Kev Cia Siab Muaj Yeej
Kev cia siab yog ib lub txiaj ntsim uas loj tuaj thaum peb ntxiv zog rau peb txoj kev ntseeg Yexus Khetos.
Kuv cov kwv tij thiab cov muam nyob thoob plaws lub ntiaj teb, thaum peb pib lub sij hawm tshwj xeeb no hu ua lub tuam rooj sab laj, Vajtswv yeej yuav ntsia ntsoov peb. Peb hnov tus Tswv lub suab dhau los ntawm Nws cov tub qhe; peb yuav hnov tus Vaj Ntsuj Plig Dawb Huv lub hwj chim uas cob qhia, qhuab qhia, thiab tshoov siab, thiab peb txoj kev ntseeg yuav muaj zog ntxiv.
Peb xyoo tas los, Thawj Tswj Hwm Russell M. Nelson qhib lub tuam rooj sab laj thaum nws hais cov lus no: “Kev tshwm sim txog tej lus nug hauv nej lub siab yuav ua rau nej nco ntsoov thiab txais lub nqi zog los ntawm lub rooj sab laj no. Yog tias nej tsis tau thov kom tus Vaj Ntsuj Plig Dawb Huv txhawb pab nej mloog tej lus uas tus Tswv xav kom nej mloog hauv ob hnub no, kuv caw nej ua tam sim no. Thov kom nej siv sij hawm mloog ntsoov tus Tswv tej lus uas los ntawm Nws cov tub qhe nyob hauv lub rooj sab laj no.”
Cov vaj lug kub pheej hais txog tej lus no ua ke: kev ntseeg, kev cia siab, kev siab hlub. Lub txiaj ntsim kev cia siab yog vaj txiaj ntsim uas muaj nqi heev los ntawm Vajtswv los.
Lo lus kev cia siab los peb hais thaum muaj tej yam uas peb xav tau. Piv txwv hais tias, “Kuv cia siab tias ntuj tsis los nag,” los sis “Kuv cia siab peb pawg yuav yeej.” Kuv xav hais lus rau nej txog peb txoj kev cia siab uas kav ib txhis rau Yexus Khetos thiab Nws txoj moo zoo, thiab peb “txoj kev tso siab tos ntsoov … cov koob hmoov los ntawm kev ncaj ncees uas cog lus cia lawm.”
Peb txoj Kev Cia Siab Yuav Muaj txoj Sia Nyob Mus Ib Txhis
Peb txoj kev cia siab yuav muaj txoj sia nyob mus ib txhis yeej yog los ntawm Yexus Khetos txoj kev tshav ntuj thiab tej yam uas peb xaiv, uas cia peb txais tau txoj koob hmoov uas yog kev rov qab mus nyob saum ntuj ceeb tsheej thiab muaj kev kaj siab thiab kev zoo siab tas mus li nrog peb Leej Txiv Saum Ntuj Ceeb Tsheej thiab Nws Leej Tub nyob, peb tsev neeg uas rau siab ntseeg thiab nws cov phooj ywg uas muaj nqis, thiab cov txiv neej thiab poj niam ncaj ncees uas nyob thoob plaws lub ntiaj teb no thiab hauv txhua lub caij nyoog.
Nyob hauv lub ntiaj teb peb muaj kev xyiv fab thiab kev tu siab thaum peb raug kev sim siab. Peb txoj kev muaj yeej los ntawm peb txoj kev ntseeg Yexus Khetos thaum peb kov yeej peb tej kev txhaum, tej yam nyuaj, tej kev ntxias, tej yam uas tsis ncaj, thiab tej teeb meem ntawm lub neej no.
Thaum peb txhawb peb txoj kev ntseeg Yexus Khetos kom muaj zog, peb txawj pom kev dhau tej yam nyuaj kom pom cov koob hmoov thiab tej lus cog tseg uas kav ib txhis. Ib yam li ib lub teeb uas ci ntsa iab zuj zus, kev cia siab yog txoj kev kaj uas ua rau kev tsaus ntuj ploj mus, thiab peb pom kev muaj yeeb koob thaum yav tom ntej.
Kev Cia Siab Los ntawm Vajtswv Los
Txij thaum chiv keeb los, peb Leej Txiv Saum Ntuj Ceeb Tsheej thiab Nws Leej Tub tau foom koob hmoov rau cov neeg ncaj ncees muab lub txiaj ntsim kev cia siab rau lawv.
Tom qab nkawd tawm lub vaj mus, ib tug tim tswv tau qhia Adas thiab Evas txog txoj kev cog lus tias yuav txib Yexus Khetos los. Lub txiaj ntsim kev cia siab no tau pab nkawd lub neej. Adas hais tias, “Kuv qhov muag thiaj qhib, thiab hauv lub neej no kuv yuav muaj kev xyiv fab.” Evas hais txog “txoj kev xyiv fab ntawm [nkawd] txoj kev txhiv dim, thiab txoj sia nyob mus ib txhis uas Vajtswv muab rau txhua tus uas mloog lus.”
Ib yam li tus Vaj Ntsuj Plig Dawb Huv muab kev cia siab rau Adas, tus Tswv tus Ntsuj Plig lub hwj chim qhia cov neeg uas rau siab ntseeg niaj hnub no, ci ntsa iab rau qhov uas yuav muaj txoj sia nyob mus ib txhis tiag.
Tus Cawm Seej txib ib tug Nplij Siab, tus Vaj Ntsuj Plig Dawb Huv, rau peb, ib tug uas txhawb nqa peb txoj kev ntseeg thiab kev cia siab, uas muab kev kaj siab lug uas “tsis muab … li neeg ntiaj teb muab.”
Tus Cawm Seej hais tias, “Neeg ntiaj teb yuav tsim txom nej. Tiam sis nej yuav tsum ua siab tawv, rau qhov kuv twb kov yeej lub ntiaj teb no lawm.”
Thaum peb raug tej yam nyuaj, peb xaiv kom muaj kev ntseeg tso siab rau tus Tswv. Peb thov twj ywm, “Tsis txhob ua raws li kuv lub siab nyiam, tiam sis ua raws li koj lub siab nyiam xwb.” Peb hnov tus Tswv txoj kev pom zoo rau peb txoj kev txaus siab, thiab peb tos ntsoov kev kaj siab lug uas tus Tswv cog lus tias Nws yuav xa tuaj thaum lub sij hawm Nws teem tseg.
Tus Thwj Tim Povlauj qhia hais tias, “Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, … pab kom nej muaj kev cia siab … zuj zus,” “Qhov uas nej cia siab rau Vajtswv yuav ua rau nej zoo siab, thiab thaum nej raug kev txom nyem nej yuav tsum ua siab ntev;” dhau los ntawm “tus Vaj Ntsuj Plig Dawb Huv lub hwj chim.”
Ib Zaj Lus Qhia txog Kev Cia Siab
Tus yaj saub Maulaunais paub tias kev cia siab rau Yexus Khetos thaum raug tsim txom zoo li cas. Nws piav txog nws qhov xwm txheej ceev heev:
“Kuv tib leeg xwb. … Kuv twb … tsis pom qab yuav mus qhov twg.”
“Kuv twb tsis ua kuv tus kheej rau cov Neeg Lamas paub tsam lawv ho ua rau kuv puas tsuaj.”
Xav tsis thoob uas thaum lub sij hawm tsaus ntuj thiab kho siab no, Maulaunais sau ntawv txog nws txiv tej lus uas muaj kev cia siab:
“Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab.”
“Nej yuav cia siab rau yam dab tsi? … Nej yuav tsum muaj kev cia siab los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab nej tsa sawv rau txoj sia nyob mus ib txhis.”
Kuv cov kwv tij thiab cov muam, kev cia siab yog ib lub txiaj ntsim uas loj tuaj thaum peb ntxiv zog rau peb txoj kev ntseeg Yexus Khetos. “Kev ntseeg [ua pov thawj] txog tej yam uas cia siab rau.” Peb ua pov thawj txog peb txoj kev ntseeg los ntawm kev thov Vajtswv, tej kev khi lus hauv lub tuam tsev, kev ua raws li cov lub txib, mloog ntsoov cov vaj lug kub thiab cov yaj saub hauv lub caij nyoog no, txais lub cim nco txog, thiab nrog peb Tsoom Haiv Neeg Ntseeg teev ntuj txhua lub lim tiam.
Ib lub Tsev ntawm Kev Cia Siab
Xwv kom txhawb peb txoj kev cia siab hauv ib lub caij nyoog uas muaj kev phem zuj zus tuaj, tus Tswv tau hais kom Nws tus yaj saub ua Nws cov tuam tsev nyob thoob plaws lub ntiaj teb.
Thaum peb nkag hauv tus Tswv lub tsev, peb hnov Vajtswv tus Ntsuj Plig uas pom zoo rau peb txoj kev cia siab.
Lub tuam tsev ua tim khawv txog qhov uas muaj ib lub ntxa uas tsis muaj leej twg nyob haud thiab yuav muaj txoj sia tom qab peb hla daim ntaub thaiv.
Rau cov uas tsis muaj ib tug khub mus ib txhis li, cov kab ke qhia tias txhua tus neeg ncaj ncees yuav txais txhua txoj koob hmoov uas Vajtswv cog lus.
Yeej muaj kev cia siab tshwj xeeb thaum ib khub txhos caug rau ntawm lub thaj kom ua kev cai sib khi, tsis yog rau lub neej no xwb tiam sis mus ib txhis li.
Muaj kev cia siab loj heev rau peb los ntawm cov lus cog tseg rau peb cov xeeb ntxwv, txawm lawv raug xwm txheej dab tsi los xij.
Tsis muaj kev mob kev nkees, tsis muaj yam tsis ncaj, tsis muaj kev txom nyem, tsis muaj dab tsi uas yuav npog peb txoj kev cia siab thaum peb ntseeg thiab ua raws nraim li peb tej kev khi lus nrog Vajtswv hauv tus Tswv lub tsev. Yog ib lub tsev ntawm txoj kev kaj, ib lub tsev ntawm kev cia siab.
Thaum Tso Kev Cia Siab Tseg
Peb los kua muag thaum peb pom kev tu siab ntawm cov uas tsis muaj kev cia siab rau Khetos.
Tsis ntev tas los kuv paub ib khub niam txiv uas twb ntseeg Yexus Khetos dhau los tiam sis txiav txim siab tso nkawd txoj kev ntseeg tseg. Nkawd nplua nuj hauv lub ntiaj teb, thiab nkawd xav tias nkawd zoo siab vim nkawd txawj ntse thiab tau xyeej nkawd txoj kev ntseeg.
Zoo li txhua yam zoo mus txog thaum tus txiv tsev, uas tseem hluas thiab muaj zog, pib mob ces txawm tas sim neej. Zoo li thaum lub hli ntis lub hnub, nkawd twb thaiv txoj kev kaj ntawm Leej Tub, thiab zoo li tej xwm txheej no ntis nkawd txoj kev cia siab. Tus poj niam, vim nws tsis ntseeg lawm, tsis paub meej, nws tsis tau npaj siab rau qhov no, thiab tsis muaj peev xwm nplij nws cov me nyuam. Nws txoj kev txawj ntse qhia nws tias nws lub neej zoo tag nrho mus txog thaum ua ciav nws tsis txawj pom tag kis. Nws tu siab kawg nkaus ua rau nws nyob hauv qhov tsaus ntuj thiab ua xyem xyav.
Kev Cia Siab Thaum Raug Kev Tu Siab Loj
Cia kuv muab nws txoj kev tu siab piv rau ib tsev neeg txoj kev cia siab rau Khetos thaum ib lub sij hawm uas lub siab ntais rhe.
Nees nkaum ib xyoo tas los nyab hoom kho mob thauj tus tub uas nyuam qhuav yug los ntawm kuv tus kwv tus tub, Ben Andersen, thiab nws tus poj niam, Robbie, los ntawm lawv zej zog hauv Idaho mus rau Salt Lake City. Kuv tuaj txog lub tsev kho mob, es Ben piav txog tej teeb meem ntawm nkawd tus me nyuam mos liab lub plawv. Wb tau tso tes rau Trey lub taub hau me me. Tus Tswv foom koob hmoov rau nws kom ua neej mus ntxiv.
Twb phais Trey lub plawv thawj lub lim tiam ntawm nws lub neej, thiab twb phais plawv ntxiv tom qab ntawd. Ib xyoos dhau ib xyoos, twb paub tias yuav tsum muab Trey lub plawv pauv. Txawm yog nws ua tsis tau ntau yam ntawm sab cev nqaij daim tawv, nws txoj kev ntseeg loj tuaj. Nws sau hais tias, “Kuv yeej ib txwm tsis khuv xim kuv tus kheej vim kuv twb paub tias kev ntseeg Yexus Khetos thiab ib zaj lus tim khawv txog txoj hau kev cawm seej tseem ceeb npaum li cas.”
Trey muab ib nqe lus los ntawm Thawj Tswj Hwm Nelson hauv nws tus xov tooj: “Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.”
Trey sau hais tias: “Kuv ib txwm tos ntsoov txog thaum kuv yuav mus ua tub txib, tiam sis … kuv cov kws kho mob tsib pub kuv mus ua tub txib ua ntej ib xyoos tom qab pauv kuv lub plawv. … Kuv tso siab ntseeg Yexus Khetos xwb.”
Trey zoo siab uas nws yuav kawm ua ib tug kws suav nyiaj nyob hauv BYU pib thaum lub caij semester no, tiam sis zoo siab tshaj thaum lub Xya Hli Ntuj nws txais kev hu xov tooj kom los rau lub tsev kho mob pauv lub plawv.
Trey hais tias, “Ib xyoo xwb ces kuv yuav mus ua tub txib.”
Twb xav zoo zoo thaum nws mus hauv chav phais mob. Tiam sis, thaum lawv phais lub plawv twb muaj tej xwm txheej nyuaj dhau, ces Trey tsis tau rov qab tsim los.
Nws niam, Robbie, hais tias: “Friday ua rau kuv lub siab ntais rhe … kuv xav tsis tawm dab tsi. … Kuv twb nyob lig xav txog txhua yam no. … Tiam sis hnub Saturday, thaum kuv tsim los kuv muaj kev xyiv fab loj kawg nkaus li. Tsis yog kev kaj siab xwb; tsis yog kuv tsis lees tej xwm txheej no. Kuv xyiv fab rau kuv tus tub, thiab kuv xyiv fab vim kuv yog nws niam. … Ben twb tsim los ntxov dua li kuv, thiab thaum wb muaj sij hawm sib tham, Ben tau tsim los muaj kev xav zoo ib yam li kuv.”
Ben piav hais tias: “Kuv paub meej lawm raws li Vajtswv qhia kuv dhau los ntawm Nws tus Ntsuj Plig Dawb Huv.” Kuv tsim los thaum 4:00 sawv ntxov thiab muaj ib txoj kev kaj siab lug thiab kev xyiv fab uas tsis pom qab piav txog. Ua li cas muaj li no? … Qhov uas Trey tas sim neej ua rau kuv mob kuv lub siab heev, thiab kuv nco nws kawg li. Tiam sis tus Tswv yeej tsis tso peb tseg kom tsis muaj kev nplij siab. … Kuv tos ntsoov hnub zoo siab thaum wb yuav rov qab koom ua ke.”
Kev Cog Lus txog Kev Cia Siab
Trey twb sau cov lus no hauv nws phau ceev xwm txheej los ntawm Thawj Tswj Hwm Nelson zaj lus hais hauv lub tuam rooj sab laj: “Yus yeej tsis xav tias yus yuav muaj kev xyiv fab thaum yus tus me nyuam muaj mob uas kho tsis taus, los yog thaum yus poob hauj lwm, los yog thaum yus tus khub ntxeev siab rau yus. Tiam sis tus Cawm Seej muab txoj kev xyiv fab rau yus. Yeej muaj Nws txoj kev xyiv fab tsis tu tsis tseg kom ‘tej kev txom nyem yuav muaj ib me pliag xwb’ [Lus Qhuab Qhia thiab Kev Khi Lus 121:7] thiab yuav pab peb loj hlob tuaj.”
Cov kwv tij thiab cov muam, kev kaj siab lug uas nej nrhiav yuav tsis los sai npaum li nej xav, tiam sis kuv cog lus rau nej tias thaum nej tso siab rau tus Tswv, Nws txoj kev kaj siab yeej yuav los.
Thov kom peb yuav tu peb txoj kev ntseeg uas muaj nqis heev, sib zog mus lawm tom hauv ntej nrog txoj kev cia siab uas ci kawg nkaus. Kuv ua tim khawv tias peb txoj kev cia siab yog peb tus Cawm Seej Yexus Khetos. Los ntawm Nws, yuav muaj raws li tag nrho peb tej kev xav uas ncaj ncees. Nws yog tus Vajtswv ntawm kev cia siab—tus uas ua rau kev cia siab muaj yeej. Nws muaj txoj sia nyob thiab Nws hlub nej. Los ntawm Yexus Khetos lub npe, amees.