Lub Neej No Yeej Yog Raws Li Txoj Kev uas Tau Npaj Tseg!

Rau ntau xyoo kuv raug txib mus qhia ib tug pog laus hauv kuv pawg ntseeg. Nws lub neej yeej tsis yooj yim li. Nws muaj mob muaj nkees thiab hnov mob heev vim nws raug mob sab kawg thaum nws tseem yaus. Nws sib nrauj thaum nws muaj 32 xyoos es tau tu nws plaub tug me nyuam nws ib leeg xwb, ces nws rov qab yuav txiv thaum nws muaj 50 xyoo. Nws tus txiv thib ob ntawd tuag thaum nws tsuas muaj 66 xyoo, ces tus muam no nyob ua poj ntsuam 26 xyoo ntxiv.

Txawm nws muaj kev cov nyom ntau heev hauv nws lub neej los, nws yeej rau siab ntso ua raws li nws tej kev khi lus mus txog thaum kawg. Tus muam no rau siab nrhiav nws tsev neeg caj ceg, mus hauv lub tuam tsev ntau, thiab khaws thiab sau tej zaj dab neeg txog nws tsev neeg. Txawm nws muaj teeb meem ntau, thiab tej thaum nws nyuaj siab thiab kho siab los, nws tseem muaj kev cia siab thiab hlub lwm tus neeg thiab ua siab zoo tas li.

Cuaj lub hli tom qab nws tau tas sim neej, nws ib tug tub tau ib qho kev zoo hauv lub tuam tsev. Tus Vaj Ntsuj Plig Dawb Huv lub hwj chim twb qhia nws tias nws niam muaj ib zaj xov xav qhia rau nws. Nws niam tau qhia rau nws, tiam sis tsis yog tim tej yam uas nws pom los sis hnov. Tus tub ntawd txawm hnov zaj xov no rau hauv nws lub hlwb uas nws niam hais tias: “Kuv xav kom koj paub hais tias lub neej hauv lub ntiaj teb no yeej yog raws li txoj kev uas tau npaj tseg, thiab kuv xav kom koj paub tias tas sim no kuv to taub yog vim li cas kuv thiaj raug txhua yam tsav hauv kuv lub neej—thiab txhua yam yeej zoo lawm.”

Zaj xov no muaj nqi heev thaum yus xav txog nws lub neej thiab txhua yam teeb meem uas tus muam no raug thiab kov yeej hauv lub neej no.

Cov kwv tij thiab cov muam es, lub neej no yeej yog raws li txoj kev uas tau npaj tseg! Vajtswv twb tsim kom muaj raws li txoj kev uas tau npaj tseg! Txawm muaj tej teeb meem, kev cov nyom, thiab kev sim siab txhua yam uas peb sawv daws raug los, peb Leej Txiv Saum Ntuj Ceeb Tsheej uas hlub peb, txawj ntse thiab paub txhua nrho yeej tau npaj txoj hau kev zoo siab rau peb thiab peb yuav tsis poob qab. Nws txoj hau kev yuav pab peb kov yeej peb tej kev qaug zog hauv lub neej hauv ntiaj teb no. Tus Tswv tau hais tias, “Qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab kom tau txoj sia nyob mus ib txhis”

Txawm li ntawd los, yog peb yuav txais tus Tswv “txoj hauj lwm thiab lub yeeb koob,” uas yog “kev tsis txawj tuag thiab txoj sia nyob mus ib txhis,” peb yuav tsum tau kawm thiab raug kev sim siab, thiab mus dhau plaws lub cub hluav taws—tej thaum nyiaj tej uas peb xav tias yuav nyiaj tsis tau. Yog tias yus tsis muaj teeb meem, kev cov nyom, thiab kev nyuaj siab hauv lub neej no ces peb thiaj tsis ua tej yam uas pab kom lub neej hauv ntiaj teb no muaj raws li txoj kev uas tau npaj tseg.

Ces yog li ntawd peb yuav tsum paub tseeb hais tias peb yeej yuav raug tej yam nyuaj kawg. Peb yuav raug tej yam uas sim peb lub siab thiab cov neeg uas pab peb muaj kev siab hlub tiag tiag thiab ua rau peb ua siab ntev kawg. Tiam sis peb yuav tsum ua tiag thev thaum peb raug tej teeb meem thiab nco qab tias, tus Tswv tau hais tias:

“Thiab yog tus uas muab nws txoj sia pub rau kuv lub hom phiaj, rau kuv lub npe, tus ntawd yuav nrhiav tau txoj sia dua, uas twb yog txoj sia nyob mus ib txhis.

“Yog li ntawd, tsis txhob ntshai nej cov yeeb ncuab [los yog nej tej teeb meem, kev cov nyom, los yog tej kev sim siab hauv lub neej no], vim kuv tau txiav txim …, tus Tswv hais tias, kuv yuav ua txhua yam sim nej, saib nej puas yuav ua raws li kuv txoj kev khi lus … kom tus Tswv yuav pom hais tias nej yog neeg tsim nyog.”

Thaum twg peb nyuaj siab los sis ntxhov siab txog peb tej teeb meem los sis xav tias peb raug ntau tshaj peb yuav tsum raug hauv lub neej nyuaj nyuaj no, peb yuav tsum nco qab cov lus uas tus Tswv tau hais rau haiv neeg Ixayees hais tias:

“Nej yuav tsum nco ntsoov hais tias, tus Tswv uas yog nej tus Vajtswv coj nej kev hla tiaj suab puam tau plaub caug xyoo los li cas, nws cia nej raug kev txom nyem ntau yam sim nej siab, saib nej ua puas taus siab ntev thiab saib nej puas yuav ua raws li nws tej lus.”

Xws li Lihais qhia nws tus tub Yakhauj hais tias:

“Koj tau raug tej kev txom nyem thiab ntau yam kev tu siab … Tiam sis, … [Vajtswv] yuav fij koj tej kev txom nyem los ua tej yam uas pab tau koj. … Yog li ntawd, kuv paub tias koj twb txais kev txhiv dim, vim koj tus Txhiv Dim txoj kev ncaj ncees.”

Vim hais tias lub neej no yog ib lub caij sim siab thiab “cov huab dub ntawm kev ntxhov siab los txog peb thiab yuav rhuav peb txoj kev thaj yeeb,” yuav pab peb yog peb nco qab cov lus ntuas thiab lus cog tseg hauv phau Mauxiyas 23 uas qhia txog lub neej no tej kev cov nyom: “Txawm li ntawd los—tus uas tso siab rau tus Tswv, tus Tswv yuav muab tus ntawd tsa sawv thaum txog hnub kawg.”

Ua ib tug tub hluas, kuv muaj kev mob siab thiab tu siab kawg vim lwm tus neeg ua tsis ncaj ncees rau kuv, es kuv thiaj xav tias kuv yog neeg tsis tsim nyog thiab xav tias tus Tswv tsis saib kuv rau nqi hlo li. Txawm li ntawd los, kuv hais lus tim khawv tias tus Tswv yuav ntxiv zog rau peb thiab yuav tsa peb nto txawm peb raug kev nyuaj siab li cas los xij thaum peb tseem ua neej hauv lub neej nyuaj kawg no.

Peb yeej paub txog Povlauj zaj dab neeg hais tias:

“Vajtswv twb ua tej uas zoo kawg nkaus rau kuv pom lawm. Nws ntshai nyob tsam kuv khav heev nws thiaj cia kuv lub cev muaj ib qho mob, qhov ntawd zoo li Dab Ntxwg Nyoog ib tug tub txib uas muab kuv nplawm kom kuv tsis txhob khav.

“Kuv twb thov Vajtswv kho kuv qhov mob ntawd peb zaug lawm.

“Thiab nws hais rau kuv tias, Kuv pom zoo hlub koj ces txaus lawm. Kuv yuav pub kuv lub hwj chim rau tus uas qaug zog. Qhov uas kuv qaug zog ua rau kuv zoo siab kawg li, rau qhov Yexus Khetos lub hwj chim yuav tsom kwm kuv.”

Peb tsis paub tseeb hais tias Povlauj “lub cev muaj ib qho mob” zoo li cas. Nws tsis tau piav seb puas yog muaj mob muaj nkees, muaj teeb meem ntawm lub paj hlwb los yog sab siab ntsws, los sis ib txoj kev ntxias. Tiam sis peb tsis tas paub tseeb yog li cas vim peb paub tias nws siv zog taij thov tus Tswv los pab thiab thaum kawg, tus Tswv tau ntxiv zog ntxiv hwj chim kom nws nyiaj mus dhau nws txoj kev nyuaj siab ntawd.

Zoo li Povlauj, tus Tswv los pab kuv muaj zog ntawm sab paj hlwb thiab sab siab ntsws, ces ntau xyoo tom qab ntawd kuv thiaj to taub tias kuv muaj nqi thiab tsim nyog txais tej koob hmoov ntawm txoj moo zoo no. Tus Cawm Seej tau pab kuv kov yeej tej kev xav uas ua rau kuv xav tias kuv yog neeg tsis tsim nyog thiab kuv thiaj zam txim rau tus neeg uas ua txhaum rau kuv. Kuv thiaj li to taub tias tus Cawm Seej txoj Kev Theej Txhoj yog ib lub txiaj ntsim zoo rau kuv thiab kuv Leej Txiv Saum Ntuj Ceeb Tsheej thiab Nws Tib Leeg Tub yeej hlub kuv kawg li. Vim muaj tus Cawm Seej txoj Kev Theej Txhoj, lub neej no yeej yog raws li txoj kev uas tau npaj tseg.

Nyob nyob ces kuv muaj hmoov pom seb tus Cawm Seej tau cawm kuv dim thiab sawv ntawm kuv ib sab mus dhau plaws tej teeb meem ntawd, kuv to taub tias teej teeb meem uas kuv raug thaum kuv tseem hluas yog kuv lub neej thiab tej yam uas kuv raug hauv ntiaj teb no, yog tej uas yus muab tsub tsis tau rau lwm tus uas raug txom nyem thiab tseem tab tom raug vim luag tej ua tsis ncaj rau lawv.

Kuv to taub tias tej yam hauv lub neej no—tej yam zoo thiab tej yam phem—yeej qhia tau tej yam uas tseem ceeb. Nim no kuv paub thiab hais lus tim khawv tias lub neej no yeej yog raws li txoj kev uas tau npaj tseg! Kuv cia siab tias tej yam uas kuv raug hauv lub neej no—tej yam zoo thiab tej yam phem huv tib si—tau pab kuv muaj kev khuv leej rau cov neeg uas raug luag tej ua phem thiab ua rau kuv txawj xav txog cov neeg uas raug txom nyem txhua yam.

Kuv cia siab tias vim yog tej yam uas kuv raug hauv lub neej no—tej yam zoo thiab tej yam phem—kuv thiaj haj yam ua siab zoo rau lwm tus neeg, ua ib yam li tus Cawm Seej yuav ua rau lawv, haj yam ua zoo rau cov neeg uas ua txhaum, thiab tias kuv ua siab ncaj ncees. Thaum peb pib vam tus Cawm Seej txoj kev tshav ntuj thiab ua raws li peb tej kev khi lus, peb thiaj ua cov yam ntxwv txog tus Cawm Seej txoj Kev Theej Txhoj.

Kuv xav qhia ib piv txwv ntxiv uas qhia tias lub neej no yeej yog raws li txoj kev uas tau npaj tseg.

Kuv niam tsis muaj ib lub neej uas yooj yim hauv ntiaj teb no. Nws tsis muaj koob muaj npe los sis tsis muaj neeg qhuas nws thiab tsis tau mus kawm ntawv tshaj high school. Nws raug mob tuag tes tuag taw thaum nws tseem yaus, yog li ntawd tag nrho nws lub neej nws muaj mob heev ntawm nws sab ceg laug. Thaum nws laus lawm, nws raug ntau yam teeb meem ntawm sab cev nqaij daim tawv thiab nyiaj txiag tiam sis nws tseem rau siab ntso ua raws li nws tej kev khi lus thiab yeej hlub tus Tswv.

Thaum kuv niam muaj 55 xyoos, kuv tus muam hlob txawm tso lub ntiaj teb no tseg, nws tus ntxhais uas tsuas muaj yim hli, thiaj yog me nyuam ntsuag lawm. Txawm muaj ntau yam los, kuv niam yog tus ua tu tus ntxhais no hlob rau 17 xyoo tom qab ntawd, txawm tias nws lub neej nyuaj kawg. Tab sis mas, txawm muaj tej yam tsis zoo los, nws zoo siab hlo los pab nws tsev neeg, cov neeg zej zog, thiab cov neeg hauv nws pawg ntseeg thiab tseem ua hauj lwm hauv lub tuam tsev rau ntau xyoo. Nyob rau ob peb xyoos ua ntej nws tso lub ntiaj teb no tseg, kuv niam pib ua tem toob, feem ntau tsis paub nws nyob li cas, thiab tau mus nyob hauv tsev laus. Tu siab kawg, vim nws nyob nws ib leeg xwb thaum nws tas sim neej sai sai.

Ntau lub hlis tom qab nws tuag, kuv tau ua npau suav uas kuv tseem nco qab ntsoov. Hauv kuv zaj npau suav, kuv tab tom zaum hauv kuv lub hoob kas hauv lub Koom Txoos lub Tsev Khiav Hauj Lwm. Niam los hauv kuv hoob kas. Kuv paub tias nws tau los ntawm lub ntuj ntsuj plig los. Kuv yeej yuav nco qab ntsoov kuv tej kev xav ntawd. Nws tsis tau hais lus, tiam sis nws tus ntsuj plig ci ntsa iab tshaj txhua yam kuv tau pom dua thiab kuv yeej piav tsis tau zoo.

Nws lub ntsej muag thiab lub cev ci kawg nkaus li! Kuv nco qab kuv tau hais tias, “Niam, koj yeej zoo nkauj kawg nkaus!,” qhov no hais txog nws sab ntsuj plig lub hwj chim ntawd Nws lees paub kuv—tiam sis tseem tsis tau hais lus. Kuv tau hnov nws txoj kev hlub, thiab kuv thiaj to taub tias nws zoo siab thiab tau kov yeej tej kev nyuaj siab ntawm lub neej no thiab yeej tos ntsoov “lub caij sawv rov los.” Kuv paub tias Niam, lub neej no twb yog raws li txoj kev uas tau npaj tseg—thiab twb yuav muaj raws li txoj kev uas tau npaj tseg rau peb thiab.

Vajtswv txoj hauj lwm thiab lub yeeb koob yog ua kom tib neeg tsis txawj tuag thiab tau txoj sia nyob mus ib txhis. Tej yam uas peb raug hauv lub neej hauv lub ntiaj teb no yog tej yam uas pab peb loj hlob thiab mus lawm tom ntej kom peb thiaj yuav txais kev tsis txawj tuag thiab tau txoj sia nyob mus ib txhis. Peb tsis raug txib los hauv no kom yuav poob qab tiam sis yuav ua zoo hauv Vajtswv txoj hau kev uas Nws npaj tseg rau peb.

Yam li Vaj Ntxwv Npeyamis hais tias: “Thiab tsis tas li ntawd, kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg.” Los yog hais tias, lub neej no yeej yog raws li txoj kev uas tau npaj tseg!

Kuv hais lus tim khawv tias yog peb ua tej kab ke hauv txoj moo zoo, nrog Vajtswv sib khi lus tseg thiab ua raws li tej kev khi lus ntawd, hloov siab lees txim, pab lwm tus neeg, thiab nyiaj kom mus txog thaum kawg, peb yeej yuav paub thiab tso siab plhuav rau tus Tswv hais tias lub neej no yeej yog raws li txoj kev uas tau npaj tseg! Kuv hais lus tim khawv txog Yexus Khetos thiab lub neej tom ntej nrog peb Leej Txiv Saum Ntuj Ceeb Tsheej muaj yeeb koob vim hais tias muaj tus Cawm Seej txoj kev tshav ntuj thiab kev Theej Txhoj. Los ntawm Yexus Khetos lub npe, amees.