Zaj Lus Tim Khawv txog Yexus
Kuv caw nej kom ua tej yam tam sim no thiaj li ua ib tug uas rau siab ua raws li nej zaj lus tim khawv txog Yexus.
Nyob rau xyoo 1832, Joseph Smith thiab Sidney Rigdon tau ua yog toog pom Vajtswv cov me nyuam txoj hmoov mus ib txhis li. Kev tshwm sim no hais txog peb lub nceeg vaj saum ntuj ceeb tsheej. Thawj Tswj Hwm Dallin H. Oaks tau hais txog “tej lub nceeg vaj uas muaj yeeb koob” thaum lub Kaum Hli Ntuj tas los, hais tias “los ntawm tus Me Nyuam Yaj txoj kev kov yeej thiab yeeb koob,” txhua tus tshuav tsawg tus xwb yuav txais kev txhiv dim hauv ib lub nceeg vaj no, “raws li lawv tej kev xaiv hauv lub neej no.” Vajtswv txoj hau kev txhiv neeg dim yog ib lub cib fim rau tag nrho Nws cov me nyuam, txawm lawv nyob qhov twg thiab nyob thaum twg hauv lub ntiaj teb no.
Txawm yog lub yeeb koob ntawm lub nceeg vaj qis tshaj, lub ntuj thilethi-aus, “tshaj txhua txoj kev to taub,” peb Txiv txoj kev cia siab yog kom peb xaiv—thiab, dhau los ntawm Nws Leej Tub txoj kev tshav ntuj ua rau peb tsim nyog txais—lub nceeg vaj theem siab tshaj thiab muaj yeeb koob tshaj, lub ntuj xilethi-aus, peb thiaj li yuav muaj txoj sia nyob mus ib txhis kom “txais tej uas Vajtswv npaj tseg rau Yexus Khetos.” Thawj Tswj Hwm Russell M. Nelson tau hais kom peb “xav txog tej yam xilethi-aus,” yog li ntawd lub nceeg vaj xilethi-aus yog peb lub hom phiaj mus ib txhis li thiab hais kom peb “ua tib zoo xav [peb] tej kev txiav txim thaum nyob hauv lub ntiaj teb no yuav ua li cas kom [peb] nyob qhov twg hauv lub neej tom ntej.”
Cov uas nyob hauv lub nceeg vaj xilethi-aus yog “cov uas tau txais ib zaj lus tim khawv txog Yexus, … cov neeg ncaj ncees uas yuav hloov ua neeg zoo tag nrho los ntawm Yexus uas yog tus nruab nrab ntawm txoj kev khi lus tshiab.” Cov neeg nyob hauv lub nceeg vaj thib ob, los yog lub ntuj thawlethi-aus, los twb hais tias lav yog neeg zoo, tsis hais “cov neeg uas muaj sam xeeb nyob hauv ntiaj teb, uas neeg txoj kev txawj ntxias ua rau lawv dig muag” los yog. Tus cwj pwm uas tab kaum lawv ntau tshaj yog qhov uas lawv “tsis rau siab ua raws li tej lus tim khawv txog Yexus.” Piv rau cov neeg nyob hauv lub nceeg vaj theem qis, lub ntuj thilethi-aus, uas yog cov uas “tsis kam txais Khetos txoj moo zoo, thiab tej lus tim khawv txog Yexus.”
Cia nco ntsoov tias qhov uas tib neeg nyob hauv tej lub nceeg vaj twg no yog qhov uas lawv ua li muaj lub siab xav li cas txog lawv “zaj lus tim khawv txog Yexus” zoo li cas, xws li (1) tso siab plhuav los sis (2) tsis rau siab los sis (3) xyeej hlo li. Nyias yuav nyob qhov twg mus ib txhis li nyob ntawm tej yam nyias ua.
I.
Zaj lus tim khawv txog Yexus yog dab tsi?
Yog tus Vaj Ntsuj Plig Dawb Huv txoj kev ua tim khawv tias Nws yog Vajtswv Leej Tub, tus Mexiyas thiab tus Txhiv Dim. Yog Yauhas txoj kev ua tim khawv tias Yexus nyob thaum chiv keeb nrog Vajtswv, Nws yog tus uas Tsim lub ntuj thiab lub ntiaj teb, thiab “nyob hauv nws los muaj txoj moo zoo, thiab txoj moo zoo yog txoj sia, thiab txoj sia yog qhov kaj rau neeg.” Yog “zaj lus tim khawv ntawm cov Thwj Tim thiab cov Yaj Saub, … hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm.” Yog kev paub tias “tsis muaj lwm lub npe uas yuav coj tau kev cawm seej los.” Yog “zaj lus tim khawv, zaj kawg nkaus,” uas tus Yaj Saub Joseph Smith hais tias, “nws muaj txoj sia nyob! … Nws yog Leej Txiv Tib Leeg Tub—hais tias los ntawm nws, thiab vim yog nws, thiab yog ntawm nws, tej ntuj los muab tsim thiab tau muab tsim tas los, thiab cov neeg uas nyob rau hauv tej lub ntuj ntawd yog cov tub thiab cov ntxhais uas yug los rau Vajtswv.”
II.
Hais txog zaj lus tim khawv no peb muaj lus nug hais tias, Peb yuav ua dab tsi?
Cov uas txais lub nceeg vaj xilethi-aus ua lawv tug “txais” ib zaj lus tim khawv txog Yexus tag nrho thaum lawv ua kev cai raus dej, txais tus Vaj Ntsuj Plig Dawb Huv, thiab kov yeej txhua yam los ntawm lawv txoj kev ntseeg. Tej lub ntsiab cai thiab tej lus tseeb ntawm Yexus Khetos txoj moo zoo tswj hwm lawv tej lub hom phiaj thiab tej yam uas lawv xaiv. Pom tau lawv zaj lus tim khawv txog Yexus nyob hauv qhov uas lawv yog neeg zoo li cas thiab lawv hloov los ua neeg zoo li cas. Lawv muaj lub siab hlub, “Khetos txoj kev hlub uas dawb paug.” Lawv tsom ntsoov rau kev “ua tau lub neej zoo ib yam li Yexus Khetos.”
Ib txhia uas nyob hauv lub nceeg vaj thawlethi-aus kuj yuav txais ib zaj lus tim khawv txog Yexus, tiam sis lawv txawv vim muaj tej yam uas lawv tsis ua. Qhov uas lawv tsis rau siab ua raws li lawv zaj lus tim khawv txog tus Cawm Seej qhia tias lawv tsis muaj siab xav ua los sis lam ua—lawv “sov sem so xwb”—tsis zoo li Amoos cov neeg nyob hauv Phau Ntawv Maumoos, ua piv txwv, uas “txawv lwm cov neeg vim yog lawv txoj kev mob siab hlub tshua rau Vajtswv.”
Cov neeg nyob hauv lub nceeg vaj thilethi-aus yog cov uas xyeej ib zaj lus tim khawv txog Yexus, thiab xyeej Nws txoj moo zoo, Nws tej kev khi lus, thiab Nws cov yaj saub. Anpinadais piav txog cov no hais tias lawv “tau ua raws li lawv tus kheej lub siab nyiam thiab lub siab xav txog sab cev nqaij daim tawv; thiab ib txwm tsis tau thov tus Tswv thaum ob txhais npab ntawm kev hlub tshua tseem ncav rau lawv; vim tus Tswv ncav nws ob txhais npab ntawm kev hlub tshua rau lawv, thiab lawv tsis kam txais.”
III.
Qhov uas yus rau siab ua raws li tej lus tim khawv txog Yexus txhais li cas?
Muaj ntau yam uas kuv hais tau thaum teb lo lus nug no. Kuv yuav hais txog ob peb yam xwb. Kev rau siab ua raws li tej lus tim khawv txog Yexus yeej yog kev txhawb nqa thiab kev tu zaj lus tim khawv ntawd. Cov thwj tim tseeb yeej tsis tso tej yam me tseg uas txhawb nqa lawv zaj lus tim khawv txog Yexus, xws li kev thov Vajtswv, kev kawm vaj lug kub, kev hwm Vajtswv nyob rau Hnub Caiv thiab kev txais lub cim nco txog, kev hloov siab lees txim, kev txhawb pab, thiab kev hwm nyob hauv tus Tswv lub tsev. Thawj Tswj Hwm Nelson tau qhia peb tias “Ib zaj lus tim khawv uas yus tsis tu txhua hnub ‘los ntawm Vajtswv txoj lus zoo’ [Maulaunais 6:4] yuav ploj mus sai heev. Yog li ntawd, … peb yuav tsum teev tiam tus Tswv thiab kawm txog Nws txoj moo zoo txhua hnub. Ces nws hais tias: “Kuv thov kom nej yuav cia Vajtswv yeej hauv nej lub neej. Siv ib feem ntawm nej lub sij hawm pub rau Nws. Thaum nej ua li ntawd, cia li saib nej sab ntsuj plig yuav muaj zog zuj zus tuaj.”
Kev rau siab kuj qhia tias yus qhib siab thiab txaus siab hais yus zaj lus tim khawv. Thaum peb ua kev cai raus dej, peb qhia tias peb txaus siab “ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas [peb] nyob, kom txog hnub tuag.” Qhov tseem ceeb yog nyob hauv lub caij Easter no, peb zoo siab tshaj tawm tab meeg sawv daws ua tim khawv txog tus Khetos uas tau sawv rov los thiab muaj txoj sia nyob.
Ib qho ntawm kev rau siab ua raws li tej lus tim khawv txog Yexus yog kev mloog Nws cov tub xa xov tej lus. Vajtswv yeej tsis yuam peb taug txoj kev zoo, txoj kev ua raws li kev khi lus, tiam sis Nws qhia Nws cov yaj saub kom peb paub zoo tias peb yuav raug dab tsi los ntawm tej yam uas peb xaiv. Thiab tsis yog cov mej zeej ntawm Nws lub Koom Txoos xwb. Dhau los ntawm Nws cov yaj saub thiab cov thwj tim, Nws muaj siab hlub thov tag nrho neeg ntiaj teb kom lawv ua raws li qhov tseeb lawv thiaj li yuav muaj kev ywj siab, pab lawv tsis raug tej kev txom nyem uas lawv dim tau, thiab ua rau lawv muaj kev xyiv fab uas kav mus ib txhis.
Kev rau siab ua raws li tej lus tim khawv txog Yexus yog kev txhawb nqa lwm tus, los ntawm peb tej lus thiab tus yam ntxwv, kom lawv rau siab thiab, qhov tseem ceeb yog cov nyob hauv peb tsev neeg. Muaj ib zaug uas Txwj Laug Neal A. Maxwell tau hais lus rau “cov mej zeej [ntawm lub Koom Txoos] uas ‘muaj sam xeeb’ tiam sis lawv lam ua tej yam xwb lawv tsis rau siab ua cov thwj tim thiab cov uas ua dog dig xwb lawv tsis ‘mob siab ua tej yam zoo’ (Lus Qhuab Qhia thiab Kev Khi Lus 76:75; 58:27).” Nws hais tias txhua tus muaj kev ywj siab xaiv, tiam sis Txwj Laug Maxwell hais tias: “Tu siab uas thaum ib txhia xaiv kev tub nkeeg, lawv tsis xaiv rau lawv tus kheej xwb, tiam sis lawv xaiv rau tiam neeg tom qab ntawd thiab tiam neeg tom qab. Tej yam me uas cov niam tsev txiv tsev ua tsis tshua ncaj los ntshe ua rau lawv cov me nyuam ua tej yam txhaum loj! Tej tiam neeg hauv ib tsev neeg los tej zaum twb rau siab heev, tiam sis ib txhia hauv tiam neeg tam sim no twb hloov ua txhaum lawm. Tu siab heev, nyob hauv tiam neeg tom ntej, ib txhia yuav ntxeev siab thaum lawv txoj kev ntseeg ploj zuj zus.”
Ntau xyoo tas los, Txwj Laug John H. Grogberg hais ib zaj dab neeg txog ib tsev neeg nyob hauv ib ceg ntseeg hauv Hawaii nyob rau tej xyoo 1900. Lawv yog cov mej zeej ntawm lub Koom Txoos rau ob xyoo thaum lawv ib tug ntxhais muaj mob uas tsis paub yog dab tsi thiab nyob hauv tsev kho mob. Nyob hauv lub koom txoos hnub Sunday tom qab ntawd, tus txiv tsev thiab nws tus tub npaj lub cim nco txog zoo li nkawd ua txhua lub lim tiam, tiam sis thaum tus txiv tsev txhos caug foom koob hmoov rau cov mov mog, ceg ntseeg tus thawj tswj hwm, thaum nws txawm paub yog leej twg nyob ntawm lub rooj foom koob hmoov rau lub cim nco txog, sawv ntsug thiab qw hais tias, “Cia li tsum. Neb kov tsis taus lub cim nco txog. Koj tus ntxhais muaj mob uas tsis paub yog dab tsi. Khiav tawm mus tam sim no cia lwm tus npaj cov mov mog tshiab rau lub cim txog. Tsis pub nej nyob no. Mus tam sim no.” Tus txiv tsev no ntsia ceg ntseeg tus thawj tswj hwm ces ntsia pawg ntseeg thiab vim nws pom tias lawv txhawj thiab txaj muag, nws piav tes rau nws tsev neeg, thiab lawv sawv daws tawm hauv chav teev ntuj mus.
Thaum tsev neeg no poob siab taug kev mus rau lawv lub tsev me, tsis muaj leej twg hais lus. Nyob ntawd lawv zaum ua ib voj voog, thiab tus txiv tsev hais tias, “Thov nej nyob ntsiag to mus txog thaum kuv npaj hais lus.” Tus tub ntxawg xav paub seb lawv yuav ua li cas kom ua pauj rau lawv txoj kev poob ntsej muag: puas muab ceg ntseeg tus thawj tswj hwm cov npua tua, los sis muab nws lub tsev hlawv, los sis mus koom lwm lub koom txoos? Tsib, kaum, kaum tsib, nees nkaus tsib feeb dhau mus es lawv nyob ntsiag to.
Tus txiv tsev ob lub nrig uas muab nyem pib tso me ntsis, thiab nws los kua muag. Tus niam tsev pib quaj, thiab tsis ntev txhua tus me nyuam los kua muag. Tus txiv tsev tig rau nws tus poj niam thiab hais tias, “Kuv hlub koj” ces nws hais li ntawd rau nkawd txhua tus me nyuam. “Kuv hlub nej txhua tus thiab kuv xav kom peb nyob ua ke tas mus li, ua ib tsev neeg. Thiab tib txoj kev uas yuav ua tau li ntawd yog thaum peb ua cov mej zeej zoo hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab ua kev sib khi los ntawm lub pov thawj hwj nyob hauv lub tuam tsev. Nov tsis yog ceg ntseeg tus thawj tswj hwm lub koom txoos. Nov yog Yexus Khetos lub Koom Txoos. Peb yuav tsis cia ib tug txiv neej los sis kev txaj muag los sis kev muab hlob tab kaum peb txoj kev nyob ua ke tas mus li. Hnub Sunday tom ntej peb yuav rov qab mus rau lub koom txoos. Peb yuav nyob peb mus txog thaum peb paub tus ntxhais txoj kev mob yog dab tsi, tiam sis peb yuav rov qab mus.”
Lawv twb rov qab mus, tus ntxhais twb rov qab zoo, thiab lawv tsev neeg ua kev sib khi hauv lub Tuam Tsev Laie Hawaii thaum ua tiav lawm. Hnub no, muaj 100 tus neeg hais tias lawv txiv, yawg, thiab yawg koob tau koob hmoov vim nws tau tsom ntsoov rau kev nyob mus ib txhis li.
Yam kawg txog kev rau siab ua raws li tej lus tim khawv txog Yexus uas kuv yuav hais yog peb txoj kev xav hloov los ua neeg dawb huv. Yexus yog peb tus Txhiv Dim, thiab Nws thov kom peb “Cia li hloov siab lees txim, nej txhua tus uas nyob thoob plaws lub ntiaj teb, thiab los cuag kuv thiab ua kev cai raus dej los ntawm kuv lub npe, xwv kom qhov uas nej tau txais tus Vaj Ntsuj Plig Dawb Huv yuav muab nej hloov ua neeg dawb huv, xwv kom nej yuav sawv tsis muaj qhov ceb rau ntawm kuv xub ntiag thaum txog hnub kawg.”
Tus yaj saub Maumoos piav txog ib pawg Neeg Ntseeg uas tau nyiaj mus raws li no txawm yog lawv twb “tiv kev txom nyem ntau”::
“Txawm li ntawd los lawv yoo mov thiab thov Vajtswv tsis tu tsis tseg, thiab lawv txoj kev txo hwj chim loj hlob muaj zog zuj zus tuaj, thiab lawv txoj kev ntseeg Khetos ruaj khov zuj zus tuaj, txog rau thaum lawv muaj kev xyiv fab thiab kev nplij siab puv nkaus, muaj tseeb tiag, twb txog rau thaum ua rau lawv lub siab hloov ua ntshiab thiab dawb huv, kev hloov ua dawb huv uas tau muaj vim yog lawv ywj lawv lub siab rau Vajtswv.” Yog kev hloov siab loj heev—kev ywj peb lub siab rau Vajtswv thiab kev rov qab yug dua tshiab dhau los ntawm tus Cawm Seej txoj kev tshav ntuj—uas peb xav tau.
Kuv caw nej kom ua tej yam tam sim no thiaj li ua ib tug uas rau siab ua raws li nej zaj lus tim khawv txog Yexus. Vim tej zaum yuav tsum hloov siab lees txim, “tsis txhob laug sij hawm rau hnub uas nej hloov siab lees txim,” ntshe “nyob rau teev nej tsis xav ces lub caij ntuj sov twb dhau lawm, thiab lub caij sau qoob loo tas lawm, thiab nej tus ntsuj plig tsis dim.” Mob siab ua raws li nej tej kev khi lus uas khi nrog Vajtswv. Tsis txhob “npau taws vim yog txoj kev nruj ntawm txoj lus.” “Kuv hais rau nej, kuv xav kom nej nco ntsoov sau [Khetos] lub npe no cia rau hauv nej lub siab tas mus li, … kom nej yuav hnov thiab paub lub suab uas yuav hu nej, thiab, lub npe uas nws yuav siv los hu nej.” Thiab qhov kawg, “txiav kiag txim siab, hais tias nej yuav ua tej yam uas [Yexus] yuav qhia nej, thiab txib kom nej ua.”
Peb Leej Txiv yeej xav kom tag nrho Nws cov me nyuam uas xav nrog Nws nyob hauv Nws lub nceeg vaj xilethi-aus muaj txoj sia nyob mus ib txhis. Yexus tau raug txom nyem, tuag, thiab sawv rov los kom muaj li ntawd. Nws tau “nce mus rau saum ntuj ceeb tsheej, thiab tau mus zaum ntawm Vajtswv sab tes xis, mus aws ntawm Leej Txiv nws tej cai muaj kev hlub tshua uas nws muaj rau noob neej.” Kuv thov kom peb yuav tau koob hmoov muaj ib zaj lus khawv txog tus Tswv Yexus Khetos uas muaj zog, kom peb xyiv fab thiab rau siab ua raws li zaj lus tim khawv ntawd, thiab txais cov koob hmoov los ntawm Nws txoj kev tshav ntuj hauv peb lub neej tas mus li. Los ntawm Yexus Khetos lub npe, amees.