Kev Tso Siab rau tej Kev Khi Lus uas Los ntawm Yexus Khetos

Kuv cov kwv tij thiab cov muam, kuv thov Vajtswv kom peb yuav txais dag zog ntawm sab ntsuj plig los ntawm tej zaj lus uas peb yuav mloog peb cov thawj coj hais thiab xav kom peb zoo siab vim peb muaj “kev tso siab rau peb tej kev khi lus uas los ntawm Yexus Khetos.” Kev tso siab no yog kev paub zoo tias peb yuav txais cov koob hmoov uas Vajtswv muab rau cov neeg uas ua raws li lawv tej kev khi lus thiab yog qhov uas peb xav tau niaj hnub no vim peb raug tej xwm txheej nyuaj heev.

Qhov uas peb ua tus Tswv cov tsev nyob thoob plaws lub ntiaj teb, raws li Thawj Tswj Hwm Russell M. Nelson qhia, ua rau cov mej zeej hauv lub Koom Txoos xyiv fab kawg li thiab yog ib lub cim txog qhov uas tus Tswv lub nceeg vaj loj tuaj.

Thaum kuv xav txog lub sij hawm uas kuv muab lub Tuam Tsev Feather River California fij tseg thaum lub Kaum Hlis Ntuj tas los, ua rau kuv xav tias tej lub sij hawm peb zoo siab vim muaj tej lub tuam tsev tshiab nyob hauv peb lub nroog thiab zej zog tiam sis peb tsis xav txog lub hom phiaj dawb huv ntawm kev khi lus dawb ceev hauv lub tuam tsev ntawd.

Twb sau tej lus no rau txhua lub tuam tsev: “Kev Dawb Huv rau tus Tswv.”¹ Tej lus tshoov siab no yeej yog ib yam uas qhia meej hais tias thaum peb nkag hauv tus Tswv lub tsev, ces peb pib ib txoj kev kawm los ua Yexus Khetos cov thwj tim siab thiab dawb huv dua. Thaum peb khi lus nrog Vajtswv raws li kev dawb huv thiab cog lus tias peb yuav ua raws li tus Cawm Seej mus, peb txais tau lub hwj chim kom hloov peb lub siab, ntxiv dag zog rau peb sab ntsuj plig, thiab nrog Nws sib raug zoo ntxiv. Ib txoj hauj lwm zoo li no ua rau peb sab ntsuj plig hloov ua dawb huv thiab pab peb nrog Vajtswv thiab Yexus Khetos sib raug zoo, Nkawd cog lus tias peb yuav txais lub txiaj ntsim uas yog txoj sia nyob mus ib txhis los ua peb tug.² Qhov kawg ntawm txoj kev ua li no yog qhov uas peb tso siab ntxiv nyob hauv peb lub neej niaj hnub raws li peb tej kev khi lus uas peb khi dhau los ntawm Yexus Khetos.

Kev tso siab plhuav li no yog qhov zoo tshaj plaws ntawm peb txoj kev nrog Vajtswv sib raug zoo thiab yuav pab peb xav hwm thiab ris txiaj rau Yexus Khetos thiab Nws txoj kev theej txhoj. Qhov no txhawb nqa peb txoj kev txawj hlub thiab pab lwm tus thiab txhawb peb sab ntsuj plig lub zog kom nyob hauv ib lub ntiaj teb uas tsaus ntuj thiab muaj kev poob siab zuj zus, ib lub ntiaj teb uas ntxhov hnyo thiab muaj kev ntxhov siab. Qhov no ua rau peb muaj hwj chim kov yeej kev ua xyem xyav thiab kev poob siab, kev ntshai, kev nyuaj siab, thiab kev tu siab uas tus yeeb ncuab yuav siv kom chob peb lub siab thaum peb lub neej nyuaj heev, peb tej kev raug txom nyem kav ntev, los sis muaj xwm txheej nyuaj. Ib nqe vaj lug kub ntuas peb txhua tus thaum peb sim kov yeej tej teeb meem ntawm lub ntiaj teb no: “Nej tsis txhob poob siab.”³

Cov kwv tij thiab cov muam, cov neeg uas tso siab rau tej kev khi lus uas lawv khi hauv tus Tswv lub tsev dhau los ntawm Yexus Khetos yeej muaj ib lub hwj chim loj tshaj plaws uas tib neeg txais tau hauv lub neej no.

Thaum peb tau kawm txog Phau Ntawv Maumoos nyob hauv Los, Nrog Kuv Mus xyoo no, peb kawm los ntawm Nifais txoj kev coj yam ntxwv txog lub hwj chim ntawm kev tso siab rau tej kev khi lus vim nws rau siab ntseeg thaum nws raug tej teeb meem thiab tej kev tsim txom thaum nws sim nqa cov phiaj mus raws li tus Tswv txib Nws ua. Txawm Nifais nyuaj siab heev vim Lamas thiab Lemu-ees ntshai thiab tsis muaj kev ntseeg los, Nifais tseem rau siab thiab tso siab hais tias tus Tswv yuav pab lawv nqa tau cov phiaj. Nws tau hais rau nws cov tij laug, “Ib yam li tus Tswv muaj txoj sia nyob, thiab ib yam li peb muaj txoj sia nyob, peb yuav tsis rov qab mus cuag peb txiv nram roob moj sab qhua, kom txog thaum peb ua tiav yam uas tus Tswv tau txib kom peb ua lawm tso.”⁴ Vim Nifais tso siab rau tus Tswv tej lus cog tseg, nws muaj peev xwm ua tau qhov uas tus Tswv tau txib kom nws ua.⁵ Tom qab ntawd, Nifais tau ua yog toog pom txoj kev tso siab zoo li no thiab sau hais tias, “Kuv, Nifais, pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, … thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”⁶

Kuv tau pom tus Tswv cov lus cog tseg thiab lub hwj chim nyob hauv Vajtswv cov me nyuam lub neej, uas ua rau lawv muaj dag zog kov yeej tej xwm txheej ntawm lub neej no. Tsis ntev tas los kuv tus poj niam tau los tsev tom qab nws mus rau lub tuam tsev thiab qhia kuv tias hnub ntawd nws tau txais kev tshoov siab heev. Thaum nws nkag hauv tus Tswv lub tsev, nws pom ib tug txiv neej uas zaum hauv lub rooj muaj log uas maj mam mus thiab ib tug poj niam uas siv tus pas nrig kom taug kev mus, ob leeg twb rau siab los hwm tus Tswv thiab muab siab npuab Nws nyob hauv Nws lub tsev. Thaum kuv tus poj niam mus hauv qhov chaw ua kab ke chiv thawj, nws pom ib tug viv ncaus ntxim hlub, uas tsis muaj ib sab tes lawm—thiab sab tod tshuav ib yas tes xwb—es tus no yeej ua li neeg xilethi-aus ua txhua yam hauj lwm uas muab rau nws ua.

Thaum kuv thiab kuv tus poj niam wb sib tham txog qhov no, wb txiav txim siab tias tsuas yog cov neeg no tso siab rau Vajtswv tej lus cog tseg los ntawm lawv tej kev khi lus nrog Vajtswv nyob hauv nws lub tsev xwb Yexus Khetos cov thwj tim zoo no thiaj li yuav muaj cuab kav tawm lawv lub tsev nyob rau ib hnub no no npaum li ntawd, txawm yog lawv muaj xwm txheej hauv lawv lub neej los yog.

Kuv cov phooj ywg, yog tias muaj ib yam xwb—ib yam uas peb muab tau rau peb cov me nyuam thiab cov xeeb ntxwv uas yuav pab lawv kov yeej tej kev sim siab nyob rau yav tom ntej—ces yam ntawd yeej yog kev tso siab rau tej kev khi lus uas peb khi dhau los ntawm Yexus Khetos. Qhov uas lawv muaj ib yam dawb huv zoo li no yuav pab lawv ua neej raws li tus Tswv cog lus rau Nws cov neeg uas rau siab coj raws li Nws hais tias: “Kuv cov thwj tim yuav sawv hauv tej chaw dawb huv, thiab yuav tsis txav.”⁷

Peb yuav ua li cas kom tso siab npaum li no dhau los ntawm Yexus Khetos? Yeej yog los ntawm kev txo hwj chim, kev tsom ntsoov rau tus Cawm Seej, ua raws li cov ntsiab cai ntawm Yexus Khetos txoj moo zoo, txais cov kab ke cawm seej thiab kev tsa nto, thiab kev ua raws nraim li tej kev khi lus uas peb khi nrog Vajtswv hauv Nws lub tsev dawb huv.

Nyob hauv nws cov lus kaw lub tuam rooj sab laj thaum lub Kaum Hli Ntuj xoo 2019, peb tus yaj saub tau qhia peb txog ib qho tseem ceeb uas pab peb tso siab rau peb tej kev khi lus, hais tias, “Yog nej yuav ua neeg tsim nyog nkag mus hauv tus Tswv lub tsev los nej yuav tsum npaj nej sab ntsuj plig ntau heev. … Kev ua neeg tsim nyog los yuav tsum hloov siab hloov ntsws kom ua zoo li tus Tswv, ua ib tug neeg ncaj ncees, coj yam ntxwv zoo dua, thiab ua ib tug neeg dawb huv ntxiv.”⁸ Yog li ntawd, yog peb hloov peb txoj kev npaj mus rau hauv lub tuam tsev, peb yuav hloov peb txoj kev xav hauv lub tuam tsev, thiaj li yuav hloov peb lub neej thaum peb nyob sab nraud. “Thaum ntawd koj txoj kev tso siab yuav muaj zog tuaj nyob ntawm Vajtswv xub ntiag; thiab lub pov thawj hwj tej lus qhuab qhia yuav teev los rau koj tus ntsuj plig ib yam li tej lwg los saum ntuj los.”⁹

Muaj ib tug npisov uas hais tias chav kawm hlob nyob hauv lub Koom Haum Me Nyuam Yaus yog ib chav kawm “npaj mus rau lub tuam tsev.” Thaum lub Ib Hlis Ntuj tus npisov hais kom cov me nyuam thiab lawv cov xib hwb tuaj rau nws chav ua hauj lwm es lawv sib tham txog qhov uas xyoo no lawv npaj mus rau lub tuam tsev. Tus npisov siv sij hawm hais txog cov lus nug xam phaj kom tau ib daim ntawv tso cai nkag tuam tsev, ces cov xib hwb siv tej lus nug ntawd thaum lawv qhia hauv lub Koom Haum Me Nyuam Yaus. Nws caw cov me nyuam kom npaj siab lawm yog li ntawd ib xyoo tom ntej thaum lawv rov qab tuaj hauv tus npisov chav ua hauj lwm, ces lawv yuav tso siab rau lawv tej kev khi lus kom txais tau ib daim ntawv tso cai nkag tus Tswv lub tsev. Xyoo no tus npisov muaj plaub tug ntxhais hluas uas zoo siab, npaj siab, thiab tso siab xav mus rau lub tuam tsev, lawv thiaj li xav kom tus npisov luam lawv tej daim ntawv tso cai nkag tuam tsev thaum Hnub Xyoo Tshiab thaum 12:01 sawv ntxov.

Kev npaj siab tsis yog rau cov neeg uas mus rau lub tuam tsev thawj zaug xwb. Peb txhua tus yuav tsum npaj siab txhua lub sij hawm kom mus rau tus Tswv lub tsev. Ib ceg txheem ntseeg tau tsim lub ntsiab lus hais tias “Txoj kev kawm hauv tsev uas lub Koom Txoos txhawb nqa kom mus rau lub tuam tsev.” Bound ¹⁰ yog ib lo lus zoo heev vim ib lub ntsiab yog kev tsom ntsoov mus rau ib sab twg, tiam sis kuj txhais hais tias muab khi, rau siab, thiab mob siab mus. Yog li ntawd qhov uas peb khi rau lub tuam tsev yeej muab peb khi rau tus Cawm Seej, peb paub mus rau sab twg thiab peb nyob ruaj nrees vim peb tso siab rau peb tej kev khi lus dhau los ntawm Yexus Khetos. Yog li ntawd, peb txhua tus yuav tsum txhob txwm ua rau peb tej kev khi lus muaj zog thaum peb teem sij hawm mus rau tus Tswv nyob hauv Nws lub tsev dawb huv, txawm yog lub tuam tsev nyob ze los nyob deb los yog.¹¹

Peb tus yaj saub, Thawj Tswj Hwm Russell M. Nelson, tau hais kom peb nco txog tej lub ntsiab cai tseem ceeb thaum nws hais tias: “Lub tuam tsev yeej txhawb nqa peb txoj kev ntseeg thiab tiv thaiv peb sab ntsuj plig vim tus Cawm Seej thiab Nws cov lub qhuab qhia yog lub ntsiab ntawm lub tuam tsev. Txhua yam uas peb kawm hauv lub tuam tsev, los ntawm tej lus qhia thiab los ntawm tus Ntsuj Plig, yuav pab peb to taub txog Yexus Khetos ntxiv. Nws cov kab ke khi peb rau Nws los ntawm tej kev khi lus pov thawj hwj uas dawb ceev. Ces thaum peb ua raws li peb tej kev khi lus, Nws pub ntxiaj ntsim rau peb los ntawm Nws lub hwj chim uas txhawb peb dag zog. Thiab peb yeej yuav xav tau Nws lub hwj chim nyob rau yav tom ntej.”¹²

Tus Cawm Seej xav kom peb npaj siab los xav to taub meej heev seb peb yuav tsum ua li cas kom khi lus nrog peb Leej Txiv Saum Ntuj Ceeb Tsheej los ntawm Nws lub npe. Nws xav kom peb npaj siab txais peb tej lub nqi zog, tej lus cog tseg, thiab tej kev lav ris; kom npaj siab txais tau tej kev tshoov siab txog sab ntsuj plig uas peb xav tau hauv lub neej no. Kuv paub tias thaum tus Tswv pom ib qho me me xwb ntawm peb txoj kev xav ua ncaj ncees kom tsom ntsoov rau Nws, thiab cov kab ke thiab tej kev khi lus uas peb khi hauv Nws lub tsev, ces Nws yuav foom koob hmoov rau peb kom peb txais tau tej txuj ci tseem ceeb thiab txoj kev hlub tshua uas peb xav tau.

Tus Tswv lub tsev yog qhov chaw uas hloov peb kom ua tej yam siab thiab dawb huv dua. Yog li ntawd, thaum peb tawm lub tuam tsev mus, uas ua rau peb cia siab rau peb tej kev khi lus, thiab muaj Vajtswv lub hwj chim, peb coj tej yam ntawm lub tuam tsev mus hauv peb lub tsev thiab peb lub neej. Kuv qhia nej tias qhov uas peb muaj tus Tswv lub tsev tus ntsuj plig nyob hauv peb lub siab yuav hloov peb tag nrho.

Los ntawm lub tuam tsev peb kuj kawm tias yog peb xav kom muaj tus Tswv tus Ntsuj Plig nyob hauv peb lub neej, peb yuav tsum tsis txhob xav phem txog leej twg. Qhov uas peb cia peb lub siab xav phem yuav ua rau peb hais tej lus thiab ua tej yam tsis zoo, tsis hais nyob hauv social media los sis nyob hauv tsev, ua rau tus Tswv tus Ntsuj Plig thim tsis nyob hauv peb lub siab. Yog li ntawd, txhob tso nej txoj kev tso siab tseg, tiam sis cia nej txoj kev tso siab muaj zog.

Qhov uas peb ua cov tuam tsev sai zuj zus yeej yuav ua rau peb zoo siab, thiab foom koob hmoov rau peb. Tiam sis, qhov tseem ceeb tshaj plaws, yog peb hloov peb txoj kev npaj mus rau hauv lub tuam tsev, peb yuav hloov peb txoj kev xav hauv lub tuam tsev, thiaj li yuav hloov peb lub neej thaum peb nyob sab nraud. Thov kom txoj kev hloov siab no yuav ua rau peb tso siab rau peb tej kev khi lus dawb huv uas peb khi nrog Vajtswv dhau los ntawm Yexus Khetos. Vajtswv muaj txoj sia nyob, Yexus yog peb tus Cawm Seej, thiab nov yog Nws lub Koom Txoos uas tau muab txum tim rov qab los nyob hauv lub ntiaj teb no. Kuv tshaj tawm txog tej lus tseeb no los ntawm peb tus Cawm Seej, Yexus Khetos, lub npe dawb ceev, amees.