“Kuv Yog tus Ntawd”

Yog Hnub Caiv, thiab peb tau sib sau los ua ke yuav hais lus txog Khetos thiab qhov uas Nws raug ntsia saum ntoo khaub lig. Kuv paub tias kuv tus Txhiv Dim tseem muaj txoj sia.

Sim xav txog lub lim tiam kawg hauv Yexus lub neej hauv ntiaj teb no. Muaj ib pab neeg coob coob sau los ua ke, kuj muaj cov tub rog Loos uas tuav tej rab hmuv thiab rab ntaj. Cov tuam pov thawj uas tuav tej tsau tau coj nws mus, pab neeg no tsis yog yuav mus ntaus rog xav kov yeej ib lub nroog. Hmo ntawd lawv tsuas xav tau ib tug txiv neej xwb, ib tug txiv neej uas tsis nqa riam phom, tsis tau kawm ua tub rog, los sis tsis tau sib ntaus ib zaug hauv tag nrho Nws lub neej.

Thaum cov tub rog tuaj txog, Yexus, xav pab tiv thaiv Nws cov thwj tim, tau txav los thiab hais tias, “Nej tuaj nrhiav leej twg?” Lawv teb tias, “Yexus ntawm Naxales.” Yexus teb tias, “Kuv yog tus ntawd. … Thaum … Yexus hais rau lawv hais tias, yog kuv ntag, lawv thaub nchos rov qab thiab ntog pawg lug rau hauv av.”

Kuv xav tias tej lus ntawd yog ib co lus tseem ceeb hauv cov vaj lug kub. Nws qhia kuv tseeb tiag thaum yus nyob rau ntawm Vajtswv Tib Leeg Tub xub ntiag—tus uas yog tus Yehauvas hauv Phau Qub thiab tus Tswv Yug Yaj Zoo hauv Phau Tshiab, uas tsis tuav tej cuab yeej ua rog twg—es tsuas hnov nws lub suab tus uas yog Chaw Khiav Nkaum Cuab Daj Cua Dub, tus Tub Vaj Ntxwv ntawm Kev Thaj Yeeb, yeej ua rau neeg tawm tsam khiav rov qab, ntog rau pem teb, thiab ua rau tag nrho pab neeg ntawd xav tias kheev lam hmo ntawd lawv raug txib mus ntxuav tais diav xwb.

Ob peb hnub ua ntej ntawd, thaum luag qhuas Nws thaum Nws los hauv nroog, “cov neeg uas nyob hauv lub nroog, ras zom zaws,” nqe vaj lug kub hais tias, lawv sib nug hais tias, “Tus no yog leej twg?” Kuv xav tias lo lus nug “Tus no yog leej twg?” yog tib lo lus nug uas cov tub rog ntawd tab tom nug lawv tus kheej thiab!

Lo lus teb rau lus nug ntawd tsis yog vim Nws lub ntsej muag, vim Yaxayas twb qhia li no xya puas xyoo ua ntej ntawd hais tias “nws tsis muaj lub cev ntaj ntsug zoo saib thiab tsis muaj tus yam ntxwv zoo nyiam; thiab thaum peb pom nws tsis zoo nraug txaus peb xav tau nws.” Twb tsis yog vim Nws hnav tsuj hnav npuag los sis muaj nyiaj txiag, vim Nws twb tsis muaj ob yam no. Tsis yog vim nws tau kawm ntawv hauv tej tsev teev ntuj vim peb tsis muaj puav pheej hais tias Nws tau kawm ntawv hauv cov ntawd hlo li, tab txawm thaum Nws tseem hluas nws hais lus uas rau cov kws sau ntawv thiab thiab kws hais plaub xav tsis thoob, vim Nws hais Nws tej lus qhuab qhia “yam li nws muaj hwj chim heev.”

Txij li muaj kev qhia hauv lub tuam tsev mus rau thaum Nws rov qab los rau hauv Yeluxalees thiab thaum kawg, lawv ua tsis ncaj los ntes nws, Yexus yeej raug tej kev nyuaj kawg, feem ntau txawm muaj kev dag los Nws tseem ua tus yeej—tej kev yeej uas peb tsis paub ua li cas thiaj yeej tsuas yog nws los saum ntuj los xwb.

Tiam sis hauv tib neeg zaj keeb kwm, luag tej hais tias yog tej yam me me thiab lawv tsis puab tseeb tias Nws yog leej twg tiag. Lawv hais tias Nws txoj kev ncaj ncees tsuas yog nws muaj hlob, hais tias Nws txoj kev txim lij tsuas yog kev chim siab, tias Nws txoj kev hlub tshua tsuas yog kev zam cai xwb. Peb yuav tsum xyuam xim thaum peb hnov tej lus qhia tsis tseeb txog Yexus uas tsis nco qab xav txog tej lus qhia uas peb tsis nyiam. Luag tej twb “saib tsis tau” Nws tej txiaj ntsim, thiab Nws txoj kev hlub.

Hauv Nws txoj kev qhuab qhia tib neeg, Yexus qhia tias muaj ob txoj lus txib tseem ceeb. Twb qhia txog ob txoj no hauv lub rooj sab laj no thiab yuav qhia tsis tu tsis tseg: “Hlub tus Tswv nej tus Vajtswv [thiab] hlub nej tej kwv tij zej zog ib yam li nej hlub nej lub cev.” Yog peb yuav ua raws li tus Cawm Seej ua thaum hais txog ob nqi lus no, peb yuav tsum ua ruaj nrees raws li Nws twb hais. Thiab Nws twb hais tias, “Yog nej hlub kuv tiag, nej yeej yuav mloog kuv lus.” Tib hmos ntawd, Nws hais tias peb yuav tsum “ib leeg yuav tsum hlub ib leeg, ib yam li kuv hlub nej.”

Hauv cov nqe vaj lug kub ntawd, cov lus ntawd qhia qhov tseeb, hais tias yuav tsum hlub li Yexus tau hlub—tej lub sij hawm peb hu txoj kev hlub no ua lub siab hlub.

Tej lus no lub ntsiab yog dab tsi? Yexus tau hlub li cas?

Qhov thib ib, Nws hlub “tag nrho Nws siab ntsws, kawg plab kawg plawv, kawg dag kawg zog,” Nws thiaj muaj cuab kav kho tej kev mob thiab hais lus tseeb uas luag tej tsis nyiam. Ua lwm yam lus hais, Nws yog tus uas muaj taus kev tshav ntuj thiab yuav qhov tseeb thaum tib lub sij hawm. Xws li Lihais foom koob hmoov rau nws tus tub Yakhauj tias, “Txoj kev txhiv dim los ntawm tus Mexiyas uas Dawb Huv; vim nws muaj kev tshav ntuj thiab kev tseeb nplua mias.” Nws txoj kev hlub ua rau peb txais tau kev puag thaum twg xav tau thiab lub khob iab thaum yus yuav tsum haus. Ces peb thiaj sim hlub—tag siab tag ntsws, kawg plab kawg plawv, kawg dag kawg zog—vim rau qhov Nws hlub peb li ntawd.

Yam thib ob ntawm Yexus txoj kev hlub yog Nws txoj kev mloog lus txhua lo lus uas Vajtswv hais tseg, txhua zaus ua raws li Nws lub siab nyiam thiab ua raws li Nws Leej Txiv Saum Ntuj Ceeb Tsheej hais.

Thaum Nws los txog thaj teb Tim Sab Hnub Poob No tom qab Nws Sawv Rov Los lawm, Khetos hais rau cov neeg Nifais tias: “Saib seb, kuv yog Yexus Khetos. … Kuv twb tau haus ntawm lub khob dej iab uas Leej Txiv muab rau kuv, … kuv thiaj ua raws li Leej Txiv lub siab nyiam … txij thaum chiv keeb.”

Muaj ntau yam Nws muab tau Nws tus kheej tshwm los, tab sis mas Yexus ua li ntawd thaum hais tias Nws tau mloog Vajtswv lus, peb yuav tsum nco qab hais tias tsis ntev ua ntej Nws raug kev txom nyem tshaj plaws, Vajtswv Tib Leeg Tub twb xav tias Nws Leej Txiv tau tso nws tseg. Yexus txoj kev hlub—uas yus pom thaum mloog lus tiag—tseem nyob ruaj khov, thiab tsis yog thaum muaj tej hnub yooj yim thiab xis nyob xwb tiam sis thaum muaj tej hnub uas tsaus ntuj nti thiab nyuaj kawg nkaus.

Cov vaj lug kub hais tias Yexus yog “ib tug txiv neej muaj kev nyuaj siab.” Nws raug kev tu siab, kev nkees, kev poob siab, thiab kev kho siab heev. Hauv txhua yam no, Yexus txoj kev hlub tsis tau poob qab thiab Nws Leej Txiv los ua tib yam thiab. Thaum hlub tiag tiag—kev hlub uas coj yam ntxwv, muab hwj chim, thiab foom pub tej txiaj ntsim—uas peb muaj yeej yuav tsis poob qab thiab.

Ces yog tias nej xav tias, thaum nej yim rau siab ntso nej yim muaj kev nyuaj siab; yog tias nej sim kov yeej nej tej teeb meem thiab tej kev tsis txawj ua, nej ho nrhiav tau ib tug neeg los sis ib yam uas xav tawm tsam nej txoj kev ntseeg; yog tias nej rau siab ntso ua, tiam sis nej tseem muaj kev ntshai, nej yuav tsum nco qab hais tias twb muaj li ntawd rau txhua tus neeg zoo hauv txhua tiam neeg lawm. Thiab nco qab hais tias yeej muaj ib tug neeg hauv ntiaj teb no uas tab tom sim tawm tsam txhua yam zoo uas nej tab tom xav ua.

Ces, thaum twg muaj caij zoo thiab caij pluag, thaum nej nto moo los sis luag tej luag thuam, thaum muaj tej yam zoo hauv Kev Muab Txum Tim Rov Qab Los thiab tej yam tsis zoo uas tib neeg ua, yog tias peb pheej nyob ruaj nrees hauv Yexus Khetos lub Koom Txoos. Vim li cas? Vim zoo li peb tus Cawm Dim, peb yeej npaj yuav ua kom tiav tas—tsis yog lam raug sim siab me me tiam sis yuav raug kev sim siab mus txog thaum kawg. Zoo siab kawg vim tus Thawj Coj tau cia peb nyeem ntawv teb cov lus nug ua ntej peb pib kawm. Tsis tas li ntawd xwb, peb muaj cov neeg uas xav qhuab qhia peb thiab qhia peb cov lus teb tsis tu tsis tseg. Tiam sis tej no yeej yuav tsis pab yog tias peb pheej khaj es tsis hnov lawv cov lus.

“Nej nrhiav leej twg?” Peb teb tag siab ntsws hais tias, “Yexus ntawm Naxales.” Thaum Nws hais tias, “Kuv yog Nws,” peb txhos caug thiab lees hais tias Nws yog tus Khetos uas muaj sia nyob, thiab tias Nws tib leeg xwb tau theej peb lub txhoj, tias Nws tab tom ev peb thaum uas peb xav tias Nws twb tso peb tseg lawm. Thaum peb sawv rau ntawm Nws thiab pom cov caws pliav hauv Nws ob txhais tes, Nws ob sab ko taw, thiab Nws sab tav, peb yuav pib to taub tias Nws txoj kev ua raws nraim li Leej Txiv txhais li cas tiag, kom ris peb tej kev txhaum thiab paub kev nyuaj siab—vim muaj kev hlub dawb paug rau peb. Kev ntseeg, hloov siab lees txim, ua kev cai raus dej los ntawm ib tug neeg uas muaj Vajtswv lub hwj chim, txais lub vaj txiaj ntsim Vaj Ntsuj Plig Dawb Huv, thiab txais peb tej koob hmoob dawb ceev hauv tus Tswv lub tsev—tej no puav leej yog “tej ntsiab cai thiab kab ke uas qhia txog peb txoj kev hlub Vajtswv thiab cov neeg zej zog thiab yog tej yam ntawm Yexus Khetos lub Koom Txoos tseeb.

Cov kwv tij thiab cov muam, kuv hais lus tim khawv tias Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog qhov uas Vajtswv tau muab rau peb kom tsa tau peb nto. Nws qhia txoj moo zoo tseeb, thiab lub pov thawj hwj uas muaj hwj huam tsis yog lam tau lam tsim los xwb. Kuv hais lus tim khawv tias Russell M. Nelson yog Vajtswv ib tug yaj saub, ib yam li cov uas ua Nws ntej thiab cov uas yuav lawv Nws qab yuav ua. Thiab yuav muaj ib hnub twg txoj kev coj ntawd yuav npaj ib tiam neeg los pom tus Neeg Xa Kev Cawm Dim los es yuav zoo li “xob laim … tim sab hnub tuaj,” thiab peb yuav qw hais tias, “Yexus ntawm Naxales.” Nws yuav xyab tes thiab muaj kev hlub tshaj tawm hais tias, “Kuv yog Nws.” Kuv cog lus li no vim kuv ua ib tug twj tim thiab muaj hwj chim thiab txoj cai ua li no los ntawm Nws lub npe dawb huv, tus ua yog Yexus Khetos, amees.