov thwj tim muaj ib lub cev nqaij daim tawv, tiam sis tseem muaj tej qhov ntsia hlau hauv nws ob txhais tes kom peb nco txog Nws txoj kev txi uas kav ib txhis li. Nws txhais tes yeej tos ntsoov peb, txawm yog peb tsis pom los sis hnov thaum xub thawj, vim Leej Txiv Saum Ntuj Ceeb Tsheej tau xaiv Nws los ua peb tus Cawm Seej, tus uas yuav txhiv tag nrho cov tib neeg dim.
Tuav Tau, los ntawm Jay Bryant Ward
Vajtswv txhais Tes, los ntawm Youngsung Kim
Yog kuv xav txog tej yam xilethi-aus, kuv paub tias peb tsis nyob peb tus kheej hauv lub neej no xwb. Txawm yog peb yuav tsum kov yeej tej teeb meem thiab tej kev sim siab, peb Leej Txiv Saum Ntuj Ceeb Tsheej paub peb txawj ua npaum li cas thiab Nws paub tias peb ris tau los sis muaj peev xwm kov yeej tej yam uas nyuaj rau peb. Peb yuav tsum ua tej yam peb ua tau thiab muaj kev ntseeg tig mus rau Nws. Nws Leej Tub uas Nws Hlub, Yexus Khetos, yog tus uas cawm peb dim thiab yeej yuav ua li ntawd. Los ntawm Nws lub npe, lub npe dawb ceev uas yog Yexus Khetos, amees.