Kev Xyiv Fab Siab Dua

Nyuaj rau kuv ntseeg tias yog 120 xyoo tas los xwb thaum Wilbur thiab Orville Wright tau ya mus hauv nyab hoom saum cov xuab zeb ntawm Kitty Hawk, lub xeev North Carolina. Hnub December ntawd thawj lub sij hawm uas tau tsav nyab hoom plaub zaug twb hloov lub ntiaj teb lawm thiab qhib qhov rooj rau tib neeg tsim ib yam zoo tshaj plaws hauv lub ntiaj teb zaj keeb kwm.

Kev ya mus yeej txaus ntshai thaum ntawd. Ob tug kwv tij paub qhov no. Thiab nkawd txiv, Milton paub li ntawd thiab. Muaj tseeb tiag, nws ntshai tias nws yuav xiam nws ob tug tub thaum nkawd ya mus es nkawd thiaj li cog lus tias nkawd yuav tsis nyob hauv nyab hoom ua ke.

Thiab nkawd yeej tsis tau ua li ntawd—tsuas yog ib zaug xwb. Xya xyoo tom qab hnub tseem ceeb ntawd nyob ntawm Kitty Hawk, Milton Wright tau pom zoo thiab saib thawj zaug uas Wilbur thiab Orville nkawd caij nyab hoom ua ke. Tom qab tsaws nyab hoom, Orville yaum nws txiv caij nyab hoom thawj zaug seb zoo li cas thiab yog tib lub sij hawm uas nws txiv ua li no.

Thaum nyab hoom pib nce mus, Milton uas muaj 82 xyoos zoo siab kawg nkaus li vim nws ya mus nws thiaj li tsis ntshai dab tsi lawm ntxiv. Orville zoo siab kawg thaum nws txiv qw nrov zoo siab heev, “Mus siab ntxiv, Orville, mus siab ntxiv!”²

Kuv yeej muab siab npuab tus no!

Tej zaum kuv nyiam hais lus txog kev tsav nyab hoom vim kuv paub tias tsev neeg Wright xav li cas. Kuv kuj tau “dim tej yam uas khi yus nyob hauv lub Ntiaj Teb thiab muaj tis uas ci ntsa iab li cov nyiaj ya mus saum nruab ntug.”³

Thawj zaug uas ob tug kwv tij Wright tsav nyab hoom, ib qho uas muaj 37 xyoo ua ntej kuv yug los, twb qhib kev rau kuv muaj kev xav tsis thoob, kev mus ncig teb chaws, thiab kev xyiv fab hauv kuv lub neej.

Tiam sis txawm yog kev xyiv fab zoo npaum li ntawd los, kuj muaj ib txoj kev xyiv fab uas siab dua. Hnub no, raws li Milton Wright qw hais tias, “Mus siab ntxiv, Orville, mus siab ntxiv,” kuv xav hais txog qhov uas txoj kev xyiv fab siab dua los qhov twg los, ua li cas kev xyiv fab no nkag tau hauv peb lub siab, thiab peb yuav ua li cas kom muaj kev xyiv fab no ntxiv.

Nyaj kuv tsis tas hais tias txhua leej txhua tus xav zoo siab xwb.⁴ Txawm li ntawd los, tsis yog tag nrho txhua tus muaj kev zoo siab. Nyuaj rau neeg coob nrhiav kev zoo siab.⁵

Yog vim li cas? Yog tias kev zoo siab yog tib qho uas peb xav tau heev, vim li cas peb tsis txawj nrhiav tau li? Zoo li ib zaj nkauj hais tias, tej zaum peb nrhiav kev xyiv fab hauv tej qhov tsis yog.⁶

Ua ntej peb hais txog txoj kev nrhiav kev xyiv fab, cia kuv lees hais tias kev nyuaj siab thiab lwm yam teeb meem ntawm sab siab ntsws thiab sab hlwb los muaj tiag, thiab tsis yog kuv hais tias, “Sim ua zoo siab xwb.” Kuv lub hom phiaj tsis yog kom hais tej teeb meem ntawm sab siab ntsws tsis muaj tseeb. Yog nej muaj tej teeb meem li ntawd, kuv pab nej nyuaj siab thiab txhawb nqa nej. Rau ib txhia, tej zaum yuav tsum nrhiav kev pab los ntawm cov kws txawj pab sab siab ntsws uas mob siab xyaum ua tej txuj ci pab lwm tus nej thiaj li yuav muaj kev xyiv fab. Peb yuav tsum ua Vajtswv tsaug vim muaj txoj kev pab zoo li no.

Lub neej no tsis yog kev zoo siab kawg txhua lub sij hawm. “Yuav tsum muaj tias txhua txhia yam nyias yeej muaj nyias qhov fab ntxeev.”⁷ Thiab yog tias Vajtswv los kua muag, ib yam li cov vaj lug kub hais,⁸ ces peb yeej yuav los kua muag ib yam thiab. Kev tu siab tsis yog ib lub cim uas qhia tias peb ua txhaum. Nyob hauv lub neej no, kev xyiv fab thiab kev tu siab yeej koom ua ke.⁹ Ib yam li nej txhua tus, kuv twb muaj kev poob siab, kev nyuaj siab, thiab kev tu siab.

Tiam sis, kuv tau txais kev xyiv fab loj kawg nkaus uas puv nkaus yus lub siab lub ntsws thaum kaj ntug txoog. Kuv tau kawm tias kev kaj siab lug no yeej yog los ntawm kev coj raws li tus Cawm Seej thiab kev ua raws li Nws txoj Kev.

Kev kaj siab lug uas Nws muab rau peb tsis yog raws li lub ntiaj teb muab.¹⁰ Yeej zoo dua. Yeej siab dua thiab dawb huv dua. Yexus hais tias, “Kuv los, yog los ua kom nej tau txoj sia thiab tau lub neej puv npo.”¹¹

Yexus Khetos txoj moo zoo yeej yog “txoj kev zoo siab kawg nkaus”!¹² Yog ib zaj lus uas muaj kev cia siab kawg nkaus! Yog ib zaj lus txog kev kwv tus quab thiab kev ris tej nra.¹³ Yog kev ci ntsa iab. Yog kev tau vaj txiaj ntsim, txuj ci siab tshaj, tej kev khi lus dawb huv ntxiv, kev nyab xeeb mus ib txhis li, thiab yeeb koob uas kav ib txhis!

Kev xyiv fab yog lub hom phiaj ntawm Vajtswv txoj hau kev rau Nws cov me nyuam. Twb tau tsim nej—“kom [nej] yuav muaj kev xyiv fab!”¹⁴

Peb Leej Txiv Saum Ntuj Ceeb Tsheej tsis tau muab txoj kev kom nej zoo siab zais cia. Tsis yog ib yam uas Nws qhia tsis tau. Txhua tus txais tau!¹⁵

Vajtswv yeej cog lus tias cov uas ua cov thwj tim, ua raws li tus Cawm Seej tej lus qhia thiab tus yam ntxwv, ua raws li Nws cov lus txib, thiab ua raws li lawv tej kev khi lus yuav muaj kev zoo siab. Yeej yog ib txoj kev cog lus zoo kawg nkaus!

Peb txhua tus paub cov neeg uas hais tias lawv tsis tas muaj Vajtswv kom zoo siab, lawv zoo siab txaus yog tsis muaj kev teev ntuj.

Kuv lees thiab saib taus tej kev xav ntawd. Peb Leej Txiv Saum Ntuj Ceeb Tsheej xav kom tag nrho Nws cov me nyuam muaj kev zoo siab heev, yog li ntawd Nws ua kom lub neej no muaj ntau yam zoo nkauj, “ua kom lub qhov muag nyiam thiab kom zoo lub siab.”¹⁶ Rau kuv mas, kev ya mus ua rau kuv zoo siab kawg. Lwm tus txais kev zoo siab los ntawm cov nkauj, kev kos duab, los sis nyob nraum zoov.

Thaum peb tshaj tawm tus Cawm Seej txoj moo zoo, peb tsis hais tias tsis muaj lwm yam uas ua rau tib neeg zoo siab. Peb tsuas hais tias Vajtswv muaj ntxiv uas Nws xav muab rau peb. Ib txoj kev xyiv fab uas siab dua—ib txoj kev xyiv fab uas loj tshaj tej yam uas lub ntiaj teb no muab tau. Yog kev xyiv fab uas nyiaj kom dhau kev tu siab, ua rau kev nyuaj siab ploj mus, thiab ua rau neeg tsis kho siab.

Kev zoo siab ntawm lub ntiaj teb no yeej kav tsis ntev. Yeej ua tsis tau! Txhua yam hauv lub ntiaj teb yeej yuav laus zuj zus, ploj mus, thiab ntsuag tas. Tiam sis txoj kev xyiv fab ntawm Vajtswv nyob mus ib txhis li, vim Vajtswv nyob mus ib txhis li. Yexus Khetos tau los kom rub peb tawm ntawm sab cev nqaij daim tawv thiab muab tej uas tsis txawj lwj pauv tej uas txawj lwj. Nws tib leeg xwb muaj hwj chim ua li ntawd, thiab Nws txoj kev xyiv fab yeej yuav kav mus ib txhis.

Yog tias nej xav tias nej xav muaj txoj kev xyiv fab ntxiv zoo li no nyob hauv nej lub neej, kuv caw nej ua raws li Yexus Khetos thiab coj raws li Nws txoj Kev. Yeej yog ib txoj kev uas peb taug tas peb lub neej—thiab ntxiv. Thov cia kuv hais ob peb yam uas peb ua tau kom pib taug txoj kev no thiaj li tau kev xyiv fab.

Nej puas nco qab tus poj niam nyob hauv Phau Tshiab uas muaj mob los ntshav rau 12 xyoos?¹⁸ Txawm yog nws siv tag nrho nws cov nyiaj kho los tsis zoo, nws pheej mob loj zuj zus ntxiv xwb. Nws tau hnov txog Yexus; sawv daws hais txog Yexus lub hwj chim txawj kho mob. Tiam sis Yexus puas txawj kho nws? Thiab yuav ua li cas kom nyob ze Yexus? Nws tus mob ua rau nws “tsis huv” raws li Mauxes txoj kev cai, thiab yog li ntawd nws yuav tsum tsis txhob nyob ze lwm tus.¹⁹

Nws ntshai tias Nws yuav muaj cuab kav mus thov Yexus kho nws tus mob.

Nws xav hais tias, “Yog kuv kov Yexus lub tw tsho, kuv tus mob yuav zoo.”²⁰

Thaum kawg, nws txoj kev ntseeg kov yeej nws txoj kev ntshai. Nws ua siab loj mag lwm tus cem thiab txiv mus lawm tom hauv ntej mus txog tus Cawm Seej.

Ces, nws cia li nyob ze txaus. Nws cev tes.

Thiab nws txawm zoo tag nrho.

Peb txhua tus puas zoo li tus poj niam no me ntsis?

Tej lub sij hawm peb tsis tshua yeem nyob ze tus Cawm Seej. Tej zaum peb yuav raug luag tej thuam los sis rau txim. Vim peb muab hlob, tej zaum peb yuav tsis xav tias ib yam yooj yim npaum li ntawd yuav muaj nqis heev. Tej zaum peb yuav xav tias peb txoj kev mob ua rau peb tsis tsim nyog txais Nws txoj kev kho mob—yuav tsum mus deb dhau los sis peb txoj kev txhaum loj dhau.

Ib yam li tus poj niam no, kuv tau kawm tias yog peb muab siab npuab Vajtswv thiab cev tes kov Nws, ces peb yuav nrhiav tau kev kho mob, kev kaj siab lug, thiab kev xyiv fab.

Yexus tau qhia tias, cia li “nrhiav, nej thiaj yuav ntsib.”²¹

Kuv ntseeg tias cov lus yooj yim no tsis yog kev cog lus xwb; yeej hais qhov tseeb tiag.

Yog peb nrhiav tej yam kom peb npau taws, ua xyem xyav, los sis muaj lub siab iab, ces peb yuav ntsib tej ntawd.

Tiam sis, yog peb nrhiav kev xyiv fab—yog peb nrhiav tej yam uas ua kom peb zoo siab ua raws li tus Cawm Seej qhia, ces peb yuav ntsib tej ntawd.

Tej yam uas peb tsis nrhiav los feem ntau peb tsis ntsib tej ntawd.

Nej puas nrhiav kev xyiv fab?

Cia li nrhiav, nej thiaj yuav ntsib.

Yexus qhia hais tias, “Thaum yus pub rau luag yus tau koob hmoov ntau dua li thaum yus txais.”²³

Puas yog thaum peb nrhiav kev xyiv fab, txoj kev zoo tshaj yog kom ua rau lwm tus zoo siab?

Cov kwv tij thiab cov muam, peb paub qhov no muaj tseeb! Kev xyiv fab yeej zoo li ib lub thoob hmoov nplej los sis lub hub roj uas tsis paub qhuav.²⁴ Kev xyiv fab loj tuaj thaum peb muab rau lwm tus.

Peb tsis tas ua ib yam dab tsi loj los sis nyuaj.

Peb ua tau tej yam yooj yim.

Xws li thov Vajtswv kawg siab kom pab lwm tus.

Qhuas ib tug neeg.

Tos txais los sis saib taus ib tug kom nws paub tias muaj neeg hlub nws.

Qhia ib nqe vaj lug kub thiab lub ntsiab txog nqe ntawd.

Los sis nyob thiab mloog xwb.

“Thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb,”²⁵ thiab Vajtswv yuav foom koob hmoov rau nej kom pauj nej txoj kev ua siab zoo.²⁶ Kev xyiv fab uas nej muab rau lwm tus yuav rov qab los rau nej vim “Vajtswv yuav foom koob hmoov nplua mias rau nej, kom nej muaj nplua mias siv tsis tas.”²⁷

Thaum tej hnub, tej lub lim tiam, thiab tej lub hlis tom ntej, kuv caw nej:

• Siv sij hawm kom mob siab siv zog muab siab npuab Vajtswv.

• Rau siab nrhiav kev cia siab, kev kaj siab, thiab kev xyiv fab txhua hnub.

• Ua kom lwm tus nyob ib puag ncig nej muaj kev xyiv fab.

Kuv cov kwv tij thiab cov muam, cov phooj ywg zoo, thaum nej kawm Vajtswv txoj lus kom to taub zoo dua txog Vajtswv txoj hau kev mus ib txhis li, txais tej lus caw no, thiab siv zog taug Nws txoj Kev, nej yuav muaj “txoj kev kaj siab ntawm Vajtswv, uas tsis muaj leej twg yuav paub li,”²⁹ tsis hais thaum peb raug kev nyuaj siab los yog. Nej yuav hnov Vajtswv txoj kev hlub nplua mias nyob hauv nej lub siab. Txoj kev kaj xilethi-aus yuav ua rau cov duab ntxoov ntxoo ntawm nej tej kev sim siab ploj mus, thiab nej yuav pib pom lub yeeb koob thiab tej txuj ci tseem ceeb ntawm lub ntuj ceeb tsheej uas zoo tag nrho. Nej yuav hnov nej tus ntsuj plig pib nce siab kom txhob raug lub ntiaj teb txoj kev rub nej.

Ces zoo ib yam li Milton Wright, tej zaum nej yuav muaj kev zoo siab qw nrov hais tias, “Mus siab ntxiv, Txiv, mus siab ntxiv!”

Thov kom peb yuav nrhiav tau txoj kev xyiv fab loj dua uas los ntawm kev rau siab ua neej raws li peb Leej Txiv Saum Ntuj Ceeb Tsheej thiab Nws Leej Tub tej lus qhia. Kuv rau siab thov kom muaj li no los ntawm Yexus Khetos lub npe dawb ceev, amees.