Rau Siab Mus Kom txog Thaum Kawg

Nej puas tau xav seb nej yuav ua li cas kom rau siab ntseeg Vajtswv thaum nej nyob hauv ib lub ntiaj teb uas nyiam kev txhaum? Nej yuav txais dag zog los ntawm qhov twg nej thiaj li yuav muaj zog mus tom ntej thiab ua zoo ntxiv mus? Nej yuav ua li cas kom muaj kev xyiv fab tiag?

Kuv xav tias zaj lus txog Daviv thiab Nkauli-am¹ pab tau.

Nyob hauv Phau Qub, cov tub rog Filitees tawm tsam cov neeg Ixayees, thiab txhua hnub thiab txhua hmo, ib tug neeg Filitees siab heev hu ua Nkauli-am twv cov Ixayees seb leej twg yuav nrog nws sib ntaus sib tua.

Nyob hauv cov neeg Ixayees muaj ib tug tub yug yaj hu ua Daviv uas yeej me dua li Kaulias tiam sis nws muaj kev ntseeg Yexus Khetos loj heev! Daviv hais tias nws mam li ua. Txawm yog tus vaj ntxwv sim hais kom nws tsis txhob ua li ntawd los, Daviv tau xaiv kom tso siab rau Yexus Khetos.

Yav tas los, Daviv tau tua ib tug tsov ntxhuav thiab ib tug dais. Los ntawm tej yam nws ua no, nws paub tias Vajtswv tau pov hwm nws thiab pab nws kov yeej. Daviv xav tias Vajtswv lub hom phiaj yeej yog lub hom phiaj tseem ceeb tshaj plaws. Yog li ntawd, vim nws rau siab ntseeg tias Vajtswv yuav tsis tso nws tsev, nws thiaj li khaws tau tsib lub pob zeb kheej kheej, nqa nws txoj zes hlua, thiab mus ntsib tus neeg siab ntawd.

Cov vaj lug kub qhia peb tias Daviv muab txoj ze hlua fiav mus ntaub nkaus Nkauli-am hauv pliag, muab nws tua tuag.²

Txawm yog Daviv siv ib lub pob zeb muab Nkauli-am tua, nws twb npaj tsib lub. Tsib lub pob zeb diam! Ua rau kuv xav txog tej yam kuv ua tau kom npaj kuv tus kheej kov yeej lub ntiaj teb.

Yuav zoo li cas yog tias Daviv cov pob zeb no nyias piv txog nyias yam uas pab peb kov yeej hauv peb lub neej no? Tsib lub pob zeb no yuav zoo li cas? Kuv tau xav li no:

1. Lub pob zeb ntawm kuv txoj kev hlub Vajtswv.

2. Lub pob zeb ntawm kuv txoj kev ntseeg peb tus Cawm Seej, Yexus Khetos.

3. Lub pob zeb ntawm kev paub kuv yog leej twg tiag.

4. Lub pob zeb ntawm kuv txoj kev hloov siab lees txim txhua hnub.

5. Lub pob zeb ntawm kuv txoj kev txais Vajtswv lub hwj chim.

Cia kuv hais txog vim li cas peb tau koob hmoov los ntawm tej yam no.

Qhov thib ib, lub pob zeb ntawm kuv txoj kev hlub Vajtswv. Txoj kev hlub Vajtswv li no yog thawj txoj lus txib.³ Phau Ntxiv Dag Zog rau cov Tub Hluas Ntxhais Hluas qhia peb hais tias: “Vajtswv hlub nej. Nws yog nej Leej Txiv. Nws txoj kev hlub zoo tag nrho yuav ua rau nej xav hlub Nws. Thaum nej txoj kev hlub Leej Txiv Saum Ntuj Ceeb Tsheej yog lub hwj huam tseem ceeb tshaj plaws plaws huav nej lub neej, ces ntau yam kev txiav txim siab yuav yooj yim dua.”⁴

Peb txoj kev hlub Vajtswv thiab peb txoj kev nrog Nws sib raug zoo yuav ua rau peb muaj zog txaus hloov peb lub siab thiab kov yeej peb tej teeb meem.

Lub pob zeb thib ob, yog lub pob zeb ntawm kuv txoj kev ntseeg peb tus Cawm Seej, Yexus Khetos. Thaum Yexus Khetos tau los rau hauv lub ntiaj teb, Nws raug txom nyem rau peb tej kev txhaum⁵ thiab Nws ris peb tej kev nyuaj siab, peb tej kev mob kev nkeeg, thiab tej kev mob ntawm lub cev thiab sab siab ntsws. Yog vim li ntawd Nws thiaj li paub ua li cas kom pab peb. Kev ntseeg Yexus Khetos txhais tias yus tso siab plhuav rau Nws laj lim tswv yim, Nws lub sij hawm, Nws txoj kev hlub thiab Nws lub hwj chim theej peb lub txhoj. Lub pob zeb ntawm kev ntseeg Yexus Khetos yuav kov yeej txhua “tus neeg siab” hauv peb lub neej.⁶ Peb kov yeej tau lub ntiaj teb uas tau poob mus no vim Nws twb kov yeej lawm.⁷

Lub pob zeb thib peb, yog lub pob zeb ntawm kev paub kuv yog leej twg tiag. Peb tus yaj saub, Thawj Tswj Hwm Russell M. Nelson, tau qhia peb tias qhov tseem ceeb ntawm peb, peb yeej yog Vajtswv cov me nyuam, cov me nyuam khi lus, thiab Yexus Khetos cov thwj tim.⁸

Txhua yam hloov thaum kuv paub tias kuv yog leej twg tiag.⁹ Thaum kuv ua xyem xyav txog kuv tus kheej, kuv pheej hais rau kuv tus kheej hauv kuv lub siab los sis hais lus nrov, “Kuv yog Vajtswv tus ntxhais, kuv yog Vajtswv tus ntxhais,” ntau npaum li yuav tsum hais kom kuv thiaj li ua siab loj mus tom ntej.

Lub pob zeb thib plaub, yog lub pob zeb ntawm kuv txoj kev hloov siab lees txim txhua hnub. Nyob hauv phau Ntxiv Dag Zog rau cov Tub Hluas Ntxhais Hluas, peb nyeem hais tias: “Kev hloov siab lees txim tsis yog kev raug txim vim peb tau ua txhaum; yeej yog txoj kev uas tus Cawm Seej pab peb dim kev txhaum. Kev hloov siab lees txim txhais tias peb hloov—tig ntawm kev txhaum mus thiab tig mus rau Vajtswv. Yog kev ua zoo dua ntxiv thiab kev txais kev zam txim. Txoj kev hloov no tsis yog ib yam uas yus ua ib zaug xwb; yeej yog ib tug txheej txheem uas yus ua tas li.”¹⁰

Tsis muaj ib yam dab tsi uas zoo dua li Vajtswv txoj kev zam txim thiab qhov uas peb paub tias peb yog neeg huv thiab peb nrog Nws sib raug zoo. Txhua tus yeej txais kev zam txim los tau.

Lub pob zeb thib tsib yog lub pob zeb ntawm kuv txoj kev txais Vajtswv lub hwj chim. Tej kev khi lus uas peb nrog Vajtswv khi, xws li thaum peb ua kev cai raus dej, ua rau peb txais tau lub hwj chim ua li Vajtswv.¹¹ Vajtswv lub hwj chim yog ib lub hwj chim uas pab peb kov yeej tej teeb meem, xaiv tej yam zoo, thiab ua rau peb muaj peev xwm nyiaj tau tej xwm txheej nyuaj. Yog ib lub hwj chim uas peb txais tau kom muaj peev xwm ntxiv ua tej yam peb yuav tsum ua.¹²

Phau ntawv Ntxiv Dag Zog rau cov Tub Hluas Ntxhais Hluas piav hais tias: “Tej kev khi lus ua rau [nej] nrog Leej Txiv Saum Ntuj Ceeb Tsheej thiab tus Cawm Seej sib raug zoo. Nkawd ua rau [nej] muaj Vajtswv lub hwj chim ntxiv hauv [nej] lub neej.”¹³

Kuv xav hais txog kev sib raug zoo ntawd. Nej puas nco qab thaum Yexus tau qhia txog lub tsev uas ua nyob rau saum ib lub pob zeb thiab lub tsev uas ua rau saum tej xuab zeb?¹⁴ Txwj Laug Dieter F. Uchtdorf piav hais tias: “Ib lub tsev tsis tiv taus cua daj cua dub vim lub tsev ntawd muaj zog. Lub tsev ntawd kuj tsis tiv taus vim lub pob zeb muaj zog. Lub tsev tiv taus cua daj cua dub vim tau muab lub tsev ntawd ua nyob rau saum lub pob zeb ntawd. Yeej yog lub zog ntawm kev txuas rau lub pob zeb ntawd uas muaj nqis.”¹⁵

Peb txoj kev sib raug zoo nrog Yexus Khetos yuav ua rau peb ua siab loj thiab ntseeg tias peb nyob tau nrog tib neeg uas saib tsis taus peb txoj kev ntseeg los sis tawm tsam peb. Yexus Khetos caw peb xav txog Nws tas li; Nws qhia peb tias, “Ntsia ntsoov kuv nrog txhua txoj kev xav.”¹⁶ Kev xav txog tus Cawm Seej tas li ua rau peb to taub meej tias yuav ua li cas kom txiav txim siab, tsis muaj kev ntshai, thiab hais lus kom txhob ua tej yam uas tawm tsam Vajtswv tej lus qhia.¹⁷ Thaum kuv lub neej nyuaj heev thiab kuv xav tias kuv ua tsis taus ntxiv, kev xav txog Yexus Khetos ua rau kuv nyob kaj siab lug thiab muaj kev cia siab.

Peb yuav ua li cas kom siv Yexus Khetos lub hwj chim no? Peb yuav tsum ua raws li peb tej kev khi lus thiab muaj kev ntseeg Yexus Khetos ntxiv.

Kheev lam Daviv muaj ib lub pob zeb ntxiv; lub pob zeb ntawd yog lub pob zeb ntawm kuv zaj lus tim khawv. Thaum peb pom ntawm sab ntsuj plig hais tias Vajtswv pab peb lub neej ces ua rau peb zaj lus tim khawv muaj zog ntxiv.¹⁸ Tsis muaj leej twg uas tshem taus txoj kev txawj ntse ntawd ntawm peb mus. Tej yam uas peb kawm los ntawm sab ntsuj plig hauv peb lub neej yeej muaj nqis tshaj plaws. Qhov uas peb ua raws nraim li tej yam uas peb kawm ntawd ua rau peb muaj kev ywj siab. Ua rau peb muaj kev xyiv fab! Yog tias peb nyiam qhov tseeb, ces peb yuav nrhiav, thiab thaum peb nrhiav tau lawm, peb yuav tiv thaiv qhov tseeb ntawd.¹⁹

Ib yam li kuv tau xaiv pob zeb thib rau, kuv caw nej nrog nej chav kawm, pawg, los sis tsev neeg sib ntsib thiab xav txog lwm yam uas nej yuav tsum muaj kom nej rau siab ntseeg Vajtswv, thiab kov yeej lub ntiaj teb.

Cov phooj ywg zoo, Yexus Khetos xav nrog peb taug kev hauv peb lub neej no. Kuv cog lus rau nej tias, thaum nej tuav tus nqaj hlau, nej yuav nrog Yexus Khetos tuav tes.²⁰ Nws yuav coj nej mus, thiab Nws yuav qhia nej.²¹ Los ntawm Nws txhais tes, nej yuav txawj tua txhua tus Nkauli-am nyob hauv nej lub neej.

Kuv ua tim khawv tias muaj kev xyiv fab los ntawm kev thov Vajtswv txhua hnub, kev nyeem Phau Ntawv Maumoos txhua hnub, kev txais lub cim nco txog txhua Hnub Caiv, thiab mus rau seminary—tsis hais thaum sawv ntxov los yog! Yeej muaj kev xyiv fab thaum nej ua zoo.

Muaj kev xyiv fab thaum nej rau siab ntseeg tus Vajtswv ntawm txhua yam tag nrho, tus Cawm Seej ntawm lub ntiaj teb, tus Vaj Ntxwv ntawm cov vaj ntxwv. Yeej muaj kev xyiv fab los ntawm kev ua Yexus Khetos cov thwj tim.

Vajtswv yog peb Leej Txiv. Nws paub nej lub siab xav thiab tej yam uas nej yuav muaj peev xwm ua, thiab Nws tso siab rau nej.

Cov tub hluas ntxhais hluas, Yexus Khetos yuav pab nej rau siab ntseeg mus txog thaum kawg. Kuv hais lus tim khawv txog tej yam tseeb no los ntawm tus Tswv Yexus Khetos lub npe, amees.