“Nov Yog Kuv Txoj Moo Zoo”—“Nov Yog Kuv lub Koom Txoos”

Tau ntev lawm, cov hmoov dub yog qhov uas tawg taus loj tshaj. Siv taus kom tuam phom loj, tiam sis siv tsis taus rau kev khawb hlau thiab kev tsim txoj kev. Tsis muaj zog txaus kom ua rau cov pob zeb tawg.

Nyob rau xyoo 1846 ib tug kws tov tshuaj chemical los ntawm Italis hu ua Ascanio Sobrero tau tsim ib qho uas tawg taus tshiab, nitroglycerin. Cov kua uas muaj roj no yeej muaj zog tshaj cov hmoov dub ib txhiab npaug. Yooj yim ua rau cov pob zeb tawg taus. Tiam sis ntshe, nitroglycerin tsis ruaj khov. Yog tias ua poob ntawm ib qho chaw siab tsim tsawv, yuav tawg. Yog tias kub dhau, yuav tawg. Yog tias txias dhau, ces yuav tawg. Yog tias yus tso hauv ib chav txias thiab tsaus ntuj ces cia nyob, ces thaum kawg yuav tawg. Tej teb chaws feem ntau txwv tsis pub muab thauj mus los, thiab feem ntau txwv tsis pub tsim hlo li.

Nyob rau xyoo 1860 ib tug kws kawm txuj ci science nyob Sweden hu ua Alfred Nobel pib sim ua kom nitroglycerin ruaj khov. Tom qab nws sim ua li no ntev li xya xyoo, nws ua raws li nws lub hom phiaj thaum nws siv ib cov av diatomaceous hu ua kieselguhr uas tsis tshua muaj nqis hlo li ntxaum cov nitroglycerin. Kieselguhr yog ib cov pob zeb dej txeem tau uas siv kom ua ib cov hmoov av. Thaum muab txuag nrog nitroglycerin, kieselguhr ntxaum cov nitroglycerin ces yuav muab cov kua nplaum ntawd puab ua “tej pas.” Zoo li no, ces nitroglycerin ruaj khov ntxiv. Tsis muaj teeb meem thaum ceev, thauj, thiab siv qhov uas muaj zog tawg loj tshaj plaws no. Qhov uas muab nitroglycerin thiab kieselguhr koom ua ke los Nobel hu ua “dynamite.”

Dynamite twb hloov lub ntiaj teb. Ua rau Nobel tau nyiaj ntau heev. Yog tsis muaj dab tsi pab ua ruaj khov, ces kev siv nitroglycerin yog ib qho teeb meem loj dhau kom thiaj li siv rau kev ua lag luam, ib yam li Ascanio Sobrero kawm. Nyob tus kheej, zoo li kuv twb hais lawm, kieselguhr los siv tsis taus ua dab tsi. Tiam sis muab ob qho no koom ua ke ces dynamite los yeej hloov taus ntau yam thiab muaj nqis heev.

Yog li no, qhov uas Yexus Khetos txoj moo zoo thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg koom ua ke yeej muaj hwj chim thiab muaj zog kom peb hloov taus. Txoj moo zoo yeej zoo tag nrho, tiam sis yuav tsum muaj ib lub koom txoos uas Vajtswv pom zoo kom qhia txoj moo zoo, saib xyuas kom tsis muab hloov, thiab ua cov kab ke dawb ceev raws li tus Cawm Seej lub hwj chim thiab txoj cai.

Cia li xav txog qhov uas muaj tus Cawm Seej txoj moo zoo thiab Nws lub Koom Txoos koom ua ke thaum tus yaj saub Amas hauv Phau Ntawv Maumoos nyob. Lub Koom Txoos lav ris txoj kev tsis txhob tshaj tawm “txog ib yam dab tsi tsuas yog tshaj tawm txog kev hloov siab lees txim thiab kev ntseeg tus Tswv, tus uas [yuav] txhiv nws cov neeg dim.” Vim muaj Vajtswv txoj cai, lub Koom Txoos lav ris txoj kev muab neeg ua kev cai raus dej “los ntawm tus Tswv lub npe, los ua pov thawj rau nws hais tias [tib neeg] tau khi lus nrog nws, hais tias yuav ua hauj lwm rau nws thiab ua raws li nws tej lus txib.” Cov neeg uas ua kev cai raus dej twb ris Yexus Khetos lub npe, koom Nws lub Koom Txoos, thiab tau txais kev cog lus tias yuav muaj hwj chim loj heev thaum lawv txais tus Ntsuj Plig ntau nplua mias.

Tib neeg coob twb mus rau cov Dej Maumoos kom mloog Amas tshaj tawm txog txoj moo zoo. Txawm yog lawv saib taus cov dej thiab hav zoov nyob ib puag ncig rau nqi, tus Tswv lub Koom Txoos tsis yog ib qho chaw los sis ib lub tsev; hnub no los kuj tsis yog li ntawd. Lub Koom Txoos yog ib co neeg xwb, Yexus Khetos cov thwj tim, uas koom ua ke raws li Vajtswv pom zoo uas pab ua raws li tus Tswv tej lub hom phiaj. Lub Koom Txoos yog lub cuab yeej uas siv kom peb kawm txog Yexus Khetos lub luag hauj lwm nyob hauv Leej Txiv Saum Ntuj Ceeb Tsheej txoj hau kev. Lub Koom Txoos muab txoj cai ua cov kab ke rau tib neeg thiab pab lawv khi lus nrog Vajtswv. Kev ua raws li tej kev khi lus ntawd ua rau peb muab siab npuab Vajtswv ntxiv, pab peb txais Nws lub hwj chim, thiab muab peb hloov los ua neeg zoo li Nws xav kom peb ua.

Ib yam li dynamite uas tsis muaj nitroglycerin yeej tsis tshwj xeeb hlo li, tus Cawm Seej lub Koom Txoos yeej yog Nws lub Koom Txoos tsuas yog tias muaj Nws txoj moo zoo xwb. Yog tsis muaj tus Cawm Seej txoj moo zoo thiab txoj cai ua cov kab ke, ces lub Koom Txoos tsis tshwj xeeb li.

Yog tsis muaj kieselguhr kom pab ruaj khov, ces nitroglycerin tsis tshua muaj nqis ua ib yam tawg taus. Ib yam li peb kawm los ntawm zaj keeb kwm, yog tsis muaj tus Tswv lub Koom Txoos, ces tib neeg txoj kev to taub txog Nws txoj moo zoo los kuj tsis ruaj khov—ntshe cov lus qhuab qhia hloov vim muaj tej kev teev ntuj, tej kab lig kev cai, thiab tej lub tswv yim txawv. Nyob hauv txhua lub caij nyoog tso txoj cai los txog nim no twb tau muaj tej yam no. Txawm yog txoj moo zoo yeej zoo tag nrho thaum muab tshwm sim, kev xav txog thiab kev siv txoj moo zoo los twb hloov zuj zus kom tsis muaj hwj chim vim tsis muaj tus txheej txheem uas Vajtswv tso cai pom zoo rau.

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua rau peb txais tau Vajtswv lub hwj chim vim Nws tso cai rau cov neeg haud qhia Khetos cov lus qhuab qhia thiab ua cov kab ke ntawm kev cawm seej thiab kev tsa nto. Tus Cawm Seej xav zam txim pub rau peb, pab peb txais Nws lub hwj chim, thiab hloov peb lub siab. Nws tau raug txom nyem rau peb tej kev txhaum thiab xav zam peb lub txim uas peb yeej yuav raug. Nws xav kom peb hloov los ua neeg dawb huv thiab los ua neeg zoo tag nrho dhau los ntawm Nws.

Yexus Khetos muaj hwj chim ua li no. Nws tsis tau pab peb tu siab vim peb tsis zoo tag nrho xwb thiab tsis yog Nws khuv xim qhov uas peb yuav raug txim tas mus ib txhis vim peb ua txhaum xwb. Tsis yog li ntawd, Nws twb ua ntau dua ntais thiab tau muab Nws lub Koom Txoos txum tim rov qab los kom thiaj li txais tau Nws lub hwj chim.

Lub ntsiab ntawm txoj moo zoo uas lub Koom Txoos qhia yog qhov uas Yexus Khetos tau ris “peb tej kev nyuaj siab, thiab nqa peb tej kev tu siab mus.” Nws “muab peb lub txim uas tsim nyog peb raug tso rau Nws ris.” Nws tau “nyiaj qhov uas nws raug ntsia saum ntoo khaub lig,” “ua rau kev tuag tej hlua tu,” “nce mus rau saum ntuj ceeb tsheej, thiab … mus zaum ntawm Vajtswv sab tes xis, mus aws ntawm Leej Txiv nws tej cai muaj kev hlub tshua.” Tus Cawm Seej tau ua tag nrho tej yam no vim Nws hlub Nws Leej Txiv thiab Nws hlub peb. Nws twb them tus nqi loj tshaj plaws kom Nws thiaj “aws [tau] tag nrho cov uas ntseeg nws [thiab] hais daws noob neej zaj”—rau peb. Yexus Khetos xav kom peb hloov siab lees txim thiab mus cuag Nws, Nws thiaj li yuav ua rau peb hloov ua neeg dawb huv thiab tsis muaj txim. Qhov uas Nws xav ua li no, los Nws yeej tsis tu tsis tseg.

Kev txais Vajtswv lub hwj chim thiab Nws txoj kev hlub los ntawm peb tej kev khi lus yog dhau los ntawm Nws lub Koom Txoos. Qhov uas muaj tus Cawm Seej txoj moo zoo thiab Nws lub Koom Txoos koom ua ke yuav hloov peb lub neej. Twb hloov kuv niam tais thiab yawm txiv lub neej. Kuv yawm txiv Oskar Andersson tau ua hauj lwm hauv tshav ua nkoj nyob hauv Högmarsö, ib lub pov txwv hauv pawg pov txwv Stockholm. Nws tus poj niam, Albertina, thiab nkawd cov me nyuam tau nyob hauv thooj av loj Sweden. Ib zaug txhua ob lub lim tiam, thaum hnub Saturday, Oskar caij nkoj los tsev ua ntej nws yuav tsum rov qab mus rau Högmarsö thaum hnub Sunday hmo ntuj. Ib hnub, thaum nws nyob hauv Högmarsö, nws hnov ob tug tub txib Amelikas qhia txog Yexus Khetos txoj moo zoo. Oskar xav tias tej yam uas nws hnov yog qhov tseeb tiag, thiab ua rau nws muaj kev xyiv fab uas tsis paub kawg.

Lwm zaus thaum nws rov qab los tsev, Oskar zoo siab qhia Albertina txog ob tug tub txib. Nws piav tias nws ntseeg tej yam uas nkawd qhia. Nws hais kom nws tus poj niam nyeem cov ntawv uas ob tug tub txib muab rau nws, ces nws qhia Albertina tias nws xav tias nkawd cov me nyuam yuav tsum tsis txhob ua kev cai raus dej thaum lawv yog me nyuam mos liab. Albertina npau taws thiab tso cov ntawv tseg. Oskar thiab Albertina nkawd tsis tshua sib tham ntau ua ntej Oskar mus ua hauj lwm thaum hnub Sunday.

Tom qab nws tus txiv mus, Albertina rov qab nqa cov ntawv. Nws ua tib zoo muab cov lus qhuab qhia haud piv rau cov lus qhia hauv nws Phau Vaj Lug Kub Npaivnpaum. Nws xav tsis thoob vim nws xav tias tej yam uas nws nyeem muaj tseeb. Lwm zaus thaum Oskar rov qab los tsev, nws tus poj niam tos txais nws, thiab tos txais Phau Ntawv Maumoos uas nws nqa los. Albertina rau siab nyeem phau ntawd, thiab muab piv rau cov lus qhuab qhia hauv nws Phau Vaj Lug Kub Npaivnpaum. Ib yam li Oskar, nws paub tias yog qhov tseeb tiag thiab ua rau nws muaj kev xyiv fab uas tsis pom qab hais txog.

Oskar, Albertina, thiab nkawd cov me nyuam tau tsiv tsev mus rau Högmarsö kom nyob ze ob peb tug mej zeej ntawm lub Koom Txoos nyob ntawd. Ib lub lim tiam tom qab Oskar thiab Albertina tau ua kev cai raus dej nyob rau xyoo 1916, twb hu Oskar los ua tus thawj coj nyob Högmarsö ntawd. Ib yam li cov neeg hloov siab los ntseeg tshiab feem ntau, Oskar thiab Albertina raug neeg cem vim nkawd txoj kev ntseeg tshiab. Cov neeg ua liaj teb tsis kam muag cov mis nyuj rau nkawd, yog li ntawd Oskar nquam dej hla tus dej txhua hnub kom yuav mis nyuj los ntawm ib tug neeg ua liaj teb uas txaus siab ntxiv.

Tiam sis tom qab ntawd, cov mej zeej ntawm lub Koom Txoos nyob Högmarsö nce zuj zus, vim Albertina zaj lus tim khawv thiab txoj kev xav tshaj tawm txoj moo zoo. Thaum pawg no los ua ib ceg ntseeg, twb hu Oskar los ua ceg ntseeg tus thawj tswj hwm.

Cov mej zeej hauv ceg ntseeg Högmarsö ntawd twb hwm lub pov txwv ntawd. Nov yog lawv cov Dej Maumoos. Nov yog qhov chaw uas lawv tau los paub txog lawv tus Cawm Dim.

Thaum sij hawm dhau mus, thaum nkawd ua raws li nkawd tau khi lus thaum ua kev cai raus dej, Yexus Khetos lub hwj chim tau muab Oskar thiab Albertina hloov. Nkawd xav khi lus ntxiv thiab txais cov koob hmoov hauv lub tuam tsev. Kom txais tau cov koob hmoov ntawd, nkawd tsiv tsev mus rau Salt Lake City nyob rau xyoo 1949. Oskar twb yog ib tug thawj coj rau cov mej zeej hauv Högmarsö rau 33 xyoos.

Qhov uas muab nitroglycerin thiab kieselguhr koom ua ke ua rau dynamite muaj nqis heev; qhov uas muab Yexus Khetos txoj moo zoo thiab lub Koom Txoos koom ua ke los yeej muaj nqis tshaj plaws. Oskar thiab Albertina hnov txog txoj moo zoo uas tau muab txum tim rov qab los vim Vajtswv ib tug yaj saub tau hu thiab txib cov tub txib mus rau Sweden. Los ntawm Vajtswv txoj cai, cov tub txib tau qhia Khetos cov lus qhuab qhia thiab los ntawm txoj cai pov thawj hwj lawv muab Oskar thiab Albertina ua kev cai raus dej. Thaum nkawd yog mej zeej, Oskar thiab Albertina tau kawm, loj hlob tuaj, thiab pab lwm tus ntxiv. Nkawd tau los ua Tsoom Haiv Neeg Ntseeg hauv Hnub Nyoog Kawg vim lawv tau ua raws li lawv tej kev khi lus.

Tus Cawm Seej hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog “kuv lub koom txoos” vim Nws tau tso cai rau lub Koom txoos ntawd los ua raws li Nws lub hom phiaj kom qhia Nws txoj moo zoo, ua Nws cov kab ke thiab tej kev khi lus, Nws lub hwj chim thiaj li yuav muab peb hloov ua neeg dawb huv thiab ua rau peb tsis muaj txim. Yog tsis muaj Nws lub Koom Txoos, tsis muaj txoj cai, tsis muaj kev tshaj tawm qhov tseeb los ntawm Nws lub npe, tsis muaj cov kab ke thiab kev khi lus, tsis muaj lub hwj chim ua li Vajtswv, tsis muaj kev hloov los ua neeg zoo li Vajtswv xav kom peb ua, thiab Vajtswv txoj hau kev rau Nws cov me nyuam yuav tsis muaj nqis dab tsi li. Lub Koom Txoos hauv lub caij nyoog tso cai no yeej tseem ceeb rau Nws txoj hau kev.

Kuv caw nej rau siab ntxiv cia siab rau tus Cawm Seej, Nws txoj moo zoo, thiab Nws lub Koom Txoos. Thaum nej ua li no, nej yuav kawm tias qhov uas tus Cawm Seej txoj moo zoo thiab Nws lub Koom Txoos koom ua ke ua rau nej muaj hwj chim hauv nej lub neej. Lub hwj chim no muaj zog tshaj dynamite. Yuav ua rau tej pob zeb uas cuam tshuam tawg tag nrho thiab ua rau nej hloov ua cov uas txais Vajtswv lub nceeg vaj los ua nej tug. Thiab nej yuav “muaj txoj kev xyiv fab uas piav tsis tau thiab muaj yeeb koob puv npo.” Los ntawm Yexus Khetos lub npe, amees.