Tus Txiv Neej uas Sib Tham Nrog Yehauvas

Thaum yav sawv ntxov ib hnub uas kaj nrig thaum lub caij nplooj ntoo hlav xyoo 1820, Joseph Smith uas muaj 14 xyoo tau mus hauv koog ntoo ze nws lub tsev mus thov txog nws tej kev txhaum thiab nug tias nws yuav tsum koom lub koom txoos twg. Vim nws mob siab thov Vajtswv, thiab muaj kev ntseeg tsis tu tsis tseg, ces ob tug muaj hwj chim loj tshaj plaws hauv lub ntiaj teb, uas yog Leej Txiv thiab Leej Tub, tau hnov nws tej lus thov. Thiab tus dab phem kuj hnov. Peb leeg no yeej muaj siab xav paub txog txoj kev thov thiab tus tub hluas ntawd.

Lub sij hawm uas peb hu ua Thawj Zaug Ua Yog Toog yeej yog chiv keeb ntawm kev muab tag nrho txhua yam txum tim rov qab los hauv lub caij nyoog tso txoj cai kawg no. Tiam sis rau Joseph, qhov xwm txheej no twb tau npaj nws rau yav tom ntej. Nws tsuas xav txais kev zam txim thiab xav paub ua li cas. Tus Tswv tau qhia ob yam ntawd rau nws. Tej lus qhia kom “tsis txhob koom ib lub [koom txoos twg]” yog kev txib. Cov lus, “kuv zam txim rau koj” yog kev txhiv dim.

Los ntawm tag nrho tej lus tseeb uas peb tau kawm los ntawm Thawj Zaug Ua Yog Toog, tej zaum lub ntsiab cai tseem ceeb uas Joseph tau txais yog, “Kuv twb pom tias Yakaunpaus zaj lus tim khawv yeej muaj tseeb—hais tias tus neeg uas tsis muaj tswv yim yeej thov tau Vajtswv, thiab txais tau.”

Raws li ib tug kws tshawb fawb hais: “Qhov tseem ceeb heev hnub no uas kawm los ntawm Thawj Zaug Ua Yog Toog kuj yog tias yeej yog Vajtswv lub hom phiaj muab rau cov uas tsis muaj tswv yim. … Tus Vajtswv uas tshwm sim rau Joseph Smith hauv koog ntoo dawb ceev yeej yog tus Vajtswv uas teb cov tub hluas ntxhais hluas thaum lawv muaj teeb meem.”

Tej yam uas tau muaj los rau Joseph hauv koog ntoo tau ua rau nws thov txais kev zam txim thiab thov kom paub ua dab tsi tag nrho nws lub neej. Qhov uas tau tshwm sim rau nws kuj tau cia kuv muaj peev xwm thov txais kev zam txim thiab thov kom paub ua dab tsi tas kuv lub neej thiab.

Nyob rau lub Cuaj Hlis Ntuj hnub tim 21, 1823, Joseph tau rau siab thov kom txais kev zam txim, ntseeg tias vim muaj tej yam tshwm sim rau nws hauv koog ntoo peb xyoo tas los, lub ntuj ceeb tsheej yuav rov qab teb nws ntxiv. Thiab Vajtswv tau teb tiag. Tus Tswv tau txib ib tug tim tswv, Maulaunais, los coj qhia Joseph thiab qhia nws txog ib cov phiaj uas nws yuav txhais lus thaum yav tom ntej los ntawm Vajtswv lub txiaj ntsim thiab lub hwj chim—yog Phau Ntawv Maumoos.

Yuav luag 13 xyoo tom qab ntawd, Joseph thiab Oliver Cowdery tau txhos caug, thov Vajtswv hauv lub Tuam Tsev hauv Kirtland uas tau muab fij tseg lawm. Peb tsis paub tias nkawd tau thov dab tsi, tiam sis tej zaum nkawd tau thov kom txais kev zam txim, vim tias, thaum nkawd sawv, tus Cawm Seej tau tshwm sim thiab hais tias, “Saib seb, tus Tswv zam txim rau nej tej kev txhaum lawm; kuv pom tias nej twb huv.”

Lub sij hawm tom qab zaum no, Joseph thiab Oliver yuav rov qab ua txhaum ntxiv. Thiab ua txhaum ntxiv. Tiam sis thaum ntawd, rau lub sij hawm ntawd, Yexus tau teb nkawd tej kev thov thiab kom npaj nkawd txais cov yawm sij pov thawj hwj uas yuav txum tim rov qab los, Yexus ua rau nkawd tsis muaj kev txhaum.

Joseph lub neej uas nws hloov siab lees txim txhua hnub uas rau kuv ntseeg tias kuv yuav “zaum saum vaj ntxwv lub rooj zaum kom Nws zam txim rau [kuv].” Kuv tau kawm tias Yexus Khetos yeej “xav zam txim rau peb.” Tsis yog Nws lub luag hauj lwm los sis Nws tus cwj pwm kom los rau txim rau neeg. Nws los cawm neeg.

Ib feem ntawm kev cog lus tias “ib puas tsav yam hloov dua tshiab” yog qhov uas tus Tswv, los ntawm Joseph Smith, tau muab Phaub Ntawv Maumoos thiab lwm yam kev tshwm sim uas qhia txog Nws Txoj Moo Zoo uas muaj txhij txhua. Nws tau txais tej lus qhia txog qhov tseeb kom to taub meej thiab paub tag nrho thaum Joseph tau thov tus Tswv ntau zaus. Cia li xav txog tej yam no:

1. Leej Txiv thiab Leej Tub muaj ib lub cev “muaj nqaij thiab muaj txha uas kov tau ib yam li tib neeg.”

2. Yexus tsis ris peb tej kev txhaum xwb tiam sis Nws ris peb tej kev mob kev nkeeg, kev txom nyom thiab kev nyuaj siab.

3. Nws txoj kev Theej Txhoj nyuaj heev ua rau Nws tau los ntshav ntawm txhua lub qhov hws.

4. Los ntawm txoj kev tshav ntuj peb thiaj tau txais kev cawm seej “tom qab peb tau ua txhua yam uas peb muaj peev xwm ua.”

5. Muaj tej kev cai uas yuav tsum ua kom txais tau Yexus Khetos txoj kev hlub tshua.

6. Thaum peb los cuag Khetos Nws yuav tsis zam txim rau peb tej kev txhaum xwb, tiam sis Nws yuav hloov peb tus cwj pwm “kom peb tsis muaj siab xav ua phem ntxiv.”

7. Khetos yeej ib txwm txib Nws cov neeg ua cov tuam tsev, qhov chaw uas Nws tshwm sim rau neeg pom thiab muab vaj txiaj ntsim hwj chim los saum ntuj los rau lawv.

Kuv ua tim khawv tias tej no muaj tseeb thiab yog tej yam uas yuav tsum ua. Tej no yog ib feem me me ntawm tag nrho tej yam uas Yexus Khetos tau muab txum tim rov qab los dhau los ntawm Joseph Smith kom teb Joseph tej lus thov pab coj nws kev.

Nyob hauv xyoo 1842, Joseph sau ntau yam zoo uas yuav tshwm sim hauv lub caij nyoog tso cai kawg no. Nws tau tshaj tawm tias rau peb lub caij nyoog, “lub Pov Thawj Hwj saum ntuj ceeb tsheej yuav koom nrog lub pov thawj hwj hauv lub ntiaj teb, kom muaj raws li tej hom phiaj no; thiab thaum peb sib koom muaj ib lub hom phiaj kom Vajtswv lub nceeg vaj loj hlob tuaj, cov Pov Thawj Hwj saum ntuj ceeb tsheej yuav tsis lam saib xwb.”

Joseph hais lus rau nws tus phooj ywg Benjamin Johnson, “Benjamin, [yog kuv tuag] kuv yuav tsis nyob deb ntawm koj, thiab yog nyob ntawm daim ntaub thaiv sab nraud, kuv tseem yuav ua luag hauj lwm nrog koj, thiab nrog ib lub hwj chim loj, pab lub nceeg vaj tseem loj hlob tuaj mus.”

Nyob rau lub Rau Hlis Ntuj hnub tim 27, 1844, Joseph Smith thiab nws tus tij laug Hyrum tau raug tua tuag. Twb tso Joseph lub cev hauv lub ntxa, tiam sis tseem nco qab nws cov lus tim khawv thoob plaws lub ntiaj teb thiab nyob hauv kuv lub siab:

“Vim kuv tau ua yog toog; kuv twb paub, thiab kuv paub hais tias Vajtswv twb paub, thiab kuv xyeej tsis tau.”

“Kuv tsis tau qhia nej tias kuv zoo tag nrho—tiam sis tsis muaj qhov ua yuam kev nyob hauv tej kev tshwm sim uas kuv tau qhia.”

“Cov hauv paus ntsiab cai ntawm peb txoj kev ntseeg yog zaj lus tim khawv ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov no xwb.”

Tej uas hais txog Yauhas tus uas Muab Neeg Ua Kev Cai Raus Dej hais tau txog Joseph Smith thiab: “Vajtswv txib ib tug txiv neej uas yog nws tus tub txib hu ua [Joseph]. … “Nws tsis yog qhov kaj ntawd, tiam sis tau los ua tim khawv txog qhov kaj ntawd … kom txhua tus tau hnov Txoj Lus ntawd thiaj los ntseeg.”

Kuv ntseeg. Kuv ntseeg thiab paub tias Yexus yog tus Khetos, thiab yog Vajtswv Leej Tub. Kuv ua tim khawv tias Vajtswv yog peb Leej Txiv uas hlub peb. Kuv paub tej no vim tias Vajtswv lub suab tau hais lus rau kuv, thiab cov suab ntawm Nws cov tub qhe, cov thwj tim thiab yaj saub, tsis hais Joseph Smith los yog.

Kuv ua tim khawv tias Joseph Smith yog Vajtswv tus yaj saub, ib tug ua tim khawv thiab yog Tswv Yexus Khetos tus tub qhe. Nws “muaj koob hmoov qhib lub caij nyoog tso cai kawg,” thiab peb muaj koob hmoov vim nws tau ua li ntawd.

Tus Tswv txib Oliver thiab peb txhua tus, “Rau siab txhawb nqa kuv tus tub qhe Joseph.” Kuv ua tim khawv tias tus Tswv pom zoo rau Nws tus tub qhe Joseph thiab txoj Kev Muab Txoj Moo Zoo Txum Tim Rov Qab Los uas tau los ntawm nws tej hauj lwm.

Tam sim no Joseph Smith tau koom lub pov thawj hwj saum ntuj ceeb tsheej uas nws tau hais txog. Li nws tau cog lus rau Benjamin Johnson, nws tsis nyob deb ntawm peb, thiab nyob ntawm daim ntaub thaiv sab nraud, nws tseem ua luag hauj lwm nrog peb, thiab nrog ib lub hwj chim loj, pab lub Nceeg Vaj no loj hlob tuaj mus. Nrog rau kev zoo siab thiab kev ua tsaug, kuv tsa kuv lub suab “qhuas tus txiv neej uas tau sib tham nrog peb tus Tswv.” Thiab qhov tseem ceeb tshaj plaws, qhuas Yehauvas uas tau sib tham nrog tus txiv neej ntawd! Los ntawm Yexus Khetos lub npe, amees.