Nrog Yexus Khetos Mus
Vim peb yog cov uas coj raws li Yexus Khetos, thov kom peb qhia thiab ua tim khawv txog Yexus Khetos, peb tus Yam Ntxwv uas Zoo Tshaj Plaws. Cia peb coj raws li Nws thaum peb tso kev sib cav sib ceg tseg.
Xyoo no neeg coob twb txais kev tshoov siab los ntawm kev kawm txoj moo zoo uas peb hu raws li tus Cawm Seej txoj kev caw, “Los, nrog kuv mus.” Kev coj raws li Khetos tsis yog ib qho uas yus lam ua los sis ua tej lub sij hawm xwb. Yeej yog ib txoj kev cog lus thiab ib txoj kev ua neej uas peb yuav tsum ua txhua lub sij hawm thiab nyob txhua qhov chaw. Nws tej lus qhia thiab Nws tus yam ntxwv yog txoj kev uas txhua tus thwj tim ntawm Yexus Khetos yuav tsum taug. Thiab Nws caw txhua leej txhua tus taug txoj kev no thaum lawv los cuag Nws, “tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; … thiab txhua tus yeej zoo tib yam rau Vajtswv.”
I.
Thawj thawj yam peb yuav tsum ua thaum peb coj raws li Yexus Khetos yog kev ua raws li “txoj kev cai … uas tseem ceeb dua ntais huv tib si”:
“Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.
“Nqe no thiaj yog nqe uas tseem ceeb dua ntais.
“Thiab nqe ob uas tseem ceeb hais li no hais tias: Hlub [nej] tej kwv tij zej zog ib yam li [nej] hlub [nej] lub cev.
“Mauxes txoj Kev Cai thiab cov [yaj saub] tej lus qhia puav leej nyob tag nrho hauv ob nqe no.”
Vajtswv tej lus txib ua rau peb txais tau lub hwj chim uas coj peb lub neej kom ruaj khov. Nyob hauv lub neej no peb zoo li ib tug me nyuam tub uas nrog nws txiv ya lub vauj rau hnub uas cua hlob hlob. Thaum lub vauj ya siab zuj zus, cua tshuab kom rub txoj hlua uas tus me nyuam tub tuav. Vim nws tsis tshua to taub txog cua hlob hlob, nws xav kom muab txoj hlua txiav lub vauj thiaj li yuav ya siab ntxiv. Nws txiv uas muaj tswv yim hais kom txhob ua li ntawd, thiab piav tias txoj hlua yog txoj uas tuav lub vauj kom txhob raug cua hlob nplawm. Yog peb tsis tuav txoj hlua, lub vauj yeej yuav tsis ya siab ntxiv. Cua hlob mam li nplawm lub vauj ntawd ces thaum kawg mam li poob nthav lawm rau hauv av.
Txoj hlua ntawd piv txog peb tej kev khi lus uas muab peb khi rau Vajtswv, peb Leej Txiv Saum Ntuj Ceeb Tsheej thiab Nws Leej Tub, Yexus Khetos. Thaum peb ua raws li tej kev khi lus ntawd los ntawm kev ua raws li Nkawd tej lus txib thiab ua raws li Nkawd txoj hau kev txhiv dim, ces Nkawd cov koob hmoov ua rau peb muaj peev xwm nce tau siab mus saum ntuj ceeb tsheej.
Phau Ntawv Maumoos hais ntau zaus hais tias Yexus Khetos yog “txoj kev kaj ntawm neeg ntiaj teb.” Thaum Nws tshwm sim rau cov Neeg Nifais, tus Tswv uas sawv rov los tau piav txog tej lus qhia no thaum nws hais tias: “Kuv tau ua ib tug yam ntxwv rau nej.” “Kuv yog lub teeb uas nej yuav tsa—tej uas nej tau pom kuv ua.” Nws yog peb tus yam ntxwv. Peb kawm tej yam uas Nws tau hais thiab ua thaum peb kawm cov vaj lug kub thiab ua raws li cov yaj saub tej lus ib yam li Thawj Tswj Hwm Russell M. Nelson tau hais kom peb ua. Nyob hauv txoj kab ke txais lub cim nco txog, peb khi lus txhua Hnub Caiv hais tias peb yuav “nco ntsoov txog nws thiab coj raws li nws cov lus txib.”
II.
Nyob hauv Phau Ntawv Maumoos, tus Tswv tau qhia lub hauv paus ntawm “Khetos cov lus qhuab qhia.” Nov yog kev ntseeg tus Tswv Yexus Khetos, kev hloov siab lees txim, kev cai raus dej, kev txais tus Vaj Ntsuj Plig Dawb Huv, kev nyiaj kom mus txog thaum kawg, thiab kev hloov los ua zoo li ib tug me nyuam, uas txhais tias peb tso siab rau tus Tswv thiab ywj rau Nws ua txhua yam uas Nws hais kom peb ua.
Tus Tswv tej lus txib los muaj ob hom, tej uas nyob tas mus li, xws li Khetos cov lus qhuab qhia, thiab tej lus uas Nws txib rau ib lub caij xwb. Tej lus txib rau ib lub caij xwb yog tej yam uas yuav tsum txib kom pab tus Tswv lub Koom Txoos los sis cov neeg rau siab ntseeg rau ib lub sij hawm xwb, tiam sis yuav tsis ua ntxiv tom qab lub sij hawm ntawd. Muaj tej lus txib rau ib lub caij xwb xws li tus Tswv tej lus qhia rau cov thawj coj ntawm lub Koom Txoos kom coj Haiv Neeg Ntseeg nyob hauv New York mus rau Ohio, mus rau Missouri, mus rau Illinois, ces thaum kawg coj cov pioneer mus rau cov roob hauv sab hnub poob. Txawm yog yuav ua li no rau ib lub caij xwb, thaum lub sij hawm uas tus Tswv txib li no ces yeej yuav tsum mloog lus.
Tej lus txib uas nyob tas mus li los twb siv sij hawm ntev me ntsis kom txhua tus ua raws li tej lus txib ntawd. Piv txwv hais tias, Thawj Tswj Hwm Lorenzo Snow zaj lus txog kev cai them ib feem kaum twb hais txog ib txoj lus txib uas tus Tswv hais ua ntej tiam sis cov mej zeej ntawm lub Koom Txoos tsis tshua ua. Yuav tsum rov qab qhia tias txoj lus txib tseem ceeb npaum li cas vim lub Koom Txoos thiab cov mej zeej muaj xwm txheej ntawd. Nyob hauv peb lub caij nyoog twb rov qab qhia txog tej lus txib vim muaj xwm txheej uas Tsoom Haiv Neeg Ntseeg hauv Hnub Nyoog Kawg los sis lub Koom Txoos raug. Xws li zaj lus tshaj tawm txog tsev neeg uas Thawj Tswj Hwm Gordon B. Hinckley hais ib tiam neeg tas los, thiab Thawj Tswj Hwm Russell M. Nelson cov lus hais kom siv lub npe ntawm lub Koom Txoos raws li tus Tswv tau qhia, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
III.
Ib yam los ntawm peb tus Cawm Seej tej lus qhia ntxiv yog ib yam uas yuav tsum rov qab qhia txog vim muaj xwm txheej hauv peb lub caij nyoog.
Nov yog ib lub sij hawm thaum tib neeg hais tej lus nyaum thiab tej lus phem rau lwm tus thiab tej lub sij hawm peb ua li no nyob hauv peb tsev neeg. Qhov uas tib neeg xav txawv txog tej tsab cai rau cov pej xeem ntshe feem ntau ua rau tib neeg sib cav sib ceg—los yog sib ntxub—tab meeg sawv daws thiab kom tsis sib raug zoo nrog lwm tus. Kev sib ntxub no tav kev rau cov neeg kom lawv tsim tsis taus tej kev cai txog tej yam tseem ceeb uas cov pej xeem feem coob xav tias yuav tsum ua sai sai kom pab sawv daws.
Cov uas coj raws li Yexus Khetos yuav tsum qhia thiab ua dab tsi thaum muaj tej kev sib tham tsis zoo no? Nws tau qhia dab tsi thiab coj yam ntxwv zoo li cas?
Yeej yog ib qho tseem ceeb uas ib lub ntsiab cai uas Yexus qhia thaum Nws tshwm sim rau cov Neeg Nifais pom yog hais kom lawv tsis txhob sib cav sib ceg. Txawm yog Nws hais txog tej kev sib cav sib ceg txog cov lus qhuab qhia, Nws tej lus kuj hais txog tej kev sib tham thiab tej kev sib raug zoo ntawm kev kav teb kav chaw, tej tsab cai rau cov pej xeem, thiab kev sib haum hauv tsev neeg. Yexus qhia hais tias:
“Tus uas muaj siab xav sib cav sib ceg twb tsis yog los ntawm kuv, tiam sis yog los ntawm tus dab phem, tus uas yog leej txiv ntawm kev sib cav sib ceg, thiab nws txhaub neeg lub siab kom ib leeg sib cav sib ceg npau taws rau ib leeg.
“Saib seb, nov tsis yog kuv txoj lus qhuab qhia, uas txhaub neeg lub siab kom npau taws, ib leeg tawm tsam ib leeg; tiam sis qhov no yog kuv txoj lus qhuab qhia, kom tsis txhob muaj tej ntawd.”
Thaum Nws tseem ua hauj lwm qhuab qhia rau cov Neeg Nifais, Yexus tau qhia lwm txoj lus txib uas muaj lub ntsiab ze rau Nws txoj kev hais kom txhob sib cav sib ceg. Peb paub los ntawm Phau Vaj Lug Kub Npaivnpaum Nws twb qhia tej no nyob hauv Nws Zaj Lus Qhia Nyob Pem Roob, hais yuav luag ib yam li Nws qhia rau cov Neeg Nifais. Kuv mam li hais tej lus los ntawm Phau Vaj Lug Kub Npaivnpaum.
“[Cia li] hlub nej cov yeeb ncuab thiab thov Vajtswv pab rau cov uas tsim txom nej.”
Nov yog Yexus Khetos txoj lus txib uas tib neeg nco ntsoov—tiam sis yeej nyuaj tshaj rau tib neeg ua. Tiam sis yog ib feem tseem ceeb ntawm Nws txoj kev caw txhua leej txhua tus kom lawv los nrog Nws mus. Ib yam li Thawj Tswj Hwm David O. McKay qhia, “Tsis muaj ib txoj kev zoo dua kom qhia tias yus hlub Vajtswv, tsuas yog qhia tias yus ua siab dawb hlub yus tus neeg zej zog.”
Nov yog tej lus qhia tseem ceeb ntxiv los ntawm tus uas yog peb tus yam ntxwv: “Cov uas ua rau neeg nyob sib haum xeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov me nyuam.”
Cov uas ua rau neeg nyob sib haum xeeb! Yuav pab peb txoj kev sib raug zoo li cas yog tias cov uas coj raws li Yexus Khetos yuav tsis txhob hais tej lus nyaum thiab phem thaum peb sib tham.
Nyob hauv lub tuam rooj sab laj xyoo tas los no, Thawj Tswj Hwm Russell M. Nelson tau hais kom peb ua tej yam no:
“Txoj kev yooj yim tshaj kom paub tias leej twg yog tus coj raws li Yexus Khetos tiag tiag yog kev saib tus ntawd ua siab zoo rau lwm tus npaum li cas. …
“… Yexus Khetos cov thwj tim tseeb yog cov uas ua rau tib neeg sib haum xeeb.
“… Ib yam zoo tshaj plaws uas peb ua tau kom hwm tus Cawm Seej yog kev ua ib tug uas tsim kev thaj yeeb.”
Nws hais tas li no: “Kev sib cav sib ceg yog ib txoj kev yus xaiv. Kev ua rau neeg sib haum xeeb yog ib txoj kev yus xaiv. Nej muaj kev ywj siab xaiv kev sib cav sib ceg los sis kev sib haum xeeb. Kuv yaum kom nej xaiv ua cov uas ua rau neeg sib haum xeeb, tam sim no thiab tas mus li.”
Thaum lawv pib sib tham tej pawg uas yuav tsis sib haum yuav tau pib thaum lawv hais txog tej yam uas lawv sawv daws pom zoo.
Yog peb yuav coj raws li tus Yam Ntxwv Zoo Tshaj Plaws thiab Nws tus yaj saub, peb yuav tsum xyaum ua raws li qhov uas tib neeg hais tias yog Txoj Kev Cai Zoo: “Txhua yam uas nej xav kom lwm tus ua rau nej, nej cia li ua li ntawd rau lawv thiab, vim txoj kev cai thiab cov yaj saub qhia li no.” Peb yuav tsum hlub thiab ua zoo rau txhua tus. Peb yuav tsum tsis txhob sib cav sib ceg thiab yuav tsum ua rau tib neeg sib haum xeeb thaum peb sib tham. Qhov no tsis txhais tias peb tso peb tej lub ntsiab cai thiab tej kev cai tseg tiam sis yuav tsum tsis txhob tsim txom lwm tus vim lawv ntseeg tej yam txawv peb. Peb tus Yam Ntxwv uas Zoo Tshaj Plaws twb ua li no hauv Nws txoj hauj lwm qhuab qhia. Nws tau coj yam ntxwv li no rau peb ib yam li Nws caw peb los nrog Nws mus.
Nyob hauv lub rooj sab laj no plaub xyoos tas los, Thawj Tswj Hwm Nelson tau hais kom peb cov uas nyob hauv hnub nyoog no ua li no:
“Nej puas txaus siab cia Vajtswv yeej hauv nej lub neej? Nej puas txaus siab cia Vajtswv ua tus tseem ceeb tshaj plaws hauv nej lub neej? Nej puas yuav cia Nws cov lus, Nws cov lus txib, thiab Nws tej kev khi lus hloov tej yam nej ua txhua hnub? Nej puas yuav cia Nws lub suab nrov dua li lwm lub suab?”
Vim peb yog cov uas coj raws li Yexus Khetos, thov kom peb qhia thiab ua tim khawv txog Yexus Khetos, peb tus Yam Ntxwv uas Zoo Tshaj Plaws. Cia peb coj raws li Nws thaum peb tso kev sib cav sib ceg tseg. Thaum peb txhawb nqa tej tsab cai uas peb xav tau tab meeg sawv daws, thov cia peb ua neeg tsim nyog txais Nws cov koob hmoov thaum peb siv tej lus thiab tej txheej txheem ntawm cov uas ua rau tib neeg sib haum xeeb. Nyob hauv peb tsev neeg thiab nrog lwm tus cia peb tsis txhob hais tej yam nyaum thiab ntxub ntxaug. Cia peb nrhiav kev ua neeg dawb huv, ib yam li peb tus Cawm Seej, tus uas kuv ua tim khawv txog thiab xav tau Nws cov koob hmoov kom pab peb ua Haiv Neeg Ntseeg tiag. Los ntawm Yexus Khetos lub npe, amees.