Muab Peb cov Cuab Yeej ntawm Kev Ntxeev Siab Faus Cia

Phau Ntawv Maumoos hais tias kwv yees li 90 xyoo ua ntej Yexus Khetos yug los, Vaj Ntxwv Mauxiyas cov tub tau pib ua tub txib mus qhia cov Neeg Lamas rau 14 xyoos. Ntau tiam neeg tau sim coj cov Neeg Lamas los ntseeg Yexus Khetos cov lus qhuab qhia tiam sis lawv ua tsis taus. Tiam sis lub sij hawm no, vim tus Vaj Ntsuj Plig Dawb Huv pab ua tej txuj ci tseem ceeb, cov Neeg Lamas coob tau hloov siab los ntseeg thiab los ua Yexus Khetos cov thwj tim.

Peb nyeem hais tias, “Thiab tseeb npaum li tus Tswv muaj txoj sia nyob, yeej muaj tseeb tias tag nrho cov uas ntseeg, los sis tag nrho cov uas lawv coj tau los paub txog qhov tseeb, los ntawm Amoos thiab nws cov kwv tij txoj kev tshaj tawm, raws li lub txiaj ntsim txais tau kev tshwm sim thiab qhia tau tej yuav muaj los yav tom ntej, thiab Vajtswv lub hwj chim uas ua tej txuj ci tseem ceeb nyob hauv lawv—muaj tseeb tiag, kuv hais rau nej, ib yam li tus Tswv muaj txoj sia nyob, tag nrho cov Neeg Lamas uas los ntseeg lawv tej lus qhuab qhia, thiab tau hloov siab los ntseeg tus Tswv, twb tsis muaj ib tug uas ncaim mus li lawm.”

Nqe tom qab ntawd qhia vim li cas cov neeg no twb hloov siab los ntseeg: “Vim lawv tau hloov los ua ib co neeg ncaj ncees; lawv tau tso lawv tej cuab yeej ntawm kev ntxeev siab tseg, uas ua rau lawv tsis tawm tsam Vajtswv ntxiv lawm, thiab tsis tawm tsam lawv cov kwv tij ib tug twg.”

Qhov uas hais txog lawv “cov cuab yeej ntawm kev ntxeev siab” los twb hais txog tej yam tiag tiag thiab yog lus piv txwv. Qhov no hais txog lawv cov ntaj thiab lwm yam cuab yeej ua rog tiam sis kuj hais txog lawv txoj kev tsis mloog Vajtswv lus thiab Nws tej lus txib.

Tus vaj ntxwv ntawm cov Neeg Lamas uas hloov siab los ntseeg hais li no tias: “Thiab nim no saib seb, kuv cov kwv tij es, vim peb yuav tsum ua txhua yam uas peb muaj peev xwm ua … los hloov siab lees txim rau tag nrho peb tej kev txhaum thiab kev tua neeg ntau uas peb tau ua, thiab los ua kom Vajtswv tshem tej kev txhaum ntawd tawm hauv peb lub siab mus, vim peb yuav tsum ua txhua yam uas peb muaj peev xwm ua los hloov siab lees txim txaus nkaus rau Vajtswv xwb nws thiaj yuav tshem peb tej kev tsuas mus.”

Cia li xav txog tus vaj ntxwv tej lus—lawv txoj kev hloov siab lees txim twb ua rau lawv txais kev zam txim rau lawv tej kev txhaum, tiam sis Vajtswv kuj tau tshem tej kev tsuas ntawm lawv txoj kev txhaum mus thiab tshem lawv txoj kev xav ua txhaum tawm hauv lawv lub siab mus. Ib yam li nej paub lawm, lawv tsis xav rov qab ntxeev siab rau Vajtswv zoo li qub, lawv thiaj li muab lawv cov ntaj faus cia. Thiab thaum lawv muab lawv tej cuab yeej ua rog faus, vim lawv hloov siab lawm, lawv kuj muab lawv txoj kev xav ua txhaum faus cia thiab.

Tsim nyog uas peb nug peb tus kheej seb yuav ua li cas kom ua raws li tus txheej txheem no, kom “tso [peb] tej cuab yeej ntawm kev ntxeev siab tseg” txawm tej ntawd yog dab tsi los xij thiab “hloov siab los ntseeg tus Tswv” txaus kom yuav muab lub txim txhaum thiab txoj kev xav ua txhaum tshem tawm peb lub siab mus thiab peb yeej yuav tsis ncaim mus li lawm ib zaug li.

Tib neeg txhob txwm ntxeev siab los sis ntxeev siab thaum lawv tsis ua dab tsi. Tus uas ib txwm muaj siab xav ntxeev siab yog Luxifaws, tus uas nyob hauv lub ntuj ua ntej yug los tau tawm tsam Leej Txiv txoj hau kev txhiv dim thiab hais kom lwm tus nrog nws koom ua ke tawm tsam, “thiab, hnub ntawd, coob leej raws nws qab.” Yeej tsis nyuaj rau peb to taub tias nws txoj kev ntxeev siab tsim kev phem npaum li cas hauv peb lub caij nyoog.

Peb tug txiv neej uas tawm tsam Yexus Khetos hauv Phau Ntawv Maumoos—Seles, Nihos, thiab Khaulihos—ua rau peb kawm tau txog kev ntxeev siab rau Vajtswv. Lub ntsiab ntawm tej yam uas Nihos thiab Khaulihos qhia yog qhov uas tsis muaj kev txhaum; yog li ntawd, tsis tas hloov siab lees txim, thiab tsis muaj ib tug Cawm Seej. “Txhua tus neeg vam meej raws li nws txoj kev txawj ntse, thiab … txhua tus neeg tau kav raws li nws lub zog; thiab txawm ib tug neeg ua dab tsi los nws yeej tsis txhaum kev cai.” Cov uas tawm tsam Khetos xyeej txoj cai teev ntuj, thiab hais tias cov kab ke thiab tej kev khi lus yog tej uas “cov pov thawj thaum ub tau ua tseg, kom siv tau hwj chim thiab txoj cai los kav lawv.”

Ib zaj dab neeg txog kev txhob txwm ntxeev siab hauv hnub nyoog kawg no uas muaj kev zoo siab thaum kawg hais txog William W. Phelps. Phelps tau koom lub Koom Txoos nyob rau xyoo 1831 thiab nws yog tus uas luam ntawv rau lub Koom Txoos. Nws tau kho ntawv rau lub Koom Txoos cov ntawv thaum xub thawj, sau tej zaj nkauj qhuas Vajtswv ntau, thiab yog Joseph Smith tus teev ntawv. Tu siab uas nws ntxeev siab rau lub Koom Txoos thiab tus Yaj Saub, nws kuj ua pov thawj cuav tawm tsam Joseph Smith nyob hauv lub tsev hais plaub hauv Missouri, tus Yaj Saub thiaj li raug kaw nyob ntawd.

Tom qab ntawd, Phelps tau sau ntawv rau Joseph thiab thov nws zam txim. “Kuv paub kuv raug xwm txheej li cas, koj paub thiab, thiab Vajtswv paub, es kuv xav txais kev cawm seej yog kuv cov phooj ywg yuav pab kuv.”

Tus Yaj Saub tau teb li no tias: “Muaj tseeb tiag, peb twb raug tej kev tsim txom ntau kawg vim koj tau ua tej yam ntawd. … Tsis kav, twb haus tau lub khob dej iab lawm, twb ua raws li peb Leej Txiv lub siab nyiam lawm, thiab peb tseem muaj sia nyob. … Auj me kwv tij vim kev tsov kev rog tas lawm, cia li rov qab los, thaum ub peb twb ua phooj ua ywg, es thaum kawg tseem yuav ua phooj ywg no thiab.”

William Phelps twb hloov siab lees txim tiag tiag, nws muab nws “cov cuab yeej ntawm kev ntxeev siab” faus cia, rov qab nrog cov mej zeej sib raug zoo, es nws yeej tsis tau ncaim mus ntxiv hlo li.

Tiam sis tej zaum kev ntxeev siab rau Vajtswv uas phem tshaj plaws yog thaum yus tsis ua dab tsi—yus tsis quav ntsej txog Nws lub siab nyiam hauv yus lub neej. Neeg coob uas yeej yuav tsis kam ntxeev siab tawm tsam Vajtswv tseem tsis ua raws li Vajtswv lub siab nyiam thiab txoj lus vim lawv xav taug lawv txoj kev es tsis puab Vajtswv coj lawv txoj hau kev. Ua rau kuv nco txog zaj nkauj uas Frank Sinatra hu ntau xyoo tas los uas muaj lo lus no “Kuv ua raws li kuv txoj kev.” Muaj tseeb tiag hauv lub neej no muaj ntau yam uas yus ua tau raws li yus lub siab nyiam thiab lub siab xav, tiam sis thaum hais txog kev cawm seej thiab txoj sia nyob mus ib txhis li, peb yuav tsum txaus siab hais tias, “Kuv ua raws li Vajtswv txoj kev,” vim yeej tsis muaj lwm txoj kev li.

Cia li xav txog tus Cawm Seej txoj kev coj yam ntxwv txog kev cai raus dej. Nws tau ua kev cai raus dej vim Nws qhia tias Nws muaj siab xav ua raws li Leej Txiv hais thiab kom coj yam ntxwv zoo rau peb:

“Nws … ua qhia rau noob neej tias, raws li sab cev nqaij daim tawv nws tseem txo nws lub hwj chim rau Leej Txiv, thiab ua pov thawj rau Leej Txiv tias nws yuav mloog Leej Txiv lus kom ua raws li Leej Txiv tej lus txib. …

“Thiab nws hais rau noob neej hais tias: Nej cia li coj raws li kuv. Yog li ntawd, kuv cov kwv tij uas kuv hlub es, peb puas yuav coj raws li Yexus yog hais tias peb tsis txaus siab ua raws li Leej Txiv tej lus txib?”

Yeej tsis muaj “kuv txoj kev” yog peb yuav ua raws li Yexus Khetos tus yam ntxwv. Kev nrhiav lwm txoj kev yeej zoo li yus ua hauj lwm tsa Npanpes tus Pej Thuam thiab tsis cia siab rau Yexus Khetos thiab Nws txoj kev cawm seej.

Cov ntaj thiab lwm yam cuab yeej ua rog uas cov Neeg Lamas muab faus cia yog tej cuab yeej ntawm kev ntxeev siab vim yog lawv txoj kev siv tej cuab yeej ntawd. Thaum lawv cov tub tuav tej cuab yeej ua rog no kom tiv thaiv lawv tsev neeg thiab kev ywj siab xaiv, yeej tsis yog tej cuab yeej ntawm kev ntxeev siab rau Vajtswv hlo li. Qhov no kuj muaj tseeb thaum hais txog cov ntaj uas cov Neeg Nifais siv: “Lawv tsis yog sib ntaus sib tua kom tau huab tais los sis kom muaj hwj chim tiam sis lawv sib ntaus sib tua rau lawv tej vaj tse thiab lawv tej kev ywj siab, lawv cov poj niam thiab lawv cov me nyuam, thiab tag nrho tej uas lawv muaj, muaj tseeb tiag, rau lawv tej kab ke teev tiam thiab lawv lub koom txoos.”

Ib yam li no, muaj tej yam hauv peb lub neej uas tsis phem los sis yog tej yam zoo tiam sis thaum siv tsis yog ces tej ntawd hloov los ua “cov cuab yeej ntawm kev ntxeev siab.” Ua piv txwv hais tias, tej lus uas peb hais yeej muaj hwj chim txhawb nqa los sis saib tsis taus neeg. Ib yam li Yakaunpaus hais tias:

“Tiam sis [zoo li] tsis muaj leej twg cob tau tus nplaig. Tus nplaig phem thiab tswj tsis tau li, nws muaj taug lom neeg tuag.

“Peb siv peb tus nplaig ua Vajtswv tus uas yog peb Leej Txiv tsaug, thiab peb siv peb tus nplaig cem tej neeg zej zog. Tej neeg ntawd Vajtswv tsim muaj tus yam ntxwv zoo li Vajtswv.

“Lo lus ua Vajtswv tsaug thiab lo lus cem neeg puav leej yog tus nplaig hais. Cov kwv tij, tsis tsim nyog yuav muaj li ntawd.”

Muaj ntau yam hauv kev sib tham tab meeg sawv daws thiab kev sib tham ob leeg xwb uas siab phem thiab nyaum heev. Muaj tib neeg coob uas hais lus phem thaum lawv sib tham, tsis hais cov tub hluas ntxhais hluas los yog. Cov lus hais no yeej yog “tej cuab yeej ntawm kev ntxeev siab” rau Vajtswv, uas “muaj taug lom neeg tuag.”

Cia li xav txog ib yam ntxiv uas yeej zoo tiam sis tib neeg hloov tau kom ntxeev siab rau Vajtswv tej lus txib—ib tug neeg txoj hauj lwm. Ib tug neeg nrhiav tau kev txaus siab thaum nws ua ib txoj hauj lwm los sis muab kev pab rau lwm tus, thiab peb txhua tus tau txiaj ntsim vim tib neeg uas muaj txuj ci ua ntau yam tau tsim khoom thiab ua tej yam zoo kawg.

Tiam sis, tej zaum ib tug neeg yuav xaiv kom tsom ntsoov rau txoj kev rau siab ua hauj lwm xwb. Ces txhua yam ntxiv nws thiaj saib tias yog qhov thib ob xwb, tsis hais tus Cawm Seej txoj kev xav siv yus lub sij hawm. Hais txog txiv neej thiab poj niam, thaum yus tsis kam sib yuav, tsis muab siab npuab thiab txhawb nqa yus tus khub, tsis tu yus cov me nyuam, los sis txhob txwm khiav kom tsis txhob ua raws li yus txoj kev lav ris tu me nyuam kom tau hauj lwm siab dua los ntshe ib qho uas txaus qhuas yuav hloov ua ib txoj kev ntxeev siab.

Ib yam ntxiv yog hais txog peb lub cev nqaij daim tawv. Povlauj qhia peb tias peb yuav tsum qhuas Vajtswv los ntawm lub cev nqaij daim tawv thiab tus ntsuj plig thiab lub cev no yog tus Vaj Ntsuj Plig Dawb Huv lub tuam tsev, “nej tsis yog tus tswv uas kav nej lub cev, tiam sis Vajtswv yog tus tswv uas kav nej lub cev.” Yog li ntawd, tsim nyog uas peb yuav xav siv sij hawm tu peb lub cev zoo npaum li peb tu tau. Peb feem tsawg yuav tu peb lub cev kom ua zoo npaum li cov neeg xyaum txuj tes taw Olympic thiab Paralympic, thiab peb ib txhia raug tej yam vim peb tab tom laus lawm, los yog zoo li Thawj Tswj Hwm M. Russell Ballard hais tias “tej ntsia hlau ntawm lub cev no tsis ceev lawm.”

Txawm li ntawd los, kuv ntseeg tias tus uas Tsim peb zoo siab thaum peb saib xyuas lub txiaj ntsim Nws foom pub rau peb uas yog peb lub cev nqaij daim tawv. Yog ib lub cim txog kev ntxeev siab yog peb hloov los yog kos duab rau peb lub cev, ua phem rau peb lub cev, los sis tsis txhob ua tej yam uas ua rau peb noj qab haus huv. Tiam sis, qhov uas yus saib iav heev thiab xav ntsoov txog yus lub cev ntaj ntsug los sis yus hnav khaub ncaws ntau tas li ntshe yog ib txoj kev ntxeev siab thiab, vim ua rau yus teev tiam qhov uas Vajtswv muab rau yus tiam sis tsis teev tiam Vajtswv.

Qhov tseem ceeb, kev muab peb cov cuab yeej ntawm kev ntxeev rau Vajtswv txhais tias peb ywj rau tus Vaj Ntsuj Plig Dawb Huv tej kev tshoov siab, tso tus neeg ntiaj teb tseg thiab hloov los ua “ib tug neeg dawb huv los ntawm tus Tswv Khetos txoj kev theej txhoj.” Yog kev ua raws li thawj txoj lus txib ua ntej txhua yam hauv peb lub neej. Yog kev cia Vajtswv yeej. Yog peb txoj kev hlub Vajtswv thiab peb txoj kev rau siab ua hauj lwm rau Nws kom kawg siab kawg ntsws thiab kawg lub dag lub zog yog qhov uas peb saib kom txiav txim txog txhua yam, ces peb yeej yuav muab peb cov cuab yeej ntawm kev ntxeev siab faus cia. Los ntawm Yexus Khetos txoj kev tshav ntuj, Vajtswv yuav zam txim rau peb tej kev txhaum thiab tej kev ntxeev siab ntawm yav tas los thiab yuav muab lub txim ntawm tej kev txhaum ntawd thiab tej kev ntxeev siab ntawd tshem mus. Thaum sij hawm dhau mus, Nws yuav tshem txoj kev xav ua phem, ib yam li Nws ua rau cov Neeg Lamas uas hloov siab los ntseeg thaum ub. Tom qab ntawd, peb kuj yuav tsis “ncaim mus li.”

Kev muab peb cov cuab yeej ntawm kev ntxeev siab faus cia ua rau peb txais tau ib txoj kev xyiv fab tshwj xeeb. Nrog txhua tus uas tau hloov siab los ntseeg tus Tswv, ua rau peb xav “hu zaj nkauj txog txoj kev hlub uas txhiv dim.” Peb Leej Txiv Saum Ntuj Ceeb Tsheej thiab Nws Leej Tub, peb tus Txhiv Dim, twb qhia tseeb tias Nkawd xav kom peb txais kev zoo siab loj tshaj plaws dhau los ntawm txoj kev hlub thiab txoj kev txi uas loj tshaj plaws. Peb muaj Nkawd txoj kev hlub txhua hnub. Tsim nyog uas peb yuav muaj peev xwm hlub Nkawd thiab cia siab rau Nkawd. Thov kom peb yuav muab kev ntxeev siab tawm tsam Vajtswv hauv peb lub neej faus cia—tob tob rau rau hauv av—es muab pauv kom muaj ib lub siab xav ua zoo. Los ntawm Yexus Khetos lub npe, amees.