Tu cov Cag, ces tej Ceg Ntoo Yuav Loj Hlob Tuaj

Xyoo 2024 yog ib lub sij hawm tseem ceeb rau kuv. Vim hais tias twb yog 75 xyoos txij li kuv ua kev cai raus dej thiab ua kev cai pom zoo ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg hauv lub zos Zwickau, Yelemes teb.

Kuv txoj kev ua mej zeej hauv Yexus Khetos lub Koom Txoos yeej muaj nuj nqi rau kuv. Qhov uas suav kuv nrog Vajtswv haiv neeg, nrog nej, kuv cov kwv tij thiab cov muam, yog ib lub sam xeeb zoo kawg nkaus hauv kuv lub neej.

Thaum kuv xav txog kuv txoj kev ua ib tug ntseeg, kuv yeej xav txog ib lub qub zos hu ua Zwickau, vim kuv nco txog tej lub sij hawm kuv mus hauv tej kev sib ntsib noj lub cim nco txog hauv Yexus Khetos lub Koom Txoos thaum kuv tseem yog me nyuam yaus. Nyob ntawd kuv zaj lus tim khawv tau pib loj hlob tuaj.

Lub tsev teev ntuj no muaj lub ntaus nkauj organ uas yus yuav tsum tso pa rau. Txhua Hnub Caiv yuav txib ib tug tub hluas los nyem ib lub tso pa los yog lub foob xab rau lub ntaus nkauj ntawd thiaj ua hauj lwm. Tej thaum kuv muaj cib fim los ua txoj hauj lwm tseem ceeb no thiab.

Thaum pawg ntseeg tab tom hu peb cov nkauj, kuv tau sib zog ua hauj lwm tso pa rau lub ntaus nkauj organ thiaj muaj pa txaus. Nyob ntawm qhov chaw tso pa ntawd, kuv tau ntsia tej qhov rais zoo nkauj uas muaj duab txog tus Cawm Seej Yexus Khetos thiab lwm lub qhov rais muaj ib daim duab txog Joseph Smith hauv Koog Ntoo Dawb Ceev.

Kuv tseem nco qab ntsoov tej kev xav hauv kuv nruab siab thaum kuv ntsia ob lub qhov rais ntawd thiab mloog ib Tsoom Haiv Neeg Ntseeg hais lawv tej zaj lus tim khawv thiab hu tej zaj nkauj rau Xi-oos.

Nyob hauv qhov chaw dawb huv ntawd, Vajtswv tus Ntsuj Plig tau ua tim khawv rau kuv lub paj hlwb thiab lub siab hais tias qhov no muaj tseeb: Yexus Khetos yog tus Cawm Seej rau lub ntiaj teb. Nov yog Nws lub Koom Txoos. Tus Yaj Saub Joseph Smith twb pom Vajtswv Leej Txiv thiab Yexus Khetos thiab tau hnov Nkawd lub suab.

Ob peb hlis tas los no thaum kuv ua hauj lwm tim Europe teb, kuv tau rov qab mus xyuas lus zos Zwickau. Tu siab kawg, vim lub tsev teev ntuj qub ntawd tsis muaj lawm. Ntau xyoo tas los lawm lawv muab rhuav es tau ua ib lub tsev kem loj loj.

Kuv yeej tu siab vim lub tsev uas kuv nyiam thaum kuv yog ib tug tub hluas tsuas yog ib yam uas nyob hauv kuv paj hlwb xwb. Rau kuv mas nws yog ib lub tsev dawb ceev. Tiam sis yog ib lub tsev xwb.

Qhov fab ntxeev mas, zaj lus tim khawv rau kuv sab ntsuj plig uas los ntawm tus Vaj Ntsuj Plig Dawb Huv ntau xyoo tas los lawm yeej tsis tau ploj mus li. Tiag tiag mas, zaj lus tim khawv ntawd tau loj hlob tuaj lawm. Tej yam uas kuv kawm thaum kuv tseem hluas hais txog tej ntsiab cai rau Yexus Khetos txoj moo zoo tau ua ib lub hauv paus ruaj khov hauv tag nrho kuv lub neej. Qhov uas kuv nrog kuv Leej Txiv Saum Ntuj Ceeb Tsheej thiab Nws Tib Leeg Tub sib khi lus tseg twb nyob nrog nraim kuv—puag tom qab lawv rhuav lub tsev teev ntuj hauv Zwickau thiab ob lub qhov rais ntawd tawg tas.

Yexus tau hais tias “Lub ntuj thiab lub ntiaj teb yuav ploj mus, tiam sis kuv tej lus yuav tsis muaj ib los poob li.”

“Vim tej roob yuav pob thiab tej pov roob yuav nphau; tiam sis kuv txoj kev hlub yuav tsis ncaim koj mus, thiab yuav tsis tshem txoj kev khi lus ntawm kuv txoj kev kaj siab lug, tus Tswv hais tseg lawm.”

Ib yam tseem ceeb heev uas peb kawm tau hauv lub neej no yog seb dab tsi yuav nyob mus ib txhis thiab dab tsi yuav tsis nyob. Thaum peb to taub qhov ntawd, txhua yam yeej hloov—peb tej kev sib raug zoo, tej yam uas peb xaiv, thiab tej uas peb ua rau lwm tus neeg.

Thaum paub txog tej yam uas nyob mus ib txhis thiab tej uas tsis nyob yog qhov uas pab peb zaj lus tim khawv txog Yexus Khetos thiab Nws lub Koom Txoos loj hlob tuaj.

Yexus Khetos txoj moo zoo uas muab txum tim rov qab los lawm, zoo li tus Yaj Saub Joseph Smith qhia tias, “txais yuav txhua tus, thiab txhua yam tseeb.” Tiam sis qhov ntawd tsis txhais tias txhua yam tseeb muaj nuj nqi ib yam. Tej qhov tseeb nyob hauv nruab plawv, ua qhov tseem ceeb tshaj, thiab yog cov cag rau peb txoj kev ntseeg. Lwm yam tsuas yog tej ceg los sis ceg ntoo—yeej muaj nqi, tiam sis tsis yog lub hauv paus hauv ntsis.

Tus Yaj Saub Joseph Smith kuj hais tias, “Cov hauv paus ntsiab cai ntawm peb txoj kev ntseeg yog zaj lus tim khawv ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov no xwb.”

Los yog hais tias, Yexus Khetos thiab Nws txoj kev theej txhoj yog cov cag rau peb zaj lus tim khawv. Lwm yam puav leej tsuas yog tej ceg ntoo xwb.

Qhov no tsis yog hais tias tej ceg ntoo tsis tseem ceeb li. Ib tsob ntoo yuav tsum muaj tej ceg ntoo. Tiam sis ib yam li tus Cawm Seej qhia Nws cov Thwj Tim tias, “Tus ceg hmab uas tsis txuas rau ntawm txoj hmab yeej txi tsis taus txiv.” Yog tsis txuas mus rau tus Cawm Seej, qhov uas ntxiv zog rau cov cag, ces ceg ntoo yuav qhuav thiab tuag mus.

Thaum hais txog txoj kev tu peb zaj lus tim khawv txog Yexus Khetos, kuv xav tias tej zaum peb xav yuam kev tias tej ceg ntoo yog cov cag. Cov neeg Falaxis tau xav yuam kev li no hauv Nws lub caij nyoog. Lawv pheej xav ntsoov txog tej yam me me hauv txoj kev cai lawv thiaj tsis nco qab xav txog tej uas tus Cawm Seej hu ua “tej yam tseem ceeb”—tej ntsiab cai zoo li “kev txim lij thiab kev hlub tshua thiab kev ntseeg.”

Yog nej xav tu ib tsob ntoo, yus yeej tsis lam ywg me ntsis dej ntawm tej ceg ntoo xwb. Yus tso dej rau cov cag. Tsis tas li ntawd xwb, yog tias yus xav kom tej ceg ntoo ntawm nej zaj lus tim khawv yuav loj hlob tuaj thiab txi txiv, cia li tu cov cag xwb. Yog nej tsis paub txog ib co lus qhuab qhia los sis kev cai coj twg los sis ib yam ntawm lub Koom Txoos zaj keeb kwm, cia li nrhiav qhov tseeb los ntawm nej txoj kev ntseeg Yexus Khetos. Sim kom nej to taub Nws txoj kev txi rau nej, Nws txoj kev hlub rau nej, Nws xav kom nej ua li cas. Txo hwj chim raws Nws qab. Tej ceg ntoo rau nej zaj lus tim khawv yuav tau dag zog thaum nej haj yam rau siab ntseeg Leej Txiv Saum Ntuj Ceeb Tsheej thiab Nws Tib Leeg Tub.

Piv xam hais tias, yog nej xav tau ib zaj lus tim khawv uas muaj zog ntxiv txog Phau Ntawv Maumoos, cia li xyuas seb phau no ua tim khawv li cas txog Yexus Khetos. Xyuas seb Phau Ntawv Maumoos ua tim khawv li cas txog Nws, phau no qhia li cas txog Nws, thiab phau no caw thiab txhib nej li cas kom los cuag Nws.

Yog tias nej xav muaj tej lub sij hawm zoo dua hauv lub Koom Txoos tej kev sib ntsib los yog hauv lub tuam tsev, sim seb tus Cawm Seej puas nyob hauv tej kab ke dawb ceev uas peb txais hauv ob qhov chaw ntawd. Nrhiav tus Tswv hauv Nws lub tsev dawb huv.

Yog tias nej xav tias nej tsis muaj cuab kav ua nej txoj hauj lwm hauv lub Koom Txoos, sim ua nej txoj hauj lwm rau Yexus Khetos. Ua kom txoj hauj lwm ntawd yog nej txoj kev hlub rau Nws.

Tu cov cag, thiab tej ceg ntoo yuav loj hlob tuaj. Nyob nyob ces, tej ntawd yuav txi txiv.

Yus yeej tsis lam tau lam muaj kev ntseeg Yexus Khetos uas ruaj khov. Yeej tsis muaj li no hauv ntiaj teb no, vim muaj cov pos thiab nroj tsuag uas yog kev poob siab uas yeej yuav txhawv tuaj. Tsuas muaj tsob ntoo uas txi txiv uas yog kev ntseeg thaum yus rau siab ntso ua. Thiab qhov tseem ceeb tshaj plaws yog kom peb lub hauv paus yuav muaj cov cag rau ntawm Khetos.

Piv txwv hais tias: Thaum xub thawj mas, tej zaum peb nyiam tus Cawm Seej txoj moo zoo thiab lub Koom Txoos vim peb nyiam cov mej zeej uas ua siab zoo los sis tus npisov siab zoo los sis vim lub tsev teev ntuj zoo nkauj heev. Tej no yeej pab lub Koom Txoos loj hlob tuaj.

Txawm li ntawd los, yog tias cov cag rau peb zaj lus tim khawv tsis mus tob tshaj tej ntawd, peb yuav ua li cas thaum peb tsiv mus nyob hauv ib pawg ntseeg hauv ib lub tsev uas tsis tshua zoo nkauj, uas muaj cov mej zeej uas tsis ua siab zoo, thiab tus npisov hais ib yam uas tu peb siab?

Lwm qhov piv txwv: Puas tsim nyog peb xav tias yog peb ua raws li cov lus txib thiab raug muab khi ua ke hauv lub tuam tsev, ces peb yuav muaj tub muaj ki es sawv daws zoo siab, peb cov me nyuam mloog lus, thiab sawv daws nyob ruaj nrees hauv lub Koom Txoos, mus ua tub txib, hu nkauj hauv pawg ntseeg pawg hu nkauj, thiab los pab tu lub tsev sib ntsib txhua hnub Saturday?

Kuv cia siab hais tias peb sawv daws yuav muaj li no hauv peb lub neej Tiam sis yuav ua li cas yog tias tsis muaj li no? Peb puas tseem yuav rau siab ntseeg tus Cawm Seej txawm muaj xwm dab tsi los xij—tseem tso siab rau Nws thiab Nws lub sij hawm?

Peb yuav tsum nug peb tus kheej tias: Kuv zaj lus tim khawv puas muaj zog raws li tej uas kuv xav tau hauv kuv lub neej xwb? Nws puas vam tej yam uas luag tej ua los sis tej yam lawv xav? Los yog kuv zaj lus tim khawv puas nyob ruaj nrees rau ntawm Yexus Khetos, “muaj cog thiab txhim tsa rau ntawm nws,” txawm muaj xwm dab tsi hauv lub neej no los xij peem?

Phau Ntawv Maumoos qhia txog ib haiv neeg uas “tau coj ua raws nraim li Vajtswv tej kab ke.” Tiam sis ib tug neeg uas tsis ntseeg hu ua Khaulihos tau tuaj, luag thuam tus Cawm Seej txoj moo zoo, hu nws ua “qhov ruam” thiab “lawv tsuas coj raws li lawv poj koob yawm txwv tej kab lig kev cai ruam.” Khaulihos tau coj “lawv ntau tus tej siab lawm, tau ua kom lawv tsa lawv tej taub hau nyob hauv lawv txoj kev phem.” Tiam sis muaj lwm cov neeg uas nws ntxias tsis tau, vim lawv paub hais tias Yexus Khetos txoj moo zoo yeej yog ntau tshaj tej kab lig kev cai xwb.

Txoj kev ntseg yuav muaj zog heev thaum muaj tej cag nyob hauv tej yam yus twb raug lawm, hauv txoj kev tso siab plhuav rau Yexus Khetos, tab txawm peb muaj tej kab lig kev cai twg los sis luag tej hais los sis ua li cas rau peb los xij.

Peb zaj lus tim khawv yeej yuav raug kev sim siab. Kev ntseeg tsis yog kev ntseeg yog tias yus tsis raug kev sim siab. Kev ntseeg yeej tsis muaj zog yog tias yus tsis raug kev tsim txom. Ces txhob poob siab yog tias nej txoj kev ntseeg raug kev sim siab los sis muaj tej lo lus nug uas nej tsis tau lus teb lawm.

Peb yuav tsum to taub hais tias peb yeej yuav tsis nkag siab txhua yam ua ntej peb pib ua. Qhov ntawd tsis yog txoj kev ntseeg. Xws li Amas qhia tias, “Kev ntseeg tsis yog kev paub zoo tag nrho txog tej yam.” Yog peb tos txog rau thaum peb tau lus teb rau peb txhua lo lus nug, ces peb yuav tsis ua zoo npaum li peb ua tau, thiab peb tab tom tswj lub hwj chim ntawm peb txoj kev ntseeg.

Kev ntseeg yog ib qho zoo kawg vim peb pheej muaj kev ntseeg txawm peb tsis tau koob hmoov raws li peb lub siab nyiam xwb. Peb pom tsis tau yav tom ntej, peb tsis paub txhua lo lus teb, tiam sis peb tso siab tau rau Yexus Khetos thaum peb peem mus tom ntej thiab tsa qhov muag ntsia vim Nws yog peb tus Cawm Seej thiab tus Cawm Dim.

Kev ntseeg nyiaj mus dhau tej kev sim siab thiab tej kev nyuaj hauv lub neej no vim kev ntseeg muab cog rau saum Khetos thiab Nws cov lus qhuab qhia. Yexus Khetos, thiab peb Leej Txiv Saum Ntuj Ceeb Tsheej tus uas Txib Nws los, ua ke no yog tib tug zoo tag nrho, tsim nyog peb tso siab plhuav rau nkawd.

Ib zaj lus tim khawv tsis yog ib yam yus muab txhim tsa ib zaug xwb es nws yuav nyob ruaj nrees tas mus li. Nws muaj ntsis zoo li ib tsob ntoo uas yus yuav tsum tu tas mus li. Txoj kev cog Vajtswv txoj lus rau hauv yus nruab siab tsuas yog theem thib ib xwb. Thaum yus zaj lus tim khawv pib loj tuaj, ces yus thiaj li pib ua hauj lwm kiag! Yog thaum ntawd nej mam li “ua tib zoo tu, xwv kom yuav muaj taus cag, thiab loj hlob, thiab txi tau txiv.” Yeej yuav tsum “rau siab ntso” thiab “ua siab ntev tu txoj lus.” Tiam sis tus Tswv twb cog lus tseg hais tias: “Nej yuav tau sau tej nqi zog ntawm nej txoj kev ntseeg, thiab nej txoj kev rau siab ntso, thiab kev siab ntev, tos ntsoov kom tsob ntoo txi txiv rau nej.”

Kuv cov kwv tij thiab cov muam, kuv cov me phooj ywg, yeej muaj ib qho chaw hauv kuv lub siab uas nco lub tsev teev ntuj qub qub thiab ob lub qhov rais zoo nkauj hauv lub zos Zwickau. Tiam sis hauv 75 xyoo tas los no, Yexus Khetos tau coj kuv lub neej zoo tshaj kuv xav tau rau kuv tus kheej. Nws tau nplij kuv siab thaum kuv raug kev nyuaj siab, tau pab kuv pom kuv tej kev qaug zog, tau kho kuv tej kev mob siab, thiab tau tu kuv txoj kev ntseeg kom loj hlob tuaj.

Kuv thov Vajtswv kom peb yuav muaj hmoov es yuav rau siab ntso tu cov cag rau peb txoj kev ntseeg tus Cawm Seej, Nws cov lus qhuab qhia, thiab Nws lub Koom Txoos. Kuv ua tim khawv txog qhov no los ntawm peb tus Cawm Seej, peb tus Txhiv Dim, peb tus Xwib Hwb—los ntawm Yexus Khetos lub npe, amees.